Tuesday, August 16, 2022
ሌሎች ዓምዶች
    - ማስታወቂያ -
    - ማስታወቂያ -

    ፕሬዚዳንት ዶ/ር ሙላቱ የንግድ ምክር ቤቱ የበላይ ጠባቂ ሆኑ

    - ማስታወቂያ -

    ተዛማጅ ፅሁፎች

    ፕሬዚዳንት ዶ/ር ሙላቱ ተሾመ ከመስከረም 26 ቀን 2007 ዓ.ም. ጀምሮ የኢትዮጵያ ንግድና ዘርፍ ማኅበራት ምክር ቤት የበላይ ጠባቂ መሆናቸው ተገለጸ፡፡

    ከኢትዮጵያ ንግድና ዘርፍ ማኅበራት ምክር ቤት ያገኘነው መረጃ እንደሚያመለክተው፣ ፕሬዚዳንት ዶ/ር ሙላቱ የንግድ ምክር ቤቱ የበላይ ጠባቂ እንዲሆኑ ባቀረበላቸው ጥያቄ መሠረት ጉዳዩ ሲመረመር ቆይቶ አወንታዊ ምላሽ በማግኘቱ ነው፡፡

    ንግድ ምክር ቤቱ ፕሬዚዳንት ዶ/ር ሙላቱ የበላይ ጠባቂ እንዲሆኑት ጥያቄውን ያቀረበው ከሦስት ወራት በፊት ሲሆን፣ ጥያቄው ተቀባይነት ከማግኘቱ በፊት ተደጋጋሚ የደብዳቤ ልውውጦች ሲደረጉ ቆይተው ነበር፡፡

    ጥያቄው በፕሬዚዳንቱ ጽሕፈት ቤት በኩል ከሕግና ከአሠራር አንፃር የተለያዩ መረጃዎችን በመያዝ ከተመረመረ በኋላ የንግድ ምክር ቤቱን ጥያቄ መቀበላቸውን የኢትዮጵያ ንግድና ዘርፍ ማኅበራት ፕሬዚዳንት አቶ ሰለሞን አፈወርቅ ለሪፖርተር ገልጸዋል፡፡

    የፕሬዚዳንቱ ጽሕፈት ቤት የሕግ ክፍል የንግድ ምክር ቤቱ አጠቃላይ ክንውኖችን የሚያሳዩ መረጃዎች እንዲቀርቡለትና ይህንንም ከሕግ አንፃር ሲፈተሽ እንደነበር ታውቋል፡፡ ንግድ ምክር ቤቱ በአገር ውስጥም ሆነ በውጭ ያከናወናቸውን ማኅበራዊና ኢኮኖሚያዊ ክንውኖች የሚያሳይና ለዚህም የተሰጠውን ዕውቅና የሚያመለክት ሠርተፊኬትና ሌሎች መረጃዎችን አደራጅቶ እንዲላክለት ጠይቆም ነበር፡፡ የዕውቅና ሠርተፊኬቱና ሌሎች ንግድ ምክር ቤቱን ይገልጻሉ የተባሉ መረጃዎች ከተላኩ በኋላ የፕሬዚዳንቱ ጽሕፈት ቤት ጉዳዩን ሲገመግም ቆይቶ አወንታዊ ምላሽ ሊሰጥ መቻሉን ያገኘነው መረጃ ያስረዳል፡፡

    ፕሬዚዳንቱ የንግድ ምክር ቤቱ የበላይ ጠባቂ ለመሆን አወንታዊ መልስ የተሰጠበት ደብዳቤም ከፕሬዚዳንቱ ጽሕፈት ቤት ለንግድ ምክር ቤቱ እንደደረሰም ለማወቅ ተችሏል፡፡

    ባለፈው ሳምንት ከፕሬዚዳንቱ ጽሕፈት ቤት የወጣው ደብዳቤ ምክር ቤቱ የበላይ ጠባቂ እንዲሆኑ ጥያቄ ማቅረቡን በማስታወስ ጥያቄውን የተቀበለበትን ዝርዝር ጉዳዮች አመላክቷል፡፡ ከሕግና ከአስተዳደር አንፃር አዋጅ ቁጥር 341/951 ምክር ቤቱ በአዋጅ የተሰጠውን መብት ዝርዝር ኃላፊነትና ተግባር እየተወጣ በመሆኑ ንግድና ኢንቨስትመንትን ለማስፋፋት፣ ኢኮኖሚውን ለማጠናከር ያደረገው እንቅስቃሴ ታይቶ የተፈቀደ ስለመሆኑ መረጃው ይጠቅሳል፡፡ ማኅበራዊ ኃላፊነቶችን ለመወጣት ያበረከተው አስተዋጽኦውም ጥያቄው አወንታዊ ምላሽ እንዲያገኝ አስችሎታል ተብሏል፡፡ እንዲህ ያሉ ጉዳዮችን የመረመረው የፕሬዚዳንቱ ጽሕፈት ቤት ፕሬዚዳንት ዶ/ር ሙላቱ ከመስከረም 26 ቀን ጀምሮ የንግድ ምክር ቤቱ የበላይ ጠባቂ እንዲሆኑ ያቀረበው ጥያቄ ተቀባይነት ማግኘቱን በደብዳቤ ሊገልጽ ችሏል፡፡

    ንግድ ምክር ቤቱ ፕሬዚዳንቱን የበላይ ጠባቂ ማድረጉ ምን ጠቀሜታ አለው? የበላይ ጠባቂ በመሆን የሚመሩት ሥራ ምንድነው? የሚል ጥያቄ የቀረበላቸው አቶ ሰለሞን፣ ‹‹የንግድ ምክር ቤቱ የበላይ ጠባቂ መሆናቸው የንግድ ምክር ቤቱን መልካም ገፅታ የበለጠ ያሳድጋል፤›› የሚል ምላሽ ሰጥተዋል፡፡

    ንግድ ኅብረተሰቡ በተለይም ንግድ ምክር ቤቱ የበለጠ ተደማጭ እንዲሆንም በማድረጉ ረገድ ከፍተኛ ጠቀሜታ እንደሚሰጥም ገልጸዋል፡፡ ‹‹አንድ ርዕሰ ብሔር ለአንድ ተቋም የበላይ ጠባቂ ሲሆን ተሰሚነት ይኖረዋል፤ ታላላቅ ሥራዎችን እንዲያከናውን ያግዘዋል፤›› ብለዋል፡፡

    በአገር ውስጥም ሆነ በውጭ አገሮች ንግድ ምክር ቤቱ የበለጠ ተሰሚ የሆነ ተቋም እንዲሆን የራሱ አስተዋጽኦ ይኖረዋል የሚሉት የንግድ ምክር ቤቱ ኃላፊዎች፣ ጥያቄውም ሲቀርብ እንዲህ ያሉ ጉዳዮች ታሳቢ ተደርገዋል፡፡ ንግድ ምክር ቤት ትናንት ጥቅምት 1 ቀን 2008 ዓ.ም. ባሠራጨው መግለጫ ላይ ፕሬዚዳንቱ የበላይ ጠባቂ መሆናቸው የምክር ቤቱን ገፅታ በማጉላት የንግዱ ኅብረተሰብ ከመንግሥት ጋር የሚኖረውን ግንኙነት ወደላቀ ደረጃ ከማሳደጉም በላይ በግሉ ዘርፍ የሚታዩ ችግሮችን ለመፍታት ብሎም የፖሊሲ ተፅዕኖ ለመፍጠር ያስችለዋል ብሏል፡፡

    የኢትዮጵያ ንግድ ምክር ቤት ከአንድ ወር በፊት ባደረገው ጠቅላላ ጉባዔው ላይ ለንግድ ምክር ቤቱና ለንግዱ ኅብረተሰብ ከፍተኛ አስተዋጽኦ አድርገዋል በሚል ዕውቅና ከሰጣቸው የመንግሥት ከፍተኛ ባለሥልጣናት መካከል ፕሬዚዳንት ዶ/ር ሙላቱ ተሾመን ቀዳሚ ማድረጉ ይታወሳል፡፡ ለዚህም የምክር ቤቱን አርማ የያዘ ፒን ሸልሟል፡፡ የኢትዮጵያ ንግድ ምክር ቤት በመላ አገሪቱ የሚገኙ የንግድና ዘርፍ ማኅበራት ምክር ቤቶችን የሚወክል ሲሆን፣ በሥሩም 18 የንግድና የዘርፍ ማኅበራት ምክር ቤቶችን በአባልነት የያዘ ነው፡፡ በንግድ ምክር ቤቱ አባል የሆኑ ንግድና ዘርፍ ማኅበራት ምክር ቤቶች ከ200 ሺሕ በላይ አባላት አላቸው፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች