Tuesday, August 16, 2022
ሌሎች ዓምዶች
    - ማስታወቂያ -
    - ማስታወቂያ -

    ውጭ ከሚላክ የደን ምርት አሥር ሚሊዮን ዶላር ገቢ ታቅዶ 1.2 ሚሊዮን ዶላር ብቻ ተገኘ

    - ማስታወቂያ -

    ተዛማጅ ፅሁፎች

    ከውጭ የሚገባው የደን ምርት 400 ሚሊዮን ዶላር ደርሷል

    ኢትዮጵያ ባለፉት አሥር ወራት ወደ ውጭ ገበያ ለመላክ ካቀደቸው አሥር ሚሊዮን ዶላር የሚያወጣ የደን ምርት ውስጥ 1.2 ሚሊዮን ዶላር ብቻ ገቢ ሲገኝ፣ ወደ አገር የሚገባው ምርት መጠን ደግሞ በአንድ ዓመት ውስጥ ወደ 400 ሚሊዮን ዶላር ማሻቀቡን የግብርና ሚኒስቴር አስታወቀ፡፡

    የሕዝብ ተወካዮች ምክር ቤት የግብርና ጉዳዮች ቋሚ ኮሚቴ፣ የግብርና ሚኒስቴርንና ተጠሪ ተቋማትን የ2014 ዓ.ም. የአሥር ወራት የዕቅድ አፈጻጸም ሪፖርት ሰኞ ግንቦት 15 ቀን 2014 ዓ.ም. ገምግሟል፡፡

    የግብርና ሚኒስትር ደኤታ እያሱ ፍስሐ (ፕሮፌሰር) ለቋሚ ኮሚቴው እንደተናገሩት፣ ከጎጃምና ከምዕራብ ኢትዮጵያ ተነስቶ በሱዳን በኩል አልፎ እሰከ መካከለኛው ምሥራቅ ድረስ ይላክ የነበረው የደን ውጤት (አጠና)፣ ሱዳን ድንበር አካባቢ ባለው ግጭት ሳቢያ መተማ ላይ ያለው መተላለፊያ በመዘጋቱ የታሰበውን ገቢ ማግኘት አልተቻለም፡፡

    በተጨማሪም ከተከዜ ተፋሰስ ይሰበሰብ የነበረው ሙጫና ዕጣን፣ በሰሜኑ ጦርነት ምክንያት ሊገኝ እንዳልቻለ አክለው አስረድተዋል፡፡

    በሌላ በኩል በ2013/14 የመኸር ወቅት የትግራይ ክልልን ጨምሮ 375 ሚሊዮን ኩንታል ምርት ለማግኘት ዕቅድ ተይዞ የነበረ ቢሆንም፣ በተለያዩ አካባቢዎች በተከሰቱ ግጭቶችና ተያያዥ ጉዳዮች ምክንያት የተገኘው ምርት በ30 ሚሊዮን ኩንታል መቀነሱን የግብርና ሚኒስትሩ አቶ ኡመር ሁሴን ገልጸዋል፡፡

    በበጋ መስኖ የስንዴ ልማት በአጠቃላይ በአሥር ወራት ውስጥ በሁለት ዙር 660 ሺሕ ሔክታር መሬት ታርሶ ምርቱ ተጠቃሎ ሲገባ፣ 23 ሚሊዮን ኩንታል ያህል ምርት ይገኛል ተብሎ እንደሚጠበቅ ተናግረዋል፡፡

    በአሥር ወራት ውስጥ ቡና፣ ሻይ ቅጠል፣ አበባና ፍራፍሬን ጨምሮ ወደ ውጭ ከተላኩ 8,200 ቶን በላይ ምርቶች 1.5 ቢሊዮን ዶላር መገኘቱ ተገልጾ፣ የሻይ ምርት በሠራተኞች ዕጦት፣ በመብራት መቆራረጥ፣ በቴክኖሎጂ ውስንነትና በክትትል ማነስ ምክንያት አፈጻጸሙ ዝቅተኛ እንደሆነ በሪፖርቱ ተመላክቷል፡፡

    በበጀት ዓመቱ ተገዝቶ ወደ አገር እየገባ ካለ 12.9 ሚሊዮን ኩንታል የአፈር ማዳበሪያ ውስጥ እስካሁን ስምንት ሚሊዮን ኩንታል ወደ አገር ውስጥ መግባቱን፣ ለአርሶ አደሮች 2.2 ሚሊዮን ኩንታል ማዳበሪያና 580‚000 ኩንታል ምርጥ ዘር መሠራጨቱን ሚኒስትሩ አስታውቀዋል፡፡

    የግብርና ሚኒስቴር በተለያዩ አካባቢዎች ወራትን እየጠበቀ ለሚከሰተው የበረሃ አንበጣ መንጋ መከላከያ የሚረዱት አምስት አውሮፕላኖችና 25 ድሮኖች ገዝቶ ወደ አገር እያስገባ መሆኑንም አቶ ኡመር አስረድተዋል፡፡

    አቶ ኡመር በአሁኑ ወቅት የአንበጣ መንጋ ወረራ ብዙም ባይሆንም፣ ለኬሚካል ርጭት አገልግሎት የሚያገለግሉ ድሮኖችና አውሮፕላኖቹ ግዥ ተጠናቆ የተወሰኑት ወደ አገር ቤት ገብተዋል ብለዋል፡፡

    አውሮፕላኖቹ የሚያርፉበትን ሜዳ ጠረጋና ጥገና ለማካሄድ ለክልሎች 5.3 ሚሊዮን ብር፣ እንዲሁም ለበረሃ አንበጣ መንጋ መቆጣጠሪያ የሚያግዙና በተባበሩት መንግሥታት ድርጅት የምግብና የእርሻ ድርጅት (FAO) ድጋፍ የቀረቡ 84 የሞተር ብስክሌቶችና በተሽከርካሪ ላይ ተቀምጠው ርጭት የሚያከናውኑ አሥር መሣሪያዎች ለክልሎች መከፋፈላቸውን አቶ ኡመር ተናግረዋል፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች