Thursday, August 18, 2022
ሌሎች ዓምዶች
    - ማስታወቂያ -
    - ማስታወቂያ -

    የምሥራቅ ጃፓን የካይዘን ፍልስፍና ለአፍሪካ

    - ማስታወቂያ -

    ተዛማጅ ፅሁፎች

    አቶ አስና ጉዲሳና አቶ መስፍን በቀለ በጃፓን የካይዘን አተገባበርን በሚመለከት ሥልጠና እየተከታተሉ ከሚገኙ አፍሪካውያን ባለሙያዎች መካከል ናቸው፡፡ ሁለቱም በኢትዮጵያ የካይዘን ኢንስቲትዩት ባልደረቦች ሲሆኑ፣ በጃፓን አገር የአንድ ወር የተግባርና የንድፈ ሐሳብ ሥልጠና በመከታተል ላይ ይገኛሉ፡፡

    ከኢትዮጵያ፣ ከኬንያ፣ ከደቡብ አፍሪካ እንዲሁም ከፈረንሳይ የተውጣጣ የጋዜጠኞች ቡድን በጃፓን የተለያዩ ከተሞች ጉብኝት በማድረግ ላይ ይገኛል፡፡ የጉብኝቱ ዓላማም ጃፓን ከአፍሪካ ጋር ያላትን ግንኙነትና ትብብር መሠረት ያደረገ ሲሆን፣ በተለይ ከስድስት ወይም ከሰባት ወራት በኋላ በኬንያ አስተናጋጅነት እንደሚካሄድ ሰሞኑን በአፍሪካ ኅብረት ጉባዔ ወቅት ይፋ የተደረገውን የጃፓን አፍሪካ ጉባዔ ወይም በመጠሪያ ስሙ ‹‹ቶኪዮ ዓለም አቀፍ ጉባዔ ለአፍሪካ ልማት – ቲካድ›› ስድስተኛን ለማስተዋወቅ ያለመ ነው፡፡

    ከቶኪዮ 360 ኪሎ ሜትር ርቃ ከምትገኘውና በኢንዱስትሪ ከተማነቷ ከምትታወቀው ናጎዋ ከተማ የካይዘን አተገባበር ምን እንደሚመስል እየተከታተሉ ከሚገኙት አፍሪካውያን ሠልጣኞች መካከል ሪፖርተር ያነጋገራቸው አቶ አስናቀ ጉዲሳ በኢትዮጵያ ካይዘን ኢንስቲትዩት በጨርቃ ጨርቅና አልባሳት መስክ መሪ አማካሪ ናቸው፡፡ እንደ አቶ አስናቀ ሁሉ አቶ መስፍን ወንድሙም በኢንስቲትዩቱ አገልግሎትና መሠረተ ልማት መሪ አማካሪ ሆነው የመንግሥት የልማት ድርጅቶችንም ሆነ የግል ኩባንያዎች በመስኮቻቸው ያማክራሉ፡፡ ስለካይዘን በኢትዮጵያ የሚሰጡ ንድፈ ሐሳብ ላይ ያተኮሩ ሥልጠናዎች ይሰጣሉ ያሉት አቶ አስናቀ፣ የካይዘን ሥልጠናዎች በሁለት ደረጃዎች ተከፍለው እየተሰጡ እንደሚገኙ አስረድተዋል፡፡ የመጀመሪያ ካይዘን አተገባበር ቴክኒኮችን ኢትዮጵያውያን ከጃፓኖች በመቅሰም በራሳቸው ለመተግበር የሚችሉበት ደረጃ ላይ መድረሳቸውን አብራርተዋል፡፡ የመጀመሪያ ደረጃ ካይዘን አሠልጣኞችና ሠልጣኞች በብዛት ስለሚገኙ ኢንስቲትዩቱ ከራሱ አልፎ ሌሎችን የሚያሠለጥንበት ደረጃ ላይ እንደሚገኝም አብራርተዋል፡፡ አለፍ ሲልም እንደ መቀሌ ያሉ ዩኒቨርሲቲዎች በማስትሬት ዲግሪ ደረጃ ሥርዓተ ትምህርት አሰናድተው ባለሙያዎችን ማሠልጠን ጀምረዋል፡፡ የመጀመሪያዎቹ ምሩቃንም ወደ መስኩ ተቀላቅለዋል፡፡

