Tuesday, August 16, 2022
ሌሎች ዓምዶች
    - ማስታወቂያ -
    - ማስታወቂያ -

    የታይዋኑ ጆርጅ ሹ በ120 ሚሊዮን ዶላር ማስፋፈፊያ እየገነባ ነው

    - ማስታወቂያ -

    ተዛማጅ ፅሁፎች

    –  በቀን 35 ሺሕ ጥንድ ጫማዎች የማምረት ዕቅድ አለው

    የታይዋኑ ጆርጅ ሹ ኩባንያ (ጆርጅ ግሎሪያ ግሩፕ) በቦሌ ለሚ ካሉት ሁለት ፋብሪካዎች በተጨማሪ፣ በሞጆ ከተማ በተረከበበው 60 ሔክታር መሬት ላይ በ120 ሚሊዮን ዶላር ተጨማሪ ፋብሪካ በመገንባት ላይ እንደሚገኝ አስታወቀ፡፡

    የኩባንያው ዋና ሥራ አስኪያጅ ኦ.ኬ. ኮል ለሪፖርተር እንዳስታወቁት፣ ኩባንያው ‘የቆዳ ከተማ’ የሚል ስያሜ እያገኘች በመጣችው ሞጆ ከተማ ግንባታውን ማካሄድ በጀመረው ፋብሪካ፣ በቆዳ ዘርፍ የሚሠሩትን ሁሉንም ሥራዎች አጠቃሎ ያከናውናል፡፡ ቆዳ፣ ጫማ፣ የጫማ ክፍሎች፣ ጓንትና ሌሎችንም ምርቶች በአንድ ፋብሪካ ቅጥር ግቢ ውስጥ በማምረት ለውጭ ገበያ ያቀርባል ብለዋል፡፡ በዚህም መሠረት አምስት ሚሊዮን ካሬ ሜትር ቆዳ በወር፣ እንዲሁም 35 ሺሕ ጥንድ ጫማዎችን በቀን ወይም አሥር ሚሊዮን ጥንድ ጫማዎችን በዓመት የማምረት ዕቅድ እንዳለውም ኮል ለሪፖርተር ገልጸዋል፡፡

    ኩባንያው በቦሌ ለሚ ኢንዱስትሪ ፓርክ ውስጥ 16.6 ሔክታር መሬት ላይ ያረፉ ሁለት ማምረቻ ፋብሪካዎችን ከመንግሥት በመከራየት መሥራት በጀመረ በአምስት ወራት ውስጥ ምርት መጀመሩ ሲገለጽ፣ ባለፈው ዓመት በነበረው እንቅስቃሴም አንድ ኮንቴይነር ጫማ ለውጭ ገበያ ማቅረቡን ኮል ይፋ አድርገዋል፡፡ በዚህ ዓመት ከአምስት እስከ ስድስት ኮንቴይነር ጫማ ወደ ውጭ ይላካል ተብሎ እንደሚጠበቅም ተነግሯል፡፡

    ጆርጅ ሹ ሙሉ ለሙሉ የማምረት አቅሙ ላይ ሲደርስ በመጪው አምስት ዓመት ውስጥ በአገሪቱ እየመነጨ ካለው 130 ሚሊዮን ዶላር የላቀ 200 ሚሊዮን ዶላር ገቢ የማስገኘት አቅም ሊኖረው እንደሚችልም ህንዳዊው ሥራ አስኪያጅ ይናገራሉ፡፡ መንግሥት ለአዲሱ ፋብሪካ ግንባታ የሚለውን 60 ሔክታር መሬት ከማቅረብ ባሻገር፣ ለግንባታ ግብዓት የሚውሉ ጥሬ ዕቃዎችን ለማውጣት የሚስያችል ካባ (Quary) ማውጫ ቦታን ጨምሮ የኤሌክትሪክ ኃይል ማቅረቡንም ኮል ተናግረዋል፡፡ ይህም ሆኖ ነገሮች በሚፈለገው ፍጥነት እየተጓዙ አለመሆናቸውን ከመግለጽ አልተቆጠቡም፡፡ ለመነሻ ካፒታል 150 ሚሊዮን ብር ኢንቨስት በማድረግ ወደ ኢትዮጵያ የገባው ጆርጅ ሹ፣ በቦሌ ለሚ ያለው ፋብሪካ በሙሉ አቅሙ መሥራት ሲጀምር ከአንድ ሺሕ በላይ ቋሚ ሠራተኞች ያስፈልጉታል ተብሏል፡፡ 

    መንግሥት ባገባደደው የአምስት ዓመት ዕቅድ ውስጥ በአገሪቱ አምስት ያህል የኢንዱስትሪ ፓርኮችን የመገንባት ዓላማ ቢኖረውም፣ እውን ማድረግ የቻለው ግን በቦሌ ክፍለ ከተማ ቦሌ ለሚ በተባለው አካባቢ የተገነባውን የኢንዱስትሪ ፓርክ ብቻ ነው፡፡ በዚህ ፓርክ ውስጥ 20 የውጭ ኩባንያዎች የፋብሪካ ቦታ በሊዝ ያገኙ ሲሆን፣ ጆርጅ ሹ ከእነዚህ ውስጥ አንዱ ነው፡፡ መንግሥት አምስት ማምረቻ ፋብሪካዎችን ለመገንባት 349 ሚሊዮን ብር ወጪ ማድረጉን ገልጾ እንደነበር ይታወሳል፡፡ ተጨማሪ 15 ማምረቻዎችን ለመገንባት ግን 1.76 ቢሊዮን ብር ያስፈልገዋል፡፡፡ በምዕራፍ ሁለት በቦሌ ለሚ ለሚገነባው የኢንዱስትሪ ፓርክ 186 ሔክታር መሬት መከለሉ ሲታወቅ፣ የዓለም ባንክም 250 ሚሊዮን ዶላር ብድር መፍቀዱ ይታወቃል፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች