Sunday, August 7, 2022
ሌሎች ዓምዶች
    - ማስታወቂያ -
    - ማስታወቂያ -

    ፈቃዳቸውን ለሦስተኛ ወገን አሳልፈው የሰጡ ጫት ላኪዎች ንግድ ፈቃዳቸው ታገደ

    - ማስታወቂያ -

    ተዛማጅ ፅሁፎች

    ኢትዮጵያ ወደ ውጭ አገር ከምትልካቸው ምርቶች ከፍተኛ ድርሻ ባለው የጫት ምርት የላኪነት ፈቃድ ወስደው በሕገወጥ መንገድ ለሦስተኛ ወገን አሳልፈው የሰጡ ድርጅቶች፣ የንግድ ፈቃዳቸው በጊዜያዊነት እንዲታገድ መወሰኑን የንግድና ቀጣናዊ ትስስር ሚኒስቴር አስታወቀ፡፡

    ሚኒስቴር መሥሪያ ቤቱ በአገር አቀፍ ደረጃ መረጃን በማጥራትና ግብረ ኃይል በማደራጀት የጫት ምርት በሚወጣባቸው የኢትዮጵያ መውጫ በሮች ላይ ጥብቅ ክትትልና ቁጥጥር በማድረግ፣ አስተማሪ ዕርምጃዎችን በመውሰድ ላይ መሆኑን አስታውቋል፡፡

    ግብረ ኃይሉ ባደረገው ጥናት በተለይም ሕጋዊውን አሠራር ወደ ጎን በመተው፣ የንግድ ፈቃድን ያላደሱ፣ ሳያሳድሱ ምርት ወደ ውጭ አገር የላኩና ላልተገባ አገልግሎት ያዋሉ በርካታ ድርጅቶች መገኘታቸውን ገልጾ፣ በድርጅቶቹም ላይ የንግድ ፈቃድ ከማገድ አንስቶ እስከ የመሰረዝ ዕርምጃ መውሰዱ ተገልጿል፡፡

    በተለይም የጫት ምርት የላኪነት ንግድ ሥራ ፈቃድ ኖሯቸው፣ በሕገወጥ መንገድ ፈቃዳቸውን ለሦስተኛ ወገን አሳልፈው የሰጡ 40 ጫት ላኪ ድርጅቶች የንግድ ሥራ ፈቃዳቸው በጊዜያዊነት ታግዷል ተብሏል፡፡

    በሌላ በኩል የጫት ምርት ላኪነት ንግድ ሥራ ፈቃድ ሳያሳድሱ ምርቱን በመላክ ሥራ ላይ የተገኙ 830 የጫት ላኪ ድርጅቶች የንግድ ሥራ ፈቃዳቸው መሰረዙን፣ ሚኒስቴር መሥሪያ ቤቱ አስታውቋል፡፡

    ኢትዮጵያ አምና ወደ ውጭ አገር ከላከችው የውጭ ምርት የጫት ድርሻ 11 በመቶ ሲሆን፣ ይህም እንደ ሰሊጥ ካሉ የቅባት እህሎች ከተገኘው ገቢ የሚልቅ እንደነበር ይታወሳል፡፡

    በተያዘው ዓመት የዘጠኝ ወራት ወደ ውጭ አገር ተልኮ ከተገኘው የ2.07 ቢሊዮን ዶላር ገቢ ጫት 280.6 ሚሊዮን ዶላር አስገኝቷል፡፡ በዘጠኝ ወራት ውስጥ ወደ ውጭ አገር ከተላኩት የምርት ዓይነቶች ከቡናና ከአበባ በመቀጠል ከፍተኛ ገቢ ያስገኘው ጫት መሆኑን፣ የገቢዎች ሚኒስቴር የዘጠኝ ወራት አፈጻጸም ሪፖርት ያሳያል፡፡

    ከጫት ምርት ጋር በተያያዘ የሚደረገው ሕገወጥ ንግድና የኮንትሮባንድ ድርጊት አስከፊ ገጽታ እየተንሰራፋ መምጣቱ፣ ኢትዮጵያ ማግኘት የሚገባትን የውጭ ምንዛሪ ከማሳጣቱም ባሻገር የኢትዮጵያን ሀብት ለጎረቤት አገሮች ሲሳይ በማድረግ በኢኮኖሚው ላይ ከፍተኛ ጉዳት እያስከተለ ይገኛል ተብሏል፡፡

    ችግሩን ከሥር መሠረቱ መፍታት እንዲቻል የንግድና ቀጣናዊ ትስስር ሚኒስቴር ከአገር ውስጥ የሚወጡ ማናቸውንም የጫት ምርት በየጊዜው በመመዝገብ የመላኪያ ፈቃድ ለመስጠት በማሰብ፣ ለአንድ መስኮት አገልግሎት ዝግጅት ማጠናቀቁ ተገልጿል፡፡

    ከግንቦት 18 ቀን 2014 ዓ.ም. አንስቶ ጫት የሚልኩ ድርጅቶች ለግብይት ውል የባንክ መላኪያ ፈቃድ ከመውሰዳቸው አስቀድሞ፣ ለሚኒስቴር መሥሪያ ቤቱ ማስመዝገብ እንደሚገባቸው የንግድና ቀጣናዊ ትስስር ሚኒስቴር አሳስቧል፡፡

    ጫት ከሌሎች ምርቶች የበለጠ ለኢትዮጵያ የውጭ ምንዛሪ ቢያስገኝም፣ ለዘርፉ የተሰጠው ትኩረት ቢሻሻልና ማነቆ የሆነው ኮንትሮባንድ ዕልባት ቢያገኝ ኢትዮጵያ የምታገኘው የውጭ ምንዛሪ ከዚህም የላቀ እንደሚሆን ባለሙያዎች በተደጋጋሚ ይናገራሉ፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች