Thursday, August 18, 2022
ሌሎች ዓምዶች
    - ማስታወቂያ -
    - ማስታወቂያ -

    የኢትዮጵያ ንግድ ምክር ቤትና ያልተለመደው ጠቅላላ ጉባዔው

    - ማስታወቂያ -

    ተዛማጅ ፅሁፎች

      – መተዳደሪያ ደንቡን ያሻሽላል

    የኢትዮጵያ ንግድና ዘርፍ ማኅበራት ምክር ቤት የሁለት ዓመት ሪፖርቱን የሚያቀርብበት ጠቅላላ ጉባዔውን እንደሚያካሂድ አስታውቋል፡፡ የንግድ ምክር ቤቱ አመራሮች ከትናንት በስቲያ ሰኞ መስከረም 3 ቀን 2007 ዓ.ም. በሰጡት ጋዜጣዊ መግለጫ ላይ የዘንድሮው ጠቅላላ ጉባዔ ከዚህ በፊት ባልተለመደ ሁኔታ የሁለት ዓመት ሪፖርት የሚቀርብበት ምክንያት አለው ይላሉ፡፡ በዚህ ጠቅላላ ጉባዔ ያልተለመደ ነው የተባለው ሌላው ክስተት ደግሞ በጠቅላላ ጉባዔው ላይ ፕሬዚዳንት ዶ/ር ሙላቱ ተሾመንና ሌሎች የመንግሥት ባለሥልጣናትን የሚሸልምበት በመሆኑ ነው፡፡ ከዚሁ መግለጫ ጋር ተያይዞ ጋዜጠኞች በተለያዩ ጉዳዮች ላይ ጥያቄ ያቀረቡ ሲሆን፣ በተለይ የሁለት ዓመት ሪፖርት በአንድ ላይ ለምን ቀረበ? ንግድ ምክር ቤቱ የንግዱ ኅብረተሰብ ጥያቄ በአግባቡ እየመለሰ አይደለም የሚሉና ሌሎች ጥያቄዎችም ቀርበው ነበር፡፡ ጋዜጣዊ መግለጫና ከጋዜጠኞች ለቀረቡ ጥያቄዎች የንግድ ምክር ቤቱ ፕሬዚዳንት አቶ ሰለመን አፈወርቅና ዋና ጸሐፊው አቶ ጋሻው ደበበ የተሰጠውን መልስ በማጠናከር እንደሚከተለው ቀርቧል፡፡

    የንግድ ምክር ቤቱ ጉባዔና የሁለት ዓመት ሪፖርት

    ንግድ ምክር ቤቱ የዘንድሮው ጠቅላላ ጉባዔ የሁለት ዓመት ሪፖርት የሚቀርብበት መሆኑ ያልተለመደ ነው፡፡ ይህ ለምን ሆነ? የሚለውን ጥያቄም መልስ የሚያሻው ነው፡፡ የንግድ ምክር ቤቱ ፕሬዚዳንት አቶ ሰለሞን አፈወርቅ ግን የሁለት ዓመት ሪፖርት የሚቀርበው በምክንያት ነው ይላሉ፡፡

    እንደሳቸው ገለጻ ከዚህ ቀደም የተደረገው ጠቅላላ ጉባዔና ምርጫ የተካሄደው ሚያዚያ 30 ቀን 2006 ዓ.ም. ነበር፡፡ በኋላ በዓመቱ ግንቦት 2007 ዓ.ም. እንዳናካሂድ ደግሞ በሁለት ምክንያቶች አስቸጋሪ ነበር፡፡ ‹‹አንዱ ምክንያት አምስተኛው አገራዊ ምርጫ የሚካሄድበት ወቅት ስለነበርና ብዙ አባሎቻችን በዚህ ላይ ተሳታፊ ሊሆኑ ስለሚችሉ፤ እንዲሁም መራጮችም ስለሆኑ በዚህ ወቅት ጉባዔውና ማካሄድ አስፈላጊ ባለመሆኑ ነው፤›› ብለዋል፡፡ በመሀል ላይም የሰኔ ወር የበጀት መዝጊያ ወቅት ስለሆነ አንደኛውኑ የሁለቱን ዓመት ሪፖርት ማቅረብ ይሻላል ከሚል እምነት የሁለቱን ዓመት ሪፖርት አንድ ላይ ማድረጉ እንደተመረጠ አስረድተዋል፡፡ ሌላው ፕሬዚዳንት ዶ/ር ሙላቱ ተሾመ በጉባዔው ላይ እንዲገኙ ላቀረቡት ጥያቄ ምላሽ ለማግኘት የተወሰነ ጊዜ ማግኘት ስለነበረባቸውም ጉባዔው ጊዜ እንዲራዘም ስለመደረጉም ገልጸዋል፡፡

    በ2006 አጋማሽ ላይ ምርጫ ሲደረግ የ2006 ዓመታዊ ሪፖርት አለመቅረቡን ያስታወሱት አቶ ሰለሞን፣ በቀድሞ አመራርና የተሠራውን ሥራ ጨምሮ የ2006 እና የ2007 ዓ.ም. ሪፖርት ይቀርባል ብለዋል፡፡

    መተዳደሪያ ደንቡና የሚሻሻሉ አንቀጾች

    ከዓመታዊ ሪፖርቶቹ ሌላ በሐሙሱ ጠቅላላ ጉባዔ ላይ ቦርዱ ሊሻሻሉ ይገባቸዋል ያላቸውን አንዳንድ የመተዳደሪያ ደንቡ አንቀጾች በመለየትና ማሻሻያዎቹን በማከል ጠቅላላ ጉባዔው እንዲያፀድቀው ይቀርባል ተብሏል፡፡ የመተዳደሪያ ደንቡ ማሻሻያ እንዲደረግበት የተፈለገበት የራሱ የሆነ ምክንያት ያለው ሲሆን፣ ከዚህ ቀደምም ንግድ ምክር ቤቱም ሆነ አባል ንግድ ምክር ቤቶች ከጊዜው ጋር የሚራመድ ማሻሻያ የማድረግ ልምድ ያለ በመሆኑ አሁንም ተጨማሪ ማሻሻያ በማስፈለጉ እንደሆነ ተጠቅሷል፡፡

    ከዚህ ቀደም በመተዳደሪያ ደንቡ ውስጥ የነበረና አሁን ግን ካለው ዕድገት ጋር መራመድ የሚኖርባቸው አንዳንድ አንቀጾችን ለማሻሻልም የክልል ንግድ ምክር ቤቶች ይካተትልኝ ያሉትን ሐሳብ የያዘ ጭምር ስለመሆኑ ፕሬዚዳንቱ ገልጸዋል፡፡ የማሻሻያ ሐሳቡ ወደ ጠቅላላ ጉባዔው ከመቅረቡ በፊትም በተለያዩ መድረኮች ላይ የተመከረባቸው ናቸው፡፡ በተለይ በሐሙሱ ጠቅላላ ጉባዔ ላይ ይፀድቃል ተብሎ ከሚጠበቀው የንግድ ምክር ቤቱ ማሻሻያ ውስጥ የንግድ ምክር ቤቱን የአመራር አባላት አመራረጥና  የምርጫ ሥርዓቱን የሚመለከቱ አንቀጾች ይገኙባቸዋል፡፡

    በዚህም መሠረት በንግድ ምክር ቤቱ ውስጥ በአመራር አባልነት የተቀመጡ ተመራጮች የኃላፊነት ጊዜን የሚገድብ አንቀጽ እንዲካተት ይደረጋል፡፡ በሚሻሻሉት አንቀጾች ዙሪያ የንግድ ምክር ቤቱ ኃላፊዎች በዝርዝር ማብራሪያ ባይሰጡም፣ በንግድ ምክር ቤቱ በምርጫና በአመራር አባልነት የጊዜ ገደብ ዙሪያ ክፍተት የሚታይ በመሆኑ ለዓመታት በቦርድ አባልነት የቆዩ የቦርድ አባላት በሌሎች እንዲተኩና አዳዲስ ኃይል እንዲመጣ ለማድረግ የሚያስችል ማሻሻያ ይደረጋል ተብሏል፡፡ በተደጋጋሚ ለቦርድ አባልነት ለመመረጥ የሚደረገው እንቅስቃሴ ለማስቀረት አዲስ አንቀጽ በመተዳደሪያ ደንቡ ውስጥ መካተቱ ጠቀሜታ ያለው በመሆኑ ማሻሻያው እንዳስፈለገ ተጠቅሷል፡፡

    እንደ ምንጮች ገለጻ ከሆነ ደግሞ አሁን ባለው መተዳደሪያ ደንብ ውስጥ የሥራ ጊዜያቸውን ያጠናቀቁ ሰዎች ተመልሰው በሌላ ጊዜ እንዳይወዳደሩ የሚያደርግ ክልከላ የሌለው፣ አዳዲስ አመራሮች እንዳይመጡ እንቅፋት ስለሆነ የተሻሻለው አንቀጽ ግን ይህንን ክልከላ የሚያስቀምጥ ይሆናል ተብሎ ይጠበቃል፡፡ አንድ የንግድ ምክር ቤት አባል መስፈርቶች ምን መሆን አለባቸው የሚለውን ጉዳይ በዝርዝር የሚመልስ አንቀጽም ይካተታል፡፡

    ከዚህም ሌላ የብሔራዊ ንግድ ምክር ቤቱ አባል የሆኑ ንግድ ምክር ቤቶች ዓመታዊ መዋጮዎቻቸውን በተቀመጠላቸው የጊዜ ገደብ እንዲከፍሉ የሚያስችል ሥርዓት እንዲኖር ለማድረግ የሚያግዝ አንቀጽ በማሻሻያ ውስጥ ተካትቷል ተብሏል፡፡ እነዚህ ማሻሻያ አንቀጾች ግን ሥራ ላይ የሚውሉት ጠቅላላ ጉባዔው ሲያፀድቃቸው እንደሆነም አቶ ሰለሞን ተናግረዋል፡፡

    የንግዱ ኅብረተሰብ ጥያቄ

    በተለያዩ ወቅቶች እንደተሰማው ንግድ ኅብረተሰቡ የተለያዩ ችግሮች ያሉበት የመሆኑን ያህል ለችግሮቹ መፍትሔ እያገኘ አይደለም የሚለው አስተያየት በተደጋጋሚ ይነሳል፡፡ በተለይ በታክስ ጉዳይ ብዙ ችግሮች ያለበት የመሆኑን ያህል ይኼ ነው የሚባል መፍትሔ አልተገኘም የሚለውም ጉዳይ የብዙዎች አስተያየት ሆኖ ቆይቷል፡፡ ችግሮቹ እንዲፈቱ የንግድ ምክር ቤቶች ሚና ከፍተኛ የመሆኑን ያህል በዚህ ረገድ የተሠሩት ሥራ አጥጋቢ ባለመሆናቸው ቅሬታዎች ስለመፈጠሩ ይነገራል፡፡ እንዲያውም ንግድ ምክር ቤቱ ምንም እየጠቀመን አይደለም የሚሉ አስተያየቶች የሚነሱ በመሆኑ በዚህ ዙሪያ የንግድ ምክር ቤቱ ምላሽ ምንድነው? የሚል ጥያቄ አስነስቷል፡፡ በዕለቱም ይህንኑ አስተያየት መሠረት ያደረገ ጥያቄ ቀርቧል፡፡

    ለእነዚህ ጥያቄዎች አቶ ሰለሞን በሰጡት መልስ ‹‹አሉ በሚባሉ ችግሮች ዙሪያ ከሚመለከታቸው አካላት ጋር ተወያይተናል፤›› ይላሉ፡፡ ከንግድ ኅብረተሰቡ የሚቀርቡትን ጥያቄዎችና አሉብኝ ያላቸውን ችግሮች በመያዝና በማስጠናት ጭምር እንዲመከርባቸውና መፍትሔ እንዲያገኙ ጥረት መደረጉንም ገልጸዋል፡፡ ከጥናቱ ጐን ለጐንም የተጠቀሱትን ችግሮች መፍታት ደግሞ ሰላማዊ ንግድ እንዲኖር የሚያስችል በመሆኑ፣ መንግሥት ለራሱም ሲል ችግሮቹን እንዲፈታ ለማድረግ ተደረጉ ያሉትን ጥረቶች በዝርዝር ጠቅሰዋል፡፡

    ንግድ ምክር ቤቱ ችግሮቹ እንዲፈቱ የቱንም ያህል ቢጥር ግን ሙሉ ለሙሉ ተቀርፏል ማለት እንደማይቻልም ተናግረዋል፡፡ የንግድ ኅብረተሰቡ ደግሞ ችግሩ ሙሉ ለሙሉ ካልተቀረፈለት ደግሞ መጮሁ አይቀርም ያሉት አቶ ሰለሞን፣ ያልተፈቱ ችግሮችን እያሳየን እንዲፈቱ የማድረጉ ሥራ ግን አሁንም እንደቀጠለ መሆኑን ተናግረዋል፡፡

    ‹‹የኢትዮጵያ ንግድና ዘርፍ ማኅበራት ምክር ቤት ከተቋቋመባቸው ዓላማዎች መካከል ግንባር ቀደሞቹ ሦስት ናቸው፤›› በማለት ተጨማሪ ማብራሪያ የሰጡት አቶ ጋሻው ደበበም ችግሮችን ለመፍታት በርካታ ሥራዎች መሠራታቸውን ተናግረዋል፡፡

    ንግድና ኢንቨስትመንትን ማስፋፋት፣ አመቺ የሆነ የንግድና ኢንቨስትመንት ከባቢ እንዲፈጠር የውትወታ (የአድቮኬሲ) ሥራዎችን መሥራትና የግሉን ዘርፍ አቅም ማሳደግ በመሆኑ ንግድ ምክር ቤቱ በዚህ ረገድ ብዙ መሥራቱንም አስታውሰዋል፡፡

    ንግድና ኢንቨስትመንትን ለማስፋፋት ባለፉት ሁለት ዓመታት የአገር ውስጥና የውጭ ባለሀብቶችን ሥራዎችን ማገናኘትና በአገር ውስጥ ደግሞ የቢዝነስ ፎረሞችን የማዘጋጀት ሥራ ተሠርቷል ይላሉ፡፡

    ባለፉት ሁለት ዓመታትም 36 የሚሆኑ የቢዝነስ ፎረሞች በማዘጋጀት አንድ ሺሕ የውጭ ባለሀብቶችና አራት ሺሕ የአገር ውስጥ ባለሀብቶች እንዲገናኙ በማድረግ ለንግድና ኢንቨስትመንት አመቺ ሁኔታዎች መፈጠራቸውን በምሳሌነት ጠቅሰዋል፡፡

    ከዚህም ሌላ ኢትዮጵያ ውስጥ ለንግድና ኢንቨስትመንት አመቺ የሆነ ከባቢ እንዲፈጠር የተለያዩ ጥናቶች በማስጠናት ከመንግሥት ጋር በመመካከር ችግሮችን ለመፍታት የተሠራው ሥራ ውጤታማ እንደነበሩ አቶ ጋሻው ተናግረዋል፡፡

    ይህንንም አባባላቸውን በምሳሌ ለመግለጽ ባለፉት ሁለት ዓመታት ከአሥር በላይ የሚሆኑ ጉዳዮችን በማስጠናት ከመንግሥት ጋር ጠቅላይ ሚኒስትሩ በተገኙበት ጭምር ከተለያዩ መንግሥታዊ መሥሪያ ቤት ኃላፊዎች ጋር ምክክር ተደርጓል ብለዋል፡፡

    በንግድ ምክር ቤቱ ተጠንተው ከመንግሥት ጋር ከተወያዩባቸውና አወንታዊ ምላሽ የተገኘባቸው ብለው ያስቀመጡትም ነጥብ ነበር፡፡ የምክክር መድረኩ ከተቋሙ ባለፉት አራት ዓመታት ወደ አንድ መቶ የሚጠጉ አጀንዳዎች ተቀርፀው ከተመከረባቸው በኋላ 36 የሚሆኑት ተፈጻሚነት በማግኘታቸው የንግዱን ኅብረተሰብ ጥያቄ እንዲመለስ በማድረጉ ረገድ ውጤት እንደተገኘም አብራርተዋል፡፡ ቀሪዎቹንም ጉዳዮች ለማስፈጸም ከመንግሥትና ከግሉ ዘርፍ የተውጣጡ ኮሚቴዎች ጉዳዩን እየተከታተሉት ነው ተብሏል፡፡ ከመንግሥት ጋር በተደረገ ምክክር መፍትሔ አግኝተዋል ከተባሉት ጉዳዮች አንዱ የአክሲዮን ኩባንያዎች መቋቋም አንድ ሺሕ አባላት ካሉት ሁሉም ሄደው እንዲፈርሙ የሚያስገድደው አሠራር ነው፡፡ በዚህ አሠራር አንድ አክሲዮን ማኅበር ተመዝግቦ ሥራ ለመጀመር አንድና ሁለት ዓመት ይፈጅ ነበር፡፡ ይህ አካሄድ ችግር ያለበት መሆኑን በማሳየት ባቀረብነው ሐሳብ መሠረት የባለአክሲዮኖች ፊርማ በተወካዮች እንዲካሄድ ለማድረግ ተችሏል፡፡ እንደ ጉምሩክ ያሉ መሥሪያ ቤቶች የአንድ መስኮት አገልግሎት እንዲጀመር ለማድረግ የተሠራው ሥራውም ሌላ መገለጫ ነው ተብሏል፡፡

    ንግድ ምክር ቤቱና አጋጠሙኝ ያላቸው ተግዳሮቶች

    በዚህ መግለጫ ላይ የንግድ ምክር ቤቱ ተግዳሮቶች ምንድናቸው የሚል ይገኝበታል፡፡ አቶ ሰለሞንም ብዙ የሚያጋጥሙ ችግሮች አሉ ይላሉ፡፡ የግል ዘርፉም የራሱ የሆነ ችግር አለ፡፡ የአቅም ችግር አለ፡፡ ብዙ ሥራዎችን የምንሠራው ከዕርዳታ ሰጪዎች በሚገኝ ድጋፍ እንደሆነ የገለጹት አቶ ሰለሞን፣ እንዲህ ያሉ ክፍተቶች በራሳችን እንዳንጠናከር የሚያደርጉ በመሆኑ የፋይናንስ አቅም አንዱ ፈተና እንደሆነ ተናግረዋል፡፡ ሆኖም ግን ይህንን ችግር በጥንካሬ እየተወጣን አቅም እየፈጠርን ነው ብለዋል፡፡ ይህም ጥንካሬ በተለያዩ አጋጣሚዎች ከመንግሥት ጋር እንድንመክር ዕድል የሰጠንም ነው ይላሉ፡፡

    ንግድ ምክር ቤቱ እንደተግዳሮት የሚያየው ሌላው ጉዳይ ደግሞ ከታክስ ጋር ያሉ ችግሮችን ለመፍታት ያጋጠሙ ችግሮች መኖራቸው ነው፡፡ በንግድ ምክር ቤቶች አደረጃጀት ላይ ያለውን ችግርም ተጠቅሷል፡፡ ከዚህም ሌላ የግል ዘርፉ ወደ ማኑፋክቸሪንግ ዘርፍ እንዲገባ ማድረግም ሌላው ችግር ነበር፡፡ የግል ዘርፉ ወደ ማኑፋክቸሪንግ ዘርፍ እንዲገባ ግፊት የሚያደርጉ መሆኑንም ገልጸዋል፡፡ ነገር ግን መገፋፋቱና ሕግ ማውጣት ብቻ ሳይሆን ሕጉ ራሱ ተግባራዊ ያልነበረበትና መንግሥትም ራሱ የቤት ሥራውን ያልሠራበት መሆኑን ያመነበት ቢሆንም፣ ይህም ሥራ ፈታኝ ነበር ብለዋል፡፡

    ስለዚህ የግል ዘርፉ ከሸቀጥ ዝውውር ባለፈ ደረጃ እንዲያይ እየሠራን ነው ብለዋል፡፡ እነዚህ ተግዳሮቶች ግን በኢንቨስትመንት ላይ ተፅዕኖ ይፈጥራሉ የሚለውን ሐሳብ በማቅረብ ጭምር እንመክርበታለን ብለዋል፡፡ በተለይ የንግድ ምክር ቤቶች አደረጃጀት ጋር ተያይዞ ያለውን ክፍተት በተመለከተ መፍትሔ ሐሳብ እያዘጋጀን ነው ሲሉ ገልጸዋል፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች