Thursday, August 18, 2022
ሌሎች ዓምዶች
    - Advertisement -
    - Advertisement -
    ዓለምአሜሪካ ከአፍሪካ ጐን የምትቆምበት የደኅንነት አጀንዳ

    አሜሪካ ከአፍሪካ ጐን የምትቆምበት የደኅንነት አጀንዳ

    ቀን:

    በሶማሊያ ሰላም ለማስከበር የተሰማራው የአፍሪካ ኅብረት ጦርና የሶማሊያ መንግሥት ወታደሮች በሶማሊያ የአልቃይዳ ክንፍ የሆነውን አልሸባብ ከሶማሊያ ጠራርጐ ለማጥፋት ዘመቻ ከጀመሩ ሳምንት ተቆጥሯል፡፡ የአሜሪካው ፕሬዚዳንት ባራክ ኦባማ በምሥራቅ አፍሪካ ኬንያና ኢትዮጵያን ሊጐበኙ ቀናት ሲቀራቸው የተጀመረው ዘመቻ፣ በአብዛኛው የተሳካ እንደሆነ ዓለም አቀፍ የመገናኛ አውታሮች ዘግበዋል፡፡

    ቢቢሲ እንደዘገበው፣ በሶማሊያ የአፍሪካ ጥምር ጦር (አሚሶም) በደቡብ ሶማሊያ ይዞታቸውን አጠናክረው በነበሩት የአልሸባብ ተዋጊዎች ላይ ጠንከር ያለ አዲስ ጥቃት ፈጽሟል፡፡ በአሚሶም የተጀመረው ‹‹ኦፕሬሽን ጁባ ኮሪደር›› አልሸባብን ከሶማሊያ ዋና ከተማ ሞቃዲሾ በደቡብ አቅጣጫ ከሚገኙት ቤይና ጌዶ አካባቢዎች፣ እንዲሁም የአገሪቷ ገጠራማ ክፍሎች ጠራርጐ ለማስወጣት ነው፡፡

    አሚሶም እንዳስታወቀው፣ ጥምር ጦሩ ዘመቻ ከጀመረ ካለፈው ሳምንት ወዲህ የአልሸባብ ጠንካራ ይዞታ የነበሩት ዲንሰርና ባርዴር ነፃ ወጥተዋል፡፡ የተጀመረው ዘመቻ ተጠናክሮም በሶማሊያ የሚገኙ የተለያዩ ሥፍራዎች በሙሉ ከአልሸባብ ነፃ ወጥተው ሰላም ከሰፈነ በኋላ፣ የአገሪቱን ሰላም የሶማሊያ መንግሥት ጦር ያስጠብቃል፡፡

    አልሸባብን ከሞቃዲሾም ሆነ ከሌሎች ከተሞች በማስለቀቁ ሒደት የኢትዮጵያ ጦር ዋናውን ሥፍራ ይይዛል፡፡ የኢትዮጵያ በአፍሪካ በተለይ በምሥራቅ አፍሪካ ሰላም ለማስከበር ከፍተኛ የጦር ኃይል ከሚያሠልፉ አገሮችም ቀዳሚውን ሥፍራ ትይዛለች፡፡ በቅርቡ አሚሶም በአልሸባብ ላይ እየሰነዘረ ላለው ጥቃትም የኢትዮጵያ ጦር የጀርባ አጥንት እንደሆነ ተነግሯል፡፡ የኢትዮጵያ ጦር በሶማሊያም ሆነ በሌሎች የአፍሪካ አገሮች ሰላም ለማስከበር ያለው ሚና የላቀና ወታደሮቹም ፅኑ መሆናቸውን ፕሬዚዳንት ኦባማ ሰኞ ሐምሌ 20 ቀን 2007 ዓ.ም. ከጠቅላይ ሚኒስትር ኃይለ ማርያም ደሳለኝ ጋር በመሆን፣ በብሔራዊ ቤተ መንግሥት በሰጡት ጋዜጣዊ መግለጫ ላይ መስክረዋል፡፡

    በ1999 ዓ.ም. መገባደጃ ላይ ኢትዮጵያ፣ ሶማሊያን ተቆጣጥሮ የነበረውና የኢትዮጵያ መንግሥት ለደኅንነቴ ያሰጋኛል ያለውን የ‹‹ኢስላሚክ ኮርት ዩኒየን›› ለማሽመድመድ ጦር ካነሳ ወዲህ ተጠናክሮ እንደተመሠረተ የሚነገረው የአልቃይዳ ወጣቱ ክንፍ አልሸባብ፣ ላለፉት ስምንት ዓመታት በውጊያና በአጥፍቶ መጥፋት ሶማሊያንም ሆነ ኬንያን ሲያምስ ከርሟል፡፡ በኬንያ ናይሮቢ ዌስትጌት የገበያ ማዕከል፣ በሞምባሳ፣ በጋሪሳና በተለያዩ ሥፍራዎች በአጥፍቶ መጥፋትና ገሎ በመሰወር ኬንያን አጥቅቷል፡፡

    ፕሬዚዳንት ኦባማ ኬንያን ከመጐብኘታቸው ሳምንት አስቀድሞም በኢድ በዓል ላይ ባስተላለፈው መልዕክት፣ ከሶማሊያ ውጪ በተለይ በኬንያ መጠነ ሰፊ ጥቃት ለመሰንዘር ዝቶ ነበር፡፡ ከአንድ ወር በፊትም የአሚሶም አባል በሆኑ የብሩንዲ ወታደሮች ላይ ጥቃት በመፈጸም ከአሥር በላይ መግደሉም ይታወሳል፡፡

    የኬንያ መንግሥት የአሜሪካ ሰው አልባ ተዋጊ ጀቶች የአልሸባብ ጠንካራ ይዞታዎች ላይ ባደረሱት ጥቃት ኮማንደሮችን ጨምሮ 30 የአልሸባብ ተዋጊዎችን መግደላቸውን ባሳወቀ በጥቂት ቀናት ውስጥ፣ በእግረኛም ጭምር ጥቃቱን እየፈጸመ የሚገኘው አሚሶም፣ አብዛኛዎቹን የአልሸባብ ጠንካራ ይዞታዎች ማስለቀቁን አስታውቋል፡፡

    አልሸባብም ለዚህ አፀፋ በሞቃዲሾ የሚገኘው ጃዚራ ፓላስ ሆቴል ላይ ሰሞኑን ባደረሰው የአጥፍቶ መጥፋት ጥቃት፣ የቻይና ዜግነት ያለውን እንግዳ ጨምሮ 15 ሰዎችን ገድሏል፡፡

    ፕሬዚዳንት ኦባማ በአሚሶም ከፍተኛውን ሚና እየተጫወቱ በሚገኙ አገሮች ጉብኝት በሚያደርጉበትና ከናይሮቢ ወደ ኢትዮጵያ እያቀኑ በነበረበት ወቅት፣ አልሸባብ በሆቴሉ ላይ አደጋውን ማድረሱን አሳውቋል፡፡ በድረ ገጹም የቻይና፣ የኳታር እንዲሁም የተባበሩት ዓረብ ኤሚሬትስ ዲፕሎማቲክ ሚሽን መቀመጫ በሆነው በጀዚራ ሆቴል ላይ ጥቃት የፈጸመው፣ የአልሸባብ ጠንካራ ይዞታ በሆነው በደቡብ ሶማሊያ የኢትዮጵያ ጦር በከፈተው መጠነ ሰፊ ጥቃት ሰላማዊ ሰዎች በመገደላቸው መሆኑን ገልጿል፡፡

    የሶማሊያ ፕሬዚዳንት ሐሰን ሼኪ መሐመድ፣ አልሸባብ ከጠንካራ ይዞታው መወገዱን መናገራቸውን ተከትሎም ‹‹ለጊዜው ይዞታችንን ለቀናል፡፡ ይህም የእኛ ዘዴ ነው፡፡ መቼም ቢሆን ተመልሰን ይዞታችንን እንረከባለን፤›› ሲል የአልሸባብ ጦር ቃል አቀባይ ሼኪ አብዲአሳስ አቡ ሙሳብ ለሮይተርስ ተናግሯል፡፡

    የአሜሪካ መንግሥት ግን ለሶማሊያ፣ ለምሥራቅ አፍሪካ ብሎም ለዓለም ሥጋት የሆነውን የአልቃይዳ ክንፍ አልሸባብ ዳግም እንዳይመለስ ማድረግ ወሳኝ ነው ይላል፡፡ ለዚህም ለአፍሪካ ኅብረት ሰላም አስከባሪ ኃይልም ሆነ አልሸባብን በማሽመድመዱ ዋና ሚና ላላት ኢትዮጵያ አሜሪካ ድጋፏን እንደምትቀጥል፣ በኢትዮጵያ የሁለት ቀናት ጉብኝት ያደረጉት ፕሬዚዳንት ኦባማ ተናግረዋል፡፡

    ‹‹የባህር ኃይላችንን መላክ አያስፈልገንም፡፡ ኢትዮጵያውያን ብርቱ ተዋጊዎች ናቸው፡፡ እኛ በቀጣናው ሰላም ለማስከበር ብዙ የምንሠራው አለን፡፡ አሁን የተጀመረውን አጠናክረን እንቀጥላለን፤›› ብለዋል፡፡

    አሜሪካ እግረኛ ወታደሯን ልካ አልሸባብን ባትወጋም በተደጋጋሚ ጊዜ በሰው አልባ ተዋጊ ጄት በአልሸባብ መሪዎች ላይ ጥቃት ፈጽማለች፣ ገድላለች፡፡ በደኅንነት ዙሪያም ከአፍሪካ ኅብረትም ሆነ ከኢትዮጵያ ጋር እንደምትሠራ አስታውቃለች፡፡

    ከቅርብ ቀናት ወዲህ በኢትዮጵያና በአፍሪካ ኅብረት ጥምር ጦር ትብብር ሶማሊያ ከአልሸባብ እየፀዳች ነው፡፡ ለዚህም የአሜሪካ መንግሥት የሥልጠናና ሌሎች ድጋፎችን ያደርጋል፡፡ በቀጣናው ሰላም ለማስፈን አሜሪካና አፍሪካ በጋራ እንደሚሠሩም ፕሬዚዳንቱ ተናግረዋል፡፡

    ‹‹የአፍሪካ ዕድገት በአፍሪካ ሰላምና ደኅንነት ላይ የሚመሠረት ነው፤›› ያሉት ኦባማ፣ ‹‹ዩናይትድ ስቴትስ ከሽብርና ከግጭት በተቃራኒ ትቆማለች፣ ይህንን ለሚዋጉት አፍሪካውያንም ድጋፏን ትቀጥላለች፤›› ብለዋል፡፡ ‹‹አፍሪካ ሽብርና ግጭትን ለማጥፋት ስትቆም ዩናይትድ ስቴትስ ከእናንተ ጐን እንደምትቆም ላረጋግጥላችሁ እወዳለሁ፤›› ሲሉ ሐምሌ 21 ቀን 2007 ዓ.ም. በአፍሪካ ኅብረት አዳራሽ ንግግር ባደረጉበት ወቅት ገልጸዋል፡፡››

    በሶማሊያ አልሸባብ፣ በናይጄሪያ ቦኮ ሐራም፣ በማሊና በቱኒዚያ ያሉ ሰርጐ ገቦች፣ በማዕከላዊ አፍሪካ በኡጋንዳ የሚመሩት ሎርድስ ሬዚስታንስ አርሚ የአኅጉሪቷ ሥጋት ናቸው ብለዋል፡፡

    ‹‹በአኅጉሪቱ የሚገኙ ቡድኖች መለያቸውን ሃይማኖት ያደርጋሉ፡፡ ሆኖም በመቶ ሚሊዮኖች የሚቆጠሩ የአፍሪካ ሙስሊሞች እስላም ማለት ሰላም መሆኑን ያውቃሉ፡፡ አልቃይዳ፣ አይኤስአይኤል፣ አልሸባብና ቦኮ ሐራም የተባሉትን ቡድኖች ነፍሰ ገዳዮች ልንላቸው ይገባል፤›› ሲሉ ኦባማ ተናግረዋል፡፡

        

    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    12ኛ ክልል እንዲቋቋም ህዝበ ውሳኔ እንዲካሄድ ተወሰነ

    የፌዴሬሽን ምክር ቤት በክልል የመደራጀት አቤቱታን ተቀብሎ በመመርመር ሕዝበ...

    የኬንያ ምርጫ ቀጣናዊ አንድምታው

    በዘመናት ውስጥ ሳይናወጥ መዝለቅ የቻለ ይሉታል አንዳንዶች፡፡ የአገሮቹ መሪዎች...

    ባንኮች በትልልቅ ባለሀብቶችና በከተሞች ላይ ያተኮረ የብድር አቅርቦታቸውን እንዲያርሙ ብሔራዊ ባንክ አሳሰበ

    የአገሪቱ ባንኮች ዋነኛ ተግባራቸው የሆነው ብድር የማቅረብ አገልግሎት እንከን...