Sunday, August 7, 2022
ሌሎች ዓምዶች
    - ማስታወቂያ -
    - ማስታወቂያ -

    በሥራ ላይ ለሚገኙ ሰፋፊ የእርሻ ፕሮጀክቶች የብድር መክፈያ ጊዜ ተራዘመ

    - ማስታወቂያ -

    ተዛማጅ ፅሁፎች

    መልካም ጅማሮ ተብሏል

    በአገሪቱ በሚገኙ ሰፋፊ እርሻዎች ላይ የተጋረጡ ችግሮችን ለመፍታት ከቀረቡ የመፍትሔ ሐሳቦች መካከል አንዱ በሆነው የፋይናንስ አቅርቦት ላይ፣ የኢትዮጵያ ልማት ባንክ መጠነኛ ማሻሻያ አደረገ፡፡

    የኢትዮጵያ ልማት ባንክ ፕሬዚዳንት አቶ ጌታሁን ናና ለምክትል ፕሬዚዳንቶችና ለዲስትሪክቶች በጻፉት የውስጥ ማስታወሻ፣ አብዛኞቹ በዝናብ የሚለሙ የእርሻ ፕሮጀክቶች በተፈጥሮና ሰው ሠራሽ ችግሮች ብድራቸውን በወቅቱ መክፈል አልቻሉም ብለዋል፡፡

    ‹‹በዝናብ የሚለሙ በባንኩ ብድር የተቋቋሙ የእርሻ ፕሮጀክቶች በማምረት ሒደት ላይ ያሉ፣ ነገር ግን በተለያዩ ምክንያቶች አሁን ብድራቸውን መክፈል የማይችሉ መሆኑ በባንኩ ባለሙያዎች ከተረጋገጠ፣ መሬቱ ጦም አድሮ በጢሻና በጫካ እንዳይሸፈን ከማድረግ አንፃር ሥራ ላይ ያሉ ፕሮጀክቶች ተለይተው ተጨማሪ ብድር እስካልጠየቁ ድረስ ወደ ፎርክሎዠር (ሐራጅ) ከመሄድ ይልቅ፣ ከባንኩ የሪሃብሊቴሽን ሜካኒዝም ወለድ ካፒታላይዝ ተደርጎ የብድር መክፈያ ጊዜ እንዲራዘምላቸው እያሳሰብኩ፣ አፈጻጸሙን በተመለከተ በባንኩ ብድር የተቋቋሙ በዝናብ የሚለሙ ሰፋፊ እርሻዎች ግብረ ኃይል ክትትል እንዲደረግ አሳስባለሁ፤›› በማለት በአቶ ጌታሁን የተጻፈው የውስጥ ማስታወሻ ይገልጻል፡፡

    በሰፋፊ እርሻ ኢንቨስትመንት የተሰማሩ ኢንቨስተሮች በማያላውስ ችግር ውስጥ መተብተባቸውን በመግለጽ፣ መንግሥት መፍትሔ እንዲሰጣቸው መጠየቅ ከጀመሩ ዓመታት ተቆጥረዋል፡፡

    ነገር ግን ችግሮቻቸውን ሰምቶ መፍትሔ የሚሰጥ መንግሥታዊ ተቋም በመጥፋቱ፣ አገሪቱ ከሰፋፊ እርሻ ማግኘት ያለባትን ብቻ ሳይሆን ያገኘችውንም እያጣች መሆኗን የዘርፉ ተዋናዮች ያስረዳሉ፡፡

    በተለይ በቤንሻንጉል ጉሙዝ፣ በደቡብ ኦሞ፣ በሶማሌ፣ በጋምቤላና በትግራይ ክልል በሰፋፊ እርሻ ኢንቨስትመንት የተሰማሩ ኢንቨስተሮች በማኅበራቸው አማካይነት ለጠቅላይ ሚኒስትር ዓብይ አህመድ (ዶ/ር) ጭምር አቤቱታ አቅርበዋል፡፡

    ነገር ግን በመጨረሻ የሆርቲካልቸርና የሰፋፊ እርሻዎች ልማት ባለሥልጣን ግንቦት 17 እና 18 ቀን 2010 ዓ.ም. በአዳማ ከተማ ባካሄደው ስብሰባ፣ በዘርፉ የተጋረጡ ችግሮችን ለመፍታት የተሟላ የተባለ ሰነድ አቅርቧል፡፡

    በዚህ ወቅት በፋይናንስ አቅርቦት እስካሁን ለነበረው ችግር የኢትዮጵያ ልማት ባንክ በሰፊው መወቀሱን፣ በስብሰባው የተሳተፉ የሪፖርተር ምንጮች ገልጸዋል፡፡

    ከዚህ በኋላ ግንቦት 23 ቀን 2010 ዓ.ም. ፕሬዚዳንቱ አቶ ጌታሁን አዲስ ብድር ሳይሆን፣ የብድር ማራዘሚያ እንዲደረግ መፍቀዳቸው ታውቋል፡፡ የዘርፉ ኢንቨስተሮች ይኼንኑ የልማት ባንክ ዕርምጃ መልካም ጅማሬ ብለውታል፡፡ ነገር ግን በባለሥልጣኑ የቀረበው የመፍትሔ ሰነድ በአፋጣኝ ተግባራዊ እንዲደረግም ጨምረው ጠይቀዋል፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች