Thursday, August 18, 2022
ሌሎች ዓምዶች

    የትግራይ ክልል ለሴፍቲኔት ፕሮግራም የሚውል ገንዘብ መከልከሉን አስታወቀ

    - Advertisement -spot_img

    በብዛት የተነበቡ

    ለሴፍቲኔት ዓላማ የሚውልና ከጥቅምት ወር ጀምሮ ለቀጣይ ሦስት ወራት እንዲያገለግል መላክ የነበረበት 285 ሚሊዮን ብር እንደተከለከለ የትግራይ ብሔራዊ ክልላዊ መንግሥት አስታወቀ፡፡

    የክልሉ መንግሥት ለሴፍቲኔት ዓላማ የሚውለውን ገንዘብ ከፌዴራል መንግሥት መከልከሉን ያስታወቀው፣ ጥቅምት 12 ቀን 2013 ዓ.ም. ‹‹የትግራይ ሕዝብና መንግሥት ለአሀዳዊና አምባገነናዊ ቡድን ተከታታይ ፀረ ሕዝብ ዕርምጃ አይምበረከኩም›› በሚል ርዕስ ባወጣው መግለጫ አማካይነት ነው፡፡

    ከዚህ በተጨማሪም የመቀሌ ከተማ የመጠጥ ውኃ ችግርን ለመቅረፍ ገረብ ግባ ግድብ ፕሮጀክት በተቋራጭነት እየሠራ የሚገኘውን የቻይና ኩባንያ CGGC ሁለት ዲዛይነሮች ጥቅምት 12 ቀን 2013 ዓ.ም. ወደ መቀሌ እንዳይሄዱ መከልከላቸውን በመጥቀስ፣ ይህ ውሳኔም ‹‹በአጠቃላይ የመቀሌ ከተማ ነዋሪ የመጠጥ ውኃ ተጠቃሚ እንዳይሆን፣ ጉሮሮው በውኃ ጥም እንዲደርቅ የተፈረደ የመጨረሻ የጭካኔ መገለጫ ነው፤›› በማለት ተቃውሞውን አሰምቷል፡፡

    ‹‹እነዚህ ሁሉ ተከታታይና ተደራራቢ ዕርምጃዎች የትግራይ ሕዝብ ከኢትዮጵያ የፌዴራል አወቃቀር ተገፍትሮ እንዲወጣ የሚገፋ ተግባራት ናቸው›› ካለ በኋላ፣ የዓለም አቀፉ ማኅበረሰብ ይህን ሁኔታ ተገንዝቦ ‹‹አስፈላጊውን ዕርምጃ›› ይወሰድ በማለት የክልሉ መንግሥት ለዓለም አቀፉ ማኅበረሰብ ጥሪውን አስተላልፏል፡፡

    ለሴፊቲኔት ዓላማ የሚውለው ገንዘብ መከልከልን አስመልክቶ ከሪፖርተር ጥያቄ የቀረበላቸው የገንዘብ ሚኒስቴር የኮሙዩኒኬሽንና ኢንፎርሜሽን ዳይሬክተር አቶ ሃጂ ኢብሳ መግለጫውን ‹‹ውሸት ነው›› በማለት ያጣጣሉት ሲሆን ‹‹የአሰጣጡ መንገድ ነው የተቀየረው እንጂ በይፋ የተከለከለ ገንዘብ የለም፤›› በማለት ምላሽ ሰጥተዋል፡፡

    ከዚህ በተጨማሪም ‹‹ገንዘቡ ለወረዳ፣ ለቀበሌ፣ ለዞን ፈሰስ ይደረጋል፡፡ በትክክል ለታቀደው ሕዝባዊ አገልግሎት መዋል አለመዋሉን ለማረጋገጥ እንጥራለን እንጂ የተቋረጠ ነገር የለም፤›› በማለትም አክለዋል፡፡

    አቶ ሐጂ በዚሁ ጉዳይ ላይ ለመገናኛ ብዙኃን በሰጡት መግለጫ በትግራይ ወረዳዎች፣ ከተማዎችና ቀበሌዎች የድጎማ በጀት የሚተላለፍበትን ዝርዝር አሠራር የገንዘብ ሚኒስቴር አዘጋጅቶ የሚኒስትሮች ምክር ቤት እንዲያፀድቀው መላኩን ተናግረዋል፡፡

    በመሆኑም አዲሱ አሠራር ከፀደቀ በኋላ ይህንኑ አሠራር መሠረት በማድረግ የድጎማ በጀቱ እንደሚላለፍ፣ ነገር ግን ለክልሉ መንግሥት ከፍተኛ ሥራ አስፈጻሚ የሚተላለፍ በጀት እንደማይኖር ገልጸዋል፡፡

    - Advertisement -
    - Advertisement -spot_img

    ትኩስ ጽሑፎች

    ተዛማጅ ጽሑፎች

    - Advertisement -
    - Advertisement -