Monday, August 15, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    የአሽከርካሪ ማሠልጠኛዎች ጥራት ያሳስበናል

    ብቁና መልካም ትውልድ ከመቅረፅ አንፃር በሥራ ላይ የቆየው የአገሪቱ የትምህርት ፖሊሲ ብዙ ሲተች ነበር፡፡ ይህንን በመረዳት ጥናት በማድረግ የተሻለ የትምህርት ፖሊሲ ወይም የትምህርት ፍኖተ ካርታ በማሰናዳት ወደ ተግባር ለመግባት እየተደረገ ያለው ጥረት የሚበረታታ ነው፡፡ በተለይ መደበኛ የትምህርት ተቋማት በየደረጃው በመደበኛው የትምህርት ፕሮግራም ውስጥ ተማሪዎች መሠረታዊ የሥነ ምግባር ትምህርት የሚያገኙበት ሁኔታ መመቻቸቱ ትልቅ ነገር ነው፡፡ አገርን፣ አካባቢን መልካም አገልጋነትንና በአጠቃላይ በጎ ዜጋ ለመፍጠር ያስችላሉ የተባሉ ፕሮግራሞችን በማካተት ተማሪዎችን ለማስተማር መወሰኑ፣ ከምግባርና ከሥነ ባህል ጋር ተያይዞ የሚታየውን ችግር ለመፍታት፣ በአጠቃላይም አሳቢ ትውልድ እንዲፈጠር ጭምር የሚረዳ ነው፡፡

     ዛሬ እንደ እንደ አገር እየተፈተንና እርስ በርስ መደማመጥ ያልቻልነው፣ እንዲሁም ባለን ሀብት ተጠቅመን አገር ለማሳደግ የተሳነን ሥራን ባህል የሚያደርግ አገር ማለት ምን እንደሆነ በአግባቡ ሊያስተምር የሚችል የትምህርት ሥርዓት በመጥፋቱ ጭምር ነው፡፡ ልጆቻችን አንድነትን በማጠናከርና መተሳሰብን እንዲያጎለብቱ የሚያስችል እውቀት የሚያገኙበት ዕድል ስለተነፈጋቸውም ነው፡፡ የሥነ ምግባር ትምህርት የትምህርት ፖሊሲው አካል ባለመሆኑ፣ ነገንም እንድንሠጋ እስከ ማድረግ ደርሷል፡፡

    በአጠቃላይ አሁን እንደ አገር እየተፈተንበት ያሉ ችግሮች ያጋጠሙን በቀጥታም ሆነ በተዘዋዋሪ፣ ከሥር ጀምሮ መልካም ትውልድን ለመፍጠር የሚያስችል ትምህርት ባለመሰጠቱ ነው፡፡ አሁን ይህንን ለመለወጥ እየተሠራ ስለመሆኑ መነገሩ በራሱ ትልቅ ነገር ነው፡፡ ሆኖም ለውጡ በአንዴ የሚመጣ ባይሆንም ከዛሬ መጀመሩ ጥሩ ነው፡፡ እንዲህ ያለውን መልካም ነገር ፍሬ እንዲያፈራ ደግሞ የሁሉም ዜጋ ኃላፊነት ነው፡፡

    እዚህ ላይ ግን በብርቱ መታሰብ ያለበት በመደበኛ የትምህርት ተቋማት ተግባራዊ እንዲሆን ዝግጅት እየተደረገባቸው ያሉ መሠረታዊ እውቀት ማስጨበጫ ፕሮግራሞች ግን፣ ከመደበኛ የትምህርት ተቋማት ውጭ የተለያዩ የሙያ ሥልጠናዎችን የሚሰጡ ተቋማት ላይም መተግበር አለባቸው፡፡

    - Advertisement -

    ከመጣንበት መንገድ አንፃር የተንሻፈፉ አካሄዶችን ለማቅናት ከተፈለገ ቀና አመለካከቶችን የሚያጎለብቱ፣ ለአገር አሳቢነትን የማያጠናክሩና ምግባረ መልካምነትን ይዞ ለመጓዝ የሚያስችሉ ትምህርቶች በየትኛውም የሙያ ዘርፍ ሥልጠና የሚሰጡ ተቋማት ላይ መተግበር ይኖርበታል፡፡

    ለምሳሌ መልካም ሰብዕና የሚፈተንባቸው እንደ አሽከርካሪ ማሠልጠኛ ያሉ ተቋማት፣ የሥነ ምግባር ትምህርትና አጠቃላይ የትምህርት አሰጣጣቸው ተፈትሾ መስተካከል ይኖርበታል፡፡

    ኢትዮጵያ ዛሬ ከሌሎች አገሮች በተለየ በተሽከርካሪ አደጋዎች ስሟ እንዲነሳ፣ እንዲሁም የተሽከርካሪ አደጋዎች ከመቀነስ ይልቅ እንዲጨምሩ ምክንያት ከሆኑት ውስጥ አንዱ፣ የአሽከርካሪ ሥልጠና አስፈላጊ ከሚባሉ መሠረታዊ ትምህርቶች ጋር ተጣምሮ ያለ መስጠቱ ጭምር ነው፡፡

    አሽከርካሪዎችን አሠልጥኖ ለማውጣት የተቀረፀው የሥልጠና ካሪኩለም በጥልቅ ሲታይ፣ ጨዋ አሽከርካሪ ወይም በኃላፊነት ማሽከርከር የሚችል ሰው ለማፍራት የተቀረፀ ነው ማለት አይቻልም፡፡ ባለው የሥልጠና ካሪኩለም ቢሆን በአግባቡ እየተሠራ አይደለም፡፡ ትምህርቱ በብቃት ለመሰጠቱ የሚያረጋግጥ አሠራር የሌለበት መሆኑም ሌላው ችግር ነው፡፡

    ትምህርቱ የሚሰጠው በዘርፉ ሥልጠናውን ለመስጠት ብቃት ባላቸው ባለሙያዎች መሆን አለመሆኑን ለማወቅ እንኳን የማይችልበት ደረጃ ላይ ተደርሷል፡፡ የመንጃ ፈቃድ የሚይዙ ዜጎች ‹‹ማሽከርከር ትችላላችሁ›› ተብሎ የሚሰጣቸው የማረጋገጫ የምስክር ወረቀት፣ ሙሉ ለሙሉ ለማሽከርከር የሚያበቃቸውን ትምህርት ወስደው ነው ማለት እንደማይቻል ለሁላችንም ግልጽ ነው፡፡ በተለይ በዚህ የሥልጠና መስክ አብሮ የሚሰጠው የሥነ ምግባር ትምህርት፣ እንዲሁም ምን ያህል ኃላፊነት እንደሚኖርባቸው የሚያሳውቅ ባለመሆኑም እያስከተለ ያለው ችግር፣ በተሽከርካሪ አደጋ እየጠፋ ባለው ሕይወት መመልከት በቂ ነው፡፡ በየዓመቱ በትራፊክ አደጋ ወደመ ወድሟል ተብሎ ከሚነገረው አኃዛዊ መረጃንም በምስክርነት ማቅረብ ይቻላል፡፡

    ምንም ጥርጥር የሌለው ነገር ደግሞ እነዚህ የሥልጠና ተቋማት ባልተገባ ድርጊቶቻቸው ይታወቃሉ፡፡ የመንጃ ፈቃድ በጉቦ ይወጣል፣ አንድ አሽከርካሪ ብቃቱ ሳይረጋገጥ የመንጃ ፈቃድ ቤቱ ድረስ ይሄድለታል የሚለው ሹክሹክታ ሳይሆን እውነታ ነው፡፡ ይህ እየታወቀ ግን እንዲታረም አልተደረገም፡፡

    የበለጠው ደግሞ የሕዝብ ትራንስፖርት አገልግሎት የሚሰጡ አሽከርካሪዎች በተለየ የሚሠለጥኑበት፣ የአገልጋይነትን ምግባር ለማግኘት የሚያስችላቸው ትምህርት ግድ ይሆናል፡፡ በአሁኑ ጊዜ ከሥነ ምግባርና በመልካም አገልጋይነት ላይ ብዙ ችግር የሚታየው፣ ከመሠረቱ በቂ ትምህርት ባለመሰጠቱ ነውና የአሽከርካሪ ማሠልጠኛዎች ጥራት ጉዳይ ጊዜ ሳይሰጠው መፈተሽ አለበት፡፡

    የትራንስፖርት ዘርፉን በሁሉም ረገድ ውጤታማ ለማድረግ ከተፈለገም፣ የሥልጠና ጥራቱና በአጠቃላይ የሥልጠናው ሒደትና ቁጥጥር ሰፋ ብሎ መታየት አለበት፡፡

    ዛሬ እኮ በአዲስ አበባ ጎዳናዎች ላይ የሚታው የትራፊክ መጨናነቅ መንገድ ጠቦ ብቻ ያለ መሆኑን ልብ ልንል ይገባል፡፡ የችግሩ መንስዔዎች የተለያዩ ሊሆኑ ቢችሉም፣ ወግ ያለው የአነዳድ ሥልት ባለመኖሩ ጭምር ነው፡፡ በአግባቡ መስመርን ጠብቆ ያለ ማሽከርከር፣ የትራፊክ ሕግጋትን ሆነ ብሎ መጣስ፣ ጠጥቶ መንዳትና የመሳሰሉት ከችግሩ ጋር ይያያዛሉ፡፡ እኔ ልቅደም እኔ የሚለው እሽቅድምድም ለአደጋ መንስዔ መሆኑን እንገነዘባለን፡፡ ይህ ሁሉ እንግዲህ መሠረት ያለው የአሽከርካሪነት ሥልጠና ባለመሰጠቱ እንደሆነ እንገነዘባለን፡፡ የነውጠኛ አሽከርካሪዎች መብዛት ሥልጠናው ጥያቄ ያስነሳበታል፡፡

    በትራንስፖርት አገልግሎት የተሰማሩ ረዳቶችም ጉዳይ ከዚሁ ጋር የሚጠቃለል ነው፡፡ ሥራ ነውና ሥራቸውን በአግባቡ እንዲሠሩ አገልጋይነት ምን እንደሆነ የሚማሩበት አግባብ መኖር አለበት፡፡

    የተሽከርካሪ ማሠልጠኛዎችን እንደ ምሳሌ አነሳን እንጂ መሰል የሙያ የሥልጠና ተቋማትም በተመሳሳይ ሊታዩ ይገባል፡፡ በአንድ ሌላ ምሳሌ ላቁም፡፡ ዛሬ ሥራ አጥነትን ለማቃለል ወጣቶች በተናጠልም ሆነ በቡድን የሚወሰዱትን ገንዘብ ይመለከታል፡፡

    በቢሊዮን የሚገመት ብር ተመድቦ ለወጣቶቹ የሚሰጠው ገንዘብ በአግባቡ ከተሠራበት ብዙ ለውጥ እንደሚያመጣ ጥርጥር የለውም፡፡ ነገር ግን ገንዘቡ ከመሰጠቱ በፊት በቂ ሥልጠናና ምግባርን የሚያንፅ ትምህርት እየተሰጠ ባለመሆኑ ለብክነት ሲዳረግ ይታያል፡፡ ለሥራ አጥ ወጣቶች እንዲህ ዓይነት ዕድሎች ሲሰጡ፣ የሚሰጠው ገንዘብ ውጤት እንደሚያመጣ ሥነ ምግባርን ማስተማር ተገቢ ነው፡፡ ገንዘቡን ዝም ብሎ መበተን ብቻውን ግብ አይደለም፡፡ የገንዘብ አጠቃቀም ምግባርን ማስተማር፣  ይህ ገንዘብ እንዴት እንደተገኘ ማስረዳትና በአግባቡ ባለመኖራቸው ራሳቸውንና አገር የሚጎዳ ድርጊት ስለመሆኑ ማስተማር ግድ መሆን አለበት፡፡ ስለዚህ በዚህ አጋጣሚ ሥነ ምግባርን አገርንና አካባቢን ማዕከል በማድረግ ሥልጠናዎችን መስጠት የሚያስገኘው ጥቅም ከፍተኛ ነው፡፡

    በጥቅሉ ዜጎች ወደ ሥራ ዓለም ሲገቡ ስለአገልግሎት አሰጣጣቸው ብቻ ሳይሆን፣ በአግባቡ ማገልገል አገር መውደድ፣ ራስንና ማኅበረሰቡን ወደ ተሻለ ደረጃ ማድረስ ጭምር መሆኑን የሚያስገነዝብ ግንዛቤ ማስጨበጫ ቢኖር ብዙ ነገሮች ይለውጣሉ፡፡ ተቋማትም እንዲህ ያለውን አሠራር እንደ ባህል በመውሰድ ጥሩ አገልጋይ የመፍጠር ኃላፊነት ይኖርባቸዋል፡፡ ሥነ ምግባርን እንደ አንድ የሥልጠና አካል በማድረግ፣ የትኛውም ትምህርት ተቋም ቢሠራ ነገን መልካም ማድረግ ይቻላል፡፡ ወቅታዊውም የአገራችን ሁኔታ የሚጠይቀው ይህንን ነው፡፡

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት