Tuesday, August 9, 2022
ሌሎች ዓምዶች
    - ማስታወቂያ -
    - ማስታወቂያ -

    የቻይና ኩባንያ ሰባት የኤሌክትሪክ ኃይል ማመንጫዎችን ለመገንባት ለመንግሥት ጥያቄ አቀረበ

    - ማስታወቂያ -

    ተዛማጅ ፅሁፎች

    • የግሉን ዘርፍ የሚጋብዘው አዋጅ በቅርብ ለመንግሥት ይቀርባል

    በዓባይ ወንዝ ላይ የሚገነባው የታላቁ የኢትዮጵያ ህዳሴ ኃይድሮ ኤሌክትሪክ ኃይል ማመንጫ ፕሮጀክት አካል የሆነውን የኃይል የማሰራጫና ማከፋፈያ ጣቢያ የገነባው ግዙፉ የቻይና ኩባንያ ስቴት ግሪድ፣ ሰባት የኤሌክትሪክ ኃይል ማመንጫዎችን ለመገንባትና የሚያመነጨውን ኃይል ለመንግሥት ለመሸጥ ጥያቄ አቀረበ፡፡

    ስቴት ግሪድ አራት የኃይድሮ ኤሌክትሪክ ግድቦችና ሦስት የንፋስ ኃይል ማመንጫ ጣቢያዎች በመገንባት፣ ለኢትዮጵያ መንግሥት የኤሌክትሪክ ኃይል ለመሸጥ ጥያቄ አቅርቧል፡፡

    የውኃ፣ መስኖና ኤሌክትሪክ ሚኒስትሩ አቶ ሞቱማ መቃሳ፣ ስቴት ግሪድ በራሱ አቅም የኃይል ማመንጫ ግንባታዎችን ለማካሄድ ጥያቄ ማቅረቡን ለሪፖርተር አረጋግጠዋል፡፡

    አቶ ሞቱማ ጨምረው እንደገለጹት፣ 20 ኩባንያዎች በራሳቸው አቅምና ከመንግሥት ጋር በሽርክና በመሆን የኃይል ማመንጫዎችን ለመገንባት ጥያቄ አቅርበዋል፡፡

    መንግሥት እነዚህን ጥያቄዎች ለማስተናገድ በተለይ በግል የኤሌክትሪክ ኃይል የማመንጨት ተግባር (IPP) እና በመንግሥትና በግል በሚደረግ የኤሌክትሪክ ኃይል ማመንጫዎችን መገንባት የሚያስችል (PPP) አዋጅ በማዘጋጀት ላይ ነው፡፡ አቶ ሞቱማ እንደገለጹት፣ የተዘጋጀው አዋጅ በሚቀጥሉት ሦስት ወራት ለሚኒስትሮች ምክር ቤት ይቀርባል፡፡ ደንቡም አብሮ እየተዘጋጀ መሆኑን አክለዋል፡፡  

    መንግሥት ኢትዮጵያን የምሥራቅ አፍሪካ የኤሌክትሪክ ኃይል እምብርት (Hub) ለማድረግ የያዘውን ዕቅድ ለማሳካት፣ የግል ዘርፍ ተዋንያንን ማስገባት እንዳለበት ውሳኔ ላይ ደርሷል፡፡ ፍላጎት ያላቸው ኩባንያዎች በራሳቸው አቅም ወይም ከመንግሥት ጋር በጋራ ወደ ልማት መግባት እንዲችሉ ፖሊሲ አስቀምጧል፡፡

    ባለሙያዎች እንደሚገልጹት ኢትዮጵያ ከተለያዩ የኤሌክትሪክ ኃይል ማመንጫ አማራጮች በሚሊዮን የሚቆጠር ሜጋ ዋት ኃይል ማመንጨት የምትችልበት ዕምቅ ሀብት ያላት በመሆኑ፣ ይህንንም ለማልማት ብድር ብቻ የፋይናንስ ምንጭ መሆን ስለሌለበት በሯን ለግሉ ዘርፍ ክፍት ማድረጓን ይናገራሉ፡፡ ይህ አሠራር የአገሪቱን የብድር ጫና ከመቀነሱም በላይ ለማክሮ ኢኮኖሚው ትልቅ አስተዋጽኦ ይኖረዋል በማለት ባለሙያዎች ገልጸዋል፡፡

    አቶ ሞቱማ በኢትዮጵያ የኤሌክትሪክ ኃይል ማመንጨት ሥራ ጥያቄ ያቀረቡ ኩባንያዎች ያቀረቡት ምክረ ሐሳብና አቅም ከታየ በኋላ፣ ለአገሪቱ የሚበጀው ፕሮጀክት እየተለየ ይሰጣል ብለዋል፡፡

    በኢትዮጵያ በኤሌክትሪክ ኃይል ማመንጨት ለመሰማራት ፍላጎት ከሳዩ አገሮች መካከል አሜሪካና ቻይና ቀዳሚውን ሥፍራ ይዘዋል፡፡ በመቀጠል በዘርፉ ለመሰማራት ጥያቄ ያቀረቡት የእንግሊዝ፣ የቱርክ፣ የስዊድን፣ የደቡብ ኮሪያ፣ የደቡብ አፍሪካና የብራዚል ኩባንያዎች ናቸው፡፡

    የቻይናው ስቴት ግሪድ በህዳሴው ግድብ ላይ በ1.2 ቢሊዮን ብር ያካሄደው የኃይል ማሰራጫና ማከፋፈያ ጣቢያ ንግባታ 99 በመቶ ተጠናቋል፡፡

    ከዚህ በተጨማሪ በአዲስ አበባ ባቡር መስመር ዝርጋታ አራት ቦታዎች የኤሌክትሪክ ኃይል ማከፋፈያ ጣቢያዎችን በአጭር ጊዜ ውስጥ ገንብቷል፡፡ ኩባንያው እነዚህን ግንባታዎች የጀመረው የሚለቀቅለትን ፋይናንስ ሳይጠብቅ በራሱ አቅም እንደሆነ ተገልጿል፡፡

     

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች