Monday, August 8, 2022
ሌሎች ዓምዶች
    - Advertisment -
    - Advertisment -

    ሕዝብ የምርጫው ባለቤት ይሁን!

    እሑድ ግንቦት 16 ቀን 2007 ዓ.ም. በብሔራዊ ምርጫ ቦርድ ውሳኔ መሠረት የምርጫ ቀን ነው፡፡ በዚህ ቀን ከ36.8 ሚሊዮን በላይ የምርጫ ተመዝጋቢዎች በመላ አገሪቱ በ46,000 የምርጫ ጣቢያዎች ድምፃቸውን እንደሚሰጡ ይጠበቃል፡፡ በሌላ በኩል ተወካዮቹን ለመምረጥ ወደ ምርጫ ጣቢያዎች የሚተመው ሕዝብ በነፃነት እንዲመርጥ፣ የምርጫውን ቀንም የዴሞክራሲ ዕለት አድርጎ በልበ ሙሉነት እንዲጠቀምበት የማመቻቸት ኃላፊነት የመንግሥት፣ የፖለቲካ ፓርቲዎችና የሚመለከታቸው ባለድርሻ አካላት በሙሉ ኃላፊነት ነው፡፡ ምርጫው ሕዝቡ በድምፁ የሚፈልገውን የሚሾምበት፣ ለማይፈልገው መልዕክት የሚያስተላልፍበት፣ የአገሩን ዕጣ ፈንታ የሚወስንበትና ነፃነቱን ጭምር በተግባር የሚያረጋግጥበት እንዲሆን ማድረግ የግድ ነው፡፡

    መምረጥም ሆነ መመረጥ ሁለንተናዊ መብት ነው፡፡ ምርጫ ደግሞ በራሱ የዴሞክራሲ ሥርዓት ግንባታ የመጨረሻ ግብ ባይሆንም፣ የዴሞክራሲ አንዱ የማዕዘን ድንጋይ ነው፡፡ ሕዝቡ ወደ ምርጫ ጣቢያዎች ሲሄድ ከፊት ለፊቱም ሆነ ከጀርባው የሚያስፈራራው፣ የሚያሸማቅቀው፣ ከመምረጥ መብቱ የሚገታውና ነፃነቱን የሚጋፋው ምንም ዓይነት መሰናክል ሊያጋጥመው አይገባም፡፡ አገሩን የሚገነባና በጠላት እንዳትደፈር የሚከላከል፣ ለአገሩ ሁለንተናዊ ዕድገት ቀናዒነት ያለው ሕዝብ ‘በገዛ አገሬ’ ብሎ መኩራት ያለበት በእንዲህ ዓይነቱ አጋጣሚ ነው፡፡ ሕዝቡ በነፃነት መምረጥ አለበት ሲባል በምርጫው ተዋናይ የሆኑ ኃይሎች በሙሉ ይህንን ግንዛቤ መያዝ አለባቸው፡፡ አላስፈላጊ ከሆኑ ሕገወጥ ተግባራት መቆጠብ ይኖርባቸዋል፡፡

    የሰላማዊ የፖለቲካ ትግል ትሩፋት የሆነው ምርጫ ሰላማዊ፣ ዴሞክራሲያዊ፣ ነፃ፣ ፍትሐዊና ተዓማኒነት እንዲኖረው ሲፈለግ የሕዝቡ የመምረጥ ነፃነት ያለምንም ገደብ መከበር አለበት፡፡ በነፃነት ድምፁን የሚሰጥ ሕዝብ የሚበጀውን ጠንቅቆ ስለሚያውቅ በውሳኔው ላይ ማንም ተፅዕኖ ለማሳደር መነሳት የለበትም፡፡ ውሳኔውንም በፀጋ መቀበል የዴሞክራቶች መለያ ነው፡፡ ሕዝብ ‘በገዛ አገሬ ነፃነት አለኝ’ ብሎ አንገቱን ቀና አድርጎ መጓዝ የሚችለው በመጀመሪያ የሕግ የበላይነትን በመተማመን ነው፡፡ ቀጥሎም በምርጫው ውስጥ የሚሳተፉ ሁሉም የፖለቲካ ኃይሎች በሕግ ይገዛሉ ብሎ ስለሚገነዘብ ነው፡፡ ሕዝብ የፈለግኩትን መርጬ እሾማለሁ ሲል ሕግ ይከበር እያለ መሆኑ ሊታወቅ ይገባል፡፡

    ሰላማዊና ዴሞክራሲያዊ የድምፅ አሰጣጥ ሥርዓት ሲኖር፣ ምርጫው የተሳካና ሁሉንም ወገኖች የሚያግባባ ይሆናል፡፡ ውጤቱም በሕዝብ ፍላጎት ላይ የተመሠረተ ሆኖ ይፋ ሲደረግም ምርጫው በዘመናዊው ዓለም ውስጥ ተቀባይነት ያለውና ደረጃውን የጠበቀ መሆኑ ይረጋገጣል፡፡ በድምፅ አሰጣጡም ሆነ በውጤቱ አገላለጽ ላይ ቅሬታዎች ሲኖሩም በሕጋዊ መንገድ መፍትሔ መፈለግም የምርጫውን ተዓማኒነት ይጨምራል፡፡ ሕዝብ በድምፁ የሰጠውን ትክክለኛ ውሳኔ አልቀበልም በማለት ሕገወጥ መሆን ደግሞ እንጭጩን ዴሞክራሲ ይቀለብሰዋል፡፡ ሥርዓተ አልበኝነት እንዲፈጠርም መንገዱን ያመቻቻል፡፡ የመራጩን ሕዝብ ፍላጎት የሚያሟላና ከፀረ ዴሞክራሲያዊ ተግባራት የፀዳ ምርጫ ግን የሕዝብ ዳኝነት ውጤት ይንፀባረቅበታል፡፡

    ተወደደም ተጠላም በአሁኗ ኢትዮጵያ የሥልጣን ሽግግር የሚደረገው በሕዝብ ድምፅ ብቻ ነው፡፡ ሰላማዊ የፖለቲካ ትግሉ የፈለገውን ያህል ችግር ቢያጋጥመው፣ የፖለቲካ ፓርቲዎች አቅም ያለመመጣጠን ቢኖር፣ የፖለቲካ ምኅዳሩ እንደሚፈለገው አልሆን ቢል፣ ለአመለካከት ልዩነቶች የሚሰጠው ትኩረት አናሳ ቢሆን፣ በአጠቃላይ የዴሞክራሲው ባህል ብዙ ቢቀረው ከኃይልና ከጉልበት ተግባራት ይልቅ ሥልጣንን ወቅቱን ጠብቆ በሚመጣ ምርጫ ለማግኘት የሚደረገው እንቅስቃሴ መጎልበት አለበት፡፡ በሰላማዊና በሕጋዊ የፖለቲካ ትግል ሕዝብን ከጎን አሠልፎ በሠለጠነ መንገድ ሥልጣን ማግኘት፣ በአምባገነናዊ መንገድ ሥልጣን ለመንጠቅ ከሚደረግ ኋላቀር አስተሳሰብ በእጅጉ የተለየ ነው፡፡ ለዚህም ነው ሰላማዊና ዴሞክራሲያዊ ምርጫ መሠረት እንዲይዝ ልፋት በተደረገ መጠን ውጤቱ አስደሳች የሚሆነው፡፡ ሕዝቡ ከዴሞክራሲ ጋር እንዲለማመድ በማድረግ የመብቱና የነፃነቱ ባለቤት እንዲሆን መታገል የሁሉም የፖለቲካ ኃይሎች ሥራ ቢሆንም፣ ሕዝብ ግን ወሳኙ ዳኛ መሆኑን መቼም ቢሆን መርሳት አያስፈልግም፡፡

    አሁንም ተደጋግሞ መወሳት ያለበት ይኼ ምርጫ ከምንም ዓይነት ተፅዕኖዎች ነፃ መሆን እንዳለበት ነው፡፡ በሚሊዮኖች የሚቆጠሩ የአገሪቱ ዜጎች ድምፃቸው ዋጋ አግኝቶ ሰላማዊትና የተረጋጋች አገር እንድትኖር፣ ሁሉም የፖለቲካ ኃይሎች በኃላፊነት ሊንቀሳቀሱ ይገባል፡፡ ጊዜያዊ የፖለቲካ ጥቅምን ብቻ በማስቀደም በሕዝብ ውሳኔ ላይ ለማላገጥ መሞከር ለማንም አይበጅም፡፡ ሕዝቡ የሚመካው በሕግ የበላይነት ላይ በመሆኑ ሁሉም ወገኖች ሕግ ያክብሩ፡፡ ከሕገወጥነት ራሳቸውን ያቅቡ፡፡ በድምፅ አሰጣጥ፣ ቆጠራና ውጤት ገለጻ ወቅት ደግመው ደጋግመው ማሰብ ያለባቸው የራሳቸውን ትርፍና ኪሳራ ሳይሆን፣ ዘለቄታዊውን የአገርና የሕዝብ ጥቅም ብቻ ነው፡፡ ይህ ሚሊዮኖች ተስፋ የሚያደርጉበት ምርጫ ሕጋዊነትና ሕገወጥነት ከተደበላለቁበት አገርን መሳቂያ ያደርጋል፡፡ ሕዝቡንም አንገት ያስደፋል፡፡ ስለዚህ ከፍተኛ ጥንቃቄ ያስፈልጋል፡፡

    ሕዝቡ በሰላም ድምፁን ከሰጠ በኋላ በሕጉ መሠረት ቆጠራው ተከናውኖ ውጤት እስኪገለጽ ድረስ፣ ሁሉም የፖለቲካ ፓርቲዎች አደብ መግዛት አለባቸው፡፡ በሕግ ሥልጣን ከተሰጠው የምርጫው አስፈጻሚ አካል ብሔራዊ የምርጫ ቦርድ በስተቀር፣ ማንኛውም ወገን የምርጫ ውጤቱን በተመለከተ መግለጫ መስጠት አይችልም፡፡ ቦርዱም በተቻለ ፍጥነት ጊዜያዊውን ውጤት የማስታወቅ ኃላፊነት ያለበት ሲሆን፣ ውጤቱም ሆነ የአገላለጽ ዘዴው ግልጽና የማያሻማ እንዲሆን ይጠበቃል፡፡ የመንግሥትም ሆነ የግል ሚዲያዎች ውጤት ተንባይና ይፋ አድራጊ ከመሆን ራሳቸውን ማቀብ ይኖርባቸዋል፡፡ የፀጥታ ኃይሎችና የፍትሕ አካላት ማናቸውንም ዓይነት ቅሬታዎችም ሆኑ ጭቅጭቆች ሲነሱ በሕጋዊ መንገድ ማስተናገድ አለባቸው፡፡ ብሔራዊ ምርጫ ቦርድ በገለልተኝነት የሕዝቡን ድምፅ ከማሳወቅ ባለፈ፣ ለሚነሱ ቅሬታዎችና አቤቱታዎች ግልጽነት የተላበሰ ውሳኔ መስጠት አለበት፡፡ ሒደቶች በዚህ መንገድ ሲከናወኑ የሕዝብ ውሳኔ ተከበረ ይባላል፡፡ ለአገርም ጠቃሚ ነው፡፡

    ሰላማዊውን የፖለቲካ ትግል በማንኳሰስ ከምርጫው ምንም አይገኝም ብለው የወሰኑ ኃይሎችም፣ የሕዝቡን ተስፋ ከማጣጣል ቢቆጠቡ ጥሩ ነው፡፡ በዚህ ዘመን ሰላማዊ የፖለቲካ ትግሉ የፈለገውን ያህል እየወደቀና እየተነሳ ቢድህም፣ በጉልበት ወይም እንደሚደሰኮረው በትጥቅ ትግል ሥልጣን ማግኘት ቀርቷል፡፡ አመቺ ሁኔታ የለም፡፡ አለ ቢባልም በተግባር የመከነ መሆኑ ተረጋግጧል፡፡ ምርጫና ፓርላማ የሌለበትን ኦና አገር ለዚህ የመከነ ጉዳይ ተስፋ ከማድረግ ይልቅ፣ በአስቸጋሪው የፖለቲካ ምኅዳር ውስጥም ቢሆን ሕዝብን ከጎን አሠልፎ በሰላማዊ ትግል ለምርጫ መወዳደር ይዋል ይደር እንጂ ውጤቱ አመርቂ ነው፡፡ “የትም ፍጪው ዱቄቱን አምጪው” የሚለውን ዘመን ያለፈበትን ከንቱ ነገር ንቀው፣ በሰላማዊ የፖለቲካ ትግሉ የቻሉትን ሁሉ እያደረጉ ያሉትን ማመስገንና ለዴሞክራሲያዊ ሥርዓት ግንባታ የሚያደርጉትን መፍጨርጨር ማወደስ ይጠቅማል፡፡ ሕዝቡም ለምርጫ የሚወጣው ይኼንን ታሳቢ አድርጎ ነው፡፡ ተስፋ መቁረጥና ተስፋ ማስቆረጥ የሰነፎች ተግባር ነው፡፡

    ሚሊዮኖች በድምፃቸው የሚፈልጉትን ለመምረጥ ሲወጡ፣ ሁሉም ወገኖች ድጋፍ ማድረግ ያለባቸው ምርጫው በሰላም ተጀምሮ በሰላም እንዲጠናቀቅ ነው፡፡ በተጨማሪም ዴሞክራሲያዊነቱና ተዓማኒነቱ አጠራጣሪ እንዳይሆን ነው፡፡ ይህ አገሩን ከራሱ በላይ አስበልጦ የሚወድ ሕዝብ ለነገው ትውልድ መሠረት ሲጥል፣ የሚፈልገው አጋዥና ደጋፊ እንጂ አደናቃፊ መሆን የለበትም፡፡ በአገሩ በነፃነት አንገቱን ቀና አድርጎ የሚሄድ ዴሞክራት ትውልድ እንዲኖር ሲፈለግ ሕዝቡ በነፃነት ወኪሎቹን እንዲመርጥ መትጋት ያስፈልጋል፡፡ በሕግ የበላይነት ማመን የግድ ይላል፡፡ ከኃይልና ከጉልበት ይልቅ ዴሞክራሲ እንደሚበልጥ ማሳየት ያስፈልጋል፡፡ ከአሻጥርና ከሸፍጥ ይልቅ ግልጽነት ጠቃሚ መሆኑን በተግባር ማረጋገጥ ተፈላጊ ነው፡፡ አመፅና ብጥብጥ ሳይሆን፣ ዴሞክራሲና ሕጋዊነት ይቅደም፡፡ ሕዝብ የአገሪቱ ሥልጣን ሉዓላዊነት ባለቤት መሆኑ ይረጋገጥ፡፡ ውሳኔው ይከበር፡፡ ሰላም ይስፈን፡፡ ዴሞክራሲ ያብብ፡፡ አመፅና ሁከት ሕገወጥ ስለሆኑ ይወገዱ፡፡ ምርጫው የሕዝብ የዴሞክራሲ ቀን ይሁን፡፡ ሕዝብም የምርጫው ባለቤት ይሁን!      

    በብዛት የተነበቡ ፅሁፎች

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    የዩኒቨርሲቲ መምህራን ከደመወዝ ጭማሪና ከዕርከን ዕድገት ጋር በተያያዘ መንግሥትን አስጠነቀቁ

    ‹‹የደመወዝ ጉዳይ የትምህርት ሚኒስቴር ብቻ ሳይሆን የሲቪል ሰርቪስ ኮሚሽንም...
    - Advertisment -

    ትኩስ ፅሁፎች

    የአገሪቱ ባንኮች ካፒታል 199.1 ቢሊዮን ብር ደረሰ

    ከታክስ በኋላ 50 ቢሊዮን ብር ማትረፋቸውን ብሔራዊ ባንክ አስታወቀ የአገሪቱ...

    በዓለም ጂኦ ፖለቲካ መድረክ የኢትዮጵያ ተፈላጊነት

    የአሜሪካው የውጭ ጉዳይ ሚኒስትር አንቶኒ ብሊንከን በሦስት የአፍሪካ አገሮች...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...
    spot_img

    ተዛማጅ ፅሁፎች

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር ሕዝቦችና ለአፍሪካውያን ነፃነትም ተምሳሌት ናት፡፡ የጥንቶቹ ኢትዮጵያውያን አገራቸውን የሚያኮራ ተግባር ፈጽመው ያለፉት፣ ከአገራቸው በፊት የሚቀድም...

    የማንም ሥልጣንና ጥቅም ከኢትዮጵያ አይበልጥም!

    የታላቁ ህዳሴ ግድብ ሦስተኛ ዙር የውኃ ሙሌት በስኬት መጠናቀቁ፣ የኢትዮጵያን የወደፊት ብሩህ ጊዜ አመላካች ነው ቢባል ማጋነን አይሆንም፡፡ ይህ የአፍሪካ ታላቅ ግድብ ፕሮጀክት ዕውን...

    የሴራ ፖለቲካ መረብ ይበጣጠስ!

    ኢትዮጵያ አሁንም ከበርካታ ፈተናዎች ጋር እንደ ተፋጠጠች ነው ያለችው፡፡ በታላቁ የህዳሴ ግድብ ምክንያት ግብፅ በጎረቤት አገሮች አማካይነት ኢትዮጵያ ላይ ጫና ለማሳደር ፍጥነቷን ጨምራ እየተንቀሳቀሰች...