Tuesday, August 16, 2022
ሌሎች ዓምዶች
    - Advertisment -
    - Advertisment -

    ክቡር ሚኒስትር

    [ክቡር ሚኒስትሩ የአለቃቸው ልጅ ልታገባ መሆኑን ሰምተው፣ በራሳቸው ተነሳሽነት ሠርጉን የሚያስፈጽም ኮሚቴ ሊያዋቅሩ ተዘጋጅተዋል፡፡ አማካሪያቸውም በአፋጣኝ ወደ ቢሯቸው እንዲመጣ አደረጉት]

    • ምነው በአፋጣኝ ፈለጉኝ ክቡር ሚኒስትር?
    • አንገብጋቢ ጉዳይ መጥቶ ነው፡፡
    • የምን አንገብጋቢ ጉዳይ?
    • ትልቅ አዲስ አገራዊ ፕሮጀክት ከፊታችን ተደቅኗል፡፡
    • አዲስ አገራዊ ፕሮጀክት?
    • አዎን አዲስ አገራዊ ፕሮጀክት፡፡
    • ግድብ ነው ክቡር ሚኒስትር?
    • የጀመርነውን ሳንጨርስ ሌላ ግድብ አማረህ?
    • ታዲያ የባቡር ፕሮጀክት ነው?
    • እሱንማ አጠናቀቅን፡፡
    • የስኳር ፕሮጀክት ነው?
    • የስኳር ፕሮጀክት ነበረን ለካ?
    • የማዳበሪያ ፕሮጀክት ነው ክቡር ሚኒስትር?
    • አንተ በዚህ ከቀጠልክ  የሞቱ ዘመዶቼን ልታስታውሰኝ ትችላለህ፡፡
    • የምን ፕሮጀክት ነው ታዲያ ክቡር ሚኒስትር?
    • ትልቅ ልማታዊ ሠርግ ከፊታችን ተደቅኗል፡፡
    • ልጅዎት ልታገባ ነው እንዴ?
    • እኔ የልጄን ሠርግ እንደ ትልቅ ፕሮጀክት የምቆጥረው ይመስልሃል?
    • ታዲያ የማን ሠርግ ነው?
    • የአለቃዬ፡፡
    • አለቃዎት ሊያገቡ ነው?
    • የለም ልጃቸው ልታገባ ነው፡፡
    • ግን ክቡር ሚኒስትር …
    • የምን ግን ነው?
    • ሠርጉ እኮ የቤተሰቡ የግል ጉዳይ ነው፡፡
    • ጤነኛ ነህ ግን አንተ?
    • እንዴት ክቡር ሚኒስትር?
    • ከዚህ የበለጠ የአገር ጉዳይ አለ?
    • ኧረ የለም፡፡
    • ከተማችን ውስጥ ተደግሶ የማያውቅ ድል ያለ ሠርግ ነው የምንደግሰው፡፡
    • አለቃዎት ያውቃሉ ግን?
    • ሰርፕራይዝ ነው፡፡
    • አይ ፈርቼ ነው እኮ፡፡
    • ምንድን ነው የፈራኸው?
    • ሰርፕራይዙ እርስዎን ራስዎትን ሰርፕራይዝ እንዳያደርግዎት፡፡
    • ስለእሱ አታስብ ኃላፊነቱን እኔ እወስዳለሁ፡፡
    • ስለዚህ ምን ይደረግ?
    • ኮሚቴ መቋቋም አለበት፡፡
    • ምን የሚሉት?
    • በራስ ተነሳሽነት ሠርጉን የሚያስፈጽም ኮሚቴ፡፡
    • እሺ ክቡር ሚኒስትር፡፡
    • እዚህ ላይ ትኩረት እንዲሰጣቸው የምፈልጋቸው ነገሮች አሉ፡፡
    • ምንድን ናቸው ክቡር ሚኒስትር?
    • በመጀመሪያ ይህ ፕሮጀክት ከፍተኛ አገራዊ ፋይዳ ያለው ፕሮጀክት ነው፡፡
    • እሺ ክቡር ሚኒስትር፡፡
    • ሲቀጥል ይህን ፕሮጀክት እንደ ማሳያ መጠቀም ስለምንፈልግ ከፍተኛ ርብርብ እንዲደረግበት እፈልጋለሁ፡፡
    • ይቀጥሉ ክቡር ሚኒስትር፡፡
    • ስለዚህ ፕሮጀክቱን ከግብ ለማድረስ ሁላችንም ቀን ተሌት ደከመን ሰለቸን ሳንል መሥራት አለብን፡፡
    • ነጥቦቹን ይዣቼዋለሁ ክቡር ሚኒስትር፡፡
    • ከዚህ ባለፈ ማድረግ ያለብን ነገሮች አሉ፡፡
    • ምን ክቡር ሚኒስትር?
    • በዋናው ኮሚቴ ሥር ሦስት ንዑስ ኮሚቴዎች መዋቀር አለባቸው፡፡
    • ምን ዓይነት ኮሚቴዎች?
    • የመጀመሪያው የከብት አፈላላጊ ኮሚቴ ነው፡፡
    • ሁለተኛውስ?
    • የከብት ግዢ ኮሚቴ ነው፡፡
    • የመጨረሻው ምንድን ነው?
    • ሦስተኛው የከብት አራጅ ኮሚቴ ነው፡፡
    • እነዚህ ኮሚቴዎች ያስፈልጋሉ ግን?
    • ስማ ይህ ፕሮጀክት ፍጹም ከሙስና የፀዳ መሆን አለበት፡፡
    • ለዚህ ነው ኮሚቴዎቹ የበዙት?
    • ነገርኩህ እኮ፣ እያንዳንዱ የሥራ ሒደት ግልጽ በሆነ መንገድ መካሄድ አለበት፡፡
    • ስለዚህ ኮሚቴዎቹ እንዴት ይዋቀሩ?
    • የምታዋቅርበትን መንገድ አሁን እነግርሃለሁ፡፡
    • ይቀጥሉ ክቡር ሚኒስትር፡፡
    • በኮሚቴዎቹ የብሔር ስብጥር የተመጣጠነ መሆን አለበት፡፡
    • ጥሩ ነጥብ ነው ያነሱት፡፡
    • ሲቀጥል አባላቶቹ መመረጥ ያለባቸው ከፎረሞቹ ነው፡፡
    • ከየትኞቹ ፎረሞች?
    • ከሴቶች ፎረም፡፡
    • እሺ፡፡
    • ከወጣቶች ፎረም፡፡
    • ሌላስ?
    • ከነጋዴዎች ፎረም፡፡
    • የደላሎች ፎረምስ ይግቡበት?
    • ምን ነክቶሃል?
    • ምነው ክቡር ሚኒስትር?
    • ደላሎችን ለማጥፋት ቆርጠን በተነሳንበት ወቅት ጭራሽ ኮሚቴ ውስጥ ደላላ ልታስገባልኝ?
    • አይ ክቡር ሚኒስትር የከብት ገበያው እኮ በደላላ ነው የሚመራው ብዬ ነው፡፡
    • ቢሆንስ ታዲያ?
    • እነሱን ካልያዝን ይህን ፕሮጀክት በድል መወጣት አንችልም ብዬ ነው፡፡
    • ለነገሩ ልክ ብለሃል፡፡
    • አዲሱን አባባል አልሰሙም እንዴ?
    • ምን የሚለውን?
    • ለማንኛውም ድል፣ ያስፈልጋል ደላላ!

    [ክቡር ሚኒስትሩ ሌላ ሚኒስትር ጋ ስልክ ደወሉ]

    • እንዴት ነዎት ክቡር ሚኒስትር?
    • ይኸው በአዲሱ ፕሮጀክት ተወጥረናል፡፡
    • የምን አዲስ ፕሮጀክት መጣ?
    • አገራዊ ፋይዳ ያለው ታላቁ ፕሮጀክት ነዋ፡፡
    • ስለግድቡ ነው የሚያወሩት?
    • ሰው ሁሉ ከግድቡ ሌላ የሚያውቀው ነገር የለም እንዴ?
    • ታዲያ ስለየቱ ፕሮጀክት ነው የሚያወሩት?
    • ስለ አለቃችን ልጅ ሠርግ ፕሮጀክት ነዋ፡፡
    • እርስዎ እኮ አስተዋሽ ነዎት፡፡
    • ለዚህ አይደል እንዴ እኔ የማስፈልገው፡፡
    • ምን እየታሰበ ነው ታዲያ ክቡር ሚኒስትር?
    • አንድ ኮሚቴ ተቋቁሞ በውስጡ ሦስት ንዑስ ኮሚቴዎች ተዋቅረዋል፡፡
    • ታዲያ እኔ ምን ልርዳዎት?
    • ኮሚቴው የሚንቀሳቀስበት በጀት ያስፈልገዋል፡፡
    • ታዲያ ተጨማሪ በጀት በፓርላማ እናስፈቅድ?
    • እሱ አንድ አማራጭ ነው፡፡
    • ካልሆነ ከሠራተኞች ደመወዝ ተቆራጭ ማድረግ ይቻላል፡፡
    • ይኼንንም እንደ ሌላ አማራጭ ማየት እንችላለን፡፡
    • ከዚህ ባለፈ ደግሞ ቦንድ መሸጥ እንችላለን፡፡
    • የአገር ውስጥ ወይስ የውጭ?
    • ግዢው የሚፈጸመው በውጭ ምንዛሪ ከሆነ የዩሮ ቦንድ ሽያጭ ማድረግ እንችላለን፡፡
    • ይሄ የተሻለ ሐሳብ ሳይሆን አልቀረም፡፡
    • ስለዚህ ዩሮ ቦንድ ይሁን?
    • በቃ ዩሮ ቦንድ!

    [የክቡር ሚኒስትሩ አማካሪ ቢሯቸው ገባ]

    • ሦስቱም ኮሚቴዎች ተቋቁመዋል፡፡
    • በጣም ጥሩ፡፡
    • የኮሚቴዎቹ ሰብሳቢዎችም እዚህ ስላሉ ቢያናግሯቸው ጥሩ ነው፡፡
    • አስገባቸው፡፡

    [የኮሚቴዎቹ ሰብሳቢዎች የክቡር ሚኒስትሩ ቢሮ ገቡ፡፡ ከከብት አፈላላጊ ኮሚቴው ሰብሳቢ ጋር ውይይታቸ  ውን ቀጠሉ]

    • በመጀመሪያ ክቡር ሚኒስትር የዚህ ኮሚቴ ሰብሳቢ አድርገው ስለሾሙኝ በጣም አመሰግናለሁ፡፡
    • ሹመት ቀላል ነገር አይደለም፣ ኃላፊነትም አለበት፡፡
    • አውቃለሁ ክቡር ሚኒስትር፡፡
    • ዋናው ሥራህ ምን እንደሆነ ታውቃለህ?
    • እሱን ከእርስዎ ለመቀበል ነው የመጣሁት፡፡
    • ያው የኮሚቴው ስም እንደሚገልጸው፣ ዋናው ሥራህ ከብት ማፈላለግ ነው፡፡
    • መፍትሔ የማፈላለግ ሥራ ነው ያሉኝ?
    • ከብት የማፈላለግ ሥራ፡፡
    • ከየት ልጀምር ከካራ፣ ከሰበታ ወይስ ከቡራዩ?
    • እንዲህ አቅልለህ አትየው፡፡
    • እንዴት ክቡር ሚኒስትር?
    • ለፕሮጀክቱ አስፈላጊ ከሆነ ከአውሮፓም ሆነ ከእስያ አማርጠን ዓይተን ነው ከብቶቹን የምንገዛው፡፡
    • ደስ ይለኛል ክቡር ሚኒስትር፡፡
    • ስለዚህ ከብቶቹ ልማታችን በግልጽ የሚናገሩ መሆን አለባቸው፡፡
    • እሺ ክቡር ሚኒስትር፡፡
    • በዛ ላይ አረንጓዴ ኢኮኖሚን የሚያመላክቱ መሆን አለባቸው፡፡
    • አረንጓዴ ከብት አለ እንዴ ክቡር ሚኒስትር?
    • ከፈለግህ አረንጓዴ ቀለም ቀባቸው፡፡

    [ክቡር ሚኒስትሩ ከከብት ገዢ ኮሚቴው ሰብሳቢ ጋር መወያየት ጀመሩ]

    • የአንተ ዋነኛ ሥራ በአፈላላጊ ኮሚቴው ሪኮመንዴሽን መሠረት የከብት ግዢውን መፈጸም ነው፡፡
    • ምንም ችግር የለውም ክቡር ሚኒስትር፡፡
    • ስለዚህ የግዥ ሥርዓቱ ግልጽና ከሙስና የፀዳ መሆኑ መረጋገጥ አለበት፡፡
    • ስለዚህ ግልጽ ጨረታ እናውጣ ማለት ነው?
    • ግልጽ ይሁን ውስን የሚለው በኋላ የሚታይ ጉዳይ ይሆናል፡፡
    • ለአገር ውስጥ ኩባንያዎች ወይስ ለውጭ ኩባንያዎች ይሰጥ?
    • እሱ ከውጭ ምንዛሪ ጋር የሚያያዝ ስለሆነ በኋላ እንወስናለን፡፡

    [ክቡር ሚኒስትሩ ከከብት አራጅ ኮሚቴው ሰብሳቢ ጋር መወያየት ጀመሩ]

    • ሚኒስትር ጋ ስትመጣ እንኳን ፕሮቶኮልህን አትጠብቅም?
    • ክቡር ሚኒስትር ያው ከተማ ውስጥ ብዙ የእርድ ሥራዋች ስለነበሩብኝ ነው፡፡
    • የምን እርድ?
    • እርድ እኮ በየቦታው ነው ያለው፤ ነጋዴው ያርዳል፣ ባለሥልጣኑ ያርዳል፣ ካድሬው ያርዳል፣ ብቻ ብዙ እርድ አለ፡፡
    • ለማንኛውም ይህ የእርድ ኮሚቴ ዓለም ላይ አለ የተባለውን የእርድ ቴክኖሎጂ መጠቀም አለበት፡፡
    • በደስታ ክቡር ሚኒስትር፡፡
    • እዚህ ላይ የዕውቀት ሽግግር መኖሩን ማረጋገጥ አለብን፡፡
    • ልክ ብለዋል ክቡር ሚኒስትር፡፡

    [ክቡር ሚኒስትሩ አማካሪያቸውን አስጠሩት]

    • አቤት ክቡር ሚኒስትር፡፡
    • እነዚህ ኮሚቴዎች ውስጥ ራሴ መግባት እፈልጋለሁ፡፡
    • ስለዚህ ኮሚቴዎቹ ለእርስዎ ሪፖርት ያድርጉዋ፡፡
    • ከዚያም ባለፈ ሥራዎቹ ላይ መሳተፍ እፈልጋለሁ፡፡
    • ለምን?
    • በቃ ፕሮጀክቱ እንዲደናቀፍ ስለማልፈልግ፣ ራሴው መግባት አለብኝ፡፡
    • ስለዚህ ምን ላድርግልዎት?
    • ለእኔና ለከብት አፈላላጊው የፕሌን ትኬት ግዛልን፡፡
    • ወዴት ሊሄዱ?
    • ወደ አውሮፓና እስያ፡፡

    [ክቡር ሚኒስትሩ ከአውሮፓ ሆነው ለሚስታቸው ደወሉ]

    • ምን ዓይነት ፕሮጀክት ገጥሞህ ነው እንዲህ የዘጋኸኝ?
    • ከፍተኛ አገራዊ ፋይዳ ያለው ፕሮጀክት ይዤ ነው፡፡
    • እኮ ምን?
    • በስልክ አይወራም፡፡
    • ለማንኛውም ባልሽ የት ሄዶ ጠፋ ብሎ ብዙ ሰው ጠየቀኝ፡፡
    • ብዙ ሰው ደግሞ የት አግኝተሽ ነው?
    • ሠርጉ ላይ ነዋ፡፡
    • የማን ሠርግ?
    • የአለቃህ ልጅ፡፡
    • አለፈ እንዴ?  

    በብዛት የተነበቡ ፅሁፎች

    ባንኮች እንዲዋሀዱ እስከ ማስገደድ ሊገባ እንደሚችል ብሔራዊ ባንክ ጠቆመ

    በአሁኑ ወቅት የባንኮች ቁጥር እየጨመረ መምጣቱ ችግር የሚሆንና የውጭ...

    ለኬንያ ኤሌክትሪክ ኃይል የሚሸጥበት ታሪፍ ማሻሻያ ተደረገበት

    በቅርቡ ሙሉ ለሙሉ ስምምነቱ የተጠናቀቀው የኢትዮጵያና የኬንያ የኤሌክትሪክ ኃይል...

    አዲስ አበባ እንዳይገቡ በተከለከሉ ዜጎች ጉዳይ የኦሮሚያና አማራ ክልሎች ተወያይተው ችግሩ እንዲፈታ አደረጉ

    ለሳምንታት በርካታ ቅሬታ ሲነሳበት የነበረውና ከአማራ ክልል በደብረ ብርሃን...
    - Advertisment -

    ትኩስ ፅሁፎች

    ለሰላም ድርድሩ ‹‹ከአፍሪካ ኅብረት አደራዳሪነት ውጭ ሌላው ተቀባይነት የለውም›› የውጭ ጉዳይ ሚኒስቴር

    የሰሜን ኢትዮጵያን ጦርነትና ግጭት በሰላማዊ መንገድ ለመፍታት የተጀመረው የአፍሪካ...

    በተጠናቀቀው የበጀት ዓመት በንብረት ላይ የደረሰው የትራፊክ አደጋ በ494 በመቶ ጨምሯል

    በትራፊክ አደጋ 3,971 ሰዎች ሕይወታቸውን አጥተዋል በአገር አቀፍ ደረጃ በተጠናቀቀው...

    አዲሱን የመንግሥት መዋቅር ዘርግተው ያጠናቀቁ ተቋማት 31 በመቶ ብቻ ናቸው

    በሲቪል ሰርቪስ ኮሚሽን ሥር ካሉት 160 የፌዴራል መንግሥት መሥሪያ...

    ለተቃርኖ ምክንያት የሚሆኑ ከንቱ ድርጊቶች ይወገዱ!

    ሰሞኑን የታላቁ የኢትዮጵያ ህዳሴ ግድብ ሦስተኛ ዙር የውኃ ሙሌት...

    ለኬንያ ኤሌክትሪክ ኃይል የሚሸጥበት ታሪፍ ማሻሻያ ተደረገበት

    በቅርቡ ሙሉ ለሙሉ ስምምነቱ የተጠናቀቀው የኢትዮጵያና የኬንያ የኤሌክትሪክ ኃይል...
    spot_img

    ተዛማጅ ፅሁፎች

    [ክቡር ሚኒስትሩ የሥራ አጥነት ችግሮችን የመፍታት ተልዕኮ የተሰጠው ተቋም በዋና ጽሕፈት ቤቱ ሕንፃና ቢሮዎች ላይ ያደረገውን ዕድሳት መርቀው በመክፈት ጉብኝት እያደረጉ ነው]

    እጅግ ውብ ዕድሳት ያደረጋችሁት! በእውነቱ በጣም ድንቅ ነው፡፡ አመሠግናለሁ ክቡር ሚኒስትር። በጣም ድንቅ ነው። ዕድሳቱን ያከናወነው ድርጅት ጥሩ ልምድ ያለው ይመስላል? ተቋራጩ ማን እንደሆነ አልነገርኩዎትም እንዴ? የትኛው ተቋራጭ...

    [ክቡር ሚኒስትሩ በስንዴ የተሸፈኑ ሰፋፊ እርሻዎች ያሉበትን ሁኔታ ለመገምገም ከስንዴ ምርት ድጋፍና ክትትል ኮሚቴ ሰብሳቢ ጋር እየመከሩ ነው] 

    ክቡር ሚኒስትር እንደነገርክዎት በሁሉም ስንዴ አብቃይ አካባቢዎቻችን ያሉ አርሶ አደሮች ጥሪያችንን ተቀብለው መሬታቸውን በኩታ ገጠም አርሰው በስንዴ ዘር ሸፍነዋል። በጣም ጥሩ ዜና ነው። በጣም እንጂ። የሚገርምዎት...

    [ክቡር ሚኒስትሩ የሚመሩት የሥራ አስፈጻሚ ኮሚቴ ስብሰባ አጀንዳ አድርጎ በያዘው ወቅታዊ የፀጥታና ደኅንነት ጉዳዮች ላይ ትኩረት በመስጠት ቢጀመርም በስተመጨረሻ አጀንዳውን ስቶ ስለ መዋደድ እየተጨቃጨቀ...

    በዛሬው መደበኛው መድረካችን አጀንዳ የተለመደው የፀጥታና ደኅንነት ጉዳይ ይሆናል። ሌላ አጀንዳ የምታስይዙት አጀንዳ ከሌለ በቀር ማለቴ ነው። ክቡር ሚኒስትር... እሺ ...ቀጥል አመሰግናለሁ ክቡር ሚኒስትር። መደበኛ አጀንዳው እንደተጠበቀ...