Monday, August 8, 2022
ሌሎች ዓምዶች
    - Advertisment -
    - Advertisment -

    ክቡር ሚኒስትር

    [ክቡር ሚኒስትሩ ወደ ቢሮ ሲገቡ አማካሪያቸውን አገኙት]

    • ዊኬንድ እንዴት ነበር ክቡር ሚኒስትር?
    • ዊኬንድ አስደሳችም አሳዛኝም ነበር፡፡
    • ምን ተገኘ?
    • ያው የኳስ ጉዳይ ነዋ፡፡
    • አይ ክቡር ሚኒስትር የኳስ ነገር አይሆንልዎትም አይደል?
    • ነግሬህ የለ፤ ሱሴ ነው እኮ፡፡
    • ምነው ሌላ ሱስ ቢኖርዎት?
    • ሌላ የምን ሱስ?
    • የሥራ ነዋ፡፡
    • ምን አልክ አንተ?
    • ኧረ ስቀልድ ነው ክቡር ሚኒስትር፣ ከኳስ ሌላ ያለዎት ሱስ ሥራ አይደል እንዴ?
    • ከኳሱ በላይ ነው እንዲያውም የሥራ ሱሴ፡፡
    • ምን ጥያቄ አለው?
    • እህሳ?
    • እንዲያው እንደ እርስዎ ዓይነት አንድ ሰው ቢኖረን እኮ አለቀልን በቃ፡፡
    • አለቀልን በቃ ስትል?
    • ማለቴ በቃ ቀን ተሌት በሥራ አለቅን ማለቴ ነው፡፡
    • እኔ ደግሞ መሥሪያ ቤቱ አለቀለት ያልክ መስሎኝ ነበር፡፡
    • ያው ነው፡፡
    • ምን አልክ?
    • አይ ያው እኛ በሥራ ካለቅን መሥሪያ ቤታችንም ያልቅለታል ብዬ ነው፡፡
    • ዛሬ ምነው አሽሙር አበዛህሳ?
    • እና አስደሳቹ ነገር ምን ነበር?
    • ብሔራዊ ቡድናችን ለቀጣዩ ዙር አለፈ፡፡
    • ተሸነፍን አይደል እንዴ?
    • የሴቶቹን ነው የምልህ፡፡
    • ያሳዘነዎት የወንዶቹ ነው ማለት ነው?
    • እንዴታ?
    • ያው በስፖርት እኮ መሸነፍና ማሸነፍ ያለ ነው፡፡
    • አሁን ሽንፈትን የምንቀበልበት ጊዜ አይደለም፡፡
    • እንዴት?
    • ልክ እንደ ዕድገታችን ለስፖርቱም ትኩረት ስለሰጠነው እኮ ነው ራሱን የቻለ ሚኒስቴር መሥሪያ ቤት ያቋቋምነው፡፡
    • አዎ ይገባኛል፤ ግን ይኼ ያለ ነገር ነው፡፡
    • በጣም ያስገረመኝ ለምን እንደሆነ ታውቃለህ?
    • ለምንድን ነው?
    • ባለፈው በአንዴ ሁለት አገር አሸንፈው አሁን እንዴት ብዬ ነዋ?
    • መቼ ነው በአንዴ ሁለት አገር ያሸነፉት?
    • ሳኦቶሜ ኢንድ ፕሪንስፔን ነዋ፡፡
    • እንዴ ክቡር ሚኒስትር እነሱ እኮ ሁለት አገሮች አይደሉም፡፡
    • ኤንድ እያለ እንዴት ሁለት አይደሉም ትለኛለህ?
    • አንድ አገር ነው፡፡
    • የት ነው ለመሆኑ የሚገኘው?
    • እንዴ የአፍሪካ ኅብረት አባልም ናት እኮ፣ ምዕራብ አፍሪካ ያለች አገር ናት፡፡
    • እንዴት አላውቃትም ታዲያ?
    • ለነገሩ ትንሽ አገር ናት፡፡
    • ታዲያ አነስተኛና ጥቃቅን አገሮችን እያደራጁ አገር ያደርጋሉ፣ እኔ ምን ላድርግ?
    • ለነገሩ እንኳን እኔ ሆንኩ?
    • ለምኑ?
    • ሌላ ሰው ይኼን ቢሰማ ጥሩ አልነበረም፡፡
    • ምን ያመጣል?
    • ይሳለቅብዎታል፡፡

     

    [አንድ ከውጭ የመጣች ዘመዳቸው ልትጠይቃቸው ቢሯቸው መጣች]

    • አገርሽን እንዴት አገኘሻት?
    • ብዙ ነገር ተቀይሯል፤ በጣም ደስ ይላል፡፡
    • ይኼ ገና ጅማሮ ነው፤ ከዚህም ባለፈ ትደነቂያለሽ፡፡
    • በጣም ብዙ ሕንፃዎች እየተሠሩ ነው፡፡
    • አገራችን እየተመነደገች ነው ስልሽ?
    • አንድ ነገር ግን መልመድ አልቻልኩም፡፡
    • ምኑን ነው ያለመድሽው?
    • አየሩ በጣም ከባድ ነው፡፡
    • አዲስ አበባ እኮ ነፋሻማ ነች፡፡
    • በፊትማ እንደዚያ ነበረች፤ አሁን ግን ሙቀቱ ከባድ ነው፡፡
    • ምን እናድርግ ታዲያ?
    • ዛፎች መትከል ነዋ፡፡
    • ዛፍ እኮ የዕድገት መለኪያ አይሆንም፡፡
    • እንዴ ዕድገት በምንድን ነው የሚለካው?
    • በሕንፃ ብዛት ነዋ፡፡
    • ለዚህ ነው የፎቅ ጫካ የበዛው?
    • ዋናው እሱ ነው፡፡
    • ለማንኛውም እስቲ ሻይ ደጅ እንጠጣ፡፡

    [ክቡር ሚኒስትሩ ከዘመዳቸው ጋር ሻይ ለመጠጣት ከቢሮ ወጡ]

    • ሻይ የት መጠጣት ትፈልጊያለሽ?
    • ፓርክ ያለበት ቦታ እንሂዳ፡፡
    • ፓርክ ያለው አንዱ ለቡ ነው፤ ሌላው ደግሞ ዱከም ነው፡፡
    • ሩቅ ናቸው ማለት ነው?
    • አዎን በጣም ሩቅ ናቸው፤ ከከተማ ወጣ ያሉ ናቸው፡፡
    • ለምንድነው ከከተማ የወጡት?
    • እንዴ ኢንዱስትሪ ከተማ ውስጥ ምን ያደርጋል? ወጣ ማለት አለበት፡፡
    • የምን ኢንዱስትሪ ነው?
    • የኢንዱስትሪ ፓርክ ነዋ፡፡
    • የለም የለም፤ እኔ ያልኩት እኮ የመናፈሻ ፓርክ ነው፡፡
    • የምን የመናፈሻ ፓርክ አመጣሽ?
    • ውጭ እኮ መናፈሻ ፓርኮች በየቦታው ነው ያሉት፤ አይተው አያውቁም እንዴ?
    • ኧረ እኛ ውጭ ስንሄድ የሚያስጐበኙን እኮ የኢንዱስትሪ ፓርክ ነው፡፡
    • ታዲያ ወጣቶች የት ይዝናናሉ?
    • አሁን ጊዜው የመዝናኛ አይደለም፡፡
    • እና ፓርክ እዚህ አካባቢ የለም እያሉኝ ነው?
    • ፓርክ ምን ይጠቅማል?
    • እንዴ ወጣቶች በሉ፣ አዛውንቶች አረፍ የሚሉበት መናፈሻ በመሆኑ አዕምሮን በሚገባ ያድሳል፡፡
    • ይኼውልሽ ወጣቶች መታደስ ያለባቸው በአብዮታዊ ዴሞክራሲያዊ ነው፡፡
    • ባስኬት ቦል መጫወቻ ቦታም የለም፡፡
    • እሱ ጨዋታ የኒዮ ሊብራሊስቶች ነው፡፡
    • እሺ የእግር ኳስ ሜዳስ የለም?
    • እሱም ቢሆን የእነሱ ጨዋታ ነው፡፡
    • እሺ የእኛ ጨዋታ ምንድን ነው?
    • ሩጫ ነዋ፡፡
    • እሺ የሩጫ ሜዳ የት ነው ያለው?
    • እነ ኃይሌ መቼ ሜዳ ላይ ሮጡ? ተራራ ለተራራ ተሯሩጠው ነው እኮ ስኬታማ የሆኑት፡፡
    • በኢንተርኔት የምሰማው እውነት ነው ማለት ነው?
    • ምንድን ነው የሰማሽው?
    • በየሰፈሩ እንደ አሸን የፈላው ጫት ቤትና ሺሻ ቤት ነው፡፡
    • መዘንጋት የሌለብሽ ጫት ኤክስፖርት የሚደረግ ምርት መሆኑን ነው፡፡
    • ምን እያሉኝ ነው?
    • ኤክስፖርት ስለሚደረግ እዚህ የሚቅመው የለም፡፡
    • ወጣቱን ሌላ ዜግነት ሰጣችሁት እንዴ? ለማንኛውም ግን አስቡበት፡፡
    • ምኑን?
    • ወጣቱ ላይ ኢንቨስት ማድረጉን፡፡

    [ክቡር ሚኒስትሩ ከሚስታቸው ጋር እያወሩ ነው]

    • ኧረ የዚያን ልጅ ነገር እያሳሰበኝ ነው፡፡
    • የቱ ልጅ?
    • ባለፈው ከዩኒቨርሲቲ የተመረቀው ዘመዴ ነዋ፡፡
    • ምንድን ነው ያሳሰበሽ?
    • እስካሁን ሥራ አላገኘም፡፡
    • በምንድን ነበር የተመረቀው?
    • ሶሺዮሎጂ መሰለኝ፡፡
    • እሱ ትምህርት አሁንም አለ ማለት ነው?
    • ለምን አይኖርም?
    • ማለቴ ልማታዊ ነው ወይስ …
    • በል በል ይኼን ዲስኩርህን እዚያው፡፡
    • እሺ ምን ተሻለ?
    • የሆነ ቦታ ወሽቀዋ፡፡
    • የት ላስገባው እባክሽ?
    • አንዱ ወዳጅህ ጋ ነዋ፡፡
    • በቃ መላ እፈልግለታለሁ፡፡
    • መላ ሳይሆን ሥራ ነው የሚፈልገው ልጁ፡፡
    • ተይው ለእኔ አልኩሽ እኮ፡፡
    • በአስቸኳይ ይሁን፡፡

    [ክቡር ሚኒስትሩ አንድ ባለሀብት ጋ ደወሉ]

    • ጤና ይስጥልኝ ክቡር ሚኒስትር፡፡
    • እንዴት ነህ እባክህ?
    • ሰላም ነኝ፤ ተጠፋፋን አይደል?
    • በጣም እንጂ ጠፍተሃል፡፡
    • ምን ሥራ እኮ አላላውስ ብሎኝ ነው?
    • አውቃለሁ፤ ዕድገት ያለ ሥራ አይመጣም፡፡
    • ለዚያ ብዬ ነው ክቡር ሚኒስትር፡፡
    • ፈልጌህ ነበር፡፡
    • ምን ልታዘዝ?
    • አንድ የግል ጉዳይ ነበረችኝ፡፡
    • ክቡር ሚኒስትር ማድረግ የምችለው ነገር ከሆነ ችግር የለም፡፡
    • ኧረ በጣም ማድረግ የምትችለው ነገር ነው፡፡
    • ምንድን ነው?
    • አንድ ዘመዴ ነበር፡፡
    • እሺ ክቡር ሚኒስትር፡፡
    • ተመርቆ ሥራ እየፈለገ ነው፡፡
    • ኢንጂነሪንግ ነው ያጠናው?
    • አይደለም፤ ሶሺዮሎጂ ነው ያጠናው፡፡
    • ክቡር ሚኒስትር እኔ እኮ ያለኝ ኤንጂኦ አይደለም፡፡
    • እሱ መቼ ጠፋኝ?
    • ማለቴ እኔ ኮንስትራክሽን ላይ ስላለሁ ኢንጂነሮች ብቻ ነው የምቀጥረው፡፡
    • የምን ቢሮክራሲ ማብዛት ነው?
    • አያስቁኝ ክቡር ሚኒስትር፡፡
    • ምን ብዬ ነው ያሳቅኩህ?
    • አይ ቢሮክራሲ ሲሉ እኔ ጋ ነው ወይስ እርስዎ ጋ ቢሮክራሲ ያለው ብዬ ነው፡፡
    • ይኼው ቅጠር ስትባል አንተ እኮ ነህ ቢሮክራሲ እያበዛህ ያለኸው፡፡
    • ብችልማ ደስ ይለኝ ነበር፡፡
    • እንዴት አትችልም?
    • የልጁ ፊልድ ከምሠራው ሥራ ጋር አይገናኝማ፡፡
    • ለመሆኑ ባለፈው ያወጣነውን ጨረታ ተሳትፈሃል አይደል?
    • ይኼው ውጤቱን እየተጠባበቅን አይደል እንዴ?
    • እንደዚያ ሆኖ ነው ሰው አልቀጥርልህም የምትለኝ?
    • እጅ ጥምዘዛ ጀመሩ እንዴ?
    • አይ እንዲያው ገርመኸኝ ነው፡፡
    • ንስሃ የገባችሁ መስሎኝ ነበር እኮ?
    • የምን ንስሃ?
    • በጉባዔያችሁ ላይ ስትምሉ ስትገዘቱ አልነበር እንዴ?
    • ምን ብለን?
    • ብልሹ አሠራርን አስወግደን መልካም አስተዳደርን እናሰፍናለን እያላችሁ፡፡
    • እንዳንተ ዓይነት ኪራይ ሰብሳቢ እያለ እንዴት እናስወግደው ታዲያ?
    • አልገባኝም ክቡር ሚኒስትር?
    • ይኼው ከዩኒቨርሲቲ የሚወጡትን አልቀጥርም እያልክ አይደል እንዴ?
    • ስለማያስፈልገኝ ነዋ፡፡
    • ጨረታውም አያስፈልግህም ማለት ነው፡፡
    • ወዴት ወዴት ነው?
    • አዲስ አሠራር ጀምረናል፡፡
    • የምን አሠራር?
    • ሥራ በአዲስ መልክ ጀምረናል አልኩህ፡፡
    • እርስዎ እንኳን በአዲስ መልክ የጀመሩት ሥራ አይመስለኝም፡፡
    • ታዲያ ምንድን ነው?
    • ሙስና!

    በብዛት የተነበቡ ፅሁፎች

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    የዩኒቨርሲቲ መምህራን ከደመወዝ ጭማሪና ከዕርከን ዕድገት ጋር በተያያዘ መንግሥትን አስጠነቀቁ

    ‹‹የደመወዝ ጉዳይ የትምህርት ሚኒስቴር ብቻ ሳይሆን የሲቪል ሰርቪስ ኮሚሽንም...
    - Advertisment -

    ትኩስ ፅሁፎች

    የአገሪቱ ባንኮች ካፒታል 199.1 ቢሊዮን ብር ደረሰ

    ከታክስ በኋላ 50 ቢሊዮን ብር ማትረፋቸውን ብሔራዊ ባንክ አስታወቀ የአገሪቱ...

    በዓለም ጂኦ ፖለቲካ መድረክ የኢትዮጵያ ተፈላጊነት

    የአሜሪካው የውጭ ጉዳይ ሚኒስትር አንቶኒ ብሊንከን በሦስት የአፍሪካ አገሮች...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...
    spot_img

    ተዛማጅ ፅሁፎች

    [ክቡር ሚኒስትሩ በስንዴ የተሸፈኑ ሰፋፊ እርሻዎች ያሉበትን ሁኔታ ለመገምገም ከስንዴ ምርት ድጋፍና ክትትል ኮሚቴ ሰብሳቢ ጋር እየመከሩ ነው] 

    ክቡር ሚኒስትር እንደነገርክዎት በሁሉም ስንዴ አብቃይ አካባቢዎቻችን ያሉ አርሶ አደሮች ጥሪያችንን ተቀብለው መሬታቸውን በኩታ ገጠም አርሰው በስንዴ ዘር ሸፍነዋል። በጣም ጥሩ ዜና ነው። በጣም እንጂ። የሚገርምዎት...

    [ክቡር ሚኒስትሩ የሚመሩት የሥራ አስፈጻሚ ኮሚቴ ስብሰባ አጀንዳ አድርጎ በያዘው ወቅታዊ የፀጥታና ደኅንነት ጉዳዮች ላይ ትኩረት በመስጠት ቢጀመርም በስተመጨረሻ አጀንዳውን ስቶ ስለ መዋደድ እየተጨቃጨቀ...

    በዛሬው መደበኛው መድረካችን አጀንዳ የተለመደው የፀጥታና ደኅንነት ጉዳይ ይሆናል። ሌላ አጀንዳ የምታስይዙት አጀንዳ ከሌለ በቀር ማለቴ ነው። ክቡር ሚኒስትር... እሺ ...ቀጥል አመሰግናለሁ ክቡር ሚኒስትር። መደበኛ አጀንዳው እንደተጠበቀ...

    [ክቡር ሚኒስትሩ ወደ መኖሪያ ቤታቸው ሲገቡ ባለቤታቸው የኢትዮጵያ አትሌቶች በዓለም ሻምፒዎና መንገሣቸውን እያነሱ ደስታቸውን ሲገልጹ አገኟቸው]

    እሰይ አገሬ... እሰይ አገሬ እልልል ምን ተገኘ ደግሞ ዛሬ? የአትሌቶቻችንን ድል ነዋ! በክፉ ሲነሳ የቆየውን የአገራቸውን ስም በወርቅ እያደሱ እኮ ነው?  አየሽ፣ መንግሥት የአገራችን ችግር ያልፋል ስሟም...