Monday, August 8, 2022
ሌሎች ዓምዶች
    - Advertisment -
    - Advertisment -

    ክቡር ሚኒስትር

    [ክቡር ሚኒስትሩ ከአማካሪያቸው ጋር እያወሩ ነው]

    • እንዴት አለፈ ክቡር ሚኒስትር?
    • ምኑ?
    • ግምገማው?
    • እንግዲህ የመጀመሪያው ዙር በድል ተጠናቋል፡፡
    • እርስዎ ለነገሩ በግምገማ ጥርስዎን ነቅለዋል፡፡
    • ምንም ያህል በግምገማ ጥርስህን ብትነቅልም፣ ጨዋታው ካልገባህ ልትነቀል ትችላለህ፡፡
    • ከምን?
    • ከሥልጣንህ ነዋ፡፡
    • ክቡር ሚኒስትር እርስዎ ይነቅላሉ እንጂ ይነቀላሉ እንዴ?
    • ከፍተህ ከተጫወትክ መነቀልህ አይቀርም፡፡
    • ግምገማው እንደ ቦክስ ጨዋታ ያደርገዋል ማለት ነው?
    • የማያደርገውን ነገር ጠይቀኝ፡፡
    • ለማንኛውም ዋናው በድል መወጣትዎ ነው፡፡
    • ወሳኙ እኮ ቀጣዩ ታላቁ ጉባዔ ነው፡፡
    • ያው እንደዚኛው ግምገማ ይወጡታላ?
    • የዚህኛው ጨዋታ ትንሽ ከበድ ይላል፡፡
    • ያው የለመዱትን ታክቲክ መተግበር ነዋ፡፡
    • እሱ ነው እኮ ያስጨነቀኝ፡፡
    • እንዴት?
    • ግምገማው ላይ ስልክ አይገባም እየተባለ ነው፡፡
    • ለምን?
    • እንዴ የባለፈውን ግምገማ እኮ ያሸነፍነው በስልካችን ነው፡፡
    • እንዴት?
    • አንዱ ሲገመገም ለአንዱ ቴክስት ታደርጋለህ፡፡
    • እሺ፡፡
    • በላከው ቴክስት ሲገመገም ሌላ ቴክስት ለሌላ ሰው ትልካለህ፡፡
    • እሺ፡፡
    • በቃ  እንዲህ እያደረግህ ተገምጋሚውን ትንፋሽ ታሳጥረዋለህ፡፡
    • ወይ ጉድ?
    • ከዛም አዳራሹ ሐዘን ቤት እስኪመስል ድረስ ታስለቅሰዋለህ፡፡
    • አይጣል ነው መቼም፡፡
    • ከዛም አንተን መገምገም ስለማይችል አንገቱን አስደፍተህ ታስወጣዋለህ፡፡
    • የሚገርም ታክቲክ ነው፡፡
    • በዚህ ታክቲክ ነው እንግዲህ ድል የነሳነው፡፡
    • ኔትወርኩ ግን እንዴት ነበር?
    • ኔትወርክህማ ወሳኝ መሆን አለበት፡፡
    • ማለቴ የቴሌው?
    • እሱ ነበር ችግር ሲፈጥርብን የነበረው፡፡
    • ታዲያ አሁን እንዴት ሊያደርጉ ነው?
    • ስለምኑ?
    • ማለቴ ስልክ የማይገባ ከሆነ?
    • እኔም ማጠፊያው አጥሮብኛል እባክህ?
    • ታዲያ በወረቀት ለምን አያደርጉትም?
    • ምኑን?
    • መልዕክት መላላኩን፡፡
    • ከጻፍኩት በኋላ በምን እልከዋለው?
    • ያው አጣጥፈው መወርወር ነዋ፡፡
    • በልጅነታችን ፈተና ላይ መልስ እንደተላላክነው?
    • እህሳ?
    • ኧረ አይታሰብም፡፡
    • ካልሆነ መቅረት ነው፡፡
    • ምን ብዬ አቀራለሁ?
    • አሞኛል ብለው ነዋ፡፡
    • ብችልማ ደስ ይለኛል፡፡
    • አይቻልም እንዴ?
    • ቢያመኝ ራሱ በቃሬዛ መጥቼ እገመግማለሁ እንጂ መቅረት አልችልም፡፡
    • ታዲያ ምን ተሻለ?
    • በፀሎትህ አስበኝ፡፡
    • በየትኛው ፀሎት?
    • በአብዮታዊ ዴሞክራሲ!

     

    [የክቡር ሚኒስትሩ ወዳጅ የሆነ ዳያስፖራ ወዳጃቸው ደወለላቸው]

    • ወደዳችሁት አቀባበላችንን?
    • ደስ የሚያሰኝ ነበር፡፡
    • አገሪቷንስ እንዴት አገኛችኋት?
    • ዕድገት መኖሩን ልመሰክር እወዳለሁ፡፡
    • እንግዲህ እናንተም በዚህ ዕድገት መሳተፍ አለባችሁ፡፡
    • ለዛም ብለን ነው ወደዚህ ያቀናነው፡፡ ግን…
    • የምን ግን ነው?
    • አሁንም ሊሻሻሉ የሚገባቸው ነገሮች አሉ፡፡
    • ምን ይሻሻል?
    • ቢሮክራሲው፡፡
    • እ…
    • ሙስናው፡፡
    • እ…
    • መልካም አስተዳደሩም፡፡
    • ያው እንግዲህ ታዳጊ ደሞክራሲ ስላለን መታገስ አለባችሁ፡፡
    • ክቡር ሚኒስትር የ24 ዓመት ጎረምሳ ታዳጊ ማለት አይከብድም?
    • ጀመርክ ፖለቲካህን?
    • እንዳልኩዎት ይቀይሩት፡፡
    • ምኑን?
    • ታዳጊን በጎረምሳ፡፡

    [ክቡር ሚኒስትሩ ትንሽ ስለጨነቃቸው ያለወትሯቸው በሥራ ቀን ግራውንድ ቴኒስ የሚጫወቱበት ቦታ ሄዱ፡፡ አንድ ወዳጃቸውን እዚያው አገኙ]

    • ምነው ያለወትሮው ክቡር ሚኒስትር?
    • ምን ላድርግ ትንሽ ጨንቆኝ ነው፡፡
    • ምን ያስጨንቆዎታል?
    • ይኸው ግምገማ ነዋ፡፡
    • ውይ ሳልጠይቅዎት እንዴት አለፈ?
    • የመጀመሪያዋን እንኳን በድል አጠናቅቄያታለሁ፡፡
    • እርስዎ እኮ በግምገማ አይታሙም፡፡
    • ቀጣዩ ጉባዔ እንኳን አስጨንቆኛል፡፡
    • እርስዎ ይገመግማሉ እንጂ አይገመገሙ?
    • ችግሩ የተገመገምኩ ቀን ነዋ፡፡
    • እሱን ነው መፍራት፡፡
    • አሁን እኮ ቢጨንቀኝ ነው የመጣሁት፡፡
    • ፊትዎት ያስታውቃል፡፡
    • ለመሆኑ እነዚህ እነማን ናቸው?
    • እነማን ክቡር ሚኒስትር?
    • በርካታ አዳዲስ ሰዎች እኮ ናቸው ያሉት?
    • ክቡር ሚኒስትር እርስዎ እኮ ጠፍተዋል፡፡
    • ምን ላድርግ ሥራ በዛ?
    • ለዛ ነው አዲስ ሰው የበዛብዎት፡፡
    • ለመሆኑ ይኼ ማን ነው?
    • አዲስ ነጋዴ ነው፡፡

    [ግራውንድ ቴኒስ ከሚጫወቱት አንድ አዲስ ነጋዴ ወደ ክቡር ሚኒስትሩ ጠጋ ብሎ ወሬ ጀመሩ]

    • እንዴት ነዎት ክቡር ሚኒስትር?
    • አይቼህ አላውቅም አዲስ ነህ?
    • መምጣት ከጀመርኩ ወራት አለፉ፤ እርስዎ መጥተው ስለማያውቁ ነው፡፡
    • ታዲያ እዚህ እንዴት መምጣት ጀመርክ?
    • ያው እርስዎን ለማግኘት ነዋ፡፡
    • እኔን ለማግኘት እዚህ ድረስ?
    • ሲኦልስ ና ቢሉኝ አልመጣም እንዴ?
    • እኮ ለምን?
    • እርስዎን ለማግኘት ነዋ፡፡
    • ምን አደርግልሃለው?
    • እርስዎ በር መሆንዎትን ሰምቻለሁ፡፡
    • የምን በር?
    • የሁሉም በር፡፡
    • እሱስ ልክ ብለሃል፡፡
    • ለማንኛውም እንኩ ይህቺን፡፡
    • ምንድን ናት?
    • ከእንግሊዝ ያመጣሁልዎት ስኒከር ናት፡፡
    • እንግሊዝም ሄደሃል?
    • አዎን፡፡
    • ሲያዩህ እኮ አዲስ አበባ ለመጀመሪያ ጊዜ የመጣህ ነው የምትመስለው፡፡
    • ለማንኛውም ጫማውን ከወደዱት ኮንቴይነር ሙሉ ላስመጣልዎት እችላለሁ፡፡
    • ኧረ አንተ እንደዚህ አይባልም፡፡
    • ይቅርታ አጠፋሁ?
    • ብዙ መማር ያለብህ ነገር አለ፡፡
    • ጥሩ ተማሪ ለመሆን ዝግጁ ነኝ፡፡
    • እስቲ እናያለን፡፡
    • እርስዎም ጥሩ አስተማሪ መሆንዎትን ሰምቻለሁ፡፡
    • አልተሳሳትክም፡፡

    [የክቡር ሚኒስትሩ ወዳጅ ሚኒስትር ደወሉላቸው]

    • አሁንስ ሰለቸን ክቡር ሚኒስትር፡፡
    • ምኑ?
    • ማደራደሩ፡፡
    • ለምን?
    • አልስማማ አሉ፡፡
    • እስቲ ለወጥ ያለ ቦታ አደራድሯቸው፡፡
    • ጉልቻ ቢለወጥ ወጥ አያጣፍጥም አሉ፡፡
    • እንዴት?
    • ያልተሞከረ ነገር የለም እኮ?
    • አስረዳኝ እስቲ፡፡
    • እዚህ ሲመጡ የሚያርፉት እጅግ ዘመናዊ ሆቴሎች ውስጥ ነው፡፡
    • አውቃለሁ፡፡
    • እሱም ከሰለቻቸው ብለን ከከተማ ውጪም ሞከርናቸው፡፡
    • አይ ኖው፡፡
    • ብቻ ያልተሞከረ ነገር የለም፡፡
    • ቀብጠው ይሆን እንዴ?
    • መሰለኝ፡፡
    • ታዲያ ምን ተሻለ?
    • አሁን እኮ ካልተስማሙ ጉዳዩን UN ሊረከበው ይችላል፡፡
    • እሱማ አይሆንም፡፡
    • ለምን?
    • እኛ እኮ የአፍሪካ ጀርመን ነን፡፡
    • እንዴት?
    • ሚዲያ አትከታተልም እንዴ?
    • ኧረ እከታተላለሁ፡፡
    • ታዲያ ጀርመን የአውሮፓ ፈላጭ ቆራጭ አይደለች?
    • እሱማ ልክ ነው፡፡
    • እኛም የአፍሪካ ፈላጭ ቆራጭ ነን፡፡
    • ደስ ይላል ክቡር ሚኒስትር፡፡
    • ስለዚህ እኛው እንደጀመርን እኛው እንጨርሰዋለን፡፡
    • ግድቡን ነው?
    • ድርድሩን፡፡

    [የክቡር ሚኒስትሩ የቅርብ ዘመድ ስለወለደች እሷን ለመጠየቅ ከሾፌራቸው ጋር እየሄዱ ነው]

    • ክቡር ሚኒስትር፡፡
    • አቤት፡፡
    • ግርማ ሞገስዎት እኮ ደስ ይላል፡፡
    • እንዴት?
    • ስብሰባ ላይ ያለዎት ግርማ ሞገስ ደስ ይላል፡፡
    • አንተ ግን ብዙም አልተገመገምክም አይደል?
    • እኔ እኮ ድሃ ነኝ፤ በምን እገመገማለሁ ብለው ነው?
    • አገሪቱ በ11 ፐርሰንት እያደገች ድሃ ነኝ ትላለህ?
    • ማደግማ አድጌያለሁ፡፡
    • ጐሽ፡፡
    • ያደኩት ግን በ0.11 ፐርሰንት ነው፡፡
    • ነገረኛ፡፡

    [ክቡር ሚኒስትሩ የወለደችው ዘመዳቸው ጋር ደረሱ፤ ከሌላ ዘመዳቸው ጋር ማውራት ጀመሩ]

    • እንዲያውም ክቡር ሚኒስትሩ ይገላግሉን፡፡
    • ምንድን ነው የምገላግላችሁ?
    • ለልጅቷ ስም እያወጣን ነበር፡፡
    • እሺ ማን አላችኋት?
    • እማሆይ ጽዮን አሏት፡፡
    • ጥሩ ስም ነው እኮ ታዲያ?
    • አይ የልጅቷ አጎት ከፌዴራል ሥርዓታችን ጋር የሚሄድ ስም መውጣት አለበት እያለ ነው፡፡
    • ታዲያ ማን አላት?
    • ብዙነሽ፡፡
    • እርሱ ግን የቀረ ስም ነው፡፡
    • አክስቷ ሌላ ሐሳብ አምጥታ ነበር፡፡
    • ምን አለቻት?
    • ህዳሴ፡፡
    • ይሄ እኮ ጥሩ ስም ነው፡፡
    • እናቷ ግን አልወደደችውም፡፡

    [የክቡር ሚኒስትሩ ወዳጅ ዳያስፖራ ቢደውልላቸውም ስልኩን አላነሱትም]

    • እንደውም ሐሳብ መጣልኝ፡፡
    • ማን እንበላት ክቡር ሚኒስትር?
    • ዳያስፖራ!

    በብዛት የተነበቡ ፅሁፎች

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...

    የዩኒቨርሲቲ መምህራን ከደመወዝ ጭማሪና ከዕርከን ዕድገት ጋር በተያያዘ መንግሥትን አስጠነቀቁ

    ‹‹የደመወዝ ጉዳይ የትምህርት ሚኒስቴር ብቻ ሳይሆን የሲቪል ሰርቪስ ኮሚሽንም...
    - Advertisment -

    ትኩስ ፅሁፎች

    በዓለም ጂኦ ፖለቲካ መድረክ የኢትዮጵያ ተፈላጊነት

    የአሜሪካው የውጭ ጉዳይ ሚኒስትር አንቶኒ ብሊንከን በሦስት የአፍሪካ አገሮች...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...

    በውዝግብ የታጀበው የኢትዮጵያ እግር ኳስ ፌዴሬሽን ምርጫ

    ፊፋ ከምርጫው በፊት የሥነ ምግባር ባለሙያ ሊልክ መሆኑ ተሰምቷል የኢትዮጵያ...
    spot_img

    ተዛማጅ ፅሁፎች

    [ክቡር ሚኒስትሩ በስንዴ የተሸፈኑ ሰፋፊ እርሻዎች ያሉበትን ሁኔታ ለመገምገም ከስንዴ ምርት ድጋፍና ክትትል ኮሚቴ ሰብሳቢ ጋር እየመከሩ ነው] 

    ክቡር ሚኒስትር እንደነገርክዎት በሁሉም ስንዴ አብቃይ አካባቢዎቻችን ያሉ አርሶ አደሮች ጥሪያችንን ተቀብለው መሬታቸውን በኩታ ገጠም አርሰው በስንዴ ዘር ሸፍነዋል። በጣም ጥሩ ዜና ነው። በጣም እንጂ። የሚገርምዎት...

    [ክቡር ሚኒስትሩ የሚመሩት የሥራ አስፈጻሚ ኮሚቴ ስብሰባ አጀንዳ አድርጎ በያዘው ወቅታዊ የፀጥታና ደኅንነት ጉዳዮች ላይ ትኩረት በመስጠት ቢጀመርም በስተመጨረሻ አጀንዳውን ስቶ ስለ መዋደድ እየተጨቃጨቀ...

    በዛሬው መደበኛው መድረካችን አጀንዳ የተለመደው የፀጥታና ደኅንነት ጉዳይ ይሆናል። ሌላ አጀንዳ የምታስይዙት አጀንዳ ከሌለ በቀር ማለቴ ነው። ክቡር ሚኒስትር... እሺ ...ቀጥል አመሰግናለሁ ክቡር ሚኒስትር። መደበኛ አጀንዳው እንደተጠበቀ...

    [ክቡር ሚኒስትሩ ወደ መኖሪያ ቤታቸው ሲገቡ ባለቤታቸው የኢትዮጵያ አትሌቶች በዓለም ሻምፒዎና መንገሣቸውን እያነሱ ደስታቸውን ሲገልጹ አገኟቸው]

    እሰይ አገሬ... እሰይ አገሬ እልልል ምን ተገኘ ደግሞ ዛሬ? የአትሌቶቻችንን ድል ነዋ! በክፉ ሲነሳ የቆየውን የአገራቸውን ስም በወርቅ እያደሱ እኮ ነው?  አየሽ፣ መንግሥት የአገራችን ችግር ያልፋል ስሟም...