Monday, August 15, 2022
ሌሎች ዓምዶች
    - ማስታወቂያ -
    - ማስታወቂያ -

    ብሔራዊ ትምባሆ ድርጅትን ጨምሮ አራት ድርጅቶች ለሽያጭ ቀረቡ

    - ማስታወቂያ -

    ተዛማጅ ፅሁፎች

    – ከ28 ድርጅቶች ከሁለት ቢሊዮን ብር በላይ አልተሰበሰበም

    የመንግሥት ልማት ድርጅቶች ሚኒስቴር አራት ግዙፍ ድርጀቶችን ወደ ግል ይዞታ ለማዛወር የሽያጭ ጨረታና የድርድር ጥያቄ ይፋ አደረገ፡፡ ለሽያጭ ጨረታ የወጣባቸው ብሔራዊ የትምባሆ ድርጅትና የኢትዮጵያ ቆርኪና ጣሳ ፋብሪካ ሲሆኑ፣ የባህር ዳርና የኮምቦልቻ ጨርቃ ጨርቅ ፋብሪካዎችን በድርድር ወደ ግል ይዞታ ለማዛወር ዝግጁ መሆናቸውን ሚኒስቴሩ አስታውቋል፡፡

    ብሔራዊ ትምባሆ ድርጅትን ባለፈው ዓመት ወደ ግል ይዞታ ለማዛወር መንግሥት ፍላጎቱን ካሳየ በኋላ ሼባ ኢንቨስትመንት የተባለ የየመን ኩባንያ ፍላጎት ማሳየቱ ይታወሳል፡፡ የሚኒስቴሩ የሕዝብ ግንኙነት ኃላፊ አቶ ወንዳፍራሽ አሰፋ ለሪፖርተር እንደገለጹት፣ የትምባሆ ማምረቻው ሽያጭ የሚከናወነው የሞኖፖሊ መብቱ እንደተጠበቀ ነው፡፡

    እንዲሁም በተመሳሳይ ለቆርኪና ለጣሳ ፋብሪካ ፌይር ፋክስ የተባለ የአሜሪካ ኩባንያ የመግዛት ፍላጎት አሳይቶ የነበረ ቢሆንም፣ ስምምነት ላይ ባለመደረሱ ሽያጩ ሳይከናወን መቅረቱም ይታወሳል፡፡ እንዲሁም ሁለቱ የጨርቃ ጨርቅ ፋብሪካዎች ተደጋጋሚ ጨረታ ወጥቶባቸው ገዢ ሊገኝ ባለመቻሉ፣ መንግሥት ድርጅቶቹን የማዘዋወሩ ሒደት ከጨረታ ይልቅ በድርድር ለማድረግ ወስኗል ተብሏል፡፡

    ከመንግሥት ወደ ግል የተዘዋወሩ 28 የልማት ድርጅቶች ከሁለት ቢሊዮን ብር በላይ የውዝፍ ዕዳ እንዳለባቸውም አስታውቋል፡፡ ክፍያውን ባላጠናቀቁ ባለሀብቶች ላይ ዕርምጃ ለመውሰድ እየተሠራ መሆኑን አቶ ወንዳፍራሽ ለሪፖርተር ገልጸዋል። መንግሥት ኢኮኖሚውን ለመደገፍ ወደ ግል የሚዘዋወሩ የልማት ድርጅቶችን የአገር ውስጥ ባለሀብቶች 35 በመቶ በመክፈል፣ ቀሪውን 65 በመቶ በአምስት ዓመታት ተከፍሎ የሚያጠናቀቅበትን ዕድል አመቻችቷል።

    ድርጅቶቹ ከመንግሥት የተበደሩትን በአማካይ 13 በመቶ በአምስት ዓመታት ጊዜ ውስጥ ከፍለው ባለማጠናቀቃቸው ዕዳ ተወዝፎባቸዋል ተብሏል።

    በአሁኑ ወቅት ከመንግሥት ወደ ግል የተዘዋወሩ የልማት ድርጅቶች 72 መሆናቸውም ተገልጿል። ወደ ግል ከተዘዋወሩት መካከል ክፍያውን ካዘገዩ ድርጅቶች 2.1 ቢሊዮን ብር ውዝፍ ዕዳ በወለድና በቅጣት እንደሚገኝ አቶ ወንድአፍራሽ ጠቁመዋል።

    ውዝፍ ዕዳው ያለባቸው ድርጅቶች 28 ቢሆኑም፣ 60 በመቶ ውዝፍ በአንድ ገዥ ላይ ያለ ዕዳ መሆኑንም አክለዋል፡፡

    ዕዳው ያለባቸው ድርጅቶች መክፈል ከሚገባቸው ቀን በማሳለፋቸው ሚኒስቴሩ የመጨረሻ የማስጠንቀቂያ ደብዳቤ መጻፊያን ጨምሮ የ75 ቀናት ዕድል ከሰጠ በኋላ፣ ድርጅቶቹን ለሕግ ለማቅረብ እንደሚገደድ አስታውቀዋል።

    የመንግሥት የልማት ድርጅቶችን ለመጫረት የአገር ውስጥ ባለሀብት ድርሻ የ85 በመቶ ድርሻውን ይይዛል። በአገሪቱ በ1984 ዓ.ም የነፃ ገበያ ኢኮኖሚ ፖሊሲ ከታወጀ ወዲህ፣ ከ371 በላይ በመንግሥት እጅ የነበሩ የልማት ድርጅቶች ወደ ግል በማዘዋወር ከ24 ቢሊዮን ብር በላይ መሰብሰቡም ይነገራል፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች