Thursday, August 18, 2022
ሌሎች ዓምዶች
    - Advertisment -
    - Advertisment -

    ክቡር ሚኒስትር

    [ክቡር ሚኒስትሩ ከቤት ሊወጡ ሲሉ ሚስታቸው አገኙዋቸው]

    • ጊዜው እንደደረሰ ታውቃለህ አይደል?
    • ዕቁባችን ሊወጣ ነው እንዴ?
    • ወይ ዕቁብ?
    • ታዲያ የምናከራየው ሕንፃ ሒሳብ መቀበያ ጊዜ ነው?
    • ኧረ ሰውዬ ምን ሆነሃል?
    • የምን ጊዜ ነው የደረሰው ታዲያ?
    • የበዓል ነዋ፡፡
    • ታዲያ እሱ እኮ ያንቺ ጉዳይ ነው፡፡
    • ምኑ ነው የእኔ ጉዳይ?
    • በቃ የበዓል ዝግጅቱ ነዋ፡፡
    • ታዲያ ዝግጅቱ ዝም ብሎ ይካሄዳል እንዴ?
    • ምን ያስፈልጋል ታዲያ?
    • ከፍተኛ ወጪ ነው እኮ ያለው፡፡
    • እሱንማ አውቃለሁ፡፡
    • ስለዚህ ወጪውን መሸፈን የአንተ ጉዳይ ነዋ፡፡
    • እና ምን ተሻለ?
    • እሱን አንተ ታውቃለህ፡፡
    • በቃ ማፈላለግ ነዋ፡፡
    • ምንድን ነው የምታፈላልገው?
    • የበዓል ዝግጅት ወጪያችን የሚሸፍን ስፖንሰር ነዋ፡፡
    • ዘዴኛ ነህ እኮ አንተ፡፡
    • እንዲያውም ሰሞኑን ከውጭ የመጡ ኢንቨስተሮች አሉ፡፡
    • ኢትዮጵያውያን ናቸው?
    • የሉም የውጭ አገር ዜጐች ናቸው፤ አንድ ትልቅ ፕሮጀክት ይዘው መጥተዋል፡፡
    • እና እነሱን ስፖንሰር እንዲሆኑ ልታደርጋቸው?
    • እህሳ፡፡
    • ሰውዬ ጤነኛ ነህ?
    • ምን ችግር አለው?
    • ትልቅ ፕሮጀክት ይዞ የመጣ የውጭ ኢንቨስተር በበዓል ስፖንሰርነት ብቻ ልታልፈው?
    • አልገባኝም?
    • የጀመርነውን ሕንፃ ሊያስጨርሱ የሚችሉ ሰዎችን በበዓል ወጪ ብቻ ልትገላግላቸው?
    • የበዓሉስ ወጪ ቀላል አይደለም እኮ፤ ከየት ይመጣል ብዬ ነው?
    • ለአገር ውስጥ ባለሀብቶች ዕድሉ ይሰጣቸዋ፡፡
    • ጥሩ ሐሳብ አመጣሽ፡፡
    • በዚያ ላይ ደግሞ በዓሉ የሐበሻ ስለሆነ እነሱ ጋ ነው መሄድ ያለብህ፡፡
    • ትክክል ብለሻል፡፡
    • ባይሆን የጉቦ አቀባበልህን ሥልት መቀየር አለብህ፡፡
    • እንዴት ማለት?
    • በዚህች የማትረባ ነገር እንዳትገመገም ማለቴ ነዋ፡፡
    • እኮ ምን ማድረግ እችላለሁ?
    • በዓሉ አሪፍነቱ እኮ ይኼ ነው፡፡
    • ምኑ ነው አሪፍነቱ?
    • የተቀበልኩት ጉቦ አይደለም ትላለሃ፡፡
    • ምንድን ነው ታዲያ?
    • ስጦታ ነዋ፡፡
    • ጥሩ ሐሳብ ነው፡፡
    • ስጦታውን ግን ስትቀበል መጠንቀቅ ያስፈልጋል፡፡
    • የምን ጥንቃቄ?
    • መንግሥት ሌላ ስጦታ እንዳይሰጥህ፡፡
    • ምን ዓይነት ስጦታ?
    • የስንብት ደብዳቤ!

    [ክቡር ሚኒስትሩ ከሾፌራቸው ጋር እየሄዱ ነው]

    • ዛሬ ጃሙ ምንድን ነው?
    • ያው ደረሰ አይደል ክቡር ሚኒስትር፡፡
    • ምኑ ነው የደረሰው?
    • በዓሉ ነዋ፡፡
    • እየተዘጋጀህ ነው ታዲያ?
    • የዚያን ቀን ሰው እንዲጠራኝ እየተዘጋጀሁ ነው፡፡
    • እኔ ጠርቼሃለሁ በቃ፡፡
    • እውነት ክቡር ሚኒስትር?
    • አዎን እኔ ቤት ታሳልፋለህ፡፡
    • ግን በዓል እንዴት ነው የሚያሳልፉት?
    • በዚህኛው በዓል እንኳን ቀለል አድርጌ ነው የማከብረው፡፡
    • እኮ ምን ምን ያደርጋሉ?
    • ያው አንድ በሬ ማረዴ አይቀርም፡፡
    • እ…
    • ግን ከአገር ቤት ዘመዶቼ የሚመጡ ከሆነ ምናልባትም ጥጃ ነገር ልጨምር እችላለሁ፡፡
    • እሺ ሌላስ?
    • ያው ፋሲካ ስለሆነ አንድ ሁለት ፍየል የግድ ነው፡፡
    • እስቲ እውነት በሉ?
    • እንግዲህ ይኼ ባለቤቴ በግ ይቅር ካለች ነው፡፡
    • ሌላስ ክቡር ሚኒስትር?
    • የሚጠጣ ደግሞ ሁለት ካርቶን ጐልድ ሌብል አዘጋጃለሁ፡፡
    • ምን አሉኝ? ጎልድ ሌብል?
    • አሁን እኮ ቢራ በላት፡፡
    • ኧረ እንዳልበር ክቡር ሚኒስትር፡፡
    • ኬክ እንኳን ሰው ራሱ የሚያመጣው ይደፋል፡፡
    • ኧረ እኔን በደፋኝ፡፡
    • ድፎ ዳቦ እያለ አንተ ምን በወጣህ?
    • አይ እንዲያው ገርሞኝ ነው፡፡
    • በዚህች ላይ ሁለት በርሜል ጠጅ ይጣላል፡፡
    • ክቡር ሚኒስትር ኧረ እኔን የሚጥል በሽታ እንዳያሲዙኝ?
    • ለመሆኑ አንተ እንዴት ነው የምታከብረው?
    • ማን? እኔ?
    • አዎና፡፡
    • እኔ እንኳን እንደ እርስዎ ቀለል አድርጌ ሳይሆን አካብጄ ነው የማከብረው፡፡
    • እውነት? ምን ታዘጋጃለህ?
    • ከሚጠጣው ልጀምርልዎታ?
    • እሺ ቀጥል፡፡
    • አራት ጋን ፊሊተር አስጠምቃለሁ፡፡
    • እሺ፡፡
    • አንድ ዋይትና ብላክ አስጋግራለሁ፡፡
    • ዋይትና ብላክ ፎረስት?
    • ኧረ ጥቁርና ነጭ የስንዴ ድፎ ነው እንጂ፡፡
    • እሺ ሌላስ?
    • ያው ዶሮ መግዛት ስለማልችል ከበዓሉ በፊት የሥራ ፈቃድ ይሰጡኛል፡፡
    • የምን ፈቃድ ነው?
    • ከቀናኝ እርግብ አጥምጄ ለበዓሉ ለማረድ ነዋ፡፡
    • ቀልደኛ ነህ ልበል?
    • ያው ከእርስዎ አንፃር ሲታል ኑሮዬ ራሱ ቀልድ ነው፡፡
    • እና ፆሙን በምንድን ነው የምትፈታው?
    • እኔ እኮ ፆም ሳይሆን ሌላ ነገር ነው የምፈታው፡፡
    • ምንድን ነው የምትፈታው?
    • ሕልም!

    [ክቡር ሚኒስትሩ ቢሮ እንደገቡ ጸሐፊያቸውን ጠሯት]

    • ለምን እንደጠራሁሽ ገብቶሻል መቼም?
    • በሚገባ ክቡር ሚኒስትር፡፡
    • ተዘጋጅተሻል ታዲያ?
    • ይኸው ሪፖርቱን ጽፌ ስጨርስ ነው የጠሩኝ፡፡
    • ቀጥይ፡፡
    • የበዓል ስጦታ አቀባበላችን አመርቂ ውጤት ተመዝግቦበታል፡፡
    • አፈጻጸሙ እንዴት ነው?
    • ክቡር ሚኒስትር አጠቃላይ አቀባበላችን ከዕቅዳችን በላይ ነው፡፡
    • ምን ያህል ተቀበልን?
    • እንግዲህ በዚህ በዓል ለመቀበል ከአቀድነው ስጦታ ከ140 በመቶ በላይ መቀበል ችለናል፡፡
    • በጣም ደስ የሚል ሪፖርት ነው፡፡
    • የስጦታ አቀባበላችንን በዘርፍ ልከፋፍልልዎት፡፡
    • ቀጥይ እሺ፡፡
    • በአንደኛ ደረጃ ላይ የተቀመጠው የፈርኒቸር ዘርፍ ነው፡፡
    • እሺ፡፡
    • በዚህ ዘርፍ ሙሉ የቤት ዕቃ ስጦታ በመቀበል የዕቅዳችንን 120 በመቶ አሳክተናል፡፡
    • እየሰማሁሽ ነው፡፡
    • በዚህ ዘርፍ የተገኘው ውጤት ካለፈው ዓመት ተመሳሳይ የበዓል ስጦታ ጋር ሲነፃፀር የ110 በመቶ ጭማሪ አሳይቷል፡፡
    • ግሩም፡፡
    • በሁለተኛነት የተቀመጠው የኤሌክትሮኒክስ ስጦታ ነው፡፡
    • እሱስ እንዴት ነው?
    • በዚህ ዘርፍ የዕቅዳችንን 115 በመቶ ማሳካት ችለናል፡፡
    • ይህም አመርቂ ውጤት ነው፡፡
    • በዚህ ዘርፍ ካለፈው ዓመት ተመሳሳይ የበዓል ስጦታ ጋር ሲነፃፀር የ112 በመቶ ጭማሪ አሳይቷል፡፡
    • ሦስተኛ ደረጃ ላይ የተቀመጠው የትኛው ዘርፍ ነው?
    • በሦስተኛ ደረጃ ላይ የተቀመጠው የከብት ስጦታ ነው፡፡
    • ምን ያህል ነው የተመዘገበው?
    • በዚህ ዘርፍ የዕቅዳችንን 85 በመቶ ብቻ ነው ማግኘት የቻልነው፡፡
    • ለምንድን ነው በዚህ ዘርፍ ያቀድነውን ማግኘት የቻልነው?
    • ይህ በእርግጥ መንግሥት የሚከተለው የኢኮኖሚ ፖሊሲ ነፀብራቅ ነው፡፡
    • እንዴት ማለት?
    • ያው እንደሚታወቀው ኢኮኖሚያችን ከግብርና መር ወደ ኢንዱስትሪ መር መቀየር አለበት ተብሏል፡፡
    • እሱማ ልክ ነው፡፡
    • እንግዲህ ሪፖርቴን እንደሰሙት በአንደኛና በሁለተኛ ደረጃ ላይ የተቀመጡት የኢንዱስትሪ ውጤቶች ናቸው፡፡
    • እውነትሽን ነው እባክሽ፡፡
    • ስለዚህ የግብርና ዘርፉ ስጦታ ሦስተኛ መሆኑ የሚያሳየን ነገር አለ፡፡
    • ምንድን ነው የሚያሳየን?
    • በኢኮኖሚው ላይ የመዋቅር ሽግግር መኖሩን ያመለክታል፡፡
    • ድሮውንስ የምንለፋው ለዚህ አይደል እንዴ?
    • ሆኖም ግን በዚህ ዘርፍ የተገኘው ውጤት ካለፈው ዓመት ተመሳሳይ የበዓል ስጦታ ጋር ሲነፃፀር የ100 ፐርሰንት ጭማሪ አሳይቷል፡፡
    • እሺ ቀጥይ፡፡
    • የመጠጥ ስጦታው ላይ ግን የታዩ ችግሮች አሉ፡፡
    • ምን ዓይነት ችግሮች?
    • ዘርፉ ከታሰበው በታች ዝቅተኛ ውጤት አስመዝግቧል፡፡
    • በዘርፉ የተመዘገበው ውጤት ምን ይመስላል?
    • በዚህ ዘርፍ ያገኘነው ስጦታ የዕቅዳችንን 38 በመቶ ነው፡፡
    • የዕቅዳችን 50 በመቶ እንኳን አልተሰበሰበም?
    • ክቡር ሚኒስትር በዚህ ዘርፍ የተገኘው ውጤት ካለፈው ዓመት ተመሳሳይ የበዓል ስጦታ ጋር ሲነፃፀር ራሱ በ20 በመቶ ቅናሽ አሳይቷል፡፡
    • ለምንድን ነው ዘርፉ እንደዚህ የወረደው?
    • እንግዲህ ለዘርፉ እንዲህ መውረድ የተለያዩ ምክንያቶች ይጠቀሳሉ፡፡
    • ምንድን ናቸው ምክንያቶቹ?
    • የመጀመሪያው በዓለም ላይ የነዳጅ መውረድ ያስከተለው ተፅዕኖ ነው፡፡
    • መጠጥና ነዳጅን ምን አገናኛቸው?
    • ሁለቱም ፈሳሾች መሆናቸው ዋናው የሚገናኙበት ነገር ነው፡፡
    • አንቺ አላስተዋልኩትም ነበር፤ ልክ ነሽ እባክሽ፡፡
    • በሌላ በኩል ደግሞ በአገሪቱ ያለው የዶላር እጥረት ዘርፉ ያስመዘገበው ውጤት እንዲቀንስ ሌላኛው መንስዔ ነው፡፡
    • ይኼ ዶላር እኮ ስጦታችንን ራሱ እየጐዳው ነው ማለት ነው?
    • አዎን ክቡር ሚኒስትር፣ የዶላር ጉዳይ በጊዜ መፍትሔ ካልተሰጠው በቀጣይ ያሉ በዓሎች ላይ ራሱ ተፅዕኖ ማሳደሩን ይቀጥላል፡፡
    • ሌላውስ ምክንያት ምንድን ነው?
    • ሌላው በዘርፉ ላይ ኪራይ ሰብሳቢነት ተንሰራፍቶ ታይቷል፡፡
    • ይኼን ትንሽ ብታብራሪው?
    • ሰዎች መጠጥን በስጦታ ከመስጠት ይልቅ ራሳቸው የመጠጣት ዝንባሌ ታይቶባቸዋል፡፡
    • ይኼማ አደገኛ የመጠጥ ሰብሳቢነት ፀባይ ነው፡፡
    • ሰዎች መጠጥ መጠጣት ያበዙትም በኑሯቸው ላይ እየደረሰ ባሉ የተለያዩ ጫናዎች ቢሆንም፣ ይህ ችግር አፋጣኝ መፍትሔ ካልተገኘለት አሁንም በቀጣይ በዓሎች ላይ ተመሳሳይ ችግሮች ሊያጋጥሙ ይችላሉ፡፡
    • ስለዚህ ይህን የኪራይ ሰብሳቢነት ፀባይ አጥብቀን መዋጋት አለብን፡፡
    • አዎን፣ በዘርፉ ላይም የግንዛቤ ማስጨበጫ በሰፊው መሰጠት አለበት፡፡
    • በቀጣይ ግን ተመሳሳይ ችግር እንዳይፈጠር ዕቅዳችንን ማስተካከል አለብን፡፡
    • ዕቅዳችንን ምን ማድረግ አለብን?
    • መለጠጥ!     

    በብዛት የተነበቡ ፅሁፎች

    አዲስ አበባና ኦሮሚያ ወሰን ለማካለል ተስማሙ

    ኮዬ ፈጬ፣ ቱሉዲምቱ፣ ጀሞ ቁጥር 2 ወደ ኦሮሚያ ለቡ፣ ፉሪና...

    በፌዴራል መንግሥትና በሕወሓት መካከል የተጀመረው የድርድር ሒደት አሳታፊ እንዲሆን ተጠየቀ

    የኢትዮጵያ ሲቪል ማኅበረሰብ ድርጅቶች ምክር ቤት፣  በፌዴራል መንግሥትና በሕወሓት...

    ባንኮች በትልልቅ ባለሀብቶችና በከተሞች ላይ ያተኮረ የብድር አቅርቦታቸውን እንዲያርሙ ብሔራዊ ባንክ አሳሰበ

    የአገሪቱ ባንኮች ዋነኛ ተግባራቸው የሆነው ብድር የማቅረብ አገልግሎት እንከን...

    ባንኮች እንዲዋሀዱ እስከ ማስገደድ ሊገባ እንደሚችል ብሔራዊ ባንክ ጠቆመ

    በአሁኑ ወቅት የባንኮች ቁጥር እየጨመረ መምጣቱ ችግር የሚሆንና የውጭ...
    - Advertisment -

    ትኩስ ፅሁፎች

    12ኛ ክልል እንዲቋቋም ህዝበ ውሳኔ እንዲካሄድ ተወሰነ

    የፌዴሬሽን ምክር ቤት በክልል የመደራጀት አቤቱታን ተቀብሎ በመመርመር ሕዝበ...

    የኬንያ ምርጫ ቀጣናዊ አንድምታው

    በዘመናት ውስጥ ሳይናወጥ መዝለቅ የቻለ ይሉታል አንዳንዶች፡፡ የአገሮቹ መሪዎች...

    ባንኮች በትልልቅ ባለሀብቶችና በከተሞች ላይ ያተኮረ የብድር አቅርቦታቸውን እንዲያርሙ ብሔራዊ ባንክ አሳሰበ

    የአገሪቱ ባንኮች ዋነኛ ተግባራቸው የሆነው ብድር የማቅረብ አገልግሎት እንከን...

    ሰበበኞች!

    ዛሬ የምንጓዘው ከሜክሲኮ ወደ አየር ጤና ነው፡፡ ዛሬም፣ ነገም...
    spot_img

    ተዛማጅ ፅሁፎች

    [ክቡር ሚኒስትሩ ወዳጃቸው ከሆነ አንድ የተቃዋሚ ፓርቲ አመራር ጋር ሻይ ቡና እያሉ በኬንያ ስለተካሄደው ፕሬዚዳንታዊ ምርጫ እየተጫወቱ ነው]

    ኬንያ በዚህ ደረጃ ዲሞክራሲያዊ ምርጫ ታደርጋለች ብዬ አላሰብኩም ነበር ክቡር ሚኒስትር። አዎ። ጥሩ ዝግጅት አድርገውበታል። ቢሆንም... ቢሆንም ምን ክቡር ሚኒስትር?  እባክህ ክቡር ሚኒስትር የምትለውን ነገር አቁም። ወዳጅ...

    [ክቡር ሚኒስትሩ የሥራ አጥነት ችግሮችን የመፍታት ተልዕኮ የተሰጠው ተቋም በዋና ጽሕፈት ቤቱ ሕንፃና ቢሮዎች ላይ ያደረገውን ዕድሳት መርቀው በመክፈት ጉብኝት እያደረጉ ነው]

    እጅግ ውብ ዕድሳት ያደረጋችሁት! በእውነቱ በጣም ድንቅ ነው፡፡ አመሠግናለሁ ክቡር ሚኒስትር። በጣም ድንቅ ነው። ዕድሳቱን ያከናወነው ድርጅት ጥሩ ልምድ ያለው ይመስላል? ተቋራጩ ማን እንደሆነ አልነገርኩዎትም እንዴ? የትኛው ተቋራጭ...

    [ክቡር ሚኒስትሩ በስንዴ የተሸፈኑ ሰፋፊ እርሻዎች ያሉበትን ሁኔታ ለመገምገም ከስንዴ ምርት ድጋፍና ክትትል ኮሚቴ ሰብሳቢ ጋር እየመከሩ ነው] 

    ክቡር ሚኒስትር እንደነገርክዎት በሁሉም ስንዴ አብቃይ አካባቢዎቻችን ያሉ አርሶ አደሮች ጥሪያችንን ተቀብለው መሬታቸውን በኩታ ገጠም አርሰው በስንዴ ዘር ሸፍነዋል። በጣም ጥሩ ዜና ነው። በጣም እንጂ። የሚገርምዎት...