Thursday, August 18, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    ዩኒቨርሲቲዎቻችን የፈጠራ ማዕከላት ሊሆኑ ይገባል

    ጊዜው ሆነና ወጋችን ሁሉ ዘመን አመጣሹ ወረርሽኝ ሆኗል፡፡ ከተለያዩ አቅጣጫዎች የምንመለከታቸው ሌሎች አጀንዳዎች ሁሉ ቦታቸውን ለቀው የኮሮና ወረርሽኝን የተመለከቱ ጉዳዮች መሪ ዜናዎቻችን ከሆኑ ሰነባበቱ፡፡

    ብዙዎች ይህንኑ ጉዳይ የተመለከቱ ምልክታዎችን እንጂ ከዚህ የተሻገረ ጉዳይ ለማንሳት ያልታደሉበት ጊዜ ላይ ደርሰናል፡፡ እንደ ኢትዮጵያ ደግሞ ይህንን እየሰፋ የመጣ ወረርሽኝ እንዴት እንወጣለን? የሚለው ሥጋት በእጅጉ እያሳሰበን ነውና አሁንም ኮሮና አጀንዳችን ሆኖ ይቀጥላል፡፡  እያንዳንዱ እንቅስቃሴዎችም ከዚሁ ጉዳይ የተሳሰሩ ሆነዋል፡፡ በአገር የመጣን ችግር በጋራ ለመቅረፍ ርብርብ እየተደረገ ነው፡፡

    በመልካም የምናያቸው ብዙ ተግባራትን እየተመለከተን ነው፡፡ ወረርሽኙ ሊያስከትል የሚችለውን ጉዳት ቀንሶ ይህንን ጊዜ ለመሻገር እንችል ዘንድ የሁላችንም ምኞት ነው፡፡

    የኮሮና ቫይረስ ወረርሽኝን ለመከላከል ልንፈጽማቸው ይገባሉ የተባሉ በርካታ ጉዳዮችን ተከትሎ አንዳንዶች የቤት ኪራይ አንቀበልም ሲሉ ሌሎች እንቀንሳለን ብለዋል፡፡ ቤቴንና ሕንፃዬን ከወረርሽኙ ጋር ለተያያዙ አገልግሎቶች ተጠቀሙ ብለው እጃቸውን የዘረጉ ዜጎችንም ለምሥጋና ጎንበስ ልንልላቸው ይገባል፡፡

    - Advertisement -

    ችግሩ ከበረታ ተብሎ ለቀለብ የሚሆኑ ምርቶችን እንካችሁ የሚሉ ዜጎችም መበርከታቸው በራሱ ትልቅ ነገር ነው፡፡ መተባበር እንደሚያዋጣ ያየንበትም ነው፡፡ ሁሉም እንደየሙያው ይህንን አደርጋለሁ ማለቱንም ስናይ ለነገ መልካም ነው፡፡ አንዳንዴ ችግር ብልኃትን ይወልዳልና በተለያዩ ዘርፎች ከቀደመው በተሻለ ዘመናዊ አሠራሮችን ለመተግበር እያየነው ያለውም ትጋት ይበል የሚያሰኝ ነው፡፡

    በዚህ ወቅት በመልካም የሚታዩ በጎ ተግባራትን ብቻ ሳይሆን አንዳንዶቹም በርትተን የወረርሽኙን ጉዳት ቀንሰን ከተሻገርን በኋላ አጠንክረን ልንቀጥል የምንችልባቸውን መልካም ዕድሎች የከፈቱ ናቸው፡፡

    ከዚህ አንፃር ብዙ ምሳሌዎች መጥቀስ የሚቻል ቢሆንም፣ እኔ በግል ነጥዬ የተመለከትኩን አንድ ጉዳይ በተለየ ማየት ፈልጌያለሁ፡፡

    ይህም ብዙም ባልተለመደ ሁኔታ ብዙዎቹ ዩኒቨርሲቲዎቻችን የፈጸሙትና እየፈጸሙ ያሉት ተግባር ነው፡፡ ከዩኒቨርሲቲዎቻችን ለኅብረተሰቡ የራሳቸውን ላቦራቶሪ ተጠቅመው ንፅህና መጠበቂያ ምርቶችን በአቅማቸው አምርተው ለየአካባቢያቸው ላሉ ወገኖች በክፍያም ሆነ በነፃ አደሉ መባሉ ነው፡፡ ይህንን ዜና ሌሎቻችሁ እንዴት እንደተመለከታችሁት ባላውቅም ለእኔ ብርቅ አድርጌ ወስጀዋለሁ፡፡ ምክንያቴ ደግሞ ዩኒቨርሲቲዎቻችን እንዲህ ባለው ልምድ ስለናማውቃቸው ነው፡፡ ከፍተኛ የትምህርት ተቋማት የሚገለጹት ከዚህም በላይ በሆነ የመፍትሔ አካልነታቸው ቢሆንም፣ ዛሬ እንዲህ ከተለመደ ነገ ብዙ ሊሰጡን ስለሚችሉ ነው፡፡  

    ሁለተኛው ደግሞ  ለእኔ እንደ ብርቅ ያየሁት ነገር ነገ ከነገ ወዲያም ከዚህ በላይ በሆኑ ጉዳዮች ላይ በተግባር የምናያቸው በቀጥታ ኅብረተሰቡን ሊያግዙ የሚችሉ ሥራዎችን በቀላሉ መሥራት እንደሚቻል ያመላከተ ጭምር በመሆኑ ነው፡፡

    ዛሬ የንፅህና መጠበቂያዎችን በላቦራቶሪያቸው አምርተውና አሽገው ለኅብረተሰቡ ያቀረቡ ዩኒቨርሲቲዎች፣ የሚያቀርቡት ምርት በጥራት ደረጃም ቢሆን ከየትኛውም የሚመረጥ በመሆኑ በዚሁ ልምድ በአካባቢያቸው ይህንን ምርት በጥራት ሊያመርቱ  የሚችሉ ዜጎችን በማፍራት የሥራ ዕድል መፍጠር የሚቻልበትን መንገድ ከፈቱ ማለት ነው፡፡

    ከዩኒቨርሲቲዎቻችን የምንጠብቀው ሳኒታይዘር ማምረት ሳይሆን ከዚህ በላይ የሆኑ አገርን ከችግር የሚያወጡ ተግባራትን ነው፡፡ ስለዚህ ከሰሞኑ ያየነው ልምምድ መነሻ ሊሆነን ይችላል፡፡ ብዙ ፈጠራዎችን በማፍለቅ ቢያንስ በዩኒቨርሲቲዎቹ ዙሪያ ያሉ ዜጎች ተጠቃሚ የሚሆኑበት ሊሆን ይችላል፡፡

    ከአገሪቱ ሕዝብ የበዛው የሚኖርበትን ግብርናችንን ያላዘመንበት አንዱ ምክንያት ዩኒቨርሲቲዎቻችን ይህንን አስበው ባለመሥራታቸው ጭምር መሆኑን አንስተን የፖለቲካ ግጭት መነሻ ሳይሆን መፍትሔ ሰጪ ተግባራት የሚጠበቁባቸው ናቸው፡፡

    አባትና እናቶቻችን ዛሬም ድረስ እጅግ ኋላ ቀር በሆነው መንገድ በሬ ጠምደው እያረሱ ያሉትና ካለቻቸው ማሳ ከእጅ ወደ አፍ የምትሆን ምርት እያመረቱ ያሉት፣ ዩኒቨርሲቲዎቻችን ለዚህ የሚሆን መፍትሔ ባለማበጀታቸው ነው፡፡ ለዚህም ምክንያቱ ከልብ ባለመታሰቡ እንደሆነም እንገምታለን፡፡ በግሌ ዛሬ በንፅህና መጠበቂያ ምርቶች ብቅ ያለውን የዩኒቨርሲቲዎቻችን ትሩፋት፣ ሁኔታዎች ከተመቻቹ የመማር ትርጉሙ የመፍትሔ ቁልፍ መሆኑን በማመን ነገ ከነገ ወዲያ ከዚህም በላይ ሊሠሩ የሚችሉ ነገሮች በእጅጉን መኖራቸውን ያሳያል፡፡ ዩኒቨርሲቲዎቻችን መፍትሔ ያላቸው መሆናቸውን ጭምር ያሳየ ነውና እንዲህ ያለውን ነገር እንዴት ማጎልበት እንደሚቻል ከወዲሁ እንድናስብ ያደርገናል ማለት ነው፡፡

    አሁን ባለው ደረጃ በየአካባቢ ጥራቱን የጠበቀ ሳኒታይዘር ለማምረት እንደሚቻል የታየ በመሆኑ፣ ይህንን ሥራ ለሌሎች በማቀበል የሥራ ዕድል መፍጠሪያ ማድረግ ይገባል፡፡ ቀጣዩ ሥራ ደግሞ ሌላው የዩኒቨርሲቲው ዲፓርትመንት የአዋጭ ቢዝነስ እንዲሆን አዘጋጅቶ ሌሎች እንዲተገብሩት ማድረግ ነው፡፡ ከዚሁ ጋር ተያይዞ ዩኒቨርሲቲዎቻችን የፀብና የፖለቲካ ድርጅቶች የቼዝ ጠጠር አይሁኑ፡፡

    ስለዚህ አሁን በአገር ደረጃ የገጠመንን ችግር ለመፍታት ዩኒቨርሲቲዎቹ በኢኮኖሚ፣ በማኅበራዊና በፖለቲካ ጉዳዮች ዙሪያ ሊኖር የሚችለውን ችግር ለመቀነስ መንግሥት ምን ዓይነት ብልኃት ቢጠቀም የተሻለ ይሆናል? የሚለውን ሐሳብ ይዘው ቢቀርቡ  በሩ ዝግ ይሆንባቸዋል ተብሎ አይታሰብም፡፡

    በዚህ ወቅት አዋጭና ችግር የሚቀንስ ዜጎችን የሚታደግና አገርን ከከፋ ችግር ሊያወጣ የሚችል ሐሳብ በእጅጉ የሚያስፈልግበት ሲሆን፣ ይህ አጋጣሚ በረባው ባልረባው ስለዩኒቨርሲቲዎቻችን እንሰማ የነበረው ታሪክ የምንለውጥበት ይሁን፡፡

    ወረርሽኙን ለመከላከል አንዳንድ ዩኒቨርሲቲዎች የጀመሩት እንቅስቃሴ የዚሁ አካል ሲሆን፣ በየራሳቸው የምርምር ሥራዎቻቸው ላይ ማተኮርም ተገቢ ይሆናል፡፡

    ሌላው ቀርቶ ዛሬ ለመጣብን ወረርሽኝ እንደ አገር የሕክምና መርጃ መሣሪያ የሚወሰደውና በእርግጥም አስፈላጊ የሆነው ሕመምተኞችን ትንፋሽ የሚሰጥ መሣሪያ አንዱ ነው፡፡

    ይህ መሣሪያ ብዙ እጥረት ያለበት ግን አስፈላጊ ከመሆኑ አንፃር ዩኒቨርሲቲዎቻችን በቀላሉ አገልግሎት ሊሰጡ የሚችሉ መሣሪያዎችን ማምረት የሚችሉት ዕድል ይኖራልና፣ በዚህም ረገድ ከሚመለከታቸው አካላት ጋር በመሆን በመምከር ለነገም ይረዳናልና እንዲህ ያሉ ነገሮች ቢሠሩባቸው መልካም ነው፡፡

    ስለዚህ አንዳንዴም እንዲህ ያሉ ፈታኝ ችግሮች የምንማርባቸውና የመፍትሔ አካል የሚሆኑ የፈጠራ ሥራዎችን የምናጎለብትባቸው የሚሆኑበት ዕድል ስላለ ዩኒቨርሲቲዎቻችን አጋጣሚውን ይጠቀሙበት፡፡

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት