Thursday, August 18, 2022
ሌሎች ዓምዶች
    - ማስታወቂያ -
    - ማስታወቂያ -

    ጋራድ ሕንፃ አካባቢ የሚገኙ ነዋሪዎች ለመልሶ ማልማት ፕሮጀክት ሊነሱ ነው

    - ማስታወቂያ -

    ተዛማጅ ፅሁፎች

    የአዲስ አበባ ከተማ አስተዳደር በልደታ ክፍለ ከተማ ከጋራድ ሕንፃ እስከ ቶታል ማደያ ድረስ፣ በጀርባው ደግሞ እስከ ጎላ ሚካኤል ቤተ ክርስቲያን የሚደርሰው አሥር ሔክታር የሚጠጋ መሬት ላይ የሚገኙ ነዋሪዎችን ለማንሳት ማስጠንቀቂያ ሰጠ፡፡

    የአዲስ አበባ ከተማ አስተዳደር በልደታ ክፍለ ከተማ የሚያካሂደውን መልሶ ማልማት ፕሮጀክት በማስፋት፣ ይህንን አዲስ ፕሮጀክት በሚቀጥለው በጀት ዓመት ለመጀመር ዕቅድ መያዙ ታውቋል፡፡

    ይህ ፕሮጀክት በልደታ ክፍለ ከተማ ከተካሄዱት የሰንጋ ተራ፣ የልደታና የተክለሃይማኖት መልሶ ማልማት ፕሮጀክቶች ቀጣይ ሲሆን፣ በተለይ እስከ ጥር 2008 ዓ.ም. ድረስ ነዋሪዎችን ሙሉ ለሙሉ ለማንሳት እንደታቀደና የሦስት ወራት የዝግጅት ጊዜ እንደተሰጠ፣ የክፍለ ከተማው የመሬት ልማትና ማኔጅመንት ጽሕፈት ቤት ኃላፊ አቶ ለምለም ገብረ ሚካኤል ለሪፖርተር ገልጸዋል፡፡

    ከዚህ ፕሮጀክት ፊት ለፊት የሚገኘው የተክለሃይማኖት መልሶ ማልማት ተነሺ  ነዋሪዎችን ሙሉ ለሙሉ የማንሳት ሥራ በአዲሱ በጀት ዓመት እንደሚጠናቀቅ አቶ ለምለም ገልጸዋል፡፡ የዚህ ፕሮጀክት መረጃ ተሰብስቦ፣ ካሳና ምትክ ቦታ ተሰጥቶ ነዋሪዎችን ማንሳት ቢጀመርም፣ ቦታውን ክፍት ለማድረግ የተወሰኑ ነዋሪዎች ሒደቱንና የስም ዝውውር ያላጠናቀቁ በመሆናቸው አሁንም ያልተነሱ ነዋሪዎች በቦታው ላይ ይገኛሉ፡፡

    አቶ ለምለም እንዳሉት፣ ከመሬቱ ላይ ነዋሪዎች ሲነሱ በአክሲዮን ለተደራጁ ማኅበራት በሕጉ መሠረት ግንባታ የሚያካሂዱበት ቦታ ይሰጣቸዋል፡፡ ከተክለሃይማኖት መልሶ ማልማት ግንቦት 2006 ዓ.ም. የተነሱ ነጋዴዎች ግን ቅሬታ አላቸው፡፡

    በአካባቢው ከሚገኙ አክሲዮን ማኅበራት አንዱ የሆነው የጥቁር አንበሳ አክሲዮን ማኅበር ሰብሳቢ አቶ ተስፋዬ አበበ ለሪፖርተር እንደገለጹት፣ ከንግድ ቦታቸው ከተነሱ ከአንድ ዓመት በላይ ቢሆንም፣ ለግንባታ የሚሆን ቦታ ስላልተሰጣቸው ከፍተኛ መጉላላት እየደረሰባቸው ነው፡፡ ነጋዴዎቹ በአክሲዮን ተደራጅተው ገንዘባቸውን ቢያዋጡም፣ ገንዘቡ ያለ ሥራ መቀመጡ እያሳሰባቸው መሆኑን ጨምረው ተናግረዋል፡፡

    በኅዳር 2004 ዓ.ም. የፀደቀው የከተማ ቦታ በሊዝ ስለመያዝ የወጣው አዋጅ፣ ከመልሶ ማልማት ቦታዎች የሚነሱ ነጋዴዎች በተደራጁበት አክሲዮን አማካኝነት በነፍስ ወከፍ 25 ካሬ ሜትር መሬት እንዲሰጣቸው ተደንግጓል፡፡ በዚህ መሠረት ባለአክሲዮኖቹ በጋራ የሚሰጣቸውን መሬት ለማልማት ዝግጁ ቢሆንም፣ አስተዳደሩ ነዋሪዎችን አንድ ላይ ማንሳት ባለመቻሉና መሬቱንም ማስረከብ ባለመቻሉ ከተለያዩ አቅጣጫዎች ቅሬታዎች እየተነሱ ይገኛሉ፡፡

    አቶ ለምለም እንደሚሉት፣ ቦታው ላይ ያሉ ነዋሪዎች አንድ ላይ ካልተነሱ በቀር ሽንሸና ማካሄድ አይቻልም፡፡ ነገር ግን ችግሩ መከሰቱን ጠቅሰው ክፍለ ከተማው ቦታውን በአፋጣኝ ነፃ በማድረግ ለአልሚዎች እንደሚያቀርብ አስታውቀዋል፡፡

    የአዲስ አበባ ከንቲባ አቶ ድሪባ ኩማ ባለፈው ወር ለከተማው ምክር ቤት ባቀረቡት ሪፖርት ከ2006 ዓ.ም. በፊት የተጀመሩ 186 ሔክታር መሬት የሚሸፍኑ የመልሶ ማልማት ቦታዎች ካሳ በመክፈል፣ ምትክ ቦታና ቤት በመስጠት በኩል ያለው አፈጻጸም 82 በመቶ ነው ብለዋል፡፡ ከዚህ በተጨማሪ በ111 ሔክታር መሬት ላይ አዲስ የመልሶ ማልማት ሥራ ላይ የተጀመረ ቢሆንም፣ የሥራ አፈጻጸሙ 25 በመቶ መሆኑን ገልጸዋል፡፡ አፈጻጸሙን ዝቅተኛ የሆነበት ምክንያት ትኩረት ሰጥቶ ያለ መሥራት በመሆኑ፣ በቀጣይ ትኩረት ሰጥቶ መሥራት ያስፈልጋል በማለት ከንቲባው በሪፖርታቸው ላይ ገልጸዋል፡፡

    በሚቀጥለው በጀት ዓመት የሚጀመረው የጋራድ-ጎላ ሚካኤል መልሶ ማልማት ፕሮጀክት መረጃ የመሰብሰብ፣ ኅብረተሰቡን የማወያየትና ለካሳ የሚያስፈልግ ሀብት በመተንተን ላይ እንደሚገኝ አቶ ለምለም አስረድተዋል፡፡  

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች