Thursday, August 18, 2022
ሌሎች ዓምዶች
    - Advertisement -
    - Advertisement -
    ስፓርትስኬታማው ዳኛ ባምላክ ተሰማ ለአፍሪካ ዋንጫ ፍጻሜ ይጠበቃል

    ስኬታማው ዳኛ ባምላክ ተሰማ ለአፍሪካ ዋንጫ ፍጻሜ ይጠበቃል

    ቀን:

    ውልደቱም ሆነ ዕድገቱ በአዲስ አበባ የሆነው ኢንተርናሽናል የእግር ኳስ ዋና ዳኛ ባምላክ ተሰማ አሁን ለደረሰበት ስኬት ካበቃው የእግር ኳስ ዳኝነት ይልቅ እግር ኳስ ተጨዋች የመሆን ፍላጎት እንደነበረው በግለ ታሪኩ የሰፈሩ መረጃዎች ያስረዳሉ፡፡ ባምላክ በመገናኛ ብዙሃን ቀርቦ ብዙም የመናገር ፍላጎት የሌለው በመሆኑ እሱን ማግኘት ለሚፈልጉ የአዲስ አበባ ስታዲየምን ማዘውተር የግድ ይላል፡፡

    እግር ኳስ ተጫዋች የመሆን የልጅነት ሕልሙ ዕውን ባይሆንም፣ የእግር ኳስ ዳኝነትን ጨምሮ ለተሰማራበት ሥራ ትልቅ ክብር እንዳለው ከእሱ በላይ የሙያ አጋሮቹ ይመሰክሩለታል፡፡ የ38 ዓመቱ ባምላክ የሕክምና ባለሙያ፣ ክሊኒካል ኮኦርዲኔተር ሲሆን፣ በሥነ ማኅበረሰብ ሳይንስ ከአዲስ አበባ ዩኒቨርሲቲ እ.ኤ.አ በ2012 ከመመረቁ ባሻገር በእግር ኳስ ዳኝነት የኢንተርናሽናል ዳኝነት ዕውቅና ማግኘት የቻለው እ.ኤ.አ በ2009 ነው፡፡ በኢትዮጵያ ባምላክን ጨምሮ ሰባት ዋናና ሰባት ረዳት ኢንተርናሽናል የእግር ኳስ ዳኞች እንዳሉ ይታወቃል፡፡

    ዕውቅናውን ካገኘ በኋላም የአፍሪካ ክለቦች ሻምፒዮንስ ሊግና የአፍሪካ ክለቦች ኮንፌዴሬሽን ዋንጫ ጨምሮ የዓለም አቀፍ እግር ኳስ ማኅበር (ፊፋ) በሚያዘጋጃቸው ዕድሜያቸው ከ17 ዓመትና ከ20 ዓመት በታች የዓለም ዋንጫዎች በብቃት ሲያጫውት ቆይቷል፡፡ ደረጃው ያን ያህል ቢሆንም በኢትዮጵያ ፕሪሚየር ሊግ ምስጉንና ጠንካራ ተብለው ከሚወደሱ ዳኞች መካከል በዋናነት ይጠቀሳል፡፡

    ከቅርብ ዓመታት ወዲህ ደግሞ ካፍም ሆነ ፊፋ ትልቅ ተስፋ ከጣሉባቸው የእግር ኳስ ዋና ዳኞች መካከል አንዱ እንደሆነ የሚነገርለት ኢንተርናሽናል ዳኛ ባምላክ፣ በአሁኑ ወቅት ካፍ ለመጀመሪያ ጊዜ 24 ብሔራዊ ቡድኖችን እያሳተፈ ባለው 32ኛው የአፍሪካ ዋንጫ ላይ ከሚዳኙት 28 ዋና ዳኞች ውስጥ ብቃቱን ጠብቆ እስከ ፍጻሜው ከዘለቁት አራት ዋና ዳኞች አንዱ ሆኗል፡፡

    32ኛው የአፍሪካ ዋንጫ መስተንግዶ ለምዕራብ አፍሪካዊቷ ካሜሩን የተሰጣት ቀደም ብሎ ቢሆንም፣ ይሁንና በስታዲየምና መሰል ዝግጅቶች መጓተት ዕድሉ ለሰሜን አፍሪካዊቷ ግብፅ ተላልፎ መሰጠቱ ይታወሳል፡፡

    የአስተናጋጇ ተወካዮች ፈርኦኖቹ ተመልካች የሆኑበት 32ኛው የአፍሪካ ዋንጫ ዓርብ ሐምሌ 9 ቀን 2011 ዓ.ም. የሴኔጋልና የአልጄሪያ ብሔራዊ ቡድኖች በሚያደርጉት ጨዋታ ፍጻሜውን ያገኛል፡፡ ኢትዮጵያዊው ኢንተርናሽናል ዳኛ ባምላክ ተሰማ ጨዋታውን በዋና ዳኝነት እንደሚመራው ይጠበቃል፡፡ የአፍሪካ እግር ኳስ ኮንፌዴሬሽን (ካፍ) ምደባውን አስመልክቶ ያለው ነገር ባይኖርም፣ ይህ ዘገባ እስከተጠናቀረበት ድረስ ከምደባው ጋር ተያይዞ ሾልከው የሚወጡ ወሬዎች እንደሚያስረዱት ከሆነ ባምላክ ተሰማ ይህ የፍጻሜ ጨዋታ ሊመራ ይችላል፡፡

    በጉዳዩ ሪፖርተር ያነጋገራቸው የካፍ ኢንስትራክተር አቶ ሽፈራው እሸቱ ከሆነ፣ እንደ ባምላክ ሁሉ በግማሽ ፍጻሜው የተገናኙት አልጄሪያና ናይጀሪያን በዋና ዳኝነት የመሩት ጋምቢያዊ ባካሬ ፓፓ ጋሳማ ለፍጻሜው ከሚጠበቁት ይጠቀሳሉ፡፡ በግል ጉዳይ ከባምላክ ተሰማ ጋር ሲወያዩ ምደባውን በሚመለከት እርግጠኛ ሆኖ እንዳልነገራቸው፣ ሆኖም ግን የካፍ የዳኞች ምደባ ኮሚቴ አባላት እሱ የተሻለ ዕድል እንዳለው ፍንጭ መስጠታቸውን እንዳወራላቸው ነው ያስረዱት፡፡  

    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    የፌደራሉ መንግሥት በትግራይ ኃይሎች ላይ ጥቃት አልፈጸምኩም አለ

    የጠቅላይ ሚንስትሩ ፕሬስ ሴክሬታሪያት ቢልለኔ ስዩም ዛሬ ሐሙስ ነሐሴ...

    12ኛ ክልል እንዲቋቋም ህዝበ ውሳኔ እንዲካሄድ ተወሰነ

    የፌዴሬሽን ምክር ቤት በክልል የመደራጀት አቤቱታን ተቀብሎ በመመርመር ሕዝበ...

    የኬንያ ምርጫ ቀጣናዊ አንድምታው

    በዘመናት ውስጥ ሳይናወጥ መዝለቅ የቻለ ይሉታል አንዳንዶች፡፡ የአገሮቹ መሪዎች...