    በጠቅላላው ከስድስት ወር ጀምሮ እስከ ሁለተኛ ዲግሪ ባለው ዕርከን የሚሰጡት ሥልጠናዎች በብዛት ንድፈ ሐሳባዊ በመሆናቸው በተግባር እንዴት እንደሚተገበር ለማየት የሚያችል ሥልጠና በጃፓን እየተከታተሉ እንደሚገኙ አቶ አስናቀ ይገልጻሉ፡፡

    በኢትዮጵያ የመጀመሪያ ደረጃ ወይም መሠረታዊ የሚባል የካይዘን ሥርዓት በኢትዮጵያውያን መመራት እንደሚችል ያረጋገጡት ጃፓኖች፣ ከፍ ወዳለውና ውስብስብ በሆኑ የማምረት ሒደቶች ውስጥ የሚተገበረውን የካይዘን ሥርዓት ለማምጣት ከጃፓን መንግሥት ድጋፍ እያገኙ ካሉ አገሮች አንዷ ነች፡፡

    በካይዘን ፍልስፍናና ትግበራ ትልቅ ቦታ ከያዙ ትልልቅ ኩባንያዎች መካከል አንዱ የሆነው ቶዮታ ግሩፕ ኩባንያ በሥሩ ካቀፋቸው በርካታ ድርጅቶች መካከል በሁለቱ ጉብኝት ያደረጉት እነ አቶ አስናቀ፣ በቶዮታ ኩባንያ ውስጥ እየተተገበረ ያለውን በምርት ሒደት ወቅት የችግር አፈታት ሥርዓት፣ ጠቅላላ ምርታማ ክብካቤ (ቶታል ፕሮዳክቲቭ ሜንቴናንስ)፣ ምርታማነትን መጨመርና በውጤታማ አሠራር ወጪን መቀነስ የቻሉባቸውን፣ የሠራተኞችን ክህሎት እንዴት እንደሚያሳድጉ መሰል ይዘቶችን በሥልጠናቸው ወቅት እንዲመለከቱ ተደርጓል፡፡

    ምንም እንኳ በጃፓን ጥቃቅንና አነስተኛ የሚባሉ ቢሆንም በኢትዮጵያ ከትልልቅ ኩባንያዎች ተርታ የሚመደቡ ከቶዮታ ኩባንያ ጋር ግንኙነት ያላቸው ሁለት ፋብሪካዎችን ጎብኝተዋል፡፡ ቶዮታን ጨምሮ ለሌሎች የመኪና አምራች ድርጅቶች የተለያዩ የመኪና ቁሳቁሶችን የሚያመርተውና ከናጎዋ ከተማ የአንድ ሰዓት መንገድ ርቃ በምትገኘው ሚዮሺ ከተማ ውስጥ የሚገኘው ቶዋ ኩባንያ፣ ከመኪና ቁልፍ ጀምሮ ያሉትን ቀላል የመኪና ዕቃዎች አምራች ኩባንያ በጋዜጠኞችና በሠልጣኞቹ ከተጎበኙት መካከል አንዱ ነው፡፡ ይህ ኩባንያ የሚከተላቸው የምርትና የአመራረት ሥርዓቶች ከምርት ግብዓት እስከ ምርት ማስረከብ ባለው መጨረሻ ሒደት ውስጥ ካይዘንን ይተገብራል፡፡ የማምረቻ ፋብሪካው ሥርዓትና ንጽህና እንዲሁም የግብዓት አጠቃቀም ስልት፣ የሠራተኞች አምራችነት ብቃት ወዘተ. በኩባንያው ኃላፊዎች ገለጻ ተደርጎላቸዋል፡፡

    ከዚህ ይበልጥ ደግሞ በቶዮታ ሞተርስ ኩባንያ ሥር ታቅፈው ከሚንቀሳቀሱ መካከል አንዱ የሆነው ‹‹ቶዮታ አውቶ ቦዲ›› የተባለው ሲሆን፣ እዚህ ኩባንያ ውስጥ የቶዮታ መኪና አዳዲስ ሞዴሎችና ወደ ፊት የሚፈበረኩበት፣ ገበያ ላይ ያልወጡ መኪኖች የሚገኙበት ኩባንያ ነው፡፡ ትልልቅ የኮፒ መብት ጥበቃ የሚደረግበት፣ ጎብኝዎች ከተፈቀደላቸው ክልል የማያልፉበት፣ ማንነታቸውን ከየትኛውም አቅጣጫ የሚገኙ ስውር ካሜራዎች እንዲለዩ ለጎብኝዎች የሚሰጥ መለዮ ማጥለቅ ግድ የሚልበት ጥብቅ ኩባንያ ነው፡፡

    በዚህ ተቋም ውስጥ ተቀጥረው የሚሠሩ 17,500 ሠራተኞች በካይዘን ሥርዓት መሠረት የተቃኙ ናቸው፡፡ እ.ኤ.አ. በ1945 የተመሠረተው ቶዮታ አውቶ ቦዲ በዓመት ከ711 ሺሕ በላይ መኪኖችን በማምረት ዓመታዊ ሽያጭ የሚያከናውነው ይህ ኩባንያ፣ ከሚሰጣቸው ሥልጠናዎች መካከል ለጀማሪ ሠራተኞች፣ በሥራ ላይ ላሉና ከተለየዩ የሥራ መስኮች ለልምምድ የሚመጡትን ተቀብሎ የሚያሠለጥንበት የራሱ የሥልጠና ማዕከል ያለው ነው፡፡

    በኩባንያው መሥሪያ ቤት ተገኝተው የሥልጠና አሰጣጡን የተከታተሉት አፍሪካውያኑ ሠልጣኞችና ጎብኝዎች መሠረታዊ የመኪና ቀለብ ቅብና የብሎኖች በማሽን አገጣጠም እንዲሁም አፈታት ሥርዓቶች ከመሠረታዊ የሥራ ላይ ደኅንነት ጋር ተዳምረው እንዴት እንደሚሰጡ በተግባር እንዲያዩ ሲደረግ ሒደቶቹንም ሞክረው አሳይተዋል፡፡

    ለአንድ ወር ያህል ከሚቆየው ሥልጠና ምን እንደሚገኝበት ያብራሩት አቶ መስፍን፣ በጃፓን ኩባንያዎች ጉብኝት ታጅቦ እየተሰጠ ያለው ሥልጠና አገር ቤት በኩባንያዎች ውስጥ የሚታየው ብክነት የተሞላበት የአመራረት ሥርዓት ከዚህ በፊት ካሳየው ይልቅ ይበልጥ እንዲቀንስ ለማድረግ ያስችላል፡፡ አንድ ሥራ ሲታቀድ፣ ሲተገበር፣ እንዲረጋገጥና ዕርምጃ ሲወሰድ የሚሳየውን የካይዘን ሒደት በጃፓን ኩባንያዎች ዘንድ እንዴት እንደሚሠራበት ማየት ትልቅ ጥቅም እንደሰጣቸው አብራርተዋል፡፡

    ይህም ቢባል ግን ካይዘንን ወደ ኢትዮጵያውያን ልብ ውስጥ ለማስረጽ መንገዱ ረጅም ሆኖ ይታያል፡፡ ጃፓኖች አኗኗራቸው ሁሉ ካይዘን ብለው በሚጠሩት ሥርዓት መሠረት የተቃኘ ሆኖ ይታያል፡፡ አለባበሳቸው፣ አመጋገባቸው፣ አካሄዳቸው፣ አነጋገራቸው፣ በጠቅላላው ሁለመናቸው የተሰተረና ሥርዓትን የተከተለ ነው፡፡ ከጥቃቅኗ ነገር ጀምሮ እስከ ትልቅና ውስብስብ እስከሆነው ነገር ላለው የሕይታቸው እንቅስቃሴ የሚሰጡት ትኩረት፣ ለንጽህና ያላቸው ከፍተኛ ግምት፣ ምንም ዓይነት የተፈጥሮ ሀብት ባይኖራቸውም ካላቸው ሕዝቦች በላይ ሆነው እንዲኖሩና እጅግ የመጠቀ ቴክኖሎጂ ላይ ተራቀው እንዲቀመጡ ካስቻሏቸው ፍልስፍናዎች መካከል አንዱ ከአሜሪካኖች የቀዱትና ካይዘን ብለው የሰየሙት ፍልስፍናቸው ነው፡፡

     ከሁለት የጃፓን ቃላት የተፈጠረው ካይዘን ‹‹ካይ››፣ ‹‹ዘን›› የሚሉ ቃላት የወለዱት ሲሆን፣ ካይ ማለት ለውጥ ዘን ደግሞ የተሻለ በሚሉ ቃላት ሊፈቱ ይችላሉ፡፡ በመሆኑም ካይዘን ማለት የተሻለ ለውጥ ማምጣት መቻል ማለት ይሆናል፡፡ ከዚህ በተሻለ ሲገለጽ ደግሞ የተሻለ ለውጥ ማምጣት ብቻም ሳይሆን ለውጡን ሳያቋርጡ እስከወዲያኛው እያመጡ መቀጠል ማለትንም ይጨምራል፡፡

    በዚህ ጽንሰ ሐሳብ በመመራት ትልቅ ለውጥ በማምጣት የጃፓንን ኢኮኖሚ ከሁለተኛው የዓለም ጦርነት ማጥ ለማውጣት ምክንያት ከነበሩ ኩባንያዎች አንዱ ቶዮታ ይጠቀሳል፡፡ ቶዮታ ኩባንያ የመጀመሪያዋን ጃፓን ሠራሽ አውቶሞቢል ዲዛይን ከማድረግ ጀምሮ ገጣጥሞ እስከማውጣት፣ እ.ኤ.አ. ከ1950ዎቹ መነሻ ባለው ጊዜ ውስጥ የጃፓንን የ40 ከመቶ ጠቅላላ ብሔራዊ ገቢ እስከማስገኘት ባለው ሒደት ውስጥ ለማለፍና በዓለም የገዘፈ ስም ለማግኘት እስከበቃበት እስካሁኑ ደረጃ የደረሰው ካይዘን የሚባለውን ፍልስፍና በመተግበር እንደሆነ ይነገርለታል፡፡

    ምንም እንኳ ቶዮታ ኩባንያ ከጥንቱ የሚታወቅበት ዋና ሥራው በጨርቃ ጨርቅ አምራችነት ቢሆንም፣ እ.ኤ.አ. ከ1933 ጀምሮ ግን በአውቶሞቢል ኢንዱስትሪ ውስጥ ለመሳተፍ አሻራውን የጣሉት የቶዮታ ኩባንያ መሥራች ልጅ የሆኑት ኪቺሮ ቶዮዳ መሆናቸውን ጃፓናውያን በኩራት ይናገራሉ፡፡ ሚስተር ቶዮዳ የመጀመሪያዋን ጃፓን ሠራሽ መኪና ለማምራት ብሎም ለመንግሥት የጭነት መኪኖችን እያንዳንዱ ክፍል በአገራቸው ቁሳቁስ አምርተውና ገጣጥመው ማስረከብ የቻሉበትን ሒደት የሚዘግብ፣ የመኪና ቴክኖሎጂን ያስፋፉበት የፋብሪካ ውጥንና መሰል ሒደት ከትቦ ለአሁኑ ትውልድ ያስቀመጠ ሙዚየም በጃፓን በብዙ ሺዎች ሲጎበኝ ውሎ የሚያድር ትልቅ የታሪክ መዝገብ ነው፡፡ 

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች