Saturday, August 13, 2022
ሌሎች ዓምዶች
    - ማስታወቂያ -
    - ማስታወቂያ -

    የኢትዮጵያ ንግድ ባንክ 80ኛ ዓመት በዓሉንና ግዙፍ የሆነውን የሕንፃውን ምርቃት በመጪው እሑድ ሊያካሂድ ነው

    - ማስታወቂያ -

    ተዛማጅ ፅሁፎች

    የኢትዮጵያ ንግድ ባንክ የተመሠረተበትን 80ኛ ዓመት በዓልና በርዝመቱ ከአፍሪካ ሦስተኛ ነው የተባለውን ባለ 48 ወለሉን የዋና መሥሪያ ቤቱን ሕንፃ ምርቃት በመጪው እሑድ የካቲት 6 ቀን 2014 ዓ.ም. ሊያካሂድ መሆኑን አስታወቀ፡፡

    በ1934 ዓ.ም. ‹‹የኢትዮጵያ መንግሥት ባንክ›› በሚል ስያሜ የንግድና የብሔራዊ ባንክነትን ጥምር ኃላፊነት ይዞ የተመሠረተው የኢትዮጵያ ንግድ ባንክ፣ 80ኛ ዓመቱን ለመድፈን ወራት ቢቀሩትም፣ በዓሉን ታሪካዊ ከሆነው ዋና መሥሪያ ቤቱ ሕንፃ ምርቃት ጋር በጋራ ለማክበር መታሰቡን የባንኩ ፕሬዚዳንት አቶ አቤ ሳኖ ተናግረዋል፡፡

    ባንኩ ትናንት የካቲት 1 ቀን 2014 ዓ.ም. በሰጠው መግለጫ በ165 ሺሕ ካሬ ሜትር ላይ ያረፈውን ዋና መሥሪያ ቤቱን ሠርቶ ለማጠናቀቅ 303.5 ሚሊዮን የአሜሪካ ዶላር ወጪ መደረጉ የተገለጸ ሲሆን፣ ለሕንፃው ግንባታ የሚውሉ ግብዓቶችን ያቀረቡት ከስምንት አገሮች የተወጣጡ 28 ኩባንያዎች መሆናቸው ታውቋል፡፡

    ግዙፉ የባንኩ ዋና መሥሪያ ቤት ሕንፃ 48 ወለል እንዲሁም አራት ወለል የምድር ቤትን (ቤዝመንቶች) የያዘ ሲሆን፣ 209.15 ሜትር እርዝመት አለው፡፡ ይኼም በአፍሪካ ሦስተኛው ረዥም ሕንፃ እንደሚያስብለው ተገልጿል፡፡

    ‹‹የአፍሪካ አልማዝ ቅርፅ እንዲኖረው ተደርጎ ተገንብቷል›› የተባለለት የኢትዮጵያ የንግድ ባንክ ሕንፃ አንደኛ ወለል ላይ የባንኩ ታሪክ የሚታይበት ይሆናል የተባለ ሲሆን ከ11፣ 24 እና 37ተኛ ወለሎች በቀር ከሁለተኛ እስከ 46ተኛ ድረስ ያለው የሕንፃው ክፍል ለቢሮ አገልግሎት ይውላል ተብሏል፡፡ 47ተኛው የሕንፃው ወለል ለካፍቴሪያነት፣ 48ተኛው ደግሞ አዲስ አባባን ከሕንፃው የመጨረሻ ወለል ላይ ሆነው ማየት ለሚፈልጉ ሰዎች ክፍት ይሆናል ተብሏል፡፡

    የዋና መሥሪያ ቤቱ ቅጥር ካሉት ሁለት ሌሎች ሕንፃዎች ወስጥ አንድኛው ለስብሰባ ማዕከልነት ሌላኛው ደግሞ ለንግድ ማዕከልነት እንደሚውል ታውቋል፡፡  የዋና መሥሪያ ቤቱ ሕንፃ ከአራት ሺሕ በላይ የሚሆኑ የባንኩን የዋና መሥሪያ ቤት ሠራተኞች አጠቃሎ ይይዛል ተብሏል፡፡

    ገንብቶ ለማጠናቀቅ አምስት ዓመት ከ11 ወራት የፈጀው የንግድ ባንክ ዋና መሥሪያ ቤት፣ ግንባታው የተከናወነው በቻይና መንግሥት ኮንስትራክሽን ኢንጂነሪንግ ኮርፖሬሽን (CSCEC) ነው፡፡ የአዲስ አበባ ዩኒቨርስቲ ቴክኖሊጂ ኢንስቲትዩት ደግሞ ድጋፍ ሲያደርግ መቆየቱ ታውቋል፡፡

    የኢትዮጵያ ንግድ ባንክ እስከ ጥር 2014 ዓ.ም መጨረሻ ድረስ ያለው አጠቃላይ ሀብቱ ከ1.1 ትሪሊዮን ብር በላይ እንደሆነ ያስታወቀ ሲሆን፣ የባንኩ ተቀማጭም 824 ቢሊዮን ብር እንደደረሰ ተገልጿል፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች