Thursday, August 18, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    ከከባድ ማርሽ ጋር ምን ያታግለናል?

    እነሆ ነግቶ መንገድ ሊጀመር ነው። ከመገናኛ ወደ ስታዲዮም ልንጓዝ ነው። አያ ትርምስ የውጥንቅጥ አባት ጎዳናውን ዛሬም አልለቅ እንዳለ ነው። ያም ያስኬዳል። ይኼም ያስኬዳል። እግሩ የዛለው ሐሳቡ ተምታቶ መሀል መንገድ ላይ ቆሟል። እርግጥ ሰው ጉዞውን ቀጥሏል። አርፍዶ በመሄድ መንገድ ላይ እያመሸ ጀንበር እንቅልፏን ለጥጣ አድራ ማልዳ ስታፋሽክ፣ ያው ገለባ ኑሮ በመባዘን ሜዳ ተሽቀዳደሙ ይለናል። እንዲያው በአጭሩ ሁኔታችን ሁሉ ከንቱ ይመስላል። ‹‹ተወኝ እስኪ አንተ። ይህችም በአቅሟ መኪና ተብላ ነው የምትነዘንዘኝ? ይከፈለሃል አትጨቅጭቀኝ፤›› ቀጠን ረዘም ያለች ደርባባ ከወያላው ጋር ሙግት ገጥማለች። ‹‹ይህችም መኪና ተብላ ነው ያልሽው? ሱዳን ሄደሽ ሰጋር በቅሎ ገዝተሽ ነይ፤›› ወያላችን እንደ ድሪያ ወገቡ ላይ ሰፍቶ የሚንሳፈፍ በሲባጎ የታሰረ ቦላሌውን ወደ ላይ እየጎተተ ይመልስላታል። ‹‹ድንቄም ታሪክ አዋቂ! ባቡር ከመጣ በኃላ ነው ሰጋር በቅሎ የምትጠቁመኝ? ጠቁመህ ሞተሃል። ካልክስ አሸባሪ ፈልገህ ጠቁም። ምኑ ነው እናንተ!›› እሳት እንደ ያዘው የኤሌክትሪክ ገመድ ተንጣጣች።

    ነገሩን የምር አድርጋው፣ ‹‹እስኪ አሁን የተከበርኩበትን አገር ለማች… ለማች… እያሉ ዓይን ዓይኗን እያዩዋት፣ መሀል አዲስ አበባ መንግሥት ለሼቭሮሌትና ለመርሰዲስ አሽከርካሪዎች መንገድ ሠርቶ የወለቀ ልቡን ሳይጠግን ከሱዳን በቅሎ አምጪ ይለኛል? ምናለበት እዚህ ሰንዳፋ ቢለኝ? እዚህ ሰላሌ ፍቼ ቢል? ስንት ከጋሪው የተቀያየመ ጎዳና ተዳዳሪ ፈረስ እያለ?›› ብላ ነገሩን ስታቀልጠው፣ ‹‹ኧረ ረጋ በይ! እንኳንም ሊቢያ አላልሽ…” ይላታል አጠገቧ ከሾፌሩ መቀመጫ ጀርባ የተሰየመ ጎልማሳ። በአሙቁልኝ ስሜት ‹ኮሜንት› የተካነ ‹ፌስቡከር› ዓይኑን ‹ስማርት ፎኑ› ላይ እያንከራተተ፣ ‹‹እውነቴን ነው! በቅሎ ማለቱም አንድ ነገር ነው። ከዘንድሮ የትራንስፖርት አበሳ እንኳን በቅሎ ኤሊም አትናቅም። ከዚያ በተረፈው ‹ሰው ባለው ነው› እያሉ ሐሜተኛን ዝም ማስባል መቻል አንዱን የሚሊኒየም የልማት ግብ እንደ ማሳካት የሚቆጠር ነው፤›› ይላል። ከኩመካው ጀርባ የማን እጅ አለበት ተብሎ እንዳይጠረጠር የፈራ ተሳፋሪ ይርበተበታል። ቆይ ግን በ‹ሆረር ፊልም› መሳቅ የጀመርነው ‹ቴረር ፊልም› በገሀድ ስለምንሠራ ይሆን እንዴ? ነገሩን ነው!

    ጉዟችን ሊጀመር ነው። ሾፌራችን የታክሲዋን ሞተር ደጋግሞ እያስጓራ ልባችንን አንጠልጥሎታል። ‹‹እንዴት ነው ነገሩ? ሔሊኮፕተር ላይ ነው እንዴ የተሳፈርነው? ወደፊት ለመሄድ ይኼንን ሁሉ ነዳጅ ማባከን ምን የሚሉት ፈሊጥ ነው?›› ሦስተኛ ወንበር ከአጠገቤ የተቀመጠ ቀላጅ መሳይ ይለፈልፋል። ‹‹ምን ይታወቃል ዘንድሮ? የሚወስድህንም ሆነ የምትሄድበትን እኮ መለየት ይከብዳል፤›› ስትል መጨረሻ ወንበር የተቀመጠች በስላቅ ታብራራለች። ‹ቀ…ቀ…ቀ…ቀ…› ይላል ማርሹ አልገባ ብሎ። ‹‹ወይኔ! ‹ፈርስት ክላስ› በተሳፈርኩ ኖሮ…›› ፌስቡክ ውስጥ ሰጥሞ ገሀዱ ማኅበራዊ ትዕይንት ሰልችቶት ከተመሰጠው ወጣት አጠገብ የተሰየመች ወጣት ትቆጫለች።

    ‹‹እዚህ ሕዝባዊ ‹ክላስ› ውስጥ የጎደለ ነገር አለ?›› ፌዘኛው መሳይ ይጠይቃታል። ‹‹አትሰማም እንዴ ሸንኮራ ሲቆረጥ። እዚህ አገር ከፊት ካልተቀመጥክ ወይም ከደላው ካልተወለድክ፣ መረቁ የተጠጣለት ደረቁ ነው እኮ የሚታደልህ፣ እሱንም ቅን ሾፌር ካጋጠመህ፤›› ትለዋለች። ‹‹ኧረ ሰላማዊ ሠልፍ ወጥተን ያዋከቡን ይበቃል። ደግሞ በተቀመጥንበት ልታሳፍሱን ነው?›› ሻሽ ካሰረች ቀዘባ አጠገብ መጨረሻ ወንበር ላይ የተሰየመች ወይዘሮ ትናገራለች። ይኼን ጊዜ ሾፌሩ በሩን ከፍቶ ይወርዳል። ወይዘሮዋ፣ ‹‹የፈራሁት ሊደርስ ነው መሰል?›› ስትል በራሷ የፈጠረችውን አጉል ፍርኃት አንዳንድ ተሳፋሪዎች ላይ ታጋባለች። የሾፌሩን መውረድ ተከትሎ ወያላውም ወርዶ ወደ ሾፌሩ አመራ። ‹‹ምን ይማከሩብናል አይዘውሩትም? ሃሎ አትሄዱም?›› ከወያላው ጋር የተናቆረችው ደርባባ ትጮሃለች። ‹‹እስኪ ጊዜ እንስጣቸው፣ የመኪናውን ችግር እያጣሩ ይሆናል፤›› ሲል አጠገቤ ያለው ሊያረጋጋት ይጥራል። ‹‹አደራ ሰው መሆናችንም አብሮ ይጣራ፤›› ብሎ ደግሞ፣ ‹የመኪናው ችግር ይጣራ› የተባለውን ብሶት ማስተንፈሻ የሚያደርገው ጎልማሳው ነው። ‹የባሰበት ብቻ ነው የሚሳፈረው?› እስክንል ድረስ የማንሰማው የለም!

    - Advertisement -

    ‹‹1፣ 2፣ 3፣ . . . ›› እያሉ ሾፌሩና ወያላው ተጋግዘው አንደኛ ማርሽ ያስገባሉ። ለካ ወያላው የወረደው አንደኛ ማርሽ በጉልበት ስለሚገባ ኖሯል። አንዳንዱ ከት ብሎ ይስቃል። ሳቅ እንዲህ በቀላሉ ድርሽ የማይልበት ደግሞ ያላየውን፣ ‹‹ኧረ ባቡር ይግደለኝ . . . ›› ሲል ሌላ ነገር ይመስልበታል። ደርባባዋ፣ ‹‹አይዞህ አይገልህም፣ አንዱ ፌርማታ ላይ አስመድበንህ ወፍ ታባርራለህ፤›› ትለዋለች እየሳቀች። ‹‹አግኝቼ ነው? ሰው በአገሩ ተምሮ ዲግሪ ይዞ ሥራ መቀጠርን ተይውና ወፍ የማባረር ዕድል እየራቀው መስሎን የሚሰደደው . . . ›› ይላታል ተለሳልሶ። ‹‹መጀመርያ ነዋ ዲግሪ ለመያዝ ሲንጦሎጦል ወፎች ስጡን የሚጨርሱት፤›› አጠገቤ የተቀመጠው ነገረኛ ጣልቃ ይገባል። ነገሩ ያላማራት ወይዘሮ ትርበተበታለች።

    ይኼን ጊዜ ወያላው እየተንደረደረ ገብቶ በሩን ይዘጋል። ሾፌሩ አስጓርቶ እንደ መንኮራኩር ታክሲዋን ማንደርደር ጀምሯል። ‹‹ጥድፊያው የተቃጠለብንን ጊዜ ለመካስ ነው? ከአንደኛ ማርሽ ለመሸሽ?›› ሲል ፌስቡክ ገጹ ላይ ሊለጥፈው ያሰበውን በቃል ይለዋል ፌስቡከሩ። ጋቢና የተቀመጡት ወጣቶች ደግሞ፣ ‹‹እኛን አግዙን ብትሉ እኮ ተዘጋጅተን ነበር፤›› ሲሉ አጠገቡ ተቀምጠው ወያላው ዞሮ መምጣቱ ቅር እንዳሰኛቸው ያስረዳሉ። መጨረሻ ወንበር ደግሞ፣ ‹‹ጋይስ ሰው መንጃ ፈቃድ ለማውጣት ኪሱ አልችል ሲለው፣ ታክሲ በመግፋት ለማካካስ ሙከራ ጀመረ እንዴ? የሙከራ ሥርጭቱን ከዋናው መለየት አስቸገረን እኮ?›› ብላ አንዲት ቆንጆ ብቻዋን በሳቅ ትፈርሳለች። ‹‹እንዲህ ስቀሽ ስቀሽ ትን ያለሽ እንደሆን፣ ደቅ አድራጊሽ እኔ አትራፊሽ ማን ይሆን?›› ሲል ጎልማሳው ያሽሟጥጣታል። ጉድ እኮ ነው! በዚህ አያያዝ ነው ስላቅ የሚቆመው ጎበዝ?!

     ወያላው እያዋከበ ሒሳብ መቀበል ጀምሯል። የሾፌሩን ትግልና የታክሲዋን አሮጌነት ከግምት ውስጥ አስገብታ አካሄዳችን ያልጣማት ወይዘሮ፣ ‹‹ኧረ እናንተ ሰዎች ዛሬ ተገልብጠን ጉድ እንዳንሆን?›› ትላለች። ‹‹ከአቅም በላይ የተጫኑትንና የተጫኑንን ይጭነቃቸው እንጂ ብንገለበጥ ባህር አይበላን። በምላስ የተላሰ የመሰለ አስፋልት ላይ ነው ፈልሰስ የምንለው። በበኩሌ አብዛኞቻችን ከምንተኛበት ፍራሽ ይኼ አስፋልት የተሻለ ሳይመቸን አይቀርም፤›› ይላል ጎልማሳው። ‹‹በበኩሌ አሟሟቴ ነው የሚያስጨንቀኝ። እንዳልሆን ሆኜ ማለፌ ሳያንስ ቢቻል አገር፣ ባይቻል ሠፈር በዕንባ እንዳይራጭልኝ በመኪና አደጋ መሞት አልፈልግም፤›› ስትል ባለ ሻሿ፣ ‹‹ሞት መቼም ልማዱን አይተው። ግን ከተለመደ ሞት ያልተለመደው በልጦ የገዛ ወገኑ በጭካኔ ለገደለው እንደምናዝነው፣ በመኪና አደጋ በየቀኑ የሚያልቀውን ነፍስ ያቃለልነው መስሎ ይታየኛል። ቆይ ግን የሐዘናችን ምንጩ ሞት ወይስ አሟሟት ነው? እኔ እኮ መለየት ከበደኝ?›› ስትል ቆንጂት ትጠይቃለች።

    ‹‹እሱ ሳይሆን ቁም ነገሩ ቋሚ ነኝ ባይ ሁሉን ትቶ ሲሄድ ለማይጨርሰው ሀብት እህት ወንድሙን አስለቅሶ፣ ሕዝብና መንግሥት አናክሶ ሳያስበው ማለፉ ነው። በረባ ባልረባው ክልትው እያልን (ያውም በዚህ ጊዜ) ሞት በጥጋብ ውስጥ ተሸሽጎ በሚናጠቀን ክፉ ዘመን ልብ ለምን መግዛት እንዳቃተን ሚስጥሩ አይገባኝም፤›› አለች ወይዘሮዋ። ‹‹ደላላችን በዝቶ ነዋ። ምን እናድርግ? ከመሠረታዊ እስከ የቅንጦት ምኞታችን ያለ ገንዘብ ምንም ናችሁ የሚሉንን ደላሎች መቋቋም ከበደን። ይኼው ነው! ታዲያ በዚህ መሀል ሰው የመሆን ትርጉሙ ቢጠፋብን ይገርማል? ፍትሕ ስንል ያለ ስም፣ ያለ ዝና፣ ያለ ሥልጣን የለም ካሉን፣ ሚስት ያለ ጥሪት ዝንብህን እሽ አትልም ከሆነ ጨዋታው፣ ‹እሺ ለአንድ ራሴ ጠግቤ ልደር› ስንል እንኳን እህል አፕታይት ቆላፊው ጫት ሳይቀር ዋጋው አሻቅቦ የ‹ኢንቨስተር ዲዘርት› ሲሆን ካየን፣ ግራ እንደተጋባን ሞት ቢቀድመን ይገርማል? አሟሟታችን ቢከፋ ይደንቃል?›› ብላ ደርባቢት አነበነበች። ‹‹ወይ ጉድ በመጪው ምርጫ በዕጩነት ቀርቤ ‹ጫት በነፃ አድላለሁ› ብል ያዋጣኝ ይሆን?›› የሚለኝ ከጎኔ የተቀመጠው ነው። አንዳንዱ ሰው ምን እንደሚያወራም አላስተውል አለ እኮ እናንተ! ይኼ ያልታረመን ሐሳብ ‹ፖስት› እና ‹ሼር› የማድረግ አባዜ ገና የበለጠ ፈር እንዳያስተን ያስፈራል! በመረኖች ምክንያት እየደረሰ ያለውን መከራ የሚታዘብ ያስፈልገናል መሰል፡፡

    ወደ መዳረሻችን ተቃርበናል። ጋቢና ከተቀመጡት አንዱ ‹ወራጅ› ብሎ ወረደ። ሾፌራችን ወደ አንደኛ ማርሽ ላለመመለስ የቻለውን ያህል ቢጥርም፣ አልሳካ ብሎት ጋቢና የቀረውን ወጣት ትብብር ይጠይቃል። ሾፌሩ ዝቅ ብሎ የሆነ ነገር ሲይዝ ተሳፋሪው ‹ቀ..ቀ…ቅ…› አድርጎ አስገባ። ‹‹ወይ ኑሮ… ወይ ኑሮ…› አለች አስቴር አወቀ…›› አጠገቤ የተቀመጠው ፌዘኛ አያርፍም። ‹‹አንተ ኑሮን በአንደኛ ማርሽ ብለህ ከንፁኃን ባታነካካን ደስ ይለኛል። በበኩሌ ከደሙ ንፁህ ነኝ…›› ብሎ መጨረሻ ወንበር የተቀመጠውን ወጣት ይቆጣል። ‹‹ሄይ! ምንድነው ነገር ማክረር የሚታየውን እንደሚታየው፣ የሚሰማውን እንደሚሰማው የመናገር መብታችን ተፈጥሯዊ መሰለኝ…›› ባለ ሻሽ አፈጠጠች። ‹‹ጎበዝ ዘንድሮ አካፋን አካፋ ካላልን ዋጋ የለንም። አለባብሰን አርሰን ከትውልድ ትውልድ አረም ስንነቅል ያቃጠልነው ዘመን ይበቃል፤›› ስልኩ ባትሪ ጨርሶበት ቀና ብሎ ዓይናችንን ማየት የቻለው የ‹ፌስቡክ› ሱሰኛ ይከተላል። ‹‹እኮ ምንድነው አረሙ? የምን ፈራ ተባ ነው ተናገሩታ…›› ቅድም በትንሽ ትልቁ ስትባባ የነበረችው ወይዘሮ አሁን የቀለጠች ‹አክቲቪስት› ሆናለች። ጊዜ ሰውን ይለውጠዋል ማለት እንዲህ ሳይሆን ይቀራል?

    ጎልማሳው ጣልቃ ገብቶ መድረኩን ተቆጣጠረው። እንዲህ ይላል ‹‹እንዲያው ለመሆኑ እንደ አገር መራመድ ስላልቻልን፣ እንደ ሕዝብ መጓዝ ስላቃተን አይመስላችሁም በግል ከኑሮ ጋር አባሮሽ እየገጠምን የምንሰቃየው? በፍትሕ፣ በዴሞክራሲ፣ በሰብዓዊ መብት አያያዝ … ወደ ተሻለ ደረጃ ለመራመድ እንደ ታክሲያችን አንደኛ ማርሽ ላይ መከራ የምናየው ልባችን አንድ ባይሆን፣ የላላ ኅብረትና ተቃርኖ ቢያግደን አይመስላችሁም ከምሁር እስከ መኃይም ማስተዋል ጎድሎን ሕዝብ ለማፋጀት የምንውረገረገው? ምናለበት ታጥበን ጭቃ መሆኑን ትተን የሚለያየንን ከባድ ማርሽ በመደማመጥና በመወያየት ተባብረን ብናቃልለው?” ብሎ ሳይጨርስ ወያላው ራሱን እያከከ ‹‹መጨረሻ!›› አለ። ተሳፋሪዎች ለመውረድ በእሽቅድምድም ሲራኮቱ የከባድ ማርሹን ‹ቲዮሪ› በቅጽበት የዘነጉት ይመስሉ ነበር፣ ወይም የክብደቱ እሳቤ አዕምሯቸውን ወጥሮት ይሆናል። እኮ እስከ መቼ ከከባድ ማርሽ ጋር እንታገላለን? መልካም ጉዞ!

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት