Saturday, August 13, 2022
ሌሎች ዓምዶች
    - Advertisement -
    - Advertisement -
    ማኅበራዊበሰንዳፋ በአንድ ቢሊዮን ብር በተገነባው ዘመናዊ የደረቅ ቆሻሻ ማጠራቀሚያ መጠቀም ተከለከለ

    በሰንዳፋ በአንድ ቢሊዮን ብር በተገነባው ዘመናዊ የደረቅ ቆሻሻ ማጠራቀሚያ መጠቀም ተከለከለ

    ቀን:

    ‹‹ለጊዜው ሌሎች ማጠራቀሚያዎች እየፈለግን ነው›› የፅዳት አስተዳደር ኤጀንሲ ለደረቅ ቆሻሻ ማጠራቀሚያ ከአንድ ቢሊዮን ብር በላይ ወጪ ተገንብቶ በታኅሳስ ወር 2008 ዓ.ም. አገልግሎት መስጠት ጀምሮ የነበረው ‹‹ሰንዳፋ ሳኒተሪ ላንድ ፊል›› ዘመናዊ የደረቅ ቆሻሻ ማጠራቀሚያ ውስጥ፣ ከአዲስ አበባ ከተማ እየተወሰደ የሚደፋው ቆሻሻ እንዳይወገድ ተከለከለ፡፡ አገልግሎት መስጠት ከጀመረ ሰባት ወራት እንዳስቆጠረ በተገለጸው ዘመናዊ የደረቅ ቆሻሻ ማጠራቀሚያ ውስጥ የአዲስ አበባ ከተማ ቆሻሻ እንዳይጣል የከለከሉት፣ በአካባቢው የሚገኙ አርሶ አደሮች መሆናቸው ተገልጿል፡፡ በአዲስ አበባ ከተማ አስተዳደር የፅዳት አስተዳደር ኤጀንሲ ዋና ዳይሬክተር አቶ ዳዊት አየለ ለሪፖርተር እንደተናገሩት፣ በኦሮሚያ ክልል ከካራ በ40 ኪሎ ሜትር ርቀት ሰንዳፋ በተገነባው ዘመናዊ የደረቅ ቆሻሻ ገንዳ ውስጥ የአዲስ አበባ ደረቅ ቆሻሻ እንዳይጣል የከለከሉት የአካባቢው አርሶ አደሮች ናቸው፡፡ በመሆኑም ከሐምሌ 7 ቀን 2008 ዓ.ም. ጀምሮ የአዲስ አበባ ደረቅ ቆሻሻን ወደዚያ መውሰድ አለመቻሉን አስረድተዋል፡፡ የአዲስ አበባ ከተማ አስተዳደርና የኦሮሚያ ክልል የሚመለከተው የአስተዳደር አካል በጉዳዩ ላይ የተወያዩ ቢሆንም፣ ስምምነት ላይ አለመደረሱን ከዋና ዳይሬክተሩ ለመረዳት ተችሏል፡፡ ላለፉት ሰባት ቀናት የአዲስ አበባ ደረቅ ቆሻሻ ማጠራቀሚያ ገንዳዎች ሞልተው በመፍሰስ ላይ ሲሆኑ፣ የክረምት ወቅት በመሆኑ ምክንያት ከገንዳ ተርፎ የሚፈሰው ቆሻሻ በዝናብ ውኃ እየታጠበ ስለሚፈስ ነዋሪዎች ሥጋት ውስጥ መሆናቸውን እየገለጹ ነው፡፡ በየካቲት 12 ሆስፒታል አካባቢ ነዋሪ የሆኑት አቶ ግርማቸው አሰፋ ለሪፖርተር እንደገለጹት፣ በአካባቢው ያሉት ገንዳዎች በየቀኑ በደረቅ ቆሻሻ ይሞላሉ፡፡ ‹‹በአካባቢው ሆስፒታል ያለ በመሆኑም፣ ደረቅ ቆሻሻ የሚያነሱ ተሽከርካሪዎች ቶሎ ቶሎ እየመጡ ያነሱ ነበር፡፡ በገንዳዎቹ ውስጥ በተለያዩ ምክንያቶች የሞቱ እንስሳት፣ ፈርስና ከፍተኛ መርዝነት ያላቸው ኬሚካሎች ጭምር ስለሚደፉ ገንዳዎቹ ከአንድ ቀን በላይ መቆየት አይችሉም፤›› ብለዋል፡፡ ነገር ግን ላለፉት ስድስት ቀናት ገንዳዎቹ ባለመነሳታቸው በአካባቢው መተላለፍ አለመቻሉን አስረድተዋል፡፡ አቶ ግርማቸው እንደገለጹት ሁሉ በአዲስ አበባ ከተማ በተለያዩ ቦታዎች የተቀመጡ የቆሻሻ ማጠራቀሚያ ገንዳዎች በመሙላታቸው፣ ነዋሪዎች በመጥፎ ሽታ እየተቸገሩ መሆኑን በምሬት እየተናገሩ ነው፡፡ የከተማው ነዋሪዎች እንደሚናገሩት ችግሩ የተፈጠረበት ወቅት ክረምት ከመሆኑ አንፃር ሥጋታቸው የተደራረበ ነው፡፡ የጤና ጥበቃ ሚኒስቴርና የአዲስ አበባ ከተማ አስተዳደር ጤና ቢሮ በየቀኑና በየሰዓቱ ከአጣዳፊ ተቅማጥና ትውከት (አተት) ነዋሪዎች መጠንቀቅ እንዳለባቸው፣ አካባቢያቸውን ማፅዳትና በንፅህና መጠበቅ ግዴታቸው ጭምር መሆኑን እየገለጹ ባለበት ወቅት፣ አስተዳደሩ ያስቀመጣቸው ገንዳዎች አለመነሳታቸው ሥጋታቸውን ከፍ እንዳደረገው እየተናገሩ ነው፡፡ የከተማ አስተዳደሩም ሆነ መንግሥት ቅድሚያ መስጠት ያለባቸው ለሕዝቡ ጤንነት በመሆኑ፣ አፋጣኝ መፍትሔ መፈለግና የተጠራቀሙት ቆሻሻዎች መነሳት እንዳለባቸው አሳስበዋል፡፡ የኤጀንሲው ዳይሬክተር አቶ ዳዊት ስለታሰበው መፍትሔ ተጠይቀው፣ ‹‹ሌሎች አማራጮችን እየፈለግን ነው፡፡ አቃቂ ቃሊቲ አካባቢና ሌሎች አካባቢዎችንም እያየን ነው፤›› ብለዋል፡፡ አርሶ አደሮቹ ለምን እንደከለከሉና ከክልሉ ኃላፊዎች ጋር ስምምነት ላይ ያልተደረሰበትን ምክንያት የተጠየቁት ዋና ዳይሬክተሩ ዝምታን መርጠዋል፡፡ ከአዲስ አበባ ከተማ በቀን 2,400 ቶን ወይም 8,050 ሜትር ኪዩብ ቆሻሻ ወደ ማጠራቀሚያ ገንዳ ይወሰድ እንደነበር ለማወቅ ተችሏል፡፡

    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    የታላቁ የኢትዮጵያ ህዳሴ ግድብ ሁለተኛው ተርባይን ኃይል ማመንጨት ጀመረ

    ሦስተኛ ዙር ሙሌት በዛሬው ዕለት እንደሚጠናቀቅ ይጠበቃል የታላቁ የኢትዮጵያ ህዳሴ...

    የክላስተር አደረጃጀት ፖለቲካዊ ውዝግብ

    መንግሥት የደቡብ ብሔር ብሔረሰቦችና ሕዝቦች ክልል ይባል የነበረውን አደረጃጀት...

    በወለድ ነፃ የባንክ አገልግሎት የተሰበሰበው ከፍተኛ ሀብት ጥቅም ላይ እየዋለ አይደለም ተባለ

    በኢትዮጵያ ከወለድ ነፃ የባንክ አገልግሎት የተሰበሰበው የተቀማጭ ገንዘብ መጠን...