Thursday, August 18, 2022
ሌሎች ዓምዶች
    - Advertisement -
    - Advertisement -
    ዜናበአገሪቱ የተከሰተው ድርጊት አሳፋሪና ሊደገም እንደማይገባ ኢዜማ አሳሰበ

    በአገሪቱ የተከሰተው ድርጊት አሳፋሪና ሊደገም እንደማይገባ ኢዜማ አሳሰበ

    ቀን:

    የድምፃዊ ሃጫሉ ሁንዴሳን ግድያ ሳቢያ በበርካታ ዜጎች ሕይወትና ንብረት ላይ የደረሰው ጥፋት እጅግ አሳሳቢ፣ አሳፋሪ፣ በሁሉም ኢትዮጵያውያን ዘንድ የተወገዘና በምንም ዓይነት ሊደገም የማይገባው ድርጊት ነው ሲል፣ የኢትዮጵያ ዜጎች ለማኅበራዊ ፍትሕ (ኢዜማ) አስታወቀ፡፡

    ኢዜማ ይህን አቋሙን ይፋ ያደረገው ሰኞ ሐምሌ 6 ቀን 2012 ዓ.ም. የፓርቲው መሪ ብርሃኑ ነጋ (ፕሮፌሰር) እና ሊቀመንበሩ አቶ የሺዋስ አሰፋ አማካይነት፣ ‹‹የአገር ህልውናና የዜጎች ደኅንነት መጠበቅ የሁሉም ነገር መሠረት ነው›› በሚል መሪ ቃል በራስ ሆቴል በሰጡት ጋዜጣዊ መግለጫ ወቅት ነው፡፡

    በሰሞነኛው አለመረጋጋትና ብጥብጥ የደረሰው የበርካታ ዜጎች ሕይወት መቀጠፍና ከፍተኛ የንብረት ውድመት እጅግ አስከፊና የትውልዱ ማፈሪያ እንደሆነ ያስታወቀው ኢዜማ፣ ‹‹በዘውግ ማንነት ላይ የተመሠረተ የፖለቲካ አካሄድ ወደ መቀመቅ እየወሰደን እንደሆነ፣ ሕዝብና መንግሥት ከበቂ በላይ ትምህርት አግኝተዋል፤›› በማለት፣ የሰሞኑ ድርጊት የዘውግ ፖለቲካው ያስከተለው ምስቅልቅል ነው የሚል እምነት እንዳለው አስታውቋል፡፡

    በእውነተኛ ፌዴራሊዝም ሁሉም ራሱን በራሱ የማስተዳደርና በመረጠው የመተዳደር መብት እንደሆነ ኢዜማ ገልጾ፣ ፖለቲካው ከዘውግና ከሃይማኖት ካልተላቀቀ በስተቀር መጨረሻው እጅግ አደገኛ እንደሚሆን በተደጋጋሚ ሲገልጽ መቆየቱን አስረድቶ፣ ይህ የፓርቲው አቋም ግን እንደ መለሳለስ መቆጠሩን አስታውሷል፡፡

    ከዚህ በመነሳትም ከሰሞኑ በተከሰተው አለመረጋጋትና ብጥብጥ፣ ‹‹በድንገት የሚፈጠር ነውጥ አገራችንን ከማትወጣው የከፋ አዘቅት ውስጥ ሊያስገባት እንደሚችል፣ በዘውግና በሃይማኖት ላይ የሚሰበክ የፖለቲካ ትርክት፣ ከዚህ ትርክት ተነስቶ የሚቆሰቁሰው ፍፁም ስሜታዊ ጥላቻ፣ እንዲሁም ጥላቻው የሚቀሰቅሰው የደቦ እንቅስቃሴ የሰውን ልጅ ከሰብዓዊነት ማማ አውርዶ ወደ አውሬነት ሊቀይረው እንደሚችል›› መገንዘቡን ኢዜማ በመግለጽ፣ አሁንም ከዘውግ ፖለቲካ እንዴት መውጣት እንደሚቻል ሁሉም ቆም ብሎ ሊያስብ እንደሚገባ አሳስቧል፡፡

    በቅርቡ የተከሰተውና በአገሪቱ ላይ ከፍተኛ የአለመረጋጋት አደጋ ደቅኖ የነበረው ክስተት  ለጊዜውም ቢሆን መክሸፉን  ያስታወቀው ኢዜማ፣ ‹‹ነገር ግን ችግሩ ዘላቂ የሆነ መፍትሔ አግኝቷል ማለት አይደለም፤›› በማለት፣ አሁንም ቢሆን ለዘላቂ መፍትሔ መሠራት እንዳለበት ጥሪ አቅርቧል፡፡

    ‹‹ያለ አገር ፖለቲካም ሆነ ዴሞክራሲ ትርጉም የላቸውም፤›› ያለው ኢዜማ፣ ‹‹ከዚህ አንፃር ሁሉም የአገራችን ዜጎች ይህን ፈታኝ ጊዜ በትዕግሥት፣ በማስተዋልና በጥንቃቄ እንዲሻገሩትና የአገሪቱን አንድነትና ሰላም በማስጠበቅ ረገድ ሁሉም የበኩሉን ኃላፊነትና ድርሻ የመወጣት ግዴታ አለበት፤›› ሲል ጥሪ አቅርቧል፡፡

    የእውነተኛ ዴሞክራሲያዊ ሥርዓት መመሥረት ለዘላቂ አገራዊ መረጋጋት መሠረት መሆኑን እንደሚያምን የገለጸው ኢዜማ፣ ‹‹ዴሞክራሲያዊ ሥርዓት የሚመሠረተው በዴሞክራሲያዊ መንገድ ማለትም በእውነተኛ ውይይትና ድርድር ብቻ ነው፤›› ሲልም አቋሙን አስታውቋል፡፡

    ‹‹ብዙ መስዋዕትነት የተከፈለበትን ሽግግር ዕውን ለማድረግ የሚያስችልና ለሁሉም ተስፋ የሚሰጥ የባለድርሻዎች ውይይት ሳይውል ሳያድር እንዲጀመር እንጠይቃለን፤›› በማለት ማሳሰቢያ አቅርቧል፡፡

    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    የፌደራሉ መንግሥት በትግራይ ኃይሎች ላይ ጥቃት አልፈጸምኩም አለ

    የጠቅላይ ሚንስትሩ ፕሬስ ሴክሬታሪያት ቢልለኔ ስዩም ዛሬ ሐሙስ ነሐሴ...

    12ኛ ክልል እንዲቋቋም ህዝበ ውሳኔ እንዲካሄድ ተወሰነ

    የፌዴሬሽን ምክር ቤት በክልል የመደራጀት አቤቱታን ተቀብሎ በመመርመር ሕዝበ...

    የኬንያ ምርጫ ቀጣናዊ አንድምታው

    በዘመናት ውስጥ ሳይናወጥ መዝለቅ የቻለ ይሉታል አንዳንዶች፡፡ የአገሮቹ መሪዎች...