Tuesday, August 9, 2022
ሌሎች ዓምዶች
    - Advertisement -
    - Advertisement -
    የሳምንቱ ገጠመኝየሳምንቱ ገጠመኝ

    የሳምንቱ ገጠመኝ

    ቀን:

    በቀደም ዕለት እንዲህ ሆነላችሁ፡፡ በከተማችን ከሚገኙ ሲኒማ ቤቶች ወደ አንዱ አዲስ የወጣ ፊልም ለማየት እሄዳለሁ፡፡ የዚህን ፊልም ‹‹እንከን የለሽነት›› በተለያዩ ማስታወቂያዎች ስለሰማሁ እስኪ ልየው ደግሞ በማለት ነው እዚህ ሲኒማ ቤት የተገኘሁት፡፡ ሲኒማ ቤቱ ከቅርብ ጊዜያት ወዲህ ከተሠሩት መካከል ስለሆነ ደረጃውን የጠበቀ ይመስላል፡፡ እንደ ድሮዎቹ ድብርታምና ዝጋታም አይደለም፡፡ ሰዓቱ ደርሶ መብራት ከጠፋፋ በኋላ ብዙ የተወራለት ፊልም መታየት ጀመረ፡፡ እንደ ነገርኳችሁ ይኼ በስፖርት ዘገባዎች ሳይቀር እሪ እምቧ የተባለለትን ፊልም በትኩረት መከታተል ጀመርኩ፡፡ የሚያስገርመው ልክ እንደ ሌሎቹ ፊልሞች አልስብ አለኝ፡፡ ብዙ የተወራለት ፊልም አርቲ ቡርቲ ነገሮች ብቻ ናቸው የታጨቁበት፡፡

    እኔ ከልጅነቴ ጀምሮ የህንድና የሆሊውድ ፊልሞችን ስኮመኩም ያደግኩኝ ያራዳ ልጅ ነኝ፡፡ ከማዘር ኢንዲያ እስከ ብላክ ፓንተርስና ሌሎችን ዘመን አመጣሽ ፊልሞች ከልጅነት እስከ ጎልማሳነት ስመለከት የኖርኩ ሰው የአገራችን ፊልም ያለበትን ደረጃ እረዳለሁኝ፡፡ በመስኩ ብቁ ባለሙያዎችና ዘመናዊ ቴክኖሎጂ ያልታጠቀው የእኛው የፊልም ቢዝነስ ብዙ ጉድለቶች ቢኖሩበት አይደንቀኝም፡፡ እያስከፋኝ ያለው ነገር ግን ለበርካታ ዓመታት ቴአትርና የሬዲዮ ድራማ ሲሠራባት በኖረች አገር ውስጥ ጠንከር ያሉ ሐሳቦችን የያዙ የፊልም ጽሑፎች አለመዘጋጀታቸው ነው፡፡ ትልልቅ ጉዳዮችን እናነሳለን ብለው ካላቅማቸው እንጣጥ የሚሉትም አላስፈላጊ መዘባረቅ ውስጥ ሲገቡ ይታያሉ፡፡ ሁሉም ነገር ውስጥ ጥልቅ ማለት የሚወዱት እነዚህ ‹‹ደፋሮች›› ባለሙያዎችን ተጠቅመው የረባ ነገር ማምጣት ሲጠበቅባቸው ውዥንብር እየፈጠሩ ናቸው፡፡

    ይኼንን ያዙኝ ልቀቁኝ ዓይነት ፉከራ የተፎከረበትን ፊልም እስከ መጨረሻው ድረስ በትዕግሥት ማየት እንዳለብኝ ራሴን አሳምኜ እስኪበቃኝ አየሁት፡፡ ፊልሙ አበቃ ተብሎ ከሲኒማ ቤቱ ስወጣ ግን ባዶነት ተሰማኝ፡፡ በቃ ምንም ተይዞ የሚወጣ ማስታወሻ ውስጤ አልነበረም፡፡ በዘመቻ መልክ የተለፈፈለት ፊልም እዚያው እንደ ጉም በኖ ቀርቷል፡፡ ቢቸግረኝ ገጸ ባህርያቱን እያስታወስኩ አንዳንድ የተባሉ ነገሮችን ለማስታወስ ሞከርኩ፡፡ ባዶ ቃላት ብቻ፡፡ ገባኝ፡፡ ሁሌም በተለያዩ ማስታወቂያዎች የምንሰማቸው ቃናዎቻቸው ያልተለወጡ ድምፆች ብቻ እንደ ገደል ማሚቶ ያስተጋባሉ፡፡ ከዚያ ውጭ ረብ ያለው መልዕክት ለማስተላለፍ አቅም የላቸውም፡፡

    አዲስ አበባ ዩኒቨርሲቲ የሚያስተምር ጓደኛዬን ስለገጠመኝ ነገር አጫወትኩት፡፡ እሱም እንደኔ በግኖ ኖሮ ለካ፣ ‹‹ምን ይደረግ ብለህ ነው? እዚህ አገር ዕውቀትን ከመቅሰም ይልቅ ገንዘብንና ሥልጣንን ዕውቀት ማድረግ ፋሽን ሆኗል፤›› አለኝ፡፡ ‹‹ሁሉም ይነሳና ከእኔ በላይ ለአሳር ይልሃል፡፡ በዚህ መስክ ምንም እንኳን ያን ያህል የሠለጠኑ ባለሙያዎች ባይኖሩም፣ በቴአትሪካል አርትና በሥነ ጽሑፍ ዘርፎች ውስጥ ካሉ ባለሙያዎች ጋር ምክክር ቢደረግ እኮ፣ ቢያንስ መሠረታዊ የሚባሉት ችግሮች ይቀረፋሉ፡፡ ከዚያ በኋላ በፖለቲካል ሳይንስ፣ በኢኮኖሚክስና በሌሎች የትምህርት መስኮች ውስጥ ያሉ ባለሙያዎች አስተዋፅኦ ያበረክታሉ፡፡ ከዚያም በተፈጥሮ ሳይንስ ውስጥ ያሉ ሙያተኞች ዕገዛቸው ይቀጥላል፤›› እያለ ተነተነልኝ፡፡ ‹‹አሁን ግን ሁሉም ሙያ ውስጥ ዘው ተብሎ እየተገባ መዘባረቅ ዋነኛው መለያ ሆኗል፡፡ እንደ ዘበት ያለ ዕውቀት በተገባበት የማስታወቂያ ሥራ ስንቶች ገንዘብ በቀላሉ ሲያፍሱ፣ ሌላውስ ምን ይቸግረናል ወደ ማለት ተሄደ፤›› ብሎኝ አሳረገ፡፡ ‹‹ልብ አንጠልጣይ፣ ኮሜዲ፣ ሮማንቲክ፣ አክሽን፣ ወዘተ እየተባሉ ገበያ ውስጥ ከሚቀርቡ ፊልሞች ይልቅ የሠፈራችን ልጆች ቀልዶችና ወጎች በስንት ጣዕማቸው፡፡ ያውም በሳቅ እያንፈራፈሩን፤›› ያለኝን ሌላኛውን ጓደኛዬን አስታወስኩ፡፡

    በቅርቡ ፒያሳ ውስጥ አንድ ሬስቶራንት ምሣ ለመብላት እገባለሁ፡፡ የሬስቶራንቱ አጋማሽ የሚሆን ሥፍራ ተለይቶ ቀረፃ እየተካሄደ ነው፡፡ ካሜራ የያዘው ሰውና ‹‹ዳይሬክተር›› የተባለው ሁለት ኮረዶችን በተለያዩ ማዕዘናት ይቀርፃሉ፡፡ ይኼንን ትዕይንት በግምት ለ30 ደቂቃዎች ያህል ከተመለከትኩ በኋላ ‹‹ዳይሬክተር›› የተባለውን ጠጋ ብዬ፣ ‹‹ምንድነው የሚቀረፀው?›› አልኩት፡፡ ኮራ ብሎ፣ ‹‹ፊልም ነው፣ ድንቅ ፊልም!›› አለኝ፡፡ ‹‹ስሙ ምን ይባላል?›› ስለው፣ ‹‹ገና አልወጣለትም›› ሲለኝ በጣም አስገረመኝ፡፡ የሁለታችንን ምልልስ የሰማ አንድ ወጣት እየሳቀ፣ ‹‹አይ ጋሼ በአሜሪካ ሆሊውድ፣ በህንድ ደግሞ ቦሊውድ የሚባሉ ዝነኛ የፊልም ተቋማት አሉ፡፡ እኛ ዘንድ ግን በርካሽ ካሜራ እየቀረፁ ፊልም ሠራን የሚሉ በዝተዋል፡፡ ስማቸውም ያስቃል፤›› አለኝ፡፡ የወጣቱ አነጋገር ከንክኖኝ፣ ‹‹ስማቸው ማን ይባላል?›› በማለት ጠየቅኩት፡፡ እየሳቀ፣ ‹‹ዜሮ ውድ ይባላሉ›› ሲለኝ ኃፍረት ተሰማኝ፡፡ እንዲያው ሩቅ ሳይኬድ ሰሞኑን አንድ ካፌ መሳይ ውስጥ በመሠራት ላይ ያለው ተከታታይ የፖለቲካ ስላቅ ድራማ በስንት ጣዕሙ? እኔማ ተዋንያኑን፣ ደራሲዎቹንና ዳይሬክተሮቹን እጃችሁን ቁርጥማት አይንካው ብያለሁ፡፡ ቢያንስ የሠራ ይመሥገን እንጂ፡፡ ‹‹ምን ልታዘዝ?›› ብለው የጀመሩት ሥራ ያብብላቸው ብዬአለሁ፡፡ በሐሳብም ብናግዛቸው መልካም ነው፡፡

    (ከድር ሸምሰዲን፣ ከአጠና ተራ) 

    - Advertisement -

    ይመዝገቡ

    ተዛማጅ ጽሑፎች
    ተዛማጅ

    የአገሪቱ ባንኮች ካፒታል 199.1 ቢሊዮን ብር ደረሰ

    ከታክስ በኋላ 50 ቢሊዮን ብር ማትረፋቸውን ብሔራዊ ባንክ አስታወቀ የአገሪቱ...

    በዓለም ጂኦ ፖለቲካ መድረክ የኢትዮጵያ ተፈላጊነት

    የአሜሪካው የውጭ ጉዳይ ሚኒስትር አንቶኒ ብሊንከን በሦስት የአፍሪካ አገሮች...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...