Sunday, August 7, 2022
ሌሎች ዓምዶች
    - Advertisment -
    - Advertisment -

    ለኢትዮጵያ ሕዝብ የሚያስፈልገው በነፃነት የሚኖርበት ሥርዓት ነው!

    ኢትዮጵያ ውስጥ ለበርካታ ዓመታት የዘለቀው ትልቁ በሽታ የመንግሥት አሠራር ለሕዝብ ግልጽ አለመሆን ነው፡፡ የመንግሥት አሠራር ለሕዝብ ግልጽ መሆን እንዳለበትና ተጠያቂነትም እንዳለበት በሕግ ቢደነግግም፣ ፌዴራል መንግሥቱንም ሆነ ክልላዊ መንግሥታትን የሚመሩ ኃላፊዎች ተግባራዊ ሲያደርጉት አልታየም፡፡ ይልቁንም የመንግሥት አሠራር ድብቅ፣ ለሐሜት የተጋለጠና በሴራ የተጀቦነ ይመስላል፡፡ በዚህም ምክንያት ሕዝብና መንግሥት ሆድና ጀርባ እየሆኑ ከፍተኛ ጉዳቶች አጋጥመዋል፡፡ ኢሕአዴግ ለሦስት አሠርት ያህል በመራት ኢትዮጵያ ውስጥ ግልጽነትና ተጠያቂነት በመጥፋቱ ከፍተኛ ሕዝባዊ ቁጣ ተቀስቅሶ፣ የሕይወት መስዋዕትነት ባስከተለ አመፅ የአስተዳደር ለውጥ ተደርጓል፡፡ ሥርዓተ መንግሥቱ ተናግቶ የሥርዓት ለውጥ ለማከናወን ግፊቱ ቢቀጥል ኖሮ፣ ኢትዮጵያን አሁን ባለችበት ሁኔታ ለማግኘት ያዳግት ነበር፡፡ ያም ሆነ ይህ ሰላማዊ ሽግግር ተደርጎ ጠቅላይ ሚኒስትር ዓብይ አህመድ (ዶ/ር) የሚመሩት አስተዳደር፣ ከመጋቢት 24 ቀን 2010 ዓ.ም. ጀምሮ በሥራ ላይ ይገኛል፡፡ ባለፉት አራት ዓመታት በላይ ኢትዮጵያ የተለያዩ ክስተቶች አጋጥመዋታል፡፡ ለማመን የሚከብዱ በርካታ አዎንታዊ ተግባራት የተከናወኑትን ያህል፣ አገርንና ሕዝብን ከፍተኛ ሥጋት ውስጥ የጣሉ አሳዛኝ ድርጊቶችም ተፈጽመዋል፡፡

    በተደጋጋሚ እንደምንለው ኢትዮጵያ በርካታ ችግሮች ያሉባት አገር ናት፡፡ ከእነዚህ ችግሮች ውስጥ በፍጥነት መውጣት ካልተቻለ ቀውስ ይፈጠራል፡፡ ከ115 ሚሊዮን በላይ ሕዝብ ያላት ኢትዮጵያ ከፍተኛ የሆነ ሥራ አጥነት ያስጨንቃታል፡፡ የኑሮ ውድነቱ እየባሰበት የሕዝቡን ሕይወት እያመሰቃቀለ ነው፡፡ በድርቅና በመፈናቀል ምክንያት ሚሊዮኖች አስቸኳይ ዕርዳታ ይለመንላቸዋል፡፡ ሰፊ ለም መሬትና ከፍተኛ የውኃ ሀብት ቢኖርም አሁንም ግብርናው ኋላቀር ነው፡፡ ደካማ የሆነው የአምራች ዘርፍ ከውጭ የሚመጡ የካፒታል ዕቃዎችንና የምግብ ሸቀጣ ሸቀጦችን መተካት አልቻለም፡፡ የአገሪቱ የወጪና የገቢ ንግድ ሚዛን አሁንም ከፍተኛ ጉድለት አለበት፡፡ ሌሎች በርካታ ችግሮች አሉ፡፡ እነዚህን ችግሮች ለመፍታት ግን መንግሥትም ሆነ የሚመለከታቸው ባለድርሻ አካላት፣ ለጋራ ራዕይና ዓላማ አንድ ላይ መሠለፍ አለባቸው፡፡ ሠልፉን ለማስተካከል ደግሞ የሕግ የበላይነት ትልቁ መሣሪያ ሊሆን ይገባል፡፡ በዚህ ላይ መተማመን እንዲቻል መንግሥት ግልጽነትን፣ ኃላፊነትንና ተጠያቂነትን ከታች እስከ ላይ የማስፈን ግዴታ አለበት፡፡ ተማሪዎች፣ መምህራን፣ አርሶ አደሮች፣ ሠራተኞች፣ ነጋዴዎች፣ ኢንቨስተሮች፣ ፖለቲከኞች፣ ወዘተ ለሕግ የበላይነት መገዛት አለባቸው፡፡ 

    ‹‹በእንቅርት ላይ ጆሮ ደግፍ›› እንዲሉ መፍትሔ ሳያገኙ የቆዩ ችግሮች ላይ በየዕለቱ አዳዲስ ችግሮች እየተጨመሩ፣ የኢትዮጵያ በሽታ ከማገገም ይልቅ እየፀና መሄድ ጀምሯል፡፡ ኢትዮጵያ የዛሬ አራት ዓመት በአዲስ የለውጥ ጎዳና መጓዝ ስትጀምር፣ ለዘመናት የተከማቹ የቤት ሥራዎቿ መቃለል ይጀምራሉ ተብሎ በብዙዎች ተስፋ ተደርጎ ነበር፡፡ ለዓመታት የተንሰራፋው ጭቆና ተወግዶ ዜጎች ለአገራቸው የሚጠበቅባቸውን የሚያበረክቱበት ዕድል ይፈጠራል ተብሎ ይጠበቅ ነበር፡፡ ያለመታደል ሆኖ ለውጡ ለጥቂት ጊዜያት በተስፋ ጎዳና ከተጓዘ በኋላ፣ ጫፍና ጫፍ የረገጡ ሐሳቦች እየተሳሳቡ ጭራሽ የባሰ ሥጋት ውስጥ ተገብቷል፡፡ ለበርካታ ዓመታት ታፍኖና ተዘግቶ የነበረ ቤት ሲከፈት መጥፎ ጠረን ሊኖር ስለሚችል፣ ነገሮችም ቀስ በቀስ ሊስተካክላሉ ይችላሉ በሚል ዕሳቤ እስካሁን ተቆይቷል፡፡ ሆኖም እንደታሰበው ነገሮች ከመስተካከል ይልቅ ጭራሽ እየባሰባቸው ነው፡፡ በመሀላቸው ቅራኔ መፍጠር የማይገባቸው አካላት ሳይቀሩ እርስ በርስ እየተገፋፉ፣ ልዩነትን ይዞ አገርን በጋራ ለማሳደግ ፍላጎት እየጠፋ ነው፡፡ 

    በየትኛውም የታሪክ አጋጣሚ አገር መሠረታዊ ለውጥ ውስጥ ስትገባ፣ ከየአቅጣጫው የተለያዩ ፍላጎቶችና ስሜቶች መንፀባረቃቸው አይቀሬ ነው፡፡ እነዚህ ፍላጎቶችና ስሜቶች እርስ በርስ ከመደጋገፍ በተጨማሪ፣ የእርስ በርስ ጉሽሚያና ፍትጊያም ስለሚያስከትሉ ለውጡ በወጀብ ሊናጥ ይችላል፡፡ የተለያዩ ክስተቶችም የሚያስከትሉት ወጀብ መደናገጥን፣ ሥጋትን፣ ግራ መጋባትንና ተስፋ መቁረጥን ጭምር ሊያመጣ ይችላል፡፡ ነገር ግን ወጀቡን በፅናት በመቋቋም የተስፋ ጭላንጭል የመፍጠር ኃላፊነት፣ ለአገራቸው የሚያስቡ ዜጎች ግዴታ መሆን ነበረበት፡፡ ኢትዮጵያም ከአራት ዓመታት በላይ የተጓዘችበት ለውጥ በርካታ ተስፋ ሰጪ ጅማሬዎች ቢኖሩትም፣ በየአቅጣጫው የሚሰሙ አሳዛኝና ተስፋ አስቆራጭ ክስተቶች እየበረከቱ ነው፡፡ ነገር ግን የአገር ጉዳይ ተስፋ ስለማይቆረጥበት፣ ለማንም አደራ ስለማይባልበትና ስለማይዘናጉበት ሆደ ሰፊ መሆን የግድ ይላል፡፡ ለሥልጣን፣ ለግል ጥቅም፣ ዝና፣ ክብርና ስም ሲባል የሚፈጸሙ አላስፈላጊ ድርጊቶችን ማስወገድ ያስፈልጋል፡፡ ኢትዮጵያ ጠንካራ አገር ሆና ለዜጎች ሰላም፣ ልማት፣ ዴሞክራሲና ፍትሕ በእኩልነት ተደራሽ እንዲሆኑ ተባብሮ መሥራት ይገባል፡፡ የኢትዮጵያ ሕዝብ የመንግሥታዊ ሥልጣንም ሆነ የአገር ሀብት ሉዓላዊ ባለቤት መሆኑን በተግባር ማረጋገጥ የግድ ነው፡፡

    ከአገር ህልውና በላይ የሚቀድም ስለማይኖር የግለሰቦችና የቡድኖች ጩኸት አገር ማደንቆር የለበትም፡፡ ጥቂቶች መድረኩን ተቆጣጥረው አጀንዳ እየፈበረኩ ብዙኃኑን ማስጨነቅ አይኖርባቸውም፡፡ በአሁኑ ጊዜ ጥቂቶች ይጮሃሉ፣ ብዙኃን ግን በዝምታ ተውጠዋል፡፡ አጋጣሚው የተመቻቸላቸው እንዳሻቸው አገርን ሲያምሱ፣ የብዙኃን በአርምሞ ውስጥ መሆን ያሳስባል፡፡ ያለችው አንድ አገር ስለሆነች ለህልውናዋ በፅናት መቆም የግድ መሆን እንዳለበት መግባባት ያስፈልጋል፡፡ ፖለቲከኞችም ሆኑ አክቲቪስቶች፣ ምሁራንም ሆኑ የሃይማኖት መሪዎች፣ እንዲሁም የአገር ጉዳይ ያገባናል የሚሉ ወገኖች በሙሉ ለኢትዮጵያ መፃኢ ዕድል መጨነቅና መጠበብ አለባቸው፡፡ ጥግ ይዞ ማጉረምረም ወይም በሐሳብ መብሰልሰል ፋይዳ የለውም፡፡ ተወደደም ተጠላም የኢትዮጵያ ሕዝብ ዕጣ ፈንታ አንድ ነው፡፡ ይህ ሕዝብ በዘመናት አብሮነቱ የሚጋራቸው በርካታ የጋራ ጉዳዮች አሉት፡፡ ሥነ ልቦናው በጣም የተቀራረበ በመሆኑም አንዱ ያለ ሌላው ሕይወት ይከብደዋል፡፡ ይህንን የቤተሰብ ያህል የተዛመደ ሕዝብ ለማበጣበጥና ወዳልተፈለገ አቅጣጫ ለመግፋት መሞከር አይገባም፡፡

    ለኢትዮጵያ ሰላም ያስፈልጋል፡፡ በማንኛውም መንገድ ጦርነት አቁሞ ሰላም ማስፈን ያስፈልጋል፡፡ ሰላምን እያናጉ ዓላማን ማሳካት የሚፈልጉ ወገኖች ካሉም፣ አሸናፊና ተሸናፊ የሌለበት ትርምስ ውስጥ ነው የሚገቡት፡፡ ይህ ደግሞ ለማንም አይጠቅምም፡፡ ግጭት በመቀስቀስ ሰላማዊ ዜጎችን መግደል፣ ማፈናቀል፣ መዝረፍና የሁሉም ነገር የበላይ ለመሆን መሞከር ውጤቱ ቀውስ ነው፡፡ ለሕግ የበላይነት ባለመገዛት ሥርዓተ አልበኝነት መፍጠርም የማይወጡት አረንቋ ውስጥ ይከታል፡፡ ከትናንት ጉልበተኞች አወዳደቅ ያልተማሩ አዳዲስ ጉልበተኞችም መረዳት ያለባቸው፣ እንደ ከዚህ ቀደሙ የፈለጉትን መፈጸም እንደማይቻል ነው፡፡ የጉልበት መንገድ የሚወስደው ወደ አምባገነንነት ነው፡፡ አምባገነንነት ደግሞ ለዚህ ዘመን የማይመጥን ኋላቀርነት ነው፡፡ ኋላቀርነት በኢትዮጵያ ሕዝብ ላይ ጥሎት ያለፈው ጠባሳ ዛሬም ከእነ ክፋቱና ውርደቱ በጉልህ ይታያል፡፡ አገራቸውንና ሕዝባቸውን የሚወዱ ኢትዮጵያዊያን መገንዘብ ያለባቸው፣ ተመራጩና የሚያዋጣው መንገድ ወደ እኩልነት የሚደረገው ጉዞ ብቻ እንደሆነ ነው፡፡ ሁሉም ኢትዮጵያውያን እኩል የሚሆኑበት ሥርዓት የግንባታው መሠረት ጥብቅና አስተማማኝ እንዲሆን፣ አስፈላጊዎቹን ነገሮች ሁሉ ለሟሟላት መረባረብ የግድ ነው፡፡ ለኢትዮጵያ ሕዝብ የሚያስፈልገው በነፃነት የሚኖርበት ሥርዓት ነው

    በብዛት የተነበቡ ፅሁፎች

    የዩኒቨርሲቲ መምህራን ከደመወዝ ጭማሪና ከዕርከን ዕድገት ጋር በተያያዘ መንግሥትን አስጠነቀቁ

    ‹‹የደመወዝ ጉዳይ የትምህርት ሚኒስቴር ብቻ ሳይሆን የሲቪል ሰርቪስ ኮሚሽንም...

    በዩኒቨርሲቲዎች ነፃ የትምህርት ዕድል ለሚያገኙ የመንግሥት ሠራተኞች የዕድሜ ጣሪያ ተቀመጠ

    የመንግሥት መሥሪያ ቤቶች በከፍተኛ የትምህርት ተቋማት ለሚገኝ ነፃ የትምህርት...

    በደራሼ ልዩ ወረዳ የፀጥታ ኃይሎች በወሰዱት ዕርምጃ 11 ሰዎች ተገደሉ

    በደቡብ ክልል ደራሼ ልዩ ወረዳ የፀጥታ ኃይሎች በወሰዱት ዕርምጃ...
    - Advertisment -

    ትኩስ ፅሁፎች

    በዓለም ጂኦ ፖለቲካ መድረክ የኢትዮጵያ ተፈላጊነት

    የአሜሪካው የውጭ ጉዳይ ሚኒስትር አንቶኒ ብሊንከን በሦስት የአፍሪካ አገሮች...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...

    በውዝግብ የታጀበው የኢትዮጵያ እግር ኳስ ፌዴሬሽን ምርጫ

    ፊፋ ከምርጫው በፊት የሥነ ምግባር ባለሙያ ሊልክ መሆኑ ተሰምቷል የኢትዮጵያ...
    spot_img

    ተዛማጅ ፅሁፎች

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር ሕዝቦችና ለአፍሪካውያን ነፃነትም ተምሳሌት ናት፡፡ የጥንቶቹ ኢትዮጵያውያን አገራቸውን የሚያኮራ ተግባር ፈጽመው ያለፉት፣ ከአገራቸው በፊት የሚቀድም...

    የማንም ሥልጣንና ጥቅም ከኢትዮጵያ አይበልጥም!

    የታላቁ ህዳሴ ግድብ ሦስተኛ ዙር የውኃ ሙሌት በስኬት መጠናቀቁ፣ የኢትዮጵያን የወደፊት ብሩህ ጊዜ አመላካች ነው ቢባል ማጋነን አይሆንም፡፡ ይህ የአፍሪካ ታላቅ ግድብ ፕሮጀክት ዕውን...

    የሴራ ፖለቲካ መረብ ይበጣጠስ!

    ኢትዮጵያ አሁንም ከበርካታ ፈተናዎች ጋር እንደ ተፋጠጠች ነው ያለችው፡፡ በታላቁ የህዳሴ ግድብ ምክንያት ግብፅ በጎረቤት አገሮች አማካይነት ኢትዮጵያ ላይ ጫና ለማሳደር ፍጥነቷን ጨምራ እየተንቀሳቀሰች...