Monday, August 8, 2022
ሌሎች ዓምዶች
    - Advertisment -
    - Advertisment -

    ክቡር ሚኒስትሩ ከሌላ ሚኒስትር ጋር እያወሩ ነው

    [ክቡር ሚኒስትሩ ጸሐፊያቸውን ቢሮ አስጠሯት]

    • ፈለጉኝ ክቡር ሚኒስትር?
    • እስኪ ተቀመጭ፡፡
    • ምን ልታዘዝ?
    • አሁን ካለው ለውጥ ጋር መጓዝ የሚችል አሠራር መቅረፅ አለብን፡፡
    • ትክክል ነዎት ክቡር ሚኒስትር፡፡
    • ለውጡ ከላይ የጀመረ ስለሆነ እኛም ይህንኑ ወደታች ማውረድ አለብን፡፡
    • እስማማለሁ ክቡር ሚኒስትር፡፡
    • ስለዚህ የመሥሪያ ቤታችንን አሠራር በዚሁ መሠረት ማድረግ አለብን፡፡
    • ምን ይደረግ ታዲያ?
    • አሁን ስብሰባ ይቅር ተብሏል፣ ከተቻለ ስብሰባዎቻችን እዚህ ባይሆኑ ጥሩ ነው፡፡
    • አልገባኝም ክቡር ሚኒስትር?
    • አየሽ የድሮ ሥርዓት መፈራረስ ስላለበት አካሄዳችን መስተካከል አለበት፡፡
    • የድሮውን ሥርዓት እንዴት ነው የምናፈርሰው?
    • ለምሳሌ ስብሰባ ይቅር ተብሏል፡፡
    • ክቡር ሚኒስትር የእርስዎ ዋና ሥራ እኮ ስብሰባ ነው፡፡
    • እሱንማ አውቃለሁ፡፡
    • ታዲያ ስብሰባ ካስቀረን እርስዎ ምን ሊሠሩ ነው?
    • ስብሰባውን ሳይሆን የምናስቀረው፣ የስብሰባውን ፎርማት ነው የምንቀይረው፡፡
    • ትንሽ ቢያብራሩልኝ ክቡር ሚኒስትር?
    • አንቺ ለመሥሪያ ቤቱ ኃላፊዎች ይህን ጉዳይ አስመልክተሽ ደብዳቤ ትጽፊልኛለሽ፡፡
    • ምን ዓይነት ደብዳቤ?
    • አሁን የምንከተለው የሥራ አካሄዳችን ለበርካታ መሥሪያ ቤቶች እንደ አርዓያ የሚቆጠር መሆን ይኖርበታል፡፡
    • ምን ዓይነት የሥራ አካሄድ ነው?
    • አገሪቱ የጀመረችውን ለውጥ ተቀብለን ለማስቀጠል ስለቆረጥን አዲስ የስብሰባ አካሄድ እንከተላለን፡፡
    • ምን ዓይነት አካሄድ ነው?
    • ይህንን አካሄድም ሌሎች መሥሪያ ቤቶች እንዲከተሉን ስብሰባችን የተለየ ነው የሚሆነው፡፡
    • ስለዚህ ምን ዓይነት ደብዳቤ ነው የምጽፈው?
    • ምን ዓይነት ስብሰባ እንደምናካሂድ፣ ለስብሰባ የሚያስፈልጉ ግብዓቶችና ስብሰባው የት መካሄድ እንዳለበት በደብዳቤው መሥፈር አለበት፡፡
    • መልካም ክቡር ሚኒስትር፡፡
    • አሁን ስብሰባ ለማድረግ ከተማችን ውስጥ ያለውን ሙቀት ተመልከቺ፣ አየሽ በዚህ ሙቀት ስብሰባ ብትቀመጪ እንኳን ሐሳብ ልታመነጪ ቀርቶ ያለሽ ራሱ ይጠፋብሻል፡፡
    • ባለፈው ለስብሰባ አዳራሹ በመቶ ሺሕ ብሮች እኮ ነው ኤሲ የተገጠመላቸው፡፡
    • ነገርኩሽ እኮ እንደዚህ በታፈነ ክፍል ውስጥ የሚመጣ ሐሳብ ራሱ የታፈነ ስለሚሆን፣ አሁን ስብሰባችንን ማድረግ ያለብን አውትዶር ነው፡፡
    • አውትዶር ሲሉኝ?
    • በቃ ተፈጥሮን እያደነቅሽና እያጣጣምሽ ደጅ ላይ ስብሰባ ብታደርጊ የሐሳብ ጎርፍ ነው የሚመታሽ፡፡
    • መቼም ያን ሐሳብ ሊያመጡት እንዳይሆን?
    • የቱን ሐሳብ?
    • በመመርያ የተከለከለውንና በየሪዞርቱ ስብሰባ እናድርግ የሚለውን ነዋ፡፡
    • አሁን ሪፎርም እናድርግ ስለተባለ ከዚያም ላቅ ያለ ሐሳብ ነው ያለኝ፡፡ እኔ ከአዳራሽ ውጪ ስብሰባ እንዲካሄድ ነው የምፈልገው፡፡
    • ከአዳራሽ ውጪ ታዲያ ከሆነ ጫካ ገብተን ስብሰባ ልናካሂድ?
    • ጫካ መግባት ያለፈበት ፋሽን ስለሆነ እኔ ያለኝ ሐሳብ በጣም የተለየ ነው፡፡
    • ምን ዓይነት ሐሳብ?
    • ከዚህ በኋላ ስብሰባችን መደረግ ያለበት ቦታ ለየት ያለና ተሰብሳቢዎችን ማዝናናት የሚችል ነው፡፡
    • ምን ዓይነት ቦታ ነው?
    • ቦታው በአገር ውስጥ ስለሌለ በአስቸኳይ ዓለም አቀፍ ጨረታ ማውጣት አለብን፡፡
    • የምን ጨረታ?
    • የስብሰባ ቦታችንን እንዲገነቡልን ለማድረግ ነዋ፡፡
    • ምን ልናስገነባ ነው?
    • መርከብ!

    [የክቡር ሚኒስትሩ ሚስት ቢሯቸውን በርግደው ይገባሉ]

    • ከየት መጣሽ?
    • ጉድ ሆነናል፣ ጉድ ሆነናል፡፡
    • የምን ጉድ ነው?
    • ለመሆኑ መንግሥት አለ?
    • እኔ አይደለሁ እንዴ መንግሥት?
    • ብትሆንማ ይኼ ሁሉ ነገር ሊፈጸም አይችልም፡፡
    • ምን ተፈጸመ?
    • ጥረን ግረን ያፈራነውን ንብረት ተወሰደ፡፡
    • ሴትዮ ተረጋግተሽ እስኪ ንገሪኝ?
    • ስማ ከተማ መሀል ከልጆቻችን ጉሮሮ እየነጠቅን የሠራነውን ሕንፃ ተነጠቅን እኮ ነው የምልህ?
    • የትኛውን ሕንፃ ብዙ እኮ ነው ያለን፡፡
    • መሀል አዲስ አበባ ላይ መቶ ሚሊዮን ብር አውጥተን የገነባነው G+7 ሕንፃ ነዋ፡፡
    • ማን ነው የነጠቀን?
    • ወዳጄ ነው የምትለው ውክልና የሰጠኸው ደላላ ነዋ፡፡
    • እንዴት ሆኖ?
    • ይኸው ዛሬ የሕንፃውን ኪራይ ላክልኝ ብዬ ደውዬለት ነበር፡፡
    • አላከልሽም ታዲያ?
    • ‹የምን የሕንፃ ኪራይ?› ብሎ ጠየቀኝ፡፡
    • የሕንፃውን ነዋ፡፡
    • ‹ሕንፃውን የእናንተ ማን አደረገው?› አይለኝ መሰለህ፡፡
    • ታዲያ የሕዝብ ሕንፃ ነው ሊል ነው እንዴ?
    • እኔ ምን አውቅልሃለሁ?
    • ቆይ እስኪ ተረጋጊ?
    • ስማ እንዴት ነው የምረጋጋው?
    • ምን ተፈጠረ?
    • ‹ሕንፃው የእኔ ነው› እያለ ነው፡፡
    • መጀመርያ ተረጋጊ፡፡
    • ሰውዬ አሁኑኑ እንዲህ ዓይነት ክህደት የፈጸመው ደላላ ላይ ዕርምጃ መውሰድ አለብህ፡፡
    • ምን ዓይነት ዕርምጃ?
    • አብዮታዊ ዕርምጃ ነዋ፡፡
    • አንቺ መግደል መሸነፍ ነው፣ እንዲህ ዓይነት ሐሳብ አይኑርሽ፡፡
    • ብቻ ሌላም ዕርምጃም ቢሆን ውሰድበት፡፡
    • ስሚ ዘመኑ የምን ዘመን እንደሆነ ረሳሽው?
    • የምን ዘመን ነው?
    • የፍቅር፣ የይቅርታ፣ የመደመር ዘመን ነው፡፡
    • እኔ ከእንዲህ ዓይነቱ ከሃዲ ጋር መደመር አልፈልግም፡፡
    • ስሚ ይህን ሰውዬ እኮ ማስገረፍም ሆነ ማስገደል እንችላለን፣ ግን መግደል መሸነፍ መሆኑን መቀበል አለብሽ፡፡
    • ይኼ የፖለቲካ ዲስኩርህ እኔ ዘንድ አይሠራም፡፡ ቢያንስ አሁን ሰውዬውን አሳስርልኝ፡፡
    • ምን ነካሽ? እኛ አስረን አናጣራም፣ አጣርተን ነው የምናስረው፡፡
    • ለዚያ ነው የአዲስ አበባን ልጆች ያጎራችኋቸው?
    • ይኸውልሽ አዲስ አበባ ነዋሪ እንጂ ልጆች የሏትም፡፡
    • ቀስ ብለህ አንተ ከተማዋ መሀን ናት ትለኛለህ፡፡
    • እንደዚያ አልወጣኝም፡፡
    • ሰውዬ አሁን እኔ የምፈልገው ይኼ ከሃዲ ተገቢውን ቅጣት እንዲያገኝ ነው፡፡
    • ለእሱ አታስቢ ተገቢውን ቅጣት እኔ እሰጠዋለሁ፡፡
    • ሰውዬው እኮ የጊዜው ሰው ነኝ ብሎ ነው የሚደነፋው፡፡
    • ነገርኩሽ እኮ ለጊዜው እኔ የጊዜውን ቅጣት እሰጠዋለሁ፡፡
    • ምንድነው የጊዜው ቅጣት?
    • ፑሽአፕ!

    [በአዲሱ የሚኒስትሮች ሹመት እካተታለሁ ብሎ የሚያስብ ባለሥልጣን ከሚኒስትሩ ጋር እያወራ ነው]

    • ክቡር ሚኒስትር በአዲሱ የሚኒስትሮች ሹመት እንደምካተት ተነግሮኛል፡፡
    • በእሱ እርግጠኛ አትሁን፡፡
    • ለምን?
    • እኛንም ድሮ እንደዚሁ ተስፋ ይሰጡንና በመጨረሻ ያንሳፍፉን ነበር፣ ስለዚህ ብዙ ተስፋ አታድርግ፡፡
    • ቢሆንም እኔ ራሴን ለሚኒስትርነት እያዘጋጀሁ ብጠብቅ ይሻላል፡፡
    • ምን ልርዳህ ታዲያ?
    • ከአንድ ሚኒስትር የሚጠበቁ የሥራ ሥነ ምግባራትን እንዲነግሩኝ ነው፡፡
    • ሚኒስትርነት ትልቅ የአገር ኃላፊነት መሆኑን ማወቅ አለብህ፡፡
    • ልክ ነዎት ክቡር ሚኒስትር፡፡
    • ቢሆንም መጀመርያ አገልግሎት የሚጀምረው ከራስ ነው፡፡
    • አልገባኝም ክቡር ሚኒስትር?
    • መጀመርያ ራስህን ከጠቀምክ በኋላ ነው ቀጥሎ ሕዝቡን መጥቀም የምትችለው፡፡
    • እንዴት ክቡር ሚኒስትር?
    • ሆድህንና ኪስህን ከሞላህ በኋላ የሕዝቡን ሆድና ኪስ መሙላት ትችላለህ፡፡ የአንተ ሆድና ኪስ ባዶ ሆኖ የሕዝቡን እንዴት ልትሞላ ትችላለህ?
    • ልክ ብለዋል ክቡር ሚኒስትር፡፡
    • ስለዚህ በመጀመርያ ማሰብ ያለብህ እንዴት ታታሪ ዘራፊ መሆን እችላለሁ የሚለውን ነው፡፡
    • ክቡር ሚኒስትር ትልቅ ትምህርት እየሰጡኝ ስለሆነ እኔም ኖት እየያዝኩ ነው፡፡
    • ሁልጊዜ መሬትና ኮሚሽን የሚሉትን ነገሮች ከጭንቅላትህ ማውጣት የለብህም፡፡
    • እ. . .
    • ምንም ሥራ ስታስብ ኮሚሽኔ ምንድነው የሚለውን አብረህ ማሰብ አለብህ፡፡
    • ጥሩ ነጥብ ናት ክቡር ሚኒስትር፡፡
    • አንዳንዱ ኮሚሽን ገንዘብ ነው ብሎ ያስባል፣ አንዳንዱ ደግሞ የሕዝብ ፍቅር ነው ብሎ ያስባል፡፡
    • አሁን ገባኝ፡፡
    • ስለዚህ አንተ ከየትኛው ጎራ መሆን እንደምትፈልግ ዕወቅ፡፡
    • እሺ ክቡር ሚኒስትር፡፡
    • እንደ እኔ እንደ እኔ ቅድም እንዳልኩህ ራስህን መጥቀም አለብህ፡፡
    • እሱ በደንብ ያግባባናል ክቡር ሚኒስትር፡፡
    • ሌላው በተቻለህ መጠን በርካታ ደላላ ጓደኞች ሊኖሩህ ይገባል፡፡
    • ጥሩ ክቡር ሚኒስትር፡፡
    • አየህ ከአንድ ደላላ ይልቅ በዘርፍ በዘርፍ ደላላ ጓደኞች ቢኖሩህ ጥሩ ነው፡፡
    • ምንድነው የሚደልሉት?
    • በቃ እነሱ እንደ አንተ ሆነው ቢዝነስህን ያጣጡፉልሃል፡፡
    • ዋናው ጉዳይ እሱ አይደል እንዴ?
    • በዚህ አካሄድ እነሱም ይሠራሉ አንተም ትሠራለህ፡፡
    • በሚገባ እንጂ ክቡር ሚኒስትር፡፡
    • እንግዲህ ይኼን አካሄድ ነው ሠርቶ ማሠራት የምንለው፡፡
    • ይኼማ ሌላ ስም ነው ያለው ክቡር ሚኒስትር፡፡
    • ምን?
    • ሰርቆ ማሰረቅ!

    [ክቡር ሚኒስትሩ ከሌላ ሚኒስትር ጋር እያወሩ ነው]

    • ክቡር ሚኒስትር አዲስ መሥሪያ ቤት እንዲቋቋም ስለተወሰነ እርስዎ ምን ዓይነት አዲስ መሥሪያ ቤት ይቋቋም ይላሉ?
    • ብዙ ጊዜ የአገሪቱን ችግር ሊፈታ የሚችል መሥሪያ ቤት እንዲቋቋም ጠቁሜ እኮ ሰሚ አጥቼ ነው የተውኩት፡፡
    • ዛሬ ላናግርዎት የመጣሁት እኮ ለዚያ ነው፡፡
    • እንደነገርኩህ በቀድሞው ሥርዓትም ሆነ አሁንም አገሪቱ የጎደላት የሚኒስቴር መሥሪያ ቤት አንድ ነው፡፡
    • ምንድነው የጎደለው?
    • ሕዝቡ ስትመለከተው በጣም ያዝናል፣ ይጨነቃል፡፡ ስለዚህ ይህንን የሕዝብ ችግር የሚፈታ ሚኒስቴር መሥሪያ ቤት መቋቋም አለበት፡፡
    • ምን ዓይነት መሥሪያ ቤት? የሰላም ነው?
    • ይኸውልህ  ከሰላም በፊት መቅደም ያለበት የሚኒስቴር መሥሪያ ቤት አለ፡፡
    • ታዲያ የፍቅር ሚኒስቴር መሥሪያ ቤት ነው?
    • ምን መሰለህ ከፍቅርና ከሰላም በፊት ሊኖረን የሚገባ መሥሪያ ቤት አለ፡፡
    • ምንድነው እሱ?
    • የፈንጠዝያ ሚኒስቴር መሥሪያ ቤት፡፡
    • ይቀጥሉ ክቡር ሚኒስትር፡፡
    • ይህ የፈንጠዝያ ሚኒስቴር ዋናው ሥራው በየሳምንቱ ቅዳሜ ሕዝቡ በየሥጋ ቤቱ እስኪጠግብ በልቶ የተከሸነውን እንዲጋት ያደርጋል፡፡
    • ኖት እየያዝኩ ነው ክቡር ሚኒስትር፡፡
    • ወደ አመሻሽ ላይ ደግሞ በየፓርኮቹ አሉ የተባሉ ዲጄዎች በሙዚቃ ድግስ ሌሊቱን ሙሉ ሕዝቡን ያስፈነድቁታል፡፡
    • በጣም ጥሩ ክቡር ሚኒስትር፡፡
    • እሑድ ደግሞ ሕዝቡ ሲኒማ እየኮመኮመ እንዲዝናና ይደረጋል፡፡
    • እሺ ክቡር ሚኒስትር፡፡
    • በአዘቦት ቀን ሕዝቡ ጥሩ ጥሩ ምግብ ቤቶች እየገባ እንዲዝናና ማድረግ ሌላኛው ሥራው ነው፡፡
    • መልካም ክቡር ሚኒስትር፡፡
    • ስለዚህ በከተሞቻችን ያሉትን የምግብ ቤቶችና የሆቴሎች አቅም በመገንባት ቢቻል ደግሞ፣ የውጭ ብራንዶችን እያስገባን የሕዝቡን የደስታ መጠን መጨመር አለብን፡፡
    • ይህን ሐሳብ ለሚመለከተው አካል እናቀርባለን፡፡
    • እንዲህ በማድረግ ሕዝቡን በማስፈንጠዝ ከችግር ማላቀቅ እንችላለን፡፡
    • ክቡር ሚኒስትር ግን ይኼንን ትልቅ ተቋም ማን ሊመራው ይችላል?
    • እውነት ለመናገር እኔ እንኳን ይህንን ተቋም መምራት ይከብደኛል፡፡
    • ክቡር ሚኒስትር እንደነገሩኝ ከሆነ ይኼ መሥሪያ ቤት ከተቋቋመ የአገሪቱ ችግር ሙሉ ለሙሉ ጠፋ ማለት ነው፡፡
    • ምን ነካህ? 11 በመቶ የሚያድገው ኢኮኖሚ ራሱ 111 በመቶ ማደግ ይጀምራል፡፡
    • እሱን እኮ ነው የምልዎት ክቡር ሚኒስትር፡፡
    • ዋናው ጥያቄ ማን ይምራው የሚለው ነው?
    • ልክ ነው ክቡር ሚኒስትር፡፡
    • ሰሞኑን እንዳየኸው ሚኒስትሮቻችን ዶክተሮች፣ ኢንጂነሮች፣ ኮሚሽነሮች፣ ዶክተር ኢንጂነሮችና ከፍተኛ ማዕረግ ያላቸው ናቸው፡፡
    • አዎን ክቡር ሚኒስትር፡፡
    • ስለዚህ ይህን ተቋም ሊመራው የሚገባው ሰው ሁሉንም ማዕረግ የያዘ መሆን አለበት፡፡
    • ምን ዓይነት ማዕረግ ያለው?
    • ብርጋዴር ኮሚሽነር ጄኔራል ዶክተር ኢንጂነር!

    በብዛት የተነበቡ ፅሁፎች

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...

    የዩኒቨርሲቲ መምህራን ከደመወዝ ጭማሪና ከዕርከን ዕድገት ጋር በተያያዘ መንግሥትን አስጠነቀቁ

    ‹‹የደመወዝ ጉዳይ የትምህርት ሚኒስቴር ብቻ ሳይሆን የሲቪል ሰርቪስ ኮሚሽንም...
    - Advertisment -

    ትኩስ ፅሁፎች

    በዓለም ጂኦ ፖለቲካ መድረክ የኢትዮጵያ ተፈላጊነት

    የአሜሪካው የውጭ ጉዳይ ሚኒስትር አንቶኒ ብሊንከን በሦስት የአፍሪካ አገሮች...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...

    በውዝግብ የታጀበው የኢትዮጵያ እግር ኳስ ፌዴሬሽን ምርጫ

    ፊፋ ከምርጫው በፊት የሥነ ምግባር ባለሙያ ሊልክ መሆኑ ተሰምቷል የኢትዮጵያ...
    spot_img

    ተዛማጅ ፅሁፎች

    [ክቡር ሚኒስትሩ በስንዴ የተሸፈኑ ሰፋፊ እርሻዎች ያሉበትን ሁኔታ ለመገምገም ከስንዴ ምርት ድጋፍና ክትትል ኮሚቴ ሰብሳቢ ጋር እየመከሩ ነው] 

    ክቡር ሚኒስትር እንደነገርክዎት በሁሉም ስንዴ አብቃይ አካባቢዎቻችን ያሉ አርሶ አደሮች ጥሪያችንን ተቀብለው መሬታቸውን በኩታ ገጠም አርሰው በስንዴ ዘር ሸፍነዋል። በጣም ጥሩ ዜና ነው። በጣም እንጂ። የሚገርምዎት...

    [ክቡር ሚኒስትሩ የሚመሩት የሥራ አስፈጻሚ ኮሚቴ ስብሰባ አጀንዳ አድርጎ በያዘው ወቅታዊ የፀጥታና ደኅንነት ጉዳዮች ላይ ትኩረት በመስጠት ቢጀመርም በስተመጨረሻ አጀንዳውን ስቶ ስለ መዋደድ እየተጨቃጨቀ...

    በዛሬው መደበኛው መድረካችን አጀንዳ የተለመደው የፀጥታና ደኅንነት ጉዳይ ይሆናል። ሌላ አጀንዳ የምታስይዙት አጀንዳ ከሌለ በቀር ማለቴ ነው። ክቡር ሚኒስትር... እሺ ...ቀጥል አመሰግናለሁ ክቡር ሚኒስትር። መደበኛ አጀንዳው እንደተጠበቀ...

    [ክቡር ሚኒስትሩ ወደ መኖሪያ ቤታቸው ሲገቡ ባለቤታቸው የኢትዮጵያ አትሌቶች በዓለም ሻምፒዎና መንገሣቸውን እያነሱ ደስታቸውን ሲገልጹ አገኟቸው]

    እሰይ አገሬ... እሰይ አገሬ እልልል ምን ተገኘ ደግሞ ዛሬ? የአትሌቶቻችንን ድል ነዋ! በክፉ ሲነሳ የቆየውን የአገራቸውን ስም በወርቅ እያደሱ እኮ ነው?  አየሽ፣ መንግሥት የአገራችን ችግር ያልፋል ስሟም...