Saturday, August 13, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    የኢንዱስትሪ ፓርክ መገንባት ብቻ ውጤት አይሆንም

    ኢትዮጵያን በዓለም አቀፍ ደረጃ በኢንዱስትሪ ቀዳሚ ለማድረግ እየተሠራ ነው፡፡ በተለይ መካከለኛ ኢንዱስትዎችን በማፍራትና በማስፋፋት ከአፍሪካ ግንባር ቀደም እንድትሆን ለማድረግ እንቅስቃሴ መጀመሩ በተደጋጋሚ ተነግሯል፡፡ ተለጥጧል የተባለው የመንግሥት ውጥን በታሰበው ደረጃ ከተራመደ የሚፈለገው ለውጥ ሊመጣ ይችላል፡፡ የወጪ ንግድ ገቢውን በማከም በከፍተኛ ደረጃ ሊያሳድገው እንደሚችል ይጠበቃል፡፡ አገር እንዲህ ባለው ራዕይ ተደግፋ መረማመድ ከቻለች ዕድገት ይኖራል፡፡ ዕድገቷ ይማርካል፡፡

    ትርጉም ያለው ኢኮኖሚያዊ ዕድገት ለማምጣት ከተፈለገ የኢንዱስትሪ ዘርፉን ማሳደግ፣ ለዘርፉ ምቹ መደላድሎችን መፍጠርም ግድ ይሆናል፡፡ የአገርን ኢኮኖሚ ወደ ከፍታው ለማውጣት የአጭር፣ የመካከለኛ የረዥም ጊዜ ውጥኖች ሲቀረጹም ለዕድገት ምቹ የተባሉ አዳዲስ አሠራሮችን በማካተት ተግባራዊ ማድረግ ያስፈልጋል፡፡ ከዚህ አንፃር የዕድገትና ትራንስፎርሜችን ዕቅዱ አንድ ምሳሌ ነው፡፡ የመጀመሪያው የዕድገትና ትራንስፎርሜሽን የዕቅድ ዘመን ተጠናቅቆ ሁለተኛው ተጀምሯል፡፡ በመጀመሪያው የዕቅድ ዘመን በዕቅዱ ልክ መሥራት ባይቻልም ለውጦች መታየታቸው ግልጽ ነው፡፡ በሁለተኛው የዕቅድ ዓመታት የተሻለ አፈጻጸም ይኖራል ተብሎ ይጠበቃል፡፡ ዕቅዱ ከመጀመሪያውም የኢንዱስትሪ ልማትን በማስፋት ላይ ትኩረት ሰጥቶ መራመድ ጀምሯል፡፡ በተለይ የኢንዱስትሪ ፓርኮች ግንባታ ልዩ ትኩረት ተሰጥቶታል፡፡

    በሐዋሳ እንደተገነባውና በእሱዉ አምሳያ ይገነባሉ ተብለው ከሚጠበቁት ግዙፍ የኢንዱስትሪ ፓርኮች በተጨማሪም የግብርና ማቀነባበሪያ የኢንዱስትሪ ፓርኮች ግንባታም ተካቷል፡፡ የሁለተኛው የዕድገትና ትራንስፎርሜሽን ዕቅድ አካል ናቸው፡፡ እነዚህ የኢንዱስትሪ ፓርኮች ረሃብተኛውን የአገሪቱን የወጪ ንግድ ለመመገብ ትልቅ አስተዋጽኦ አላቸው ተብሏል፡፡ ከዚህ አንፃር በየክልሉ የሚገነቡ የኢንዱስትሪ ፓርኮች ከ20 በላይ እንደሚደርሱም ተነግሯል፡፡

    በአጠቃላይ የኢንዱስትሪ ፓርኮቹ ያስገኛሉ ተብሎ የሚታሰበው፣ የሚነገረው ብዙ ነው፡፡ እንደውጥኑ ከተሠራ በእርግጥም የታሰበው ይመጣል፡፡ ከእነዚህ ኢንዱስትሪ ፓርኮች ብቻ ለዓለም ገበያ የሚቀርበው ምርት የሚያስገኘው የውጭ ምንዛሪ እስካሁን አገሪቱ በየዓመቱ ስታገኝ ከነበረው የወጪ ንግድ ገቢ በላይ እንደሚሆን ይጠበቃል፡፡ ከሐዋሳው ኢንዱስትሪ ፓርክ ብቻ በዓመት ከአንድ ቢሊዮን ዶላር በላይ ገቢ ይገኛል መባሉ ጥሩ ምሳሌ ይሆናል፡፡ ሌሎች ኢንዱስትሪ ፓርኮችም ሲገነቡ በርካታ ቢሊዮን ዶላሮችን እንደሚያስገኙ ለተግባራዊነቱ የተሰናዳው የዕቅድ ሰነድ ያመለክታል፡፡ ይህ ዜና የብዙዎችን ትኩረት ከመሳብ አልፎ ለአገሪቱ ኢኮኖሚ ተስፋ መሆኑ አይቀርም፡፡

    - Advertisement -

    እንዲህ አማላይ የሆነው ዕቅድ ዕውን ግቡን ይመታ ይሆን? ለሚለው ጥያቄ ግን አጥጋቢ መልስ ያሻል፡፡ ውጥኑን ከመተግበር አንጻር ምን ያህል አቅም ይኖራል የሚለውም ያሳስባል፡፡ በእርግጥ ውጥኑን ለማሳካት በቂ ዝግጅት ስለመደረጉ ቢነገርም ምን ያህል አስተማማኝ ነው? አስተማማኝ ከሆነስ እንዴት ይከናወናል? ለሚለው ሁሉ ዝርዝር ምላሽ ያሻል፡፡ ለምሳሌ ብዙ የሚጠበቅባቸው የኢንዱስትሪ ፓርኮች ውስጥ እንዲገቡ የሚጠበቁት በአብዛኛው የውጭ ኩባንያዎች ናቸው፡፡ እነዚህ ኩባንያዎች ምቹ ሁኔታዎችን ይፈልጋሉ፡፡ ኢትዮጵያ ውስጥ ኢንቨስት ለማድረግ ሲያስቡም ያለውን የኢንቨስትመንት ድባብ በመገምገም አሃዛዊ መረጃዎች የሚሰጡ ተቋማትን ይመለከታሉ፡፡ እነዚህ ጠቋሚ አሃዞች ብዙ ቢሮክራሲ መኖሩን ያሳያሉ፡፡ በዚህ ምዘና መሠረት ኢትዮጵያ የተቀመጠችበት ደረጃ ዝቅተኛ በመሆኑ ደረጃዋን የሚያሻሽሉ ተግባራዊ ሥራዎች ያሻሉ፡፡ ይህ ካልሆነ ብዚ ኢንቨስተሮችን ለመሳብ ይከብዳል፡፡ ጠቅላይ ሚኒስትሩና ሹማምንቱም ይህንን ይቀበላሉ፡፡ በአራቱ የቢዝነስ እንቅስቃሴ ወይም አንድ ባለሀብት ኩባንያ ከፍቶ ሥራ ለማስጀመር የሚያየውን ውጣ ውረድ (ኤዝ ኦፍ ዱዊንግ ቢዝነስ) የሚጠቁሙ የዓለም ባንክ ዓመታዊ ጠቋሚ አሃዞች መሻሻል እንደነበረባቸው ያምናሉ፡፡ ጠቅላይ ሚኒስትሩ ከ50ዎቹ አገሮች ተርታ ኢትዮጵያ እንደምትገባ ለውጭ ባለሀብቶች ሲገልጹ መደመጥ ጀምረዋል፡፡

    በቅርቡ በተደረገ የውይይት መድረክ የቢሮክራሲው ጉዳይም ተንፀባርቋል፡፡ የታሰበውን ግብ ለማሳካት ቢሮክራሲው ፍጹም የሆነ ለውጥ ያሻዋል፡፡ ከዚህ ባሻገር እነዚህ የኢንዱስትሪ ፓርኮች ውስጥ እነማን ይገባሉ? እነማንስ እየገቡ ነው? የሚለው ትኩረት ይፈልጋል፡፡

    ለምሳሌ የሐዋሳ ኢንዱስትሪ ፓርክ ውስጥ የገቡት 15 የውጭ ኩባንያዎች ብቻ ናቸው፡፡ ስድስት የአገር ውስጥ ታክለውበት 21 ብቻ በአሁኑ ወቅት መግባታቸውን ሰምተናል፡፡ ስለዚህ በቀጣይ የሚገነቡ ኢንዲስትሪ ፓርኮች ውስጥ ሊገቡ የሚችሉ ኩባንያዎችን ከወዲሁ መሰብሰብ ካልተቻለና የአገር ውስጥ ኩባንያዎችም ተሳታፊ ካልሆኑ የኢንዱስትሪ ፓርኮቹን መገንባት ብቻ ውጤት ሊያመጣ አይችልም፡፡ ግንባታቸው ከተጠናቀቀ በኋላ ወደ ፓርኩ የሚገቡ ኢንቨስተሮችን ወደማፈላለጉ ከተኬደ ትርፉ ኪሣራ ይሆናል፡፡

    ስለዚህ ኢንዱስትሪ ፓርኮቹ የሚፈለገውን ውጤት እንዲያመጡ ከተፈለገ የአገር ውስጥ ባለሀብቶችን ከውጭዎቹ በማጣመር መሥራት አንዱ መፍትሔ ሊሆን ይችላል፡፡

    የኢንዱስትሪ ፓርኮች ግንባታና አስተዳደር ለአገሪቱ አዲስ በመሆኑ ብዙ ባለሀብቶችን ለመሳብ አበረታች ሕግጋትም ሊቀረፁ ይገባል፡፡ በአጠቃላይ ቢሮክራሲውን ማሳጠር፣ ምቹ ሁኔታን የመፍጠርና ዕቅዱን በተግባር የመለወጥ አሠራር መኖር አለበት፡፡

    የኢንዱስትሪ ፓርኮች ግንባታ ተፈላጊ ሥራ ነው፡፡ ኢትዮጵያ እንድታድግ ይህ አማራጭ መምጣቱ መልካም ነው፡፡ ነገር ግን የምንገነባቸው ፓርኮች በሙሉ የሚፈለጉትን ያህል ኩባንያዎች ሊገቡበት ስለመቻላቸው እርግጠኛ መሆን ያስፈልጋል፡፡ ከግንባታዎቹ ጎን ለጎን ኩባንያዎቹን የማፈላለጉ ሥራ ሊሠራበት ይገባል፡፡

    እርግጥ ነው የኢንዱስትሪ ፓርኮች ልማት ኮርፖሬሽንን በቦርድ ሰብሳቢነት የሚመሩት የጠቅላይ ሚኒስትሩ ልዩ አማካሪ ዶ/ር አርከበ ዕቁባይ ደጋግመው ይህንን ሐሳብ አንጸባርቀዋል፡፡ በሐዋሳ የከተሙት የአሜሪካ፣ የደቡብ ኮሪያ፣ የህንድ፣ የቻይና፣ የሲሪላንካ፣ የባንግላዴሽና የመሳሰሉት ኩባንያዎች እንዲሁ በዘበት አልመጡም፡፡

    እንደ ዶ/ር አርከበ ገለፃ ኩባንያዎቹን አሳምኖ ለማምጣት ብዙ ተለፍቷል፡፡ ኩባንያዎቹ የመጡትም የሐዋሳ ኢንዱስትሪ ፓርክ ግንባታ ከመካሄዱ ቀድሞ ነው፡፡ የፓርኩ ግንባታም በኩባንያዎቹ የዲዛይን ምርጫ፣ ዓለም አቀፍ ደረጃውን ጠብቆ ነው፡፡ ይህ መሆኑ መልካም፡፡ በሁሉም ፓርኮች ግን ተመሳሳይ ሥራ መሠራቱ ተገቢ ነው፡፡

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት