Sunday, August 7, 2022
ሌሎች ዓምዶች
    - Advertisement -
    - Advertisement -
    ዝንቅሆለታ እና ሌዝቦስ

    ሆለታ እና ሌዝቦስ

    ቀን:

    በምዕራብ ኢትዮጵያ ከአዲስ አበባ በአዲሱ መንገድ 35 ኪሎ ሜትር ርቀት ላይ በምትገኘው ሆለታ ከተማ በዓለ ጥምቀት ጥር 11 ቀን 2008 ዓ.ም. ሲከበር፣  የቀድሞው ገነት ጦር ትምህርት ቤት፣ የአሁኑ ሜጀር ጄኔራል ኃየሎም አርአያ ወታደራዊ አካዴሚ ግቢ ውስጥ የምትገኘው ጥንታዊቷ ኪዳነ ምሕረት ቤተ ክርስቲያን ታቦት ሕግ  ወደ ጥምቀተ ባሕር ሲጓዝ ወታደሮች በክብር አጅበውታል፡፡

    በሰሜን ምሥራቃዊቷ የግሪክ ደሴት ሌዝቦስ የጥምቀት (ኤጲፋንያ) በዓል የተከበረውም ረቡዕ ታኅሣሥ 27 ቀን 2008 ዓ.ም. ሲሆን፤ ለበዓሉ ድምቀት ከሰጡት አንዱ ቅዱስ መስቀሉን የያዙት ካህን በወታደራዊ ሰልፍ መታጀባቸው ነበር፡፡ (ፎቶ ከድረ ገጽ)

    ******

    ጥምቀትና ሎሚ ድሮና ዘንድሮ!
    ባህልን አክብሮ ከአንስት ርቆ
    በዓመት አንድ ጊዜ ጥምቀትን ጠብቆ
    ከኮረዳ መሐል ከውብም ውብ መርጦ
    ልቡ እንደወደዳት በውል አረጋግጦ
    ሎሚ በመወርወር የሴት ደረት መትቶ
    ውቢቷ ኮረዳም – ደረቷ ሲመታ ልቧ ተደስቶ
    ሚኖርበት ዘመን….
    ሰው ከሰው ተጫጭቶ
    ሰው ከሰው ተጋብቶ
    ድሮ ቀረ ድሮ
    ሰው “ከውጭ” ተምሮ
    ባህል ተቀይሮ
    (ሎሚም ዋጋው ንሮ)
    …አልሆነም ዘንድሮ….!
    ……..
    ያሁኑ ጎረምሳ…
    ኮረዳ ለመቅረብ ጥምቀት አይጠብቅም
    “ያው ዓመቱን ሙሉ ከሴት ጥግ አይርቅም”
    የኮረዳም ደረት…
    ለጥምቀቱ ሎሚ አሻፈረኝ አለ
    “ቀድሞ ተገላልጦ አደባባይ ዋለ”።

    በመላኩ አላምረው

    *******

    ጥምቀትን በጎንደር ከጥምቀተ ባሕር መልስ

        አፄ ፋሲል ያሠሩት ይህ መዋኛ ዓለም የኔ ብሎ በቅርስነት መዝግቦታል፡፡ የመዋኛው ስፍራ ዛሬ ጥምቀተ ባሕር ነው፡፡ ውሃው ከቀሃ ወንዝ ተጠልፎ ተሞልቷል፡፡ ቀናት ፈጅቶ የተጠራቀመው ውሃ እንደ ቃሉ የከተራ ዕለት (ጥር 10 ቀን 2008 ዓ.ም.) ተጠናቆ ተከትሯል፡፡ ከዓለም ጥግ የተሰበሰበው ጎብኚ በጎንደሬዎች አጀብ ተውጧል፡፡

    ዓለም አቀፍ መገናኛ ብዙኃን በካሜራዎቻቸው ይህንን ድንቅ ኩነት ለማስቀረት ይጣደፋሉ፡፡ ጥር 11 ማለዳ ነው፡፡ ከዚህ ታሪካዊ ቅጥር ግቢ ገብተናል፡፡ የጎንደር አድባራትና ገዳማት ቀሳውስት ጥንግ ድርባቸውን ለብሰው ኢትዮጵያዊውን ቅዱስ ዜማ አቅርበዋል፡፡ የተሟላው ጥምቀተ ባሕር እስኪባረክ፣ የተባረከው ጥምቀተ ባሕር ውስጥ ዘለው ለመግባት ያኮበኮቡ ምዕመናን አቆብቁበዋል፡፡ ይህ ልዩ ትዕይንት በየዓመቱ አይለመድም፡፡

    ይህ ልዩ ትዕይንት በየዓመቱ ጥምቀተ ባሕሩ ዳርቻ አድረው ላነጉ ሁሉ ብርቅ ነው፡፡ ጥምቀተ ባሕሩ ተባረከ፡፡ ብዙዎች ዘለው ገቡ፡፡ ከቅዱሱ ባሕር የሚጠመቁት ምዕመናን ቁጥር ጨመረ፡፡

    ኢየሱስ ክርስቶስ ወደ ዮርዳኖስ ወንዝ ወርዶ መጠመቁን ምክንያት ያደረገው መንፈሳዊ ሥርዓት ተጠናቀቀ… ታቦታቱ ወደ መንበረ ደብራቸው ሊመለሱ ነው፡፡ (በሔኖክ ሥዩም፣ጎንደር)

     

    ******

    የጥምቀት በዓል በተለያዩ አገሮች

    የ2008 ዓ.ም. /2016/ የጥምቀት በዓል በተለያዩ አገሮች በኢትዮጵያ፣ ኤርትራ፣ ግብፅ (ኮፕት)፣ ሩሲያ ጥር 10 እና 11 ሲከበር በአንዳንድ የምሥራቅ አገሮችና በምዕራቦች ታኅሣሥ 27 ቀን (ጃንዋሪ 6) ተከብሯል፡፡ በዓሉን የክርስትና እምነት ተከታዮች የጥምቀትን በዓል በየጐዳናው በመውጣትና የፀሎት ሥነ ሥርዓቱ በየሚካሄዱባቸው ጥምቀተ ባሕራት በመገኘት አክብረዋል፡፡

    በሩሲያ

    ሩሲያውያን የክርስትና እምነት ተከታዮች የጥምቀት በዓልን በየአብያተ ክርስቲያናቱ እንዲሁም ሥርዓተ ጥምቀት በሚካሄድባቸው ሥፍራዎች አክብረዋል፡፡ በወንዞች፣ በሐይቆች፣ በባሕር ዳርቻዎች በመገኘትም በካህናት በተባረኩት ሥፍራዎች ተጠምቀዋል፡፡ አሶሽየትድ ፕሬስ እንደዘገበው፣ አብዛኞቹ ሩሲያውያን በረዶ በተጋገሩባቸው ውኃማ ሥፍራዎች ሥርዓተ ጥምቀቱን ፈጽመዋል፡፡

    ቡልጋሪያ

    በቡልጋሪያ አብዛኞቹ ወጣት ወንዶች በዓሉን ያከበሩት በረዶዋማ በሆኑ ወንዞችና ሐይቆች ውስጥ በመጠመቅ ነው፡፡ በቡልጋሪያ በጥምቀተ ባሕሩ ላይ ካህን መስቀል በጨርቅ አስረው ይወረውራሉ፡፡ ወጣት ወንዶችም መስቀሉን ለማግኘት ከባሕሩ ገብተው ይፈልጋሉ፡፡

    መስቀሉን ያገኘ ወጣት ዓመቱን ሙሉ ጤናማ ሆኖ ይኖራል፣ መጥፎ መንፈስም አይጠናወተውም ተብሎ ይታመናል፡፡ መስቀሉን ከባሕር የማግኘት ሥነ ሥርዓት ከተከናወነ በኋላ ካህኑ ባሕሩን በፀሎት ይባርኩና፣ ምዕመኑ የጥምቀት ሥነ ሥርዓቱን ያከናውናል፡፡

    በቡልጋሪያ እንደ በረዶ በቀዘቀዘ ባሕር ውስጥ ገብቶ መዋኘት፣ ከውስጥ ሆኖ መደነስም በጥምቀት በዓል የሚከናወን ልማድ ነው፡፡

    ቼክ ሪፐብሊክ

    በቼክ ሪፐብሊክ ጥምቀት ከችሮታ ወይም በጐ አድራጐት ሥራ ጋር የተያያዘ ነው፡፡ ከ60 ሺሕ እስከ 70 ሺሕ የሚጠጉ በጐ ፈቃደኞች በመላ አገሪቱ በመሰማራት የተቸገሩ ሰዎችን ለመርዳት የሚያስችል ገንዘብ ይሰበስባሉ፡፡ ባለፈው ዓመት 3.6 ሚሊዮን ዶላር የተሰበሰበ ሲሆን፣ ሥራውን የሚመራው የሮማን ካቶሊክ ቤተ ክርስቲያን ከተገኘው ገንዘብ 10 በመቶ ያህሉን ለውጭ ዕርዳታ አውሏል፡፡

    ከዚሁ ጐን ለጐን በቼክ ሪፐብሊክ ዋና ከተማ ፕራግ በሚገኘው ቫልታቫ ወንዝ ምዕመናን ገብተው በመዋኘት ሥርዓተ ጥምቀቱን ያከናውናሉ፡፡

    ፖላንድ

    በፖላንድ ዋርሶ ቀዳማዊት እመቤቷን ጨምሮ በመቶዎች የሚቆጠሩ ነዋሪዎች የጥምቀት ፀሎት ሥርዓትን ለመከታተል በየአብያተ ክርስቲያናቱ ያቀናሉ፡፡ በዋርሶው ብቻ ሳይሆን በፖላንድ በሚገኙ አብያተ ክርስቲያናት በሙሉ የጥምቀት ፀሎት ይከናወናል፡፡ ሕዝበ ክርስቲያኑም በካህኑ በተባረከ ወኃ ይፀበላል፡፡

    ግብፅ

    90 ሚሊዮን ሕዝብ ካላት ግብፅ 10 በመቶ ማለትም 10 ሚሊዮኑን ሕዝብ የሚወክሉት የግብፅ ክርስቲያኖች፣ በዓሉን ለማክበር በየአብያተ ክርስቲያናቱ ይሰባሰባሉ፡፡ ሥርዓተ ፀሎቱ እንደተከናወነ፣ ምዕመኑ ሥርዓተ ጥምቀቱን ይፈጽማል፡፡ በግብፅ ካህናት በየአብያተ ክርስቲያናቱ ከሚያደርጉት ጥምቀት በተጨማሪ በየቤቱ በመዘዋወር ፀበል ይረጫሉ፡፡ ይህም ዓመቱን ሙሉ ሕዝቡ በጤና፣ በፍርቅና በሰላም እንዲኖር ያስችላል ተብሎ ይታመናል፡፡

    በክርስትና እምነት ተከታዮች ዘንድ የጥምቀት በዓል ተከብሯል፡፡ በቆጵሮስ፣ ግሪክ፣ ስፔይን፣ አሜሪካ፣ ዌስት ባንክ፣ ዩክሬንና የተለያዩ አገሮች በዓሉን ያከበሩ ሲሆን በየአገራቱ የሚገኙ ካህናትም የመጠመቂያ ባሕሮች፣ ወንዞችና ሐይቆችን ባርከዋል፡፡ ሕዝቡም በየባህሩ እየገባ የተጠመቀ ሲሆን፣ አብዛኞቹ የመጠመቂያ ሥፍራዎች የበረዶ ግግር ያለባቸውና፣ ቀዝቃዛ ሥፍራዎች እንደነበሩ ዓለም አቀፍ ሚዲያዎች ዘግበዋል፡፡ 

    - Advertisement -

    ይመዝገቡ

    ተዛማጅ ጽሑፎች
    ተዛማጅ

    በዓለም ጂኦ ፖለቲካ መድረክ የኢትዮጵያ ተፈላጊነት

    የአሜሪካው የውጭ ጉዳይ ሚኒስትር አንቶኒ ብሊንከን በሦስት የአፍሪካ አገሮች...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...