Sunday, August 14, 2022
ሌሎች ዓምዶች
    - Advertisment -
    - Advertisment -

    ከምርጫ 2007 ምን ዓይነት ትምህርት ተገኘ?

    ሰኔ 15 ቀን 2007 ዓ.ም. የምርጫው ይፋ ውጤት ተገልጾ፣ የምርጫ 2007 ፋይል ተዘግቷል፡፡ በብሔራዊ ምርጫ ቦርድ የጊዜ ሰሌዳ መሠረት ኅዳር 15 ቀን 2007 ዓ.ም. የተጀመረው የምርጫ ሒደት ተጠናቋል፡፡ በይፋ ውጤቱ መሠረት ኢሕአዴግና አጋሮቹ የሕዝብ ተወካዮች ምክር ቤቶችና የክልል ምክር ቤቶችን መቀመጫዎች ሙሉ በሙሉ ተቆጣጥረዋል፡፡ የተቃዋሚ ፖለቲካ ፓርቲዎችም ሆኑ የግል ተወዳዳሪዎች ለአንድ የምክር ቤት መቀመጫ እንዳልታደሉ የምርጫ ቦርድ ውጤት አረጋግጧል፡፡ አሁን የቀረው ምን ዓይነት ትምህርት ተገኝቷል የሚለው ነው፡፡

    በዘንድሮ ምርጫ ተቃዋሚ የፖለቲካ ፓርቲዎች ከሌላው ጊዜ በተለየ የተሻለ ድምፅ በማግኘት ለፓርላማ ይበቃሉ የሚል ግምት ቢኖርም፣ እስካሁን ከነበሩት አራት ምርጫዎች ያልተሻለ ደካማ ውጤት አግኝተዋል፡፡ አንድ የፓርላማ መቀመጫ ማግኘት አልቻሉም፡፡ ለዚህ ደካማ ውጤት በርካታ ምክንያቶች ቢኖሩም፣ ለጊዜው ይኼ አጀንዳችን አይደለም፡፡ ምክንያቱም ብዙ ተብሎበታልና፡፡ አሁን ዋናው ጥያቄ ምን ዓይነት ትምህርት ተገኘ ነው፡፡ አንዳንድ ጠቃሚ ሐሳቦችን እናንሳ፡፡

    1. የገዥው ፓርቲና የተቃዋሚዎች ግንኙነት ይሻሻል

    በአገራችን ምርጫ በመጣና በሄደ ቁጥር በገዥው ፓርቲና በተቃዋሚ ፓርቲዎች መካከል ስምምነት ኖሮ አያውቅም፡፡ ሁሌም ወቀሳዎችና ውግዘቶች ናቸው የሚደመጡት፡፡ ምክንያት ሲባል ደግሞ ወትሮም ዴሞክራሲያዊና ጤናማ ግንኙነት ስለሌለ ምርጫ የውዝግቦች የመጨረሻ ማሳያ ይሆናል፡፡ ገዥው ፓርቲ በተቃዋሚዎች ዘንድ አፋኝና አምባገነን ተደርጎ ከመፈረጁም በላይ፣ በኢትዮጵያ ምድር ዴሞክራሲ እንዳይሰፍን ዋነኛው እንቅፋት ተደርጐ ይቆጠራል፡፡ ከዚያም አልፎ ተርፎ ለአገር ደንታ የሌለውና ለሥልጣን ብቻ ያሰፈሰፈ ኃይል ነው ይባላል፡፡ በተቃራኒው ገዥው ፓርቲ ተቃዋሚ ፓርቲዎችን ለአገር የማይጠቅሙ፣ ጥላቻን የሚዘሩ፣ ራዕይ አልባና የጠላት ተላላኪ (በተለይ የተወሰኑትን) አድርጎ ከመፈረጁም በላይ፣ ለኢትዮጵያ ሕዝብ ፋይዳ የሌላቸውና ቢኖሩም ባይኖሩም ዋጋ ቢስ ናቸው ይላል፡፡ በእንዲህ ዓይነት ጽንፍ የረገጡ አቋሞች ምክንያት ግንኙነቶች ተበላሽተዋል፡፡ ለፖለቲካው ምኅዳር መጣበብ የራሳቸውን አሉታዊ አስተዋጽኦ አበርክተዋል፡፡

    ለዴሞክራሲያዊ ሥርዓት ግንባታ ተሠልፈናል የሚሉ የተደራጁ ኃይሎች አንዱ ለሌላኛው ዕውቅና ካልሰጡ እንዴት ነው ስለዴሞክራሲ መነጋገር የሚቻለው? አንዱ ለሌላኛው የአጥፊነት ባህርይ እያሳየ እንዴት ተደርጎ ነው ስለሰብዓዊ መብት መከበር መታገል የሚቻለው? አንዱ በሌላው ላይ የደኅንነት ሥጋት እየሆነ እንዴት ሥልጡን ውይይትና ድርድር ይኖራል? ላለፉት 24 ዓመታት በአገሪቱ ፖለቲካ ውስጥ የሚታየው ጽንፍ የያዘ የከረረ አቋም ካልረገበ በስተቀር፣ ለዴሞክራሲ የሚደረገው ጉዞ ዋጋ አልባ ይሆናል፡፡ ፖለቲካው ውስጥ ሐሜት፣ አሽሙር፣ አቃቂር፣ ሸፍጥ፣ ጥላቻና የመሳሰሉት ኢዴሞክራሲያዊ መንፈሶች እንዲወገዱ ካልተደረገ ችግሩ ተባብሶ ይቀጥላል፡፡

    ሕዝብ የሥልጣን ምንጭ ነው ሲባል ነፃነቱ ሊከበር ይገባል፡፡ ይህ ኃላፊነት ደግሞ ሥልጣን ላይ ያለው ገዥ ፓርቲ ብቻ ሳይሆን የሁሉም ፖለቲካ ኃይሎች ነው፡፡ የፖለቲካ ፓርቲዎች በውስጠ ዴሞክራሲ ራሳቸውን አላስፈላጊ ካልሆኑ ተግባራት ሳያፀዱ ሕዝብ ፊት ሲቀርቡ ይዋረዳሉ፡፡ ፕሮግራማቸውና ዓላማቸው ከተግባራቸው ጋር መገናኘት አቅቶት ገመናቸው አደባባይ ሲወጣ ከመኖራቸው ይልቅ አለመኖራቸው ይመረጣል፡፡ ራሱን በዴሞክራሲ ያላነፀ የፖለቲካ ድርጅት ኖረም አልኖረም ፋይዳው ያን ያህል ነው፡፡ ይልቁንም የሕዝብን ልብና መንፈስ ማግኘት ያለበት የፖለቲካ ፓርቲ መትጋት ያለበት ለጊዜያዊና ለስሜታዊ ነገሮች ሳይሆን፣ ለዘለቄታው የሕዝብን መብትና ጥቅሞች ማረጋገጥ መቻሉ ላይ ነው፡፡ አሁን በአገራችን ይኼ እየታየ ነው? በፍፁም፡፡ ‹‹ከማያውቁት መልዓክ የሚያውቁት ሰይጣን›› ይሻላል የሚለው የተለምዶ ብሂል ገፍቶ ነው የሚታየው፡፡ የገዥው ፓርቲና የተቃዋሚ ፓርቲዎች ለዓመታት የዘለቀው በጥላቻና በክፋት የታጀበ ግንኙነት መፍትሔ ሊደረግለት ይገባል፡፡ መፍትሔው ደግሞ ግንኙነቱን ለማሻሻል በሁለቱም በኩል ቁርጠኝነት መታየት አለበት፡፡ የአገር ጉዳይን ማስቀደም የመፍትሔው ዋነኛ አካል ይደረግ፡፡

    1. የፖለቲካ ፓርቲዎች መብዛት ጥቅም የለውም

    ኅብረ ብሔራዊም ሆነ ብሔር ተኮር የፖለቲካ ፓርቲዎች መኖር ለአገር ጠቃሚ ነው፡፡ ነገር ግን አሁን እየታየ ባለው ሁኔታ ግን ለዴሞክራሲያዊ ሥርዓቱ ግንባታ ጠቃሚ የሚሆነው የፖለቲካ ፓርቲዎችን ቁጥር መቀነስ ነው፡፡ በዘንድሮ ምርጫ 58 የፖለቲካ ፓርቲዎች በመወዳደራቸው የመደራጀት መብትን ከማሳየት የዘለለ ምንም ፋይዳ የለውም፡፡ ይልቁንም ቢጤ ለቢጤው እንደየ ርዕዮተ ዓለሙ ወይም ስትራቴጂካዊ ግቡ ተቧድኖ ውል ያለው ሥራ መሥራት ካልተቻለ፣ በምርጫ ጊዜ ግር እያሉ ምኅዳሩን ማጣበብ ከጥቅሙ ይልቅ ጉዳት አለው፡፡ መራጮች ከውዥንብር ፀድተው በተረጋጋ ሁኔታ አማራጮችን የሚያዩት፣ ጠንካራና የደረጀ አማራጭ ይዘው የሚቀርቡ ፓርቲዎች ሲኖሩ ብቻ ነው፡፡

    አሁን በስም የገዘፉ ‹ቢከፍቱት ተልባ› ዓይነት የፖለቲካ ፓርቲዎች ሳይቀሩ ደካማ መሆናቸው ተረጋግጧል፡፡ ብዙዎቹ በሚመሯቸው ግለሰቦችና በተወሰኑ አባላቶቻቸው ተክለ ሰውነት የተሸፈኑ በመሆናቸው፣ ከደጅ ሲታዩ ጠንካራና ብርቱ ቢመስሉም ብዙ ይቀራቸዋል፡፡ ጠንከር ያሉ ጫናዎችን ለመቋቋም ቀርቶ በአነስተኛ ንፋስ እንደሚወዛወዝ ሰንበሌጥ እየተቆጠሩ ነው፡፡ በግለሰቦች መልካም ፈቃድ ብቻ እየተመሩ ዴሞክራሲን ስላልተለማመዱ፣ ለውይይትና ለድርድር ጊዜ ከመስጠት ይልቅ ተቃውሞን ያበረታታሉ፡፡ የአኩራፊዎችና የፅንፍ ፖለቲካ አራማጆች መሰባሰቢያ በመሆናቸው በሰጥቶ መቀበል መርህ ለድርድርና ለውይይት ቅርብ አይደሉም፡፡ መግለጫዎቻቸው በሙሉ ሲታዩ በአመዛኙ በውግዘትና በስድብ የተሞሉ ናቸው፡፡ የፈለገውን ያህል ችግሮች ቢኖሩ እንኳ ጥበብና ብልኃት ይጐድላቸዋል፡፡ በዚህም ምክንያት በርካታ ኪሳራዎች አጋጥመዋል፡፡ የፖለቲካ ፓርቲዎች በበዙ ቁጥር ሀብት፣ የሰው ኃይል፣ ዕውቀት፣ ልምድ፣ ጠቃሚ ሐሳቦችና የመሳሰሉት ስለሚበታተኑ ጠንክሮ መውጣት አዳጋች ሆኗል፡፡ መፍትሔው ቁጥር ሳይሆን ጥራት በመሆኑ ቢጤ ለቢጤው ይሰባሰብ፡፡ በተሻለ አቀራረብ የፖለቲካ ገጽታው ይለወጥ፡፡ ጥላቻና ጽንፈኝነት ምንም አይፈይዱም፡፡ ለአገርም አይጠቅሙም፡፡

    1. ከገዥው ፓርቲ ምን ይጠበቃል?

    ኢሕአዴግና አጋሮቹ የዘንድሮን ጠቅላላ ምርጫ ሙሉ በሙሉ በማሸነፍ ፓርላማውን ተቆጣጥረውታል፡፡ ይኼ ውጤት እንደ አገር ማንን ይጠቅማል? ተብሎ ሲጠየቅ አሁንም ሁለቱንም ጎራዎች አያስማማም፡፡ ኢሕአዴግ ‹ሕዝብ የሰጠኝ ድምፅ ስለሆነ መከበር አለበት› ሲል የተቃውሞ ጎራው ደግሞ፣ ‹ምኅዳሩን አጣበህ ያገኘኸው ስለሆነ ተቀባይነት የለውም› ይላል፡፡ በተለመደው ሁኔታ ውዝግቡ ይቀጥል አይቀጥል ለጊዜው የሚታወቅ ነገር ባይኖርም፣ ኢሕአዴግ ትልቅ ኃላፊነት አለበት፡፡ በመጀመሪያ በሕገ መንግሥቱ የሠፈሩት ዴሞክራሲያዊና ሰብዓዊ መብቶች ይከበሩ፡፡ ዘወትር በተቃዋሚ የፖለቲካ ፓርቲዎች አቤቱታ የሚቀርብበት የፖለቲካ ምኅዳር መጣበብ ጉዳይ በአንክሮ ይታሰብበት፡፡ የፈረጠመው ኢሕአዴግና የኮሰመኑ ተቃዋሚዎች የሚወዳደሩበት ምኅዳር ለአገር አይጠቅምም፡፡

    ለተለዩ አመለካከቶችና ሐሳቦች በሮች ክፍት ይሁኑ፡፡ ሕዝብ በሕግ የበላይነት ተማምኖ የሚፈልገውን እንዲደግፍ፣ የማይፈልገውን እንዲቃወም ነፃነቱ ይከበር፡፡ ከተቃዋሚ የፖለቲካ ፓርቲዎች ጋር ተቀራርቦ ለመሥራት በተግባር ቁርጠኝነቱን ያሳይ፡፡ ለአገር የማይጠቅሙ ብሎ ማጣጣልና በጠላትነት መፈረጅ ከጥቅሙ ይልቅ ጉዳቱ ስለሚያመዝን ለአገር ጥቅም ሲል ያስብበት፡፡ ሰላማዊ የፖለቲካ ትግሉ እየሳሳ በሄደ ቁጥር አላስፈላጊ ውጥረቶችና ግጭቶች ይቀሰቀሳሉ፡፡ ብሶት እዚህም እዚያም በተሰማ ቁጥር ለሰላምና ለመረጋጋት እንቅፋት ነው፡፡ ይኼ በብርቱ ሊታሰብበት ይገባል፡፡

    ሕዝብን የሚያስመርሩ አላስፈላጊ ተግባራት በስፋት ይታያሉ፡፡ አንዱ ሙስና ሲሆን ሌላው ፀረ ዴሞክራሲ ተግባራት ናቸው፡፡ ጉቦ ካልተሰጣቸው ወይም መማለጃ ካላገኙ ሥራ መሥራት የተሳናቸው በርካቶች እየተፈጠሩ ነው፡፡ ግብር ከፋዩን ሕዝብ እያስመረሩ ነው፡፡ በመንግሥት ግዥና ጨረታ ዓይን ያወጡ ሌብነቶች በብዛት አሉ፡፡ በቀናት ውስጥ ከድህነት ወደ ሚሊየነርነት የሚለወጡ ዘመነኞች እየበዙ ነው፡፡ ይኼ ከንቱ ድርጊት በግብር ከፋዩ ሕዝብ ላይ ጫና እየፈጠረ ነው፡፡ የሕግ የበላይነትን እየተጋፉ ሕገወጥነትን የሚያሰፍኑ አደብ እንዲገዙ ይደረግ፡፡ ሥነ ምግባር የጎደላቸውን ሹማምንት ከአንድ ቦታ ወደ ሌላ ቦታ በመቀያየር በሕዝብ ላይ መቀለድ ይቁም፡፡ ለአገር ደንታ የሌላቸው በበረከቱ ቁጥር የሕግ አቅም እየኮሰመነ ሕገወጥነት ይንሰራፋል፡፡ ልብ ያለው ልብ ይበል፡፡

    ምርጫ 2007 ተጠናቆ ለመጪው ምርጫ ዝግጅት የሚጀመረው አሁን ነው፡፡ ተወደደም ተጠላም፣ አረረም መረረም ሒደቱ ይቀጥላል፡፡ ሒደቱ በተሻለ ሁኔታ ይቀጥል ዘንድ ደግሞ የሁሉንም ወገኖች ጥረት ይጠይቃል፡፡ አሸናፊው በድሉ እየተኩራራ፣ ተሸናፊው በሽንፈቱ እየቆዘመ በተለመደው ጐዳና ላይ ለመጓጓዝ መሞከር ማብቃት አለበት፡፡ ከዚህ ይልቅ ለመጪው ጊዜ ምን መደረግ ይኖርበታል ማለት ብልህነት ነው፡፡ በርካታ ነገሮች በብልኃት ወይም በብልጠት አለመኖር ምክንያት ተበላሽተዋል፡፡ ስህተትን በስህተት ለማረም የተሞከሩ ሙከራዎች መክነዋል፡፡ የትናንት ስህተቶች ዛሬ መታረም ሲገባቸው ለነገ የሚተላለፉ ከሆነ አገርን ይጎዳሉ፡፡ ስለዚህ አሁን ምን ይደረግ ብሎ እንደ አገር መምከር ብልህነት ነው፡፡ ከምርጫ 2007 ምን ዓይነት ትምህርት ተገኘ ተብሎ መገምገም አለበት!                   

    በብዛት የተነበቡ ፅሁፎች

    ሰርጌ ላቭሮቭ ለዲፕሎማቲክ ማኅበረሰቡ በአዲስ አበባ በሰጡት መግለጫ ምዕራባውያንን አጣጣሉ 

    የሩሲያ የውጭ ጉዳይ ሚኒስትር ሰርጌ ላቭሮቭ ለአፍሪካ አገሮች ላደረጉት...

    በወለድ ነፃ የባንክ አገልግሎት የተሰበሰበው ከፍተኛ ሀብት ጥቅም ላይ እየዋለ አይደለም ተባለ

    በኢትዮጵያ ከወለድ ነፃ የባንክ አገልግሎት የተሰበሰበው የተቀማጭ ገንዘብ መጠን...

    የታላቁ የኢትዮጵያ ህዳሴ ግድብ ሁለተኛው ተርባይን ኃይል ማመንጨት ጀመረ

    ሦስተኛ ዙር ሙሌት በዛሬው ዕለት እንደሚጠናቀቅ ይጠበቃል የታላቁ የኢትዮጵያ ህዳሴ...
    - Advertisment -

    ትኩስ ፅሁፎች

    ለሰላም ድርድሩ ‹‹ከአፍሪካ ኅብረት አደራዳሪነት ውጭ ሌላው ተቀባይነት የለውም›› የውጭ ጉዳይ ሚኒስቴር

    የሰሜን ኢትዮጵያን ጦርነትና ግጭት በሰላማዊ መንገድ ለመፍታት የተጀመረው የአፍሪካ...

    በተጠናቀቀው የበጀት ዓመት በንብረት ላይ የደረሰው የትራፊክ አደጋ በ494 በመቶ ጨምሯል

    በትራፊክ አደጋ 3,971 ሰዎች ሕይወታቸውን አጥተዋል በአገር አቀፍ ደረጃ በተጠናቀቀው...

    አዲሱን የመንግሥት መዋቅር ዘርግተው ያጠናቀቁ ተቋማት 31 በመቶ ብቻ ናቸው

    በሲቪል ሰርቪስ ኮሚሽን ሥር ካሉት 160 የፌዴራል መንግሥት መሥሪያ...

    ለተቃርኖ ምክንያት የሚሆኑ ከንቱ ድርጊቶች ይወገዱ!

    ሰሞኑን የታላቁ የኢትዮጵያ ህዳሴ ግድብ ሦስተኛ ዙር የውኃ ሙሌት...

    ለኬንያ ኤሌክትሪክ ኃይል የሚሸጥበት ታሪፍ ማሻሻያ ተደረገበት

    በቅርቡ ሙሉ ለሙሉ ስምምነቱ የተጠናቀቀው የኢትዮጵያና የኬንያ የኤሌክትሪክ ኃይል...
    spot_img

    ተዛማጅ ፅሁፎች

    ለተቃርኖ ምክንያት የሚሆኑ ከንቱ ድርጊቶች ይወገዱ!

    ሰሞኑን የታላቁ የኢትዮጵያ ህዳሴ ግድብ ሦስተኛ ዙር የውኃ ሙሌት በስኬት መጠናቀቁና የኤሌክትሪክ ኃይል የሚያመነጨው ሁለተኛው ተርባይን ሥራ መጀመሩ፣ በኢትዮጵያውያን ዘንድ የፈጠረው ደስታ ቃላት ከሚገልጹት...

    የሥጋት ደመና ተወግዶ ሰላም ይስፈን!

    ከቅርብ ጊዜ ወዲህ በደቡብ የአገሪቱ ክፍል ክልል ለመሆን የፈለጉ የተለያዩ ዞኖች እየተሰባሰቡ ለፌዴሬሽን ምክር ቤት ጥያቄ እያቀረቡ ናቸው፡፡ ለብቻችን ክልል መሆን አለብን የሚሉ ዞኖችም...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር ሕዝቦችና ለአፍሪካውያን ነፃነትም ተምሳሌት ናት፡፡ የጥንቶቹ ኢትዮጵያውያን አገራቸውን የሚያኮራ ተግባር ፈጽመው ያለፉት፣ ከአገራቸው በፊት የሚቀድም...