Tuesday, August 16, 2022
ሌሎች ዓምዶች
    - Advertisement -
    - Advertisement -

    በሽረ ተራራ ላይ የከተመው ሪዞርት

     ህወሓት የትጥቅ ትግል የጀመረበት 40ኛ ዓመቱ ምክንያት በማድረግ የአገሪቱ ታዋቂ አርቲስቶችና ጋዜጠኞች ባለፈው የካቲት ደደቢትና ሌሎች የድርጅቱ ታሪካዊ ቦታዎች ጎብኝተው ነበር፡፡ ከእነዚህም ውስጥ የደርግ ጦር 604ኛ ኮር የተደመሰሰበትና የጦርነቱ የኃይል ሚዛን ወደ ህወሓት እንዲያጋድል ምክንያት የሆነው አንዱ ታሪካዊ ቦታ የሽረ ተራራ ነው፡፡ ጄኔራል ሳሞራ የኑስ ለእንግዶች የህወሓትን የትጥቅ ትግል ታሪክ ገለፃ ያደረጉበት ይኼው ተራራ፤ አናቱ ላይ አንድ ትልቅ ሪዞርት ተሠርቶበታል፡፡ ቀደም ሲል ‹‹ባህረ ነጋሽ›› በአሁኑ ወቅት ‹‹ነጋሽ ኃይለ›› በመባል የሚታወቀው የዚሁ ሪዞርት ባለቤት አቶ ነጋሽ ኃይለ የአካባቢው ተወላጅ ሲሆኑ፣ ተመሳሳይ ሪዞርት በቢሾፍቱ ከተማ በማሠራት ላይ ይገኛሉ፡፡ የገጠሙዋቸው እንቅፋቶችና ከሌሎች ባለሀብቶች የሚለዩባቸው ነጥቦች ዙሪያ የማነ ናግሽ አነጋግሯቸዋል፡፡

    ሪፖርተር፡- ዕረፍት አይወዱም ሰምቻለሁ?

    አቶ ነጋሽ ኃይለ፡- ዕረፍት አልወድም፡፡ ካልሠራሁ ይደክመኛል፡፡ ከሽረ መጥቼ ደብረ ዘይት (ቢሾፍቱ) ነው የማድረው፡፡ ጧት ከደብረ ዘይት ተነስቼ በአውሮፕላን ሽረ እገባለሁ፡፡ ብዙ ከሰው የምለይበት ነገር አለኝ፡፡ እራትና ቁርስ አልበላም፣ ሻይና ቡና አልጠጣም፡፡ ምሳና ሁለት ቢራ ብቻ እጠጣለሁ፡፡ በ1970 ዓ.ም. 72 ኪሎ ግራም ነበርኩኝ፡፡ አሁንም 72 ኪሎ ግራም ነኝ፡፡ 37 ዓመት ሙሉ አንድ ዓይነት ኪሎ ነው ያለኝ፡፡

    ሪፖርተር፡- ስፖርት ያዘወትራሉ?

    አቶ ነጋሽ ኃይለ፡- አዎ! ዋናና ሩጫ እወዳለሁ፡፡ በሽታ የሚባል አላውቅም፡፡ ሕክምና የምሄደው እንዲሁ ለመታየት ብቻ ነው፡፡

    ፖርተር፡- ሥራ የጀመሩት እንዴት ነበር?

    አቶ ነጋሽ ኃይለ፡- ሻይ ቤት በሁለት ብር ተቀጥሬ እሠራ ነበር፡፡ አንድ ገበሬ ከገጠር ይመጣና ወተት እየጠጣህ ከብት ትጠብቃለህ ብሎ ወደ ደደቢት ወሰደኝ፡፡ ከብቶች እጠብቃለሁ፣ አርሳለሁ፡፡ እሱ ጋ አራት ዓመት ቆይቼያለሁ፡፡ ከዚያ ደመወዜን ይዤ ሽረ ከተማ ውስጥ ገባሁ፡፡ አሁን ባዶ አራት በመባል የሚታወቀው ቀበሌ ውስጥ ነጋሽ ካፌ የሚል ከፍቼ ለአንድ ዓመት ሠርቻለሁ፡፡ እምብዛም አላረካኝምና ወደ ሑመራ ገባሁ፡፡ ለስድስት ወራት ያህል ቤት ለቤት እየተንቀሳቀስኩ የወባ መድኃኒት ከመርጨትም በተጨማሪ አረም ማረም፣ ማጨድ የመሳሰሉትን ሠርቻለሁ፡፡ እዚያው አንድ ቀደም ብዬ የማውቀው ዘመዴ ከሱዳን መጥቶ ሑመራ ውስጥ አገኘሁት፡፡ ይዞኝ ወደ ሱዳን ተመለሰ፡፡ እሱ አረቄ፣ የባህል ልብስና በርበሬ ነበር የሚያመላልሰው፡፡ ከዚያ ሳዑዲ ላይ የተወሰነ ጊዜ ከቆየሁ በኋላ ወደ ኤርትራ ገባሁ፡፡

    ሪፖርተር፡- ኤርትራ ውስጥ ታስረው ነበር ይባላል?

    አቶ ነጋሽ ኃይለ፡- አዎ! ኤርትራ ውስጥ እንደገባሁ፣ የጀብሃ ሰላይ ነው ብለው ነበር ያሰሩኝ፡፡ ምንም በማላውቀው ነገር አንድ ዓመት ሙሉ በጨለማ ነበር የታሰርኩት፡፡ ከእኔ ጋር ታስረው የነበሩ በሕይወት ያሉም አሉ፤ ምንም የተገኘብኝ ነገር አልነበረምና ፈቱኝ፡፡ ዕድሜዬም ትንሽ ነበር ግን ብር ነበረኝ፡፡ ከዚያ አስመራ ውስጥ ባህረ ነጋሽ የሚባል ሆቴል ከፍቼ እሠራ ነበር፡፡ ዳቦ መጋገርያም ነበረኝ፡፡ በመሀል ወደ ሱዳን ደርሼ መጣሁ፡፡ ያለፈቃድ ነበር የሄድኩት፡፡ ያለፈቃድ ሱዳን ደርሰህ መጥተኸል በሚል የአንድ ዓመት እስራትና 20 ሺሕ ብር ቅጣት ፈረዱብኝ፡፡ ስድስት ወር እንደታሰርኩኝ የወህኒ ቤቱ አዛዥ ሁለት የታጠቁ ወታደሮች አጅበውኝ አስመራ ከተማ ውስጥ ገብቼ ቤተሰቤን እንድጠይቅ ፈቀደልኝ፡፡ እቤት ውስጥ ገብተን ቁርስ በላንና ‹‹እናንተ ተጫወቱ እኔ ባንክ ደርሼ ልምጣ›› ብያቸው ሄድኩ፡፡ ከዚያም መኪናዬን አስነስቼ ኤርፖርት ሄድኩኝ፡፡ አውሮፕላን [ቻርተር] ለብቻዬ ኮንትራት ይዤ ከአስመራ 400 ኪሎ ሜትር ርቀት ላይ የሚገኘው ተሰነይ ከተማ ውስጥ ድርጅት ነበረኝና እዚያ ውዬ ማታ ተመለስኩኝ፡፡ በተፈቀደልኝ ሰዓት እስር ቤት ተገኘሁ፡፡ አጃቢዎቹም ከከተማ እንደወጣሁ አላወቅኩም፡፡ አንድ ጋዜጣ ላይ ግን ወሬው ወጥቶ ነበር፡፡ ‹‹ምን ያህል እውነት ነው?›› ብለው ይጠይቁኛል፡፡ እውነት መሆኑን ነገርኳቸው፡፡ ‹‹ትረሸናለህ›› ተባልኩ፡፡ ‹‹ዛሬም ሞት ነው፣ ነገም ሞት ነው›› አልኩ፡፡ ‹‹ከኢትዮጵያ ውጪ አልወጣሁም፤ ወንጀል ከሆነ ግን እቀጣለሁ፡፡ ጉዳዩ አወዛጋቢ ሆኖ እስከ ሚኒስትሮች ምክር ቤት ደረሰ፡፡ ሚኒስትሮች ምክር ቤት ደግሞ ‹‹አሠራሩ በቀና መንፈስ ስለሆነ ሊያስቀጣው አይችልም፡፡ እንደውም ይህ ደብዳቤ ከደረሳችሁ በኋላ እንዲፈታ፣ ታማኝ ስለሆነ›› የሚል ደብዳቤ ይፅፋሉ፡፡ ተመልሼ ወደ ሥራዬ ገባሁ፣ ግን እዛም መቆየት አልፈለግኩም፤ 1981 ዓ.ም. ወደ አዲስ አበባ መጣሁ፡፡

    ሪፖርተር፡- አዲስ አበባ ከመጡ በኋላስ ምን ላይ ነበር የተሰማሩት?

    አቶ ነጋሽ ኃይለ፡- አዲስ አበባ እንደገባሁ ቦታ ገዛሁ፡፡ ሆራይዘን ዩዝ አካዴሚ ትምህርት ቤትን ከፍቼ ለ12 ዓመት ሙሉ ሥራ አስኪያጅ ሆኜ ራሴ ነበር የመራሁት፡፡ ብቻዬን ሆኜ የሚያግዘኝ ሰው ሲጠፋ ግን ትምህርት ቤቱን አከራየሁት፡፡

    ሪፖርተር፡- ከዚያስ?

    አቶ ነጋሽ ኃይለ፡- በተወለድኩበት አንድ ነገር መሥራት እንዳለብኝ ይሰማኝ ነበር፡፡ ወደ ሽረ ሄጄ 125 ሚሊዮን ብር የፈጀ ትልቅ ሪዞርት ሠርቻለሁ፡፡ እሱን ለባለሙያዎች አስረክቤ ደብረዘይት ላይም ሌላ ሪዞርት እየሠራሁ ነው፡፡

    ሪፖርተር፡- ከትምህርት ወደ ሆቴል (ሪዞርት) ፊትዎን ለምን አዞሩ?

    አቶ ነጋሽ ኃይለ፡- አንደኛ ነገር ትምህርት የእኔ ሙያ አይደለም፡፡ ያኔ የትምህርት ቤት ችግር ስለነበርና ሰው መማር አለበት ብዬ ስለማምን ነው፡፡ ሰው ካልተማረ አገር ምድረ በዳ ሆኖ የሚቀር ነው የሚመስለኝ፡፡ ከአንዳንድ ሰዎች ጋር መክሬ ነበር ሆራይዘን ዩዝ አካዴሚን የከፈትኩት፡፡ ብዙ ተማሪዎች አስመርቀናል፡፡ ትምህርት ቤት ይኼን ያህል አትራፊ አይደለም፡፡ ሰው ካስተማርክ ግን አተረፍክ ማለት ነው፡፡ ነገ አገር የሚረከብ ከቀረፅክ አትርፈሃል ማለት ነው፡፡ ለእኔ ትርፍ ማለት እሱ ነው፡፡

    ሪፖርተር፡- ሽረ ላይ ያሠሩት ሪዞርት ሥራ ተጓትቶ ነበር ይባላል፤ በምን ያህል ጊዜ ተጠናቀቀ?

    አቶ ነጋሽ ኃይለ፡- እምብዛም ሰው መውቀስ አልፈልግም እንጂ አስተዳደሮቹ ብዙ እንቅፋት ፈጥረውብኝ ነበር፡፡ ካለማሁት በኋላ እንነጥቃለን ብለውኝ ነበር፡፡ ከተወሰነ ጊዜ በኋላ ግን ቀጥል አሉኝ፡፡ እዚህ ላይ ኢንቨስት አድርግ ብለው ጠርተው ካለማሁት በኋላ እንወስደዋለን ማለት አግባብ አልነበረም፡፡ አግባብ እንዳልሆነም ለሚመለከተው አካል አስረዳሁኝ፡፡ ‹‹ይኼ መንግሥት ዴሞክራሲያዊ መንግሥት ነው፡፡ አይደለም ዜጎች የውጭ ሰዎችም እዚህ አገር ኢንቨስት እያደረጉ ነው፡፡ ይኼን አቋርጥ ማለት ስህተት ነው›› ብዬ አቤት አልኩኝ፡፡ ቀጥል ብለው አሁን እየሠራሁ ነው፡፡ እዚህ ደረጃ ላይ ደርሼያለሁ፡፡ በአስር ዓመቱ ተጠናቀቀ፡፡

    ሪፖርተር፡- አንድ በሆቴልና ሪዞርት የተሰማራ ሰው ከቀረጥ ነፃ ዕቃዎችና ቁሳቁስ ከውጭ ማስገባት ይችላል፡፡ እርስዎ ግን ከቀረጥ ነፃ አያስገቡም ይባላል እውነት ነው?

    አቶ ነጋሽ ኃይለ፡- አንድም ዕቃ ከቀረጥ ነፃ አላስገባሁም፡፡ ዕድሉን የከለከለኝ ሰው የለም፡፡ የተፈቀደ ነው፡፡ እኔ ግን አልፈለግኩም፡፡ አሁን ከቀረጥ ነፃ አስገብቼ ብሆን 65 ሚሊዮን ብር ነበር የሚጨርሰው፡፡ በቀረጥ ስለገባ ግን ወደ 125 ሚሊዮን ከፍ ብሏል፡፡ እንዳልኩህ ዕድሉ አለ፣ እኔ ግን ስላልፈለግኩኝ አልተጠቀምኩበትም፡፡ አይደለም ይኼን ያህል ትልቅ ሆቴል ትንሽ ሆቴል ያለውም ዕድሉ ይጠቀማል፡፡ ብዙ ሰዎች ሆቴል ለመሥራት አይፈልጉም፡፡ ከቀረጥ ነፃ ዕቃ ለማስገባት ግን ሆቴል ይከፍታሉ፡፡ እኔ ሆቴል ሙያዬ ነው፡፡ አስመራ ውስጥ 12 ጊዜ ተሸልሜያለሁ፡፡ በጥራትና በሆቴል አያያዝ ማለት ነው፡፡

    ሪፖርተር፡- እንዳየሁት ከሽረ ከተማ ወጣ ብሎ ተራራ ላይ ነው የተሠራው፡፡ ለውኃ አስቸጋሪ አልሆነብዎትም?

    አቶ ነጋሽ ኃይለ፡- አዎ! ወጣ ብሎ ተራራ ላይ ነው የተሠራው፡፡ ተራራው ላይ ውኃ ማቆርያ ጉድጓድ ሠራሁ፡፡ 3,000 ሊትር ውኃ ይይዛል፡፡ ሌላም 1,000 ሊትር ውኃ የሚይዝ ጉድጓድ ሠራሁ፡፡ ውኃው ከቆርቆሮ ነው የሚገኘው፤ እንደገና ሦስተኛ 1,000 ሊትር ውኃ የሚይዝ ሠርቼያለሁ፡፡ የሚባክን ውኃ የለም፡፡

    ሪፖርተር፡- እዛ አካባቢ ሪዞርት ለመሥራት ያነሳሳዎት አትራፊ እሆናለሁ ብለው ነው ወይስ የትውልድ ቦታዎ የማልማት ኃላፊነት ለመወጣት ነው?

    አቶ ነጋሽ ኃይለ፡- አያዋጣም፤ ሁል ጊዜ ለትርፍ አትሠራም፡፡ ትርፍ በቃ ተገኝቷል፤ አገርህ ላይ ሐውልት መትከል አለብህ፡፡ ሪዞርቱ የእኔ ሀብት አይደለም፡፡ የአካባቢው ሕዝብ ንብረት ነው፡፡ የከተማው ሀብት ነው፡፡ ሙዚየምም ነው፡፡ ላይብረሪ ማለትም ነው፡፡ ታሪካዊ ቦታ ላይ ነው የተሠራው፡፡

    ሪፖርተር፡- ሪዞርቱ ከሚሰጠው የአልጋና የመዝናኛ አገልግሎት ውጪ ለአካባቢው ማኅበረሰብ የሠሩት ነገር አለ?

    አቶ ነጋሽ ኃይለ፡- በዋናነት መዝናኛ ነው፡፡ ወጣቶች ሊያነቡበት ሊዝናኑበት ታስቦ የተሠራ ነው፡፡ ጥሩ መዋኛ አለው፡፡ ውስጡ በግሩም ሁኔታ ነው የተሠራው፡፡ ከዚህ ውጪ ግን አንድ የስፖርት ቡድን አለኝ፡፡ ጋንታ ነጋሽ ኃይለ የሚባል የእግር ኳስ ቡድን አለኝ፡፡ ምግባቸው ትጥቃቸው በነፃ ነው፡፡ ወጣቶችን ለማበረታታት ነው፡፡

    ሪፖርተር፡- ካፒታልዎ ምን ያህል ነው?

    አቶ ነጋሽ ኃይለ፡- አጠቃላይ ወደ ገንዘብ ሲቀየር ወደ 500 ሚሊዮን ብር የሚጠጋ ካፒታል አለኝ፡፡

    ሪፖርተር፡- ብዙ ሰዎች የተወሰነ ገንዘብ ይዘው ከባንክ ተበድረው ነው የሚሠሩት፡፡ ‹‹አቶ ነጋሽ ብድር አይወዱም›› ይባላል፡፡ ምን ያህል እውነት ነው?

    አቶ ነጋሽ ኃይለ፡- በጭራሽ! ብድር የሚባል ወስጄ አላውቅም፡፡ እኔ ሰላም ነው የምፈልገው፡፡ ብድር ምናምን አልፈልግም፡፡ ተበድረህ እንቅልፍ አይወስድህም፣ ሰላምም አታገኝም፡፡ ከቀረጥ ነፃ ያስገባህ እንደሆነም አትተኛም፡፡

    ሪፖርተር፡- ሦስቱንም መንግሥታት አይተዋል፤ እንዲህ ዓይነት ንግድና ኢንቨስትመንት ላይ ለመሰማራት ምን ያህል የተመቻቸ ሁኔታ አለ ይላሉ?

    አቶ ነጋሽ ኃይለ፡- አመቺ ነው፡፡ ጠንክሮ መሥራት የሚችል ሰው ካለ መንግሥት ሥርዓት ዘርግቷል፡፡ እንዳልከው በአፄ ኃይለ ሥላሴም በደርግም ነጋዴ ነበርኩኝ፡፡ አሁንም ነጋዴ ነኝ፡፡ እውነት ለመናገር አሁን ያለው ዕድል ተወዳዳሪ የለውም፡፡ ሥርዓቱ ውስጥ ግን ጥቂት መጥፎ ሰዎች አሉ፡፡ የሥርዓቱን ፀር የሆኑ፡፡ ቆርጠህ ከተነሳህና ተስፋ ካልቆረጥክ ታሸንፋቸዋለህ እንጂ አያሸንፉህም፡፡ ምክንያቱም መንግሥት ያወጣው መመሪያ ይዘው አይደለም የሚሠሩት፡፡

    ሪፖርተር፡- በቀጣይነት ምን ለመሥራት ዕቅድ አለዎት?

    አቶ ነጋሽ ኃይለ፡- ሽረ አካባቢ አንድ ትልቅ ፋብሪካ ለመሥራት ዕቅድ አለኝ፡፡ ቆርቆሮ ፋብሪካና ኮንጎ ፋብሪካ፡፡ ምክንያቱም እዛ አካባቢ ኮንጎ ጫማ በጣም ይፈለጋል፡፡ ታጋዮች [የወያነ] ይጠቀሙበት የነበረ ነው፡፡ አሁንም ግን አካባቢው ሙቀታማ ስለሆነ ጫማው ይፈለጋል፡፡ ተመራጭ ነው፡፡ እንግዲህ ከዚህ በፊት የፈጠሩብኝ እንቅፋት ጸጽቷቸው መስመሩን አስተካክለው ከሆነ እቀጥላለሁ፡፡ እንደበፊቱ የሚቀጥሉ ከሆነ ግን ቢቀርብኝ ይሻላል፡፡ ሥርዓቱ አይደለም ችግሩ፣ ግለሰቦች ናቸው፡፡

    ሪፖርተር፡- በርካታ ባለሀብቶች ባለው ቢሮክራሲና የአሠራር ችግር ከክልሉ እየወጡ እንደሆነ ይነገራል፡፡ እርስዎ ግን አሁንም ለመጋፈጥ የቆረጡ ይመስላል?

    አቶ ነጋሽ ኃይለ፡- አዎ! ብዙዎቹ እየፈለሱ እየወጡ እንደሆኑ አውቃለሁኝ፡፡ እኔ ግን እጋፈጣቸዋለሁኝ፡፡ ምክንያቱም ሥርዓት የወጣው ለተወሰነ አካባቢ ብቻ አይደለም፡፡ የኢትዮጵያ ሥርዓት ነው፡፡ እሱን ይዞህ መጋፈጥ ነው፤ መሸሽ አያስፈልግም፡፡ የእነሱ ምቀኝነት መሠረት የለውም፤ መንግሥት ያወጣውን ሥርዓት ይዘህ ነው የምትታገላቸው፡፡

    ሪፖርተር፡- ቅሬታዎ ታች ባሉ የአስተዳደር ኃላፊዎች ይመስላል?

    አቶ ነጋሽ ኃይለ፡- አዎ! ችግሩ ያለው ታች ላይ ነው፡፡ ፕሬዚዳንት ቢሮ ሄጄ የገጠመኝን ችግር አስረዳኋቸው ፈቱልኝ፡፡ ቅሬታዬን የሰሙኝ አቶ በየነ መክሩ (ምክትል ፕሬዚዳንት) ናቸው፡፡ እኔም አላቆምም ነበር፡፡ ፕሬዚዳንቱ ናቸው ወደ እሳቸው የመሩኝ፡፡

    ሪፖርተር፡- ትግራይ ክልል ውስጥ የአስተዳደር ችግር ተደጋግሞ ይነሳል፡፡ አንዳንዶቹ ጓዛቸውን ጠቅልለው ይሸሻሉ፡፡ አንዳንዶቻችሁም ትጋፈጣላችሁ፡፡ ግን በተደራጀ መልኩ እንዲህ ዓይነት አሠራር እንዲስተካከል ባለሀብቶች ተፅዕኖ ስትፈጥሩ አይታይም፡፡

    አቶ ነጋሽ ኃይለ፡- እንደዛ ካደረግክ ደግሞ በሌላ ይተረጉሙታል፡፡ እንደ አድማ፣ አመፅ ነው የሚቆጥሩት፡፡ ስለዚህ አንዱ አማራጭ ጥለህ መውጣት ነው፡፡ ሌላ ቦታ መሥራት ነው፡፡ እኔ የማውቃቸው ብዙ ባለሀብቶች ከክልሉ ወጥተዋል፡፡ እኔ ግን እስከመጨረሻ ታግያለሁ፡፡ አሁንም እቀጥላለሁ፡፡ አላቆምም፡፡ እኔ አልፋለሁ፣ አካባቢው ላይ ግን አንድ ሥራ ሠርቼ ማለፍ አለብኝ፡፡ እነሱም ቀስ ብሎ ይገባቸው ይሆናል፡፡

    ሪፖርተር፡- በትምህርት ምን ያህል ገፍተዋል?

    አቶ ነጋሽ ኃይለ፡- አልተማርኩም፡፡ የቤተ ክህነት ትምህርት ነበረኝ፡፡ ከዚያ በኋላ ሱዳን ላይ አስተማሪ ቀጥሬ ስድስተኛ ክፍል ደርሼያለሁ፡፡ ከዚያም ትምህርት ቤት ሄጄ ተፈትኜ አለፍኩኝ፡፡ ከዚያም አስመራ ውስጥ ሦስት ዓመት በማታ ተምሬ ስምንተኛ ክፍል ደርሼያለሁ፡፡

    ሪፖርተር፡- ቤተሰብ አለዎት ወይ?

    አቶ ነጋሽ ኃይለ፡- [እንደመሳቅ ብለው] ይኼንን እንኳ ባትጠይቁኝ፡፡ ቤተሰብ የለኝም፡፡ ብቻዬን ነው የተፈጠርኩት፣ ብቻዬን ነው ያለሁት፣ ለወደፊቱም ብቻዬን ነው የምኖረው፡፡

    ሪፖርተር፡- መንፈሳዊነት ይወዳሉ መሰለኝ፡፡ ከእግር ኳስ ቡድኑ ውጪ ሌላ የሚሠሩት ነገር ይኖራል?

    አቶ ነጋሽ ኃይለ፡- ይህንን ያንን ሠራሁ ማለት ደስ አይልም ግን ቤተ ክርስቲያንና መስጊድን አግዛለሁ፡፡ ለምሳሌ የእኔ ሕጋዊ ስም ‹‹ክቡር በኩረ ትጉሃን›› ነጋሽ ኃይለ ነው የምባለው፡፡

    ሪፖርተር፡- ማዕረጉን ማነው የሰጦት?

    አቶ ነጋሽ ኃይለ፡- ከኢየሩሳሌም ነው የተሰጠኝ፡፡ በየዓመቱ በኢየሩሳሌም ለሚሳለሙ ምዕመናን በሬ አርዳለሁኝ፡፡ እዚህም አዲስ አበባ ውስጥ ማርያም ቤተ ክርስቲያን አሠርቼያለሁ፡፡ ብዙ መስጊዶችም አግዛለሁኝ፡፡ እኔ ኦርቶዶክስ ነኝ ግን ሁሉንም ሃይማኖት ማገዝ እንዳለብኝ አውቃለሁኝ፡፡ ምክንያቱም አገር ሲደፈር ሁላችን ነው የምንሮጠው፡፡ የሃይማኖት ልዩነት አለ፤ ሕዝባችን ግን በአገሩ አንድ ነው፡፡

     

     

    ተዛማጅ ፅሁፎች

    - Advertisment -

    ትኩስ ፅሁፎች ለማግኘት

    በብዛት የተነበቡ ፅሁፎች

    ባንኮች እንዲዋሀዱ እስከ ማስገደድ ሊገባ እንደሚችል ብሔራዊ ባንክ ጠቆመ

    በአሁኑ ወቅት የባንኮች ቁጥር እየጨመረ መምጣቱ ችግር የሚሆንና የውጭ...

    ለኬንያ ኤሌክትሪክ ኃይል የሚሸጥበት ታሪፍ ማሻሻያ ተደረገበት

    በቅርቡ ሙሉ ለሙሉ ስምምነቱ የተጠናቀቀው የኢትዮጵያና የኬንያ የኤሌክትሪክ ኃይል...

    አዲስ አበባ እንዳይገቡ በተከለከሉ ዜጎች ጉዳይ የኦሮሚያና አማራ ክልሎች ተወያይተው ችግሩ እንዲፈታ አደረጉ

    ለሳምንታት በርካታ ቅሬታ ሲነሳበት የነበረውና ከአማራ ክልል በደብረ ብርሃን...

    ተዛማጅ ፅሁፎች

    ‹‹በድርቅ ምክንያት የሚቀርብልን የዕርዳታ ጥሪ ተበራክቷል›› አቶ አብዲሳ መሐመድ የአደጋ ጊዜ ምላሽ ክፍል ስራ አስኪያጅ

    ኢንተርናሽናል ሪስኪዩ ኮሚቴ (አይአርሲ) በኢትዮጵያ በተለያዩ የአገሪቱ ክፍሎች ድንገተኛ ችግሮች ሲከሰቱ አፋጣኝ መሠረታዊ ሰብዓዊ ድጋፍ በመስጠት ይታወቃል፡፡ በተለይ የዜጎች መፈናቀል፣ የጎርፍ አደጋ፣ የመጠጥ ውኃ...

    የውጭ አገር ሕክምና የሚያስፈልጋቸውን እንግልት ለመቀነስ

    በኢትዮጵያ የሕክምና አሰጣጥ ላይ ከፍተኛ ችግር እንዳለ ይታመናል፡፡ በተለይም በሕክምና ስህተት ሕሙማን ለሞት ሲጋለጡ አልያም ደግሞ ለሌላ ስቃይ ሲዳረጉም ይታያል፡፡ በሌላ በኩል ደግሞ በዝቅተኛ...

    አሠሪና ሠራተኛ የሚገናኙበት ዓውደ ርዕይ

    በአዲስ አበባ ከተማ 23 ሚሊዮን ወጣቶች እንደሚኖሩ ከዓመት በፊት ማዕከላዊ ስታትስቲክስ ኤጀንሲ ያወጣው መረጃ ያመለክታል፡፡ ከዚህ ውስጥ መሥራት የሚችሉ ወይም ዕድሜያቸው ለሥራ የደረሱ 75...