Tuesday, August 16, 2022
ሌሎች ዓምዶች
    - Advertisment -
    - Advertisment -

    የክቡር ሚኒስትሩ ሾፌር አርፍዶ ቤታቸው መጣ

    [የክቡር ሚኒስትሩ ልጅ የፈተና ውጤቱን መጥቶ እያሳያቸው ነው፡፡ ክቡር ሚኒስትሩ በጣም ተናደዋል]

    • ና አንተ፡፡
    • አቤት ዳዲ?
    • ምን ሆነህ ነው?
    • ምን ሆንኩ?
    • ውጤትህን አይተኸዋል?
    • አሪፍ ነው አይደል ዳዲ?
    • ሳይንስ ያመጣኸው አሪፍ ነው፡፡
    • እንግሊዝኛስ ዳዲ?
    • እሱንም ጥሩ ሠርተሃል፡፡
    • የሶሻል ሳይንስ ውጤቴስ ጥሩ አይደል?
    • እኔ እሱ ላይ ጥያቄ የለኝም፡፡
    • ታዲያ ምን ላይ ነው ጥያቄ ያለህ?
    • ሒሳብ ላይ፡፡
    • ምንድነው ጥያቄህ?
    • ሒሳብ ላይ ያለብህ ችግር ምንድነው?
    • ኧረ ምንም ችግር የለብኝም፡፡
    • ታዲያ እንዴት ነው እንደዚህ ዓይነት ውጤት ልታመጣ የቻልከው?
    • ችግሩ የእኔ አይደለም ዳዲ፡፡
    • የፈተና ውጤትህን እያየሁት እኮ ነው?
    • ችግሩ የእኔ አይደለም አልኩህ እኮ ዳዲ፡፡
    • ከመቶ ስንት እንዳመጣህ አይተኸዋል?
    • እ. . . ዳዲ. . .
    • አሥራ አምስት በመቶ እኮ ነው ያመጣኸው?
    • እሱ እኮ የአስተማሪዎቹ ስህተት ነው፡፡
    • የምን የአስተማሪ ስህተት ነው፣ ስህተቱማ የአንተ ነው፡፡
    • አይደለም ዳዲ እኔ እንዲያውም ትምህርት ቤት ሄደን እንድታስረዳቸው ነው የምፈልገው፡፡
    • ምኑን ነው የማስረዳቸው?
    • መሳሳታቸውን ነዋ፡፡
    • የተሳሳትኸው አንተ ነህ እንጂ እነሱ እኮ አይደሉም፡፡
    • ዳዲ ሙት እመነኝ እነሱ ናቸው የተሳሳቱት፡፡
    • ወረቀትህን እያየሁት እንዴት እነሱ ተሳሳቱ ትለኛለህ?
    • አየህ ዳዲ አንተ ራስህ አልገባህም ማለት ነው?
    • ደግሞ ከመሬት ብቅ ሳትል እኔን ሒሳብ ልታስተምር ትፈልጋለህ?
    • ከተሳሳትክ ባስረዳህ ምን ችግር አለው?
    • ስለሒሳብ ሥሌት ነው እኔን የምታስረዳኝ?
    • ምን ችግር አለው?
    • ይኼ እኮ የሒሳብ መሠረታዊ ነገር ነው፡፡
    • አውቃለሁ ዳዲ፡፡
    • ብታውቅማ እንደዚህ አትሳሳትም ነበር፡፡
    • ዳዲ አንተም አስተማሪዎቹም ያልገባችሁ ነገር ስላለ ነው፡፡
    • ምንድነው ያልገባን?
    • የሒሳብ ሥሌት ነዋ፡፡
    • ቆይ እንጂ ከዘጠኝ ላይ ሦስት ሲቀነስ ስንት ነው?
    • አሥራ ሁለት፡፡
    • ሒሳብ ምንም አትችልም እንዴ?
    • እንዴ ዳዲ?
    • እሺ አሁን አራት ሲባዛ በሁለት ስንት ነው?
    • ስድስት፡፡
    • አሁን በደንብ ነው የገባኝ፡፡
    • ምንድነው የገባህ ዳዲ?
    • መሠረታዊ የሒሳብ ሥሌት ችግር እንዳለብህ፡፡
    • እኔ ደግሞ የገባኝ አንድ ነገር አለ፡፡
    • ምንድነው የገባህ?
    • አንተም አስተማሪዎቼም አዲሱን ለውጥ አትቀበሉም ማለት ነው፡፡
    • የምን ለውጥ?
    • አገሪቱ ውስጥ የመጣውን ለውጥ አትቀበሉትም ማለት ነው?
    • ፖለቲከኛም ሆነኸልኛል ልበል?
    • ዳዲ እኔ እንደተረዳሁት አንተም አስተማሪዎቼም የድሮ ሥርዓት ናፋቂዎች ናችሁ፡፡
    • እኔ ጠፋሁ፣ ከማን ጋር ነው የምትውልልኝ?
    • ዘመኑ የምን ዘመን መሆኑን ረሳኸው እንዴ?
    • የምን ዘመን ነው?
    • የመደመር!

    [የክቡር ሚኒስትሩ ሾፌር አርፍዶ ቤታቸው መጣ]

    • አንተ ስለአዲሱ አለቃ ነግሬሃለሁ አይደል እንዴ?
    • አዎን ክቡር ሚኒስትር፡፡
    • እንደዚህ እያስረፈድከኝ ልታስጠምደኝ ነው?
    • ይቅርታ ክቡር ሚኒስትር፡፡
    • ይኼኔ ማታ አንቡላህን ስትልፍ አምሽተህ ነው፡፡
    • ኧረ በፍፁም፡፡
    • ምን ሆነህ ነው ታዲያ ያረፈድከው?
    • የዓለም ዋንጫ ሳይ አምሽቼ ነው፡፡
    • አሁን ምን ኳስ አለ ብለህ ነው?
    • እንዴት ክቡር ሚኒስትር?
    • አንጋፋዎቹ ቡድኖች ተባረው ምንም የዓለም ዋንጫ አይመስልም እኮ?
    • ዋናው እሱ አይደል እንዴ?
    • እንዴት ማለት?
    • አይነኬ የሚባሉት ቡድኖች እየተዋረዱ ምድባቸው እንኳን ሳይቀር ማለፍ ተስኗቸው ሲታዩ አያስገርምም?
    • ወጣት ሲባል እኮ ግንፍልተኛ ነው፡፡
    • እንዴት ክቡር ሚኒስትር?
    • ስማ የዓለም ዋንጫን እኮ የዓለም ዋንጫ ያስባሉት ቡድኖች እነዚህ ናቸው፡፡
    • የትኞቹ?
    • እነ ጀርመን፣ ብራዚል፣ አርጀንቲና፣ ስፔንን የመሳሰሉት፡፡
    • ይኸው ከብራዚል ውጪ ሁሉም ከውድድሩ ተሰናብተዋል፡፡
    • ለዚህ ነው እኮ አንጋፋዎቹ የሌሉበት የዓለም ዋንጫ ምን የዓለም ዋንጫ ነው የምልህ?
    • ክቡር ሚኒስትር እነ ክሮሺያና ቤልጂየም የመሳሰሉ ቡድኖች ሲጫወቱ ግን አይተዋቸው ያውቃሉ?
    • የፈለገ ነገር ብትለኝ አንጋፋዎቹ የሌሉበት የዓለም ዋንጫ አንገሽጋሽ ነው፡፡
    • ሕዝቡ ግን ይኼኛውን የዓለም ዋንጫ በጣም በትኩረት ነው እየተከታተለ ያለው፡፡
    • እንደ አንተ ዓይነት ኳስ የማያውቅ ሰውማ ሊወደው ይችላል፡፡
    • ክቡር ሚኒስትር ከዘመኑ ጋር ሊለወጡ ይገባል እኮ፡፡
    • ምን ማለት ነው?
    • አንጋፋዎቹ እኮ ከውድድሩ የተባረሩት አዳዲሶቹ ላቅ ያለ የእግር ኳስ ችሎ ስላላቸው ነው፡፡
    • እንዳይመስልህ አትሳሳት፡፡
    • ታዲያ በምንድን ነው አንጋፋዎቹ የተባረሩት?
    • በአሻጥር፡፡
    • ክቡር ሚኒስትር ስመለከትዎ እርስዎ ከሚያውቁት ውጪ የሆነ ነገር አይወዱም፡፡
    • ምን እያልከኝ ነው?
    • ይኸው በአገሪቱ ውስጥ የመጣውን ለውጥ ራሱ መቀበል አይፈልጉም፡፡
    • አንጋፋዎቹ የሌሉበትን ለውጥ አልቀበለውም፡፡
    • እንደዚያ ከሆነ የእኔ ምክር አንድ ነው፡፡
    • ምንድነው ምክርህ?
    • በጊዜ ቢቆርጡ ይሻልዎታል፡፡
    • ምንድነው የምቆርጠው?
    • ትኬት ነዋ፡፡
    • የምን ትኬት?
    • የስንብት!

    [ለክቡር ሚኒስትሩ በአገሪቱ አሸባሪ የተባለ ድርጅት አባል ከውጭ ስልክ ደወለላቸው]

    • ሰላም ክቡር ሚኒስትር፡፡
    • ሰላም ነህ?
    • አገሪቱ ውስጥ ትክክለኛ ለውጥ መኖሩን እየተረዳሁ ነው፡፡
    • በምኑ ነው የተረዳኸው?
    • ስልኬን ራሱ ማንሳትዎ የለውጡ አካል አድርጌ ነው የቆጠርኩት፡፡
    • የምን ለውጥ ነው?
    • ይኸው ጠቅላይ ሚኒስትሩ አገራችሁ መጥታችሁ ተደመሩ እያሉን አይደል እንዴ?
    • እንግዲህ እናንተ ስትደመሩ እኛ እንቀነሳለን፡፡
    • ምን ማለት ነው ክቡር ሚኒስትር?
    • ለመሆኑ ሬሲሊንግ ዓይተህ ታውቃለህ?
    • በሚገባ ክቡር ሚኒስትር፡፡
    • አንድ ተፋላሚ ወደ ሪንጉ ሲገባ ሌላውን በእጁ እንደሚጨብጠው፣ እኛም እናንተ ስትገቡ ተጨባብጠን አገሪቱን ለቀን እንወጣለን፡፡
    • ለምን ክቡር ሚኒስትር?
    • እኔና አንተ ኢትዮጵያ ውስጥ አንድ ላይ መኖር አንችልም፡፡
    • ክቡር ሚኒስትር ዘመኑ የመደመር እኮ ነው?
    • በምንም ሥሌት እኔ ከአንተ ጋር ልደመር አልችልም፡፡
    • የድሮ ሥርዓት ናፋቂ ነዎት ልበል?
    • ነገርኩህ እኮ እኔና አንተ ኢትዮጵያ ውስጥ አንድ ላይ መኖር አንችልም፡፡
    • አይሳሳቱ ክቡር ሚኒስትር፡፡
    • ማለት?
    • ኢትዮጵያ እንኳን ለእኔና ለእርስዎ ለሌሎች ትተርፋለች፡፡
    • ይኼን ፕሮፓጋንዳህን ወሬ ለተጠሙ ጓደኞችህ ንገራቸው፡፡
    • ክቡር ሚኒስትር በፍቅርና በይቅርታ እኮ ለአገራችን ሰላም ማምጣት እንችላለን፡፡
    • ስማ ይኼው እዚህ ራሱ ያሰርናቸው አሸባሪዎች ተፈትተው ሰላም የነበረችው አገር እየተበጠበጠች ነው፡፡
    • እየቀለዱ ነው ክቡር ሚኒስትር?
    • የምን ቀልድ ነው?
    • ለሦስት ዓመታት አገሪቱ ታምሳ አሁን አይደል እንዴ ከመፍረስ የተረፈችው?
    • ስማ ለእኔ ግን ከነበረችበት የበለጠ ማጥ ውስጥ እየገባች ያለችው አሁን እየተደረጉ ባሉ ነገሮች ነው፡፡
    • አልገባኝም ክቡር ሚኒስትር?
    • አሸባሪዎቹ ሲለቀቁ ሰላም የነበረችው አዲስ አበባ ውስጥ ቦምብ ፈነዳ፡፡
    • ቦምብ ያፈነዱት እኮ የለውጡ ተቃዋሚዎች ናቸው፡፡
    • አሸባሪን መልቀቅ ለውጥ ከሆነ እሱን ቢቃወሙ ምን ችግር አለው?
    • ክቡር ሚኒስትር እውነተኛ አሸባሪ እኮ መንግሥት መሆኑን ጠቅላይ ሚኒስትሩ  ተናግረዋል፡፡
    • የማልቀበለው እኮ ይኼንን ነው፡፡
    • ምኑን?
    • እኛ አሸባሪዎች እናንተ ሰላማዊ መሆናችሁን፡፡
    • ሀቁ ግን እሱ ነው፡፡
    • ስለዚህ እኛም የእናንተ ዕጣ እንዳይደርሰን በጊዜ እንወጣለን፡፡
    • ከየት?
    • ከአገር!

    [ክቡር ሚኒስትሩ ፀጉር ቤት እየተስተካከሉ ከፀጉር ቆራጫቸው ጋር እያወሩ ነው]

    • ክቡር ሚኒስትር እንዴት ላድርገው ፀጉሩን?
    • እንደ ሁልጊዜው ነዋ፡፡
    • እኔማ ለወጥ ያለ ቁርጥ ልቆርጥዎት አስቤ ነበር፡፡
    • ሰውዬ ምንም ዓይነት ለውጥ አልፈልግም፡፡
    • ሽበትዎን ለማጥፋት ፈልጌ ነበር፡፡
    • ለምን ተብሎ?
    • ያው አርጅተዋል ምናምን ብለው ከፖለቲካው እንዳያባርርዎት ብዬ ነዋ፡፡
    • ማን ነው የሚያባርረኝ?
    • ክቡር ሚኒስትር እርስዎ ከተባረሩ እኔ ራሴ እጎዳለሁ፡፡
    • እንዴት?
    • የፀጉር ቤቴ ገቢ ሊቀንስ ይችላል፡፡
    • ለምን ይቀንሳል?
    • ያው አሁን ሚኒስትሩ የሚስተካከሉበት ፀጉር ቤት እየተባለ ገቢዬ ቀላል አይደለም፡፡
    • አንተ ግን ለእኔ ኮሚሽን አትከፍለኝም?
    • ይኸው አሁን በሚቀጥለው በጀት ዓመት የፀጉር ቤቴን ስም ሚኒስትሩ ፀጉር ቤት ልለው ወስኛለሁ፡፡
    • እሱ ምን ያደርግልኛል?
    • ያው አንጋፋዎቹ ለቀው በወጣት ይተኩ እየተባለ ስለሆነ፣ አንድ ሐሳብ ነበረኝ፡፡
    • የምን ሐሳብ?
    • እርስዎን ወጣት ማስመሰል እችላለሁ፡፡
    • እንዴት አድርገህ?
    • የፀጉርዎን ቀለም በመቀየር፡፡
    • እሱን ፈጽሞ እንዳታስበው፡፡
    • ለምን ክቡር ሚኒስትር?
    • ከተማ ውስጥ አዲስ አደን ተጀምሯል፡፡
    • ምንድነው የሚታደነው?
    • ፀጉረ ልውጥ!

    በብዛት የተነበቡ ፅሁፎች

    ባንኮች እንዲዋሀዱ እስከ ማስገደድ ሊገባ እንደሚችል ብሔራዊ ባንክ ጠቆመ

    በአሁኑ ወቅት የባንኮች ቁጥር እየጨመረ መምጣቱ ችግር የሚሆንና የውጭ...

    ለኬንያ ኤሌክትሪክ ኃይል የሚሸጥበት ታሪፍ ማሻሻያ ተደረገበት

    በቅርቡ ሙሉ ለሙሉ ስምምነቱ የተጠናቀቀው የኢትዮጵያና የኬንያ የኤሌክትሪክ ኃይል...

    አዲስ አበባ እንዳይገቡ በተከለከሉ ዜጎች ጉዳይ የኦሮሚያና አማራ ክልሎች ተወያይተው ችግሩ እንዲፈታ አደረጉ

    ለሳምንታት በርካታ ቅሬታ ሲነሳበት የነበረውና ከአማራ ክልል በደብረ ብርሃን...
    - Advertisment -

    ትኩስ ፅሁፎች

    ለሰላም ድርድሩ ‹‹ከአፍሪካ ኅብረት አደራዳሪነት ውጭ ሌላው ተቀባይነት የለውም›› የውጭ ጉዳይ ሚኒስቴር

    የሰሜን ኢትዮጵያን ጦርነትና ግጭት በሰላማዊ መንገድ ለመፍታት የተጀመረው የአፍሪካ...

    በተጠናቀቀው የበጀት ዓመት በንብረት ላይ የደረሰው የትራፊክ አደጋ በ494 በመቶ ጨምሯል

    በትራፊክ አደጋ 3,971 ሰዎች ሕይወታቸውን አጥተዋል በአገር አቀፍ ደረጃ በተጠናቀቀው...

    አዲሱን የመንግሥት መዋቅር ዘርግተው ያጠናቀቁ ተቋማት 31 በመቶ ብቻ ናቸው

    በሲቪል ሰርቪስ ኮሚሽን ሥር ካሉት 160 የፌዴራል መንግሥት መሥሪያ...

    ለተቃርኖ ምክንያት የሚሆኑ ከንቱ ድርጊቶች ይወገዱ!

    ሰሞኑን የታላቁ የኢትዮጵያ ህዳሴ ግድብ ሦስተኛ ዙር የውኃ ሙሌት...

    ለኬንያ ኤሌክትሪክ ኃይል የሚሸጥበት ታሪፍ ማሻሻያ ተደረገበት

    በቅርቡ ሙሉ ለሙሉ ስምምነቱ የተጠናቀቀው የኢትዮጵያና የኬንያ የኤሌክትሪክ ኃይል...
    spot_img

    ተዛማጅ ፅሁፎች

    [ክቡር ሚኒስትሩ የሥራ አጥነት ችግሮችን የመፍታት ተልዕኮ የተሰጠው ተቋም በዋና ጽሕፈት ቤቱ ሕንፃና ቢሮዎች ላይ ያደረገውን ዕድሳት መርቀው በመክፈት ጉብኝት እያደረጉ ነው]

    እጅግ ውብ ዕድሳት ያደረጋችሁት! በእውነቱ በጣም ድንቅ ነው፡፡ አመሠግናለሁ ክቡር ሚኒስትር። በጣም ድንቅ ነው። ዕድሳቱን ያከናወነው ድርጅት ጥሩ ልምድ ያለው ይመስላል? ተቋራጩ ማን እንደሆነ አልነገርኩዎትም እንዴ? የትኛው ተቋራጭ...

    [ክቡር ሚኒስትሩ በስንዴ የተሸፈኑ ሰፋፊ እርሻዎች ያሉበትን ሁኔታ ለመገምገም ከስንዴ ምርት ድጋፍና ክትትል ኮሚቴ ሰብሳቢ ጋር እየመከሩ ነው] 

    ክቡር ሚኒስትር እንደነገርክዎት በሁሉም ስንዴ አብቃይ አካባቢዎቻችን ያሉ አርሶ አደሮች ጥሪያችንን ተቀብለው መሬታቸውን በኩታ ገጠም አርሰው በስንዴ ዘር ሸፍነዋል። በጣም ጥሩ ዜና ነው። በጣም እንጂ። የሚገርምዎት...

    [ክቡር ሚኒስትሩ የሚመሩት የሥራ አስፈጻሚ ኮሚቴ ስብሰባ አጀንዳ አድርጎ በያዘው ወቅታዊ የፀጥታና ደኅንነት ጉዳዮች ላይ ትኩረት በመስጠት ቢጀመርም በስተመጨረሻ አጀንዳውን ስቶ ስለ መዋደድ እየተጨቃጨቀ...

    በዛሬው መደበኛው መድረካችን አጀንዳ የተለመደው የፀጥታና ደኅንነት ጉዳይ ይሆናል። ሌላ አጀንዳ የምታስይዙት አጀንዳ ከሌለ በቀር ማለቴ ነው። ክቡር ሚኒስትር... እሺ ...ቀጥል አመሰግናለሁ ክቡር ሚኒስትር። መደበኛ አጀንዳው እንደተጠበቀ...