Saturday, August 13, 2022
ሌሎች ዓምዶች
    - Advertisement -
    - Advertisement -
    ማኅበራዊየፆታ ጥቃት ሰለባዎች ለፕሬዚዳንቷ የጻፉት መልዕክቶች

    የፆታ ጥቃት ሰለባዎች ለፕሬዚዳንቷ የጻፉት መልዕክቶች

    ቀን:

    ሐሳባቸውን ለማጋራት የታደሉት ጥቂት ታዳጊዎች ብቻ ናቸው፡፡ ነገር ግን የእነዚህ ጥቂት ታዳጊዎች ሐሳብ የብዙ የታፈኑ ድምፆች ወኪል ሊሆን እንደሚችል ይታመናል፡፡

    እነሱ ላይ የደረሱ ጾታዊ ጥቃቶችና ሥነ ልቦናዊ ጉዳቶች በሌሎቹም ላይ ስለመድረሳቸው በተደጋጋሚ የተሰማ በመሆኑ ሐሳቡን በርካቶች ይጋሩታል፡፡

     በ13 እና 18 ዕድሜ ክልል ውስጥ የሚገኙ ታዳጊዎች መጠየቅ የሚፈልጉትንና አስተያየታቸውን ያሰፈሩባቸውን ወረቀቶች ለፕሬዚዳንት ሳህለ ወርቅ ዘውዴ በመገናኛ ብዙኃን በኩል እንዲደርሱላቸው ጠይቀዋል፡፡

    ታዳጊዎቹ በሴቶች ማረፊያና ልማት ማኅበር (አውሳድ) ጾታዊ ጥቃት የደረሰባቸው ታዳጊዎች ከለላ የሚያገኙበት ውስጥ ሆነው የጻፉት ደብዳቤ ነው፡፡ ዕድሉን አግኝተው ደብዳቤውን በመጻፋቸውና ሐሳባቸውን በማጋራታቸው ደስተኛ መሆናቸውንም አስፍረዋል፡፡

    አብዛኛዎቹ ደብዳቤዎች የተጻፉት ጥቅምት 6 ቀን 2013 ዓ.ም. ሲሆን፣ ለፕሬዚዳንት ሳህለ ወርቅ ዘውዴ ይደርስላቸው ዘንድ ከፍተኛ ፍላጎት እንዳላቸው በጽሑፋቸው አስፍረዋል፡፡ ከዚህ በተጨማሪ የወደፊት ራዕያቸውን፣ ከኢትዮጵያ እንዲጠፋ የሚፈለጉትን አስፍረዋል፡፡ የተለያየ ዕገዛ እንዲያገኙም ተማጽነዋል፡፡

    ጾታዊ ጥቃት ከደረሰባቸውና ለፕሬዚዳንቷ ደብዳቤ የመላክ ዕድል ካገኙት ውስጥ አንዲት ታዳጊ ተከታዩን ደብዳቤ ጽፋለች፡፡

    ‹‹ሰላም ላንቺ ይሁን ክብርት ፕሬዚዳንት ሳህለ ወርቅ ዘውዴ እኔ (. . .) አውሳድ የሚባል ድርጅት ውስጥ እገኛለሁ፡፡ ጾታዊ ጥቃት የደረሰባት ሴት ነኝ፡፡ ከዚህ ቀደም በመጣሽበት ጊዜ ስላገኘሁሽ ደስ ብሎኛል፡፡ ከደረሰብኝ ጾታዊ ጥቃት በተጨማሪ አካል ጉዳተኛ (ዓይነ ሥውር) ነኝ፡፡ ሆኖም ከፍተኛ የትምህርት ፍላጎት ስላለኝ ትምህርት እንድማር ብትረጂኝና መድረስ ያሰብኩበት ደረጃ እንደርስ ብታግዥኝ ደስ ይለኛል፡፡ ትምህርቴን ስጨርስ ጠበቃ ሆኜ አገሬን ማገልገል እፈልጋለሁ››፡፡ ከዚህ ጋር ተቀራራቢ ሐሳብ ያላቸው ደብዳቤዎች ለፕሬዚዳንት ሳህለ ወርቅ እንዲደርሱ የተሳተፉ አሉ፡፡

    ሐሳባቸውና የደረሰባቸው አሰቃቂ ግፍ ለማን መንገር እንዳለባቸው በቅጡ የማያውቁ ታዳጊዎችም ለፕሬዘዳንቷ ብቻ ሳይሆን፣ ለጠቅላይ ሚኒስትር ዓብይ አህመድ (ዶ/ር) ይደርስ ዘንድ የጻፉትም ይገኛሉ፡፡

    ለጠቅላይ ሚኒስትር ዓብይ ከተጻፉ መልዕክቶችና በዓውደ ርዕዩ ከተካተቱት መካከል ቀጥሎ ያለው ይገኝበታ፡፡ ‹‹የወደፊት ህልሜን ለማሳካት መማርና መታገዝ አለብኝ፡፡ ከዚህ ስወጣ ደግሞ በትምህርቴም ጥሩ ውጤት ማምጣት እፈልጋለሁ፡፡ ነገ የተሻለ ሥራ ለመሥራት የአንተ ዕርዳታና ዕገዛ ያስፈልገኛል፡፡ በደረሰብኝ ነገር እጅግ አዝኛለሁ፡፡ ስለዚህ አይዞሽ የሚለኝና በርቺ የሚለኝ ያስፈልገኛል››፡፡

    ማሳያ የሆኑ የታዳጊዎቹን ደብዳቤዎች ለዓውደ ርዕይ ያቀረበው ደግሞ ስትራቴጂክ ኢንሽየቲቭ ፎር ውሜን ኢን ዘ ሆርን ኦፍ አፍሪካ ስትራቴጂክ (ሲሀ ኔትወርክ) ነው፡፡

    ታኅሣሥ 27 ቀን 2013 ዓ.ም. በቀረበው ዓውደ ርዕይ በዋናነት የብዙ ሴት ታዳጊዎችና ወጣቶች ድምፅ ማሳያ እንደሆነ የሲሀ አቅም ግንባታ አማካሪ ወ/ሮ ዝምድና አበበ ለሪፖርተር ተናግረዋል፡፡

    በዕለቱ በሴቶች ጾታዊ ጥቃት ላይ የሚሠሩ ወጣቶች ተገኝተዋል፡፡ አዲስ ፓወር ሐውስ ዲጂታል ሌተር መሥራች የሆነችው ወጣት ሃና ለማ ደግሞ አንዷ ናት፡፡

    ወጣቷ የምትመራው ማኅበራዊ ትስስር ገጽ፣ ሴቶች ላይ የሚደርሱ ጾታዊ፣ ሥነ ልቦናዊና አካላዊ ጥቃቶችን የሚያወግዝና ትምህርት የሚሰጥ መረጃ የሚለዋወጡበት ነው፡፡

    ከዚህ በተጨማሪ ጥቃት ለደረሰባቸው ሴቶች አለኝታ በመሆንና ጥቃት ከመድረሱ በፊት በተለያየ መልኩ ለኅብረተሰቡ ግንዛቤ በማስጨበጥ ኃላፊነቷንም ትወጣለች፡፡

    የኢትዮጵያ የሕግ ባለሙያዎች ከሲሀ ኔትወርክስ ጋር በመሆን የሴቶች ሰብዓዊ መብት ተሟጋቾች ማኅበር አባል ከሆኑት ከአዲስ ፓወር ሐውስ ንቅናቄ፣ ሳራ ፍትሕ፣ የሎ ንቅናቄ፣ ኢኳል ኦፖርቹኒቲ ፎር ኦል እና ይታወቅ ጥምረት ጋር በመተባበር፣ ጾታን መሠረት ያደረጉ ጥቃቶች ላይ ግንዛቤ ማስጨበጫ ሥራዎችን በጋራ መሥራት መጀመራቸውን ወጣት ሀና ተናግራለች፡፡

    ሥርዓተ ጾታ ላይ ፍትሕ ማምጣት የዕለት ተዕለት ሥራቸው መሆኑን የገለጸችው ወጣት ሀና፣ በየዓመቱ የሚደረጉ ንቅናቄዎች በፆታ ላይ የሚደርሱ ጥቃቶች የሚወገዙበትና ሕጉ በትክክል ስለመተግበሩና ፍትሕ እንዲኖር የሚሞግቱበት መሆኑን ገልጻለች፡፡

    ሳራ ፍትሕ ከሁሉም የሴቶች ማኅበር፣ ይታወቅ ጥምረትና ሌሎች ሴቶች ላይ ትኩረት አድርገው የሚሠሩ ማኅበራት ጾታዊ ጥቃት ከቃላት እንደሚጀምር ገልጸው፣ በመሆኑም ቤተሰቦች ልጆችን በፍትሐዊነት እንዲያሳድጉ ጥሪ አቅርበዋል፡፡

    የአውራአምባ ማኅበረሰብን በምሳሌነት ያነሱት እነዚህ ማኅበራት፣ ሁሉም ሊተገብረው የሚገባና በቀላሉ ፍትሐዊና ከጾታዊ ጥቃት የሚያርቅ አሠራር መሆኑን ገልጸዋል፡፡

    የአውራምባ ማኅበረሰብ ከሥራ ጀምሮ በጾታ የማይከፋፈሉና የፍትሐዊነት ማሳያ የሆኑ ማኅበረሰቦች መሆናቸውን ያስረዳሉ፡፡ በኢትዮጵያ ከተማ በሚባሉ ቦታዎች እንኳን ለሥራ ጾታ እንደተሰጠው የሚገልጹት ማኅበራቱ፣ ከአውራምባ ማኅበረሰብ ግንዛቤ መውሰድ እንደሚገባ ይመክራሉ፡፡

    በእያንዳንዱ የመንግሥትና የግል መሥሪያ ቤቶችና ተቋማት ጾታዊ ጥቃትን ያወገዘ አሠራር መዘርጋት እንደሚገባም አክለዋል፡፡

    ሚዲያዎች በዋናነት ጾታዊ ጥቃቶች ላይ በይበልጥ መሥራት እንዳለባቸው የሚገልጹት ማኅበራቱ፣ በጾታዊ ጥቃትና ኢፍትሐዊነት በተመለከተ ራሳቸውን ጭምር መፈተሽ እንዳለባቸው ያስረዳሉ፡፡

    ጾታዊ ጥቃትን በተመለከተ በሕግ ላይ ክፍተቶች መኖራቸውንም ገልጸዋል፡፡ ከንቅናቄዎች በተጨማሪ የዕለት ተዕለት እንቅስቃሴዎች፣ ንግግሮች፣ አካሄዶች ሁሉ ከፆታዊ ጥቃት የፀዱ መሆን እንዳለባቸው፣ ሁሉም የኅብረተሰብ ክፍሎች ከጾታዊ ጥቃትና ኢፍትሐዊ አሠራሮች የፀዳች አገር ለመገንባትና ፍትሐዊ የሆነ አኗኗር እንዲኖር ለማድረግ መሥራት እንዳለባቸው ይመክራሉ፡፡

    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    የታላቁ የኢትዮጵያ ህዳሴ ግድብ ሁለተኛው ተርባይን ኃይል ማመንጨት ጀመረ

    ሦስተኛ ዙር ሙሌት በዛሬው ዕለት እንደሚጠናቀቅ ይጠበቃል የታላቁ የኢትዮጵያ ህዳሴ...

    የክላስተር አደረጃጀት ፖለቲካዊ ውዝግብ

    መንግሥት የደቡብ ብሔር ብሔረሰቦችና ሕዝቦች ክልል ይባል የነበረውን አደረጃጀት...

    በወለድ ነፃ የባንክ አገልግሎት የተሰበሰበው ከፍተኛ ሀብት ጥቅም ላይ እየዋለ አይደለም ተባለ

    በኢትዮጵያ ከወለድ ነፃ የባንክ አገልግሎት የተሰበሰበው የተቀማጭ ገንዘብ መጠን